ƆFÃ 3

Ná Paradise Asetena Te Dɛn?

Yehowa maa Adam ne Hawa nneɛma pa pii. Genesis 1:28

Yehowa na ɔbɔɔ Hawa, ɔbea a odi kan no, na ɔde no maa Adam sɛ ne yere.—Genesis 2:21, 22.

Yehowa bɔɔ wɔn no, ɔmaa wɔn adwene ne nipadua a edi mu, na na wonni sintɔ biara.

Ná Eden turo no mu na wɔte—ná ɛyɛ beae a ɛyɛ fɛ a asubɔnten, nnuaba, ne mmoa wɔ.

Yehowa kasa kyerɛɛ wɔn; ɔkyerɛkyerɛɛ wɔn. Sɛ wotiee Onyankopɔn asɛm a, anka wɔbɛtena ase daa wɔ Paradise wɔ asase so.

Onyankopɔn ka kyerɛɛ wɔn sɛ ɛnsɛ sɛ wodi dua bi so aba. Genesis 2:16, 17

Dua a Yehowa ka kyerɛɛ Adam ne Hawa sɛ mma wonni so aba no

Onyankopɔn abɔfo no mu biako tew ne so atua. Wɔfrɛ saa ɔbɔfo bɔne no Satan Ɔbonsam.

Ɔbɔfo bɔne, Satan Ɔbonsam nam ɔwɔ so rekasa kyerɛ Hawa

Yehowa kyerɛɛ Adam ne Hawa dua bi a ɛsow aba wɔ turo no mu na ɔka kyerɛɛ wɔn sɛ sɛ wɔtew bi di a, wobewu.

Ná Satan mpɛ sɛ Adam ne Hawa tie Yehowa. Enti ɔnam ɔwɔ bi so ka kyerɛɛ Hawa sɛ, sɛ odi saa dua no so aba a ɔrenwu, na mmom ɔbɛyɛ te sɛ Onyankopɔn. Nanso, na Satan redi atoro.—Genesis 3:1-5.