Nsɛm No Mu Nhumu

“Ɛnyɛ Ohu Mu”

Nnansa yi nyansahu mu nhwehwɛmu asi so dua sɛ Turin Nkataho no yɛ afeha 14 mu atoro ade bi. Nanso, sɛnea The New York Times bɔ amanneɛ no, “wɔhyɛɛ Katolekfo nkuran sɛ wɔnkɔ so wɔ wɔn obu a wɔde ma nkataho no sɛ Kristo honi mfonini, na ɛda so ara tumi yɛ anwonwade no mu.” Anastasio Ballestrero a ɔyɛ Turin sɔfo panyin no kyerɛe sɛ: “Ɛsɛ sɛ wɔkora Yesu Kristo honi nkanyan tumi soronko no so.”

Dɛn na eyi kyerɛ? Ɛkyerɛ sɛ ɛwom sɛ asɔre no agye atom sɛ obi honi a nkekae wom wɔ nkataho no mu no nyɛ Yesu Kristo de de, nanso ne nyinaa akyi no ɛsɛ sɛ Katolekfo anokwafo kɔ so bu no te sɛ nea ɛyɛ Kristo de na enti ɛyɛ kronkron. Dɛn ntia? Sɛnea Adam Otterbein a ɔyɛ Roman Katolek sɔfo a ɔhwɛ Nkataho Kronkron Kuw no so no kyerɛ no, nnekae ahorow te sɛ nkataho no betumi aboa gyidifo ma wɔde nidi ama onii a ohoni no gyina hɔ ma no no.

Ɛnyɛ nwonwa sɛ, wɔ sɛnea ɛnyɛ nokware no nyinaa akyi no, nkataho no bɛkɔ so ayɛ gyidi ho sɛnkyerɛnne a tumi wom ama Katolek Asɔre no. The New York Times se: “Ahoni, mfonini ahorow ne nea ɛkeka ho . . . wɔ obu kɛse gyinabea wɔ Katolekfo nneyɛe ahorow mu.”

So Bible no boa ahoni a wɔde di dwuma wɔ ɔsom mu? Dabi! Onyankopɔn Asɛm ka pefee sɛ: “Munguan abosonsom!” (1 Korintofo 10:14; fa toto Exodus 20:4-6 ho.) Wotu Kristofo fo sɛ wɔnsom Onyankopɔn “honhom ne nokware mu,” ɛnyɛ denam ohoni anaa nnekae bi mmoa so. (Yohane 4:24) Sɛ́ nea ɛfata no, Paulo kyerɛwee sɛ nokware Kristofo ‘nam gyidi mu, na ɛnyɛ ohu mu.’​—2 Korintofo 5:7.

Nsusuwii a Mfomso Wom

Star Tribune bɔ amanneɛ sɛ bere a wɔreyɛ ade ma ɛne nea ɛda adi sɛ ɛyɛ Bible gyinapɛn ahorow a wɔgow mu wɔ nyamesomfo mu a ɛrekɔ so no ahyia no, “U.S. nyamekyerɛfo a wɔn dodow rekɔ anim reka sɛ Kristofo asɔre ahorow hia ɔbarima ne ɔbea nna mu anidan bi.” Saa Minnesota atesɛm krataa yi fa adwene ahorow a atitiriw te sɛ John Spong a ɔyɛ Amerika Episcopal Asɔre no sɔfo panyin a ɔwɔ Newark, ne James Nelson a ɔyɛ ɔbarima ne ɔbea nna ho nneyɛe ho ɔbenfo bi a ɔwɔ United Theological Seminary wɔ New Brighton akyerɛ no ka asɛm. Krataa no kyerɛ sɛ eyinom ne nyamekyerɛfo afoforo te nka sɛ ɛsɛ sɛ asɔre no “hyira mmarima a wɔne wɔn ho da wɔ asɔre guasodeyɛ ahorow mu, na wogye wɔn ho a wɔde ama wɔn ho wɔn ho wɔ ɔdɔ ne abrabɔ mu abusuabɔ bi mu no tom; . . . sɛ mmerante ne mmabaa bi a wɔasi wɔn asiwa tra ase ɔdɔ mu, wɔ abusuabɔ a wɔde wɔn ho ama wɔn ho wɔn ho mu a, ɛsɛ sɛ wɔde asɔre no nhyira ma wɔn, ɛwom sɛ wɔnwaree de”; ne “ɛsɛ sɛ wɔpene so bere a mpanyimfo de wɔn ho hyɛ nna mu wɔ akwan a asɛyɛde wom so mu no ɛwom sɛ wɔnwaree wɔn ho wɔn ho de.” Dɛn nti na saa nyamekyerɛfo yi gye di sɛ nsakrae ahorow a ɛtete saa no ho hia? Spong kyerɛ sɛ sɛ wɔanhyira nkabom a ɛtete saa no so a, na “yɛrepene ahohwibra asetra so.”

Nanso, nea Spong ne afoforo no ntumi nhu ne sɛ ɛyɛ nkabom a ɛtete saa a asɔre no hyira so no ara na ɛma asɔre ahorow no pene “ahohwibra asetra” so. Onyankopɔn Asɛm no mu da hɔ fann. “Nguaman . . . ne awaresɛefo . . . ne mmarima a wɔne wɔn ho da . . . rennya Onyankopɔn Ahenni.” Ɛnyɛ sɛ wɔhyɛ Kristo akyidifo sɛ ‘wɔne’ wɔn a wɔte saa no “mmɔ” nko, na mmom ‘wonnyi ɔbɔnefo no mfi wɔn mu’ nso.​—1 Korintofo 5:11, 13; 6:9-11.

Ahiade Kɛse Bi

Afe yi, Britania Free Church Federal Council (Asɔre Ahorow a Wɔde Wɔn ho Bagua) no akontaabu amanneɛbɔ da n’asɔre ahorow 15 a wɔaka abom no so a atew bio adi. Church Times a ɛyɛ England Asɔre atesɛm krataa bi no bɔ amanneɛ sɛ wɔ nea edi kan mu no, emufo so atew aba nea ennu ɔpepem biako. Dɛn ntia? Ɛwom sɛ asɔre ahorow no kyerɛ sɛ wɔde wɔn ho ama “dodow pii . . . a wɔn ahiade kɛse ne ogye” no de, nanso asɛm no se “Asɔre Ahorow a Wɔde Wɔn ho no akɔ so de bere ne ahoɔden pii ayɛ . . . asetra mu nneɛma.” Sɛnea Church Times kyerɛ no, “sɛ Asɔre ahorow no so atew a, ɛnyɛ sɛ wɔn afe afe nneɛma a wɔtontɔn no adi huammɔ anaasɛ nnipa nkɔ wɔn agodi ahorow no ase: ɛte saa efisɛ wɔmmfaa wɔn ogye ɔsom adwuma no aniberesɛm sɛnea ɛfata.”

Nyamesom akannifo a na wɔwɔ hɔ Yesu bere so no nso ammfa wɔn som adwuma no aniberesɛm. Yesu kasa tiaa wɔn ma ɛfatae sɛ wɔde wɔn atetesɛm ‘asɛe Onyankopɔn asɛm.’ Ɔkae sɛ wɔyɛ nyaatwomfo a ‘wɔde wɔn anofafa na edi Onyankopɔn ni na wɔn koma de, atwe afi ne ho kɔ akyirikyiri.’​—Marko 7:6, 7, 13.

Nanso, Yehowa Nyankopɔn nokware asomfo de wɔn ho ama “asɛm no som,” na wodi asomafo a “wɔannyae Yesu Kristo ho asɛmpa no ka ne kyerɛkyerɛ . . . da biara” no nhwɛso akyi. Wɔ nokware Kristofo fam no, saa adwuma yi ho hia kɛse.​—Asomafo no Nnwuma 5:42; 6:4; Mateo 28:19, 20.