Apɔnkɔ Sotefo No Ho Ahintasɛm No A Wohu Nea Ɛkyerɛ

HENA na obetumi ahu nea Adiyisɛm no mu apɔnkɔ sotefo ho ahintasɛm no kyerɛ? Wɔfrɛ Yehowa Nyankopɔn sɛ “nea oyi ahintasɛm adi” wɔ Bible mu wɔ Daniel 2:47. Esiane sɛ ɔno na ɔma wɔkyerɛw Bible no a apɔnkɔ sotefo no ho anisoadehu no ka ho nti, ɔno na obetumi ama yɛanya mmuae a yehia no. Enti, ɛdenam n’Asɛm a wada no adi no mu a yɛhwehwɛ so no. yetumi hu nea apɔnkɔ ahorow no ne wɔn sotefo no kyerɛ.​—Amos 3:7; 2 Timoteo 3:16; 2 Petro 1:21.

Nkyekyem abiɛsa a edi kan wɔ Adiyisɛm no mu no ma yɛn biribi a ɛboa ma yehu nea ahintasɛm no kyerɛ. Ɛkyerɛ sɛ anisoadehu ahorow yi fa daakye nsɛm a ebesisi ho, nea ɛyɛ daakye ma afe 96 Y.B. a ɛyɛ bere a ɔsomafo Yohane huu eyinom nyinaa na ɔkyerɛw too hɔ no. Eyi ne n’asɛm a ɛwɔ Adiyisɛm 1:10 no hyia sɛ nneɛma a ohui wɔ anisoadehu ahorow yi mu no bɛba bere a “Awurade da no” afi ase no akyi.​—Fa toto 1 Korintofo 1:8; 5:5 ho.

Bere a eyi wɔ yɛn adwenem no, yɛbɛhwehwɛ apɔnkɔ no ne wɔn sotefo ho asɛm no mu. Nea edi kan no ɛho hia sɛ yebenya ntease a ɛteɛ wɔ ɔpɔnkɔ fitaa no ne ne sotefo no ho. Ɛno akyi no apɔnkɔ sotefo afoforo no ho ntease bɛba.

Woahwehwɛ Nkyerɛkyerɛmu Ahorow No Mu

Yehui wɔ asɛm a edi kan no mu sɛ ɔpɔnkɔ fitaa no ne ne sotefo no ho nkyerɛase biako ne sɛ wogyina hɔ ma ‘nkonim a asɛmpa no anaasɛ ahempɔnsɛmdi di.’ Nanso wɔnsakraa wiase no nyinaa mmaa asɛmpa a ɛfa Kristo ne Onyankopɔn atirimpɔw a ɛfa ne ho no ho mu. Na ɛnyɛ nea ahempɔnsɛmdi adi nkonim nso. Mmom no, ɛyɛ nea ɛrekɔ fam, emu repaapae wɔ afeha yi mu.

Na nkyerɛase a ɛne sɛ ɔpɔnkɔ fitaa no gyina hɔ ma nkonim a asɛmpa no di ne kronkron a gyidi no yɛ wɔ afeha a edi kan no mu no nso ɛ? Eyi bu ani gu nokwasɛm a ɛyɛ sɛ na anisoadehu no fa nneɛma a ɛbɛba daakye ho no so. Na esiane sɛ Yohane kyerɛw anisoadehu no sɛ deduani wɔ nnommumfa mu wɔ Patmo supɔw no so wɔ yɛn Bere Yi afe 96 mu nti, ɛrentumi nyɛ nea egyina hɔ ma biribi a ɛfa afeha a edi kan no ho.

Nkyerɛase foforo nso ne sɛ ɛnyɛ onipa Kristo no na ɔpɔnkɔ fitaa no da no adi na mmom ɔkwan a ɔfaa so, ne sɛ n’Ahenni no ‘wɔ yɛn mu’ a ɛkyerɛ yɛn komam. Nanso ɔkwan a Yesu Kristo ne Kristosom faa so no nyɛ nea efii ase wɔ bere a wɔkyerɛw Adiyisɛm no akyi. Mmom no, na saa kwan yi ada adi kɛse dedaw wɔ afeha a edi kan Kristofo no mu ansa na Yohane rekyerɛw.

Afei nso bere a Yesu kae sɛ “Onyankopɔn ahenni no, mo mu na ɛwɔ” no, na ɔrema Farisifo nyaatwomfo no mmuae wɔ asɛm bi a wobisae ho. Nã ɛnyɛ nea Yesu akyidifo anokwafo no na ɔreka akyerɛ wɔn sɛ Ahenni no yɛ biribi ‘wɔ wɔn mu’ a wɔtee ase sɛ ɛwɔ wɔn koma mu. Mmom no na ɔreka akyerɛ Farisifo a wonnye nni no sɛ ɔno Yesu a ɔyɛ Onyankopɔn daakye Ahenni no nanmusini no wɔ wɔn mfinimfini saa bere no.​—Luka 17:21; hwɛ The Jerusalem Bible ne The New English Bible mu nso.

Na adwene a ɛne sɛ nea ɔte ɔpɔnkɔ fitaa so no ne Antikristo no nso ɛ? Bible no nka wɔ baabiara sɛ Antikristo no bɛkɔ n’anim saa a ɛbɛma wɔatumi aka wɔ ne ho sɛ “ofi adi a ɔredi nkonim na wakodi nkonim” te sɛ nea wɔkae wɔ ɔpɔnkɔ fitaa no sotefo ho no. (Adiyisɛm 6:2) Ɛda adi pefee sɛ nea ɔte ɔpɔnkɔ fitaa no so biara no befi akodi nkonim koraa. Ne nkonimdi no nyɛ nea ɛremmam. Ɔbɛsɛe n’atamfo nyinaa.

Bible Mu Nsɛm Boa Ma Wohu

“Nea oyi ahintasɛm adi” no kyerɛ nea ɔpɔnkɔ fitaa sotefo no yɛ wɔ ɔkwan a mfomso biara nni ho so akyiri yi wɔ anisoadehu ahorow koro no ara mu. Wɔ Adiyisɛm 19:11-16 no wohu ɔpɔnkɔ fitaa bio a afei de wɔkyerɛ ne sotefo no pefee.

Nokwasɛm a ɛyɛ sɛ wohu ɔpɔnkɔ fitaa mprenu wɔ nkɔmhyɛ anisoadehu yi mu no kyerɛ sɛ ɛyɛ ɔpɔnkɔ koro no ara ne sɛ wɔreda ne sotefo no nnwuma ahorow adi. Wɔbɔ ne sotefo no din wɔ nea edi akyiri no mu. Wɔfrɛ no “Gyidi ne Ɔnokwafo,” “Onyankopɔn Asɛm,” ne “Ahene mu Hene ne awuranom mu Awurade.”

Akyinnye biara nni ho sɛ saa din ahorow no ma wohu nea ɔte ɔpɔnkɔ fitaa so no. Ɛnyɛ obiara sɛ Awurade Yesu Kristo ankasa! (Fa toto Adiyisɛm 17:14 ho.) Nanso ɛyɛ n’asetra bere bɛn mu? Ɛsɛ sɛ ɛyɛ bere a wɔde Adiyisɛm no mae wɔ afeha a edi kan awiei mu hɔ no baabi. Hyɛ no nsow nso sɛ afei wɔma no ahemmotiri. Enti wɔ daakye bere bi mu no na ɛsɛ sɛ Yesu Kristo fi ase di tumi sɛ Ɔhene, anaasɛ Sodifo. Na wɔ saa dibea no mu no wɔyɛ ne ho mfonini nso sɛ ɔkofofo a okura ta a obefi adi ‘akodi nkonim, na odi nkonim.’

Nea ɛkyerɛ nso sɛ na eyi bɛyɛ daakye ne nokwasɛm yi: Bere a wɔde adiyisɛm mu anisoadehu mae no na mfe bɛboro 60 atwam fi bere a Yesu wiee n’asase so asetra ma wonyan no fii awufo mu ma ɔforo kɔɔ soro no. Bere a Yesu san kɔɔ soro no wosee no sɛ ɔntwɛn wɔ Onyankopɔn nsa nifa kosi saa daakye bere a wɔde n’atamfo bɛyɛ “ne nan ase ntiaso” no.​—Hebrifo 10:12, 13.

Ɔpɔnkɔ No So Tra No Fi Ase

Enti na ɔpɔnkɔ fitaa no so tra no befi ase wɔ daakye bere bi a wɔde Yesu Kristo besi ahengua so sɛ Onyankopɔn Ahenni no soro Hene mu. Onyankopɔn de ahyɛde yi bɛsoma no saa bere no sɛ: “Di hene w’atamfo mfinimfini.” (Dwom 110:2) Nanso bere bɛn na eyi ba?

Wɔka Yesu Kristo a wɔbɔ no abotiri sɛ ɔsoro Hene no ho asɛm wɔ Dwom 45:3-7. Afei wɔ Hebrifo 1:8, 9 no, ɔsomafo Paulo fa asɛm fi dwom yi mu ka na ɔde nkyekyem 6 ne 7 di dwuma wɔ Onyankopɔn Ba, Yesu Kristo ho. Eyi ho nsɛm pii ne Kyerɛwnsɛm mu adanse a Yehowa Adansefo atintim kyere sɛ wɔde Yesu Kristo sii ahengua so wɔ soro wɔ Amanaman Mmere, “amanaman mmere a wɔahyɛ” no awiei wɔ afe 1914 mu.​—Luka 21:24, NW.a

Enti nkyerɛase biara a ɛde apɔnkɔ no so tra di afe 1914 anim no rentumi nyɛ nea ɛteɛ. Afei nso esiane sɛ ɔpɔnkɔ fitaa no sotefo no na odi kan nti, apɔnkɔ afoforo no ne wɔn sotefo a wodi akyi no begyina hɔ ama nsɛm a ebesisi bere a wafi ase atra ne so no, anaasɛ ɛno akyi bere tiaa bi. Enti ɛsɛ sɛ apɔnkɔ sotefo baanan no apɔnkɔ so tra no ba wɔ “awiei bere” wɔ 1914 no mfiase ne ɛno akyi. Efi saa bere no na wɔahu sɛ “nna a edi akyiri” no ada adi.​—Daniel 12:4; 2 Timoteo 3:1-5, 13.

Apɔnkɔ Afoforo No Ne Ɛsotefo

Ɔpɔnkɔ a ɔto so abien no yɛ “kɔkɔɔ.” (Adiyisɛm 6:3, 4) Wɔmaa ne sotefo no “ahoɔden sɛ ommeyi asomdwoe mfi asase so na wonkunkum wɔn ho wɔn ho.” Wɔmaa no “nkrante kɛse bi.” Ɛbɛdaa adi sɛ eyi yɛ nokware bere a wofii ɔko a na ɛsen biara wɔ adesamma abakɔsɛm nyinaa mu, wiase nyinaa ko a edi kan, ase wɔ 1914 mu no. Wɔfrɛɛ no Ɔko Kɛse saa bere no. Mfe 21 pɛ akyi no, Wiase Ko II fii ase na ɛsɛee ade sen Wiase Ko I mpo. Ɔko akɔ so bere nyinaa fi saa bere no. Sɛ wɔka bom a, ɔko akunkum nnipa ɔpepem ɔha fi 1914.

Ɔpɔnkɔ a ɔto so abiɛsa no yɛ tuntum na ne sotefo no kura nsenia ne nsam. (Adiyisɛm 6:5, 6) Ɛnne bi teɛm sɛ, ebegye da mũ nyinaa adwuma akatua na wɔde atɔ awi susukora anaasɛ aburow a ne bo nyɛ den no susukora abiɛsa. Eyi kyerɛkyerɛ aduankɔm a emu bɛyɛ den asen bere a atwam no mu ma ɛfata. Ada adi sɛ ɛno yɛ nokware fi 1914. Bere a Wiase Ko I pae gui pɛ na aduan bo kɔɔ soro. Ɔkɔm kunkum ɔpepem pii. Aduankɔm akɔ so fi saa bere no a ennyaee da. Wobu akontaa sɛ mprempren nnipa bɛyɛ ɔpepem 450 reyɛ adi kɔm buroburo, na bɛyɛ ɔpepepem biako nnya aduan a ɛdɔɔso nni. Efi bere kɔ bere mu no aduankɔm a emu yɛ den ne nnipa pii a wowuwu te sɛ nea wɔbɔɔ ho amanneɛ nnansa yi wɔ Ethiopia no si sɛnea tebea no yɛ hu no so dua.

Ɛdefa ɔpɔnkɔ a ɔto so anan no ho no, yehu sɛ ɔyɛ “nsõnso” a ɛte sɛ nea ɔyare. Wɔfrɛ nea ɔte ne so no “Owu.” (Adiyisɛm 6:7, 8) Ɛyɛ nnipa pii a wɔawuwu fi 1914 a nneɛma te sɛ aduankɔm, akodi ne basabasayɛ, ne ɔyaredɔm ahorow na ɛma wowuwui no ho sɛnkyerɛnne a ɛfata. Spanish Influɛnsa a ɛbaa wiase nyinaa wɔ Wiase Ko I akyi no kunkum nnipa ɔpepem 20. Mprempren koma-yare, akisikuru ne nyarewa afoforo kunkum nnipa pii.

Wohu nsɛm a ebesisi a wɔde apɔnkɔ ne wɔn sotefo yi yɛɛ ho sɛnkyerɛnne no wɔ nkɔmhyɛ bi a ɛte saa ara a Yesu de mae a ɛfa yɛn bere yi ho nso mu. Ɔkae sɛ wɔ “wiase awiei” a yɛte mu mprempren no mu no, wiase nyinaa akodi bɛba efisɛ ‘ɔman bɛsɔre ɔman so ne ahenni ahenni so.’ Ɔkaa amumɔyɛ a ɛbɛdɔɔso, ne ‘ɔkɔm ne ɔyaredɔm a ɛbɛba mmeaemmeae’ ho asɛm siei.​—Mateo 24:3-12; Luka 21:10, 11.

So Na Ɔpɔnkɔ A Ɔto So Anum Bi Wɔ Hɔ?

Adiyisɛm 6:8 kenkan sɛ: “Na mihui, na hwɛ, ɔpɔnkɔ nsõnso bi ni, na nea ɔte no so no din de Owu, na asaman di n’akyi.” Esiane eyi nti ebinom ka sɛ esiane sɛ nnipa baanan a wodi kan no tete apɔnkɔ so nti, so ɛrenyɛ sɛ na nea ɔto so anum no nso te ɔpɔnkɔ so?

Bible no nka saa. Wɔ Hela kyerɛwsɛm no mu no asɛmfua ma “ɔpɔnkɔ” no mpue wɔ Adiyisɛm 6:8 wɔ nea ɛfa asaman ho no mu. Enti, Bible nkyerɛase ahorow pii mfa asɛmfua “ɔpɔnkɔ” no nka nea ɔto so anum yi ho. Enti wubetumi ahu pefee sɛ na asaman anaa Hades a ɛyɛ adesamma adamoa no redi apɔnkɔ abiɛsa a wodi kan ne wɔn sotefo no akyi a ɔreboaboa wɔn awufo no nyinaa ano.

Ɔkwan Bɛn So Na Anisoadehu No Ka Wo?

Sɛ́ wobɛtra ase wɔ bere a anisoadehu a ɛfa apɔnkɔ sotefo baanan a wɔwɔ Adiyisɛm no mu ho no renya ne mmamu a ɛyɛ nwonwa mu no yɛ osuahu a ɛyɛ anigye ampa. Nanso ɛyɛ bere a anibere wom a ɛhwehwɛ sɛ obi de hwehwɛ ne ho mu. Dɛn ntia? Efisɛ sɛnkyerɛnne kwan so apɔnkɔ so tra yi ka obiara a ɔwɔ asase so. Yiw, ɛfa wo ne w’adɔfo nyinaa ho. Ɔkwan bɛn so?

Asemmisa yi ma asɛm no fã bi a anibere wom sɔre a wɔama ho mmuae wɔ Watchtower, January 15, 1986 de no mu. “Sɛnea Wɔn Apɔnkɔ So Tra no Kã Wo.” Mma ɛho mmuae a ɛkanyan adwene no mpa wo ti so.

[Ase hɔ asɛm]

[Kratafa 5 mfoni]

1914​—“Ahene mu Hene” no tra ne pɔnkɔ fitaa no so

[Kratafa 7 mfoni]

Efi 1914 no, asaman anaa Hades asie owufo pii wɔ Ɔko, Aduankɔm ne Ɔyaredɔm apɔnkɔ sotefo no ba no mu