“Nea Ɔtew N’anim Ma No Na Onyankopɔn Dɔ No”

YEHOWA nipasu da ayamye adi. Nokwasɛm ne sɛ, Bible ka sɛ ɔno ne “akyɛde pa nyinaa ne adekyɛde a ɛyɛ pɛ nyinaa” Mafo. (Yakobo 1:17) Sɛ nhwɛso no, susuw nneɛma a Onyankopɔn bɔe no ho. Ɔyɛɛ aduan a ɛyɛ dɛ, ɛnyɛ nea ɛyɛ toyow; nhwiren a ɛyɛ fɛ, ɛnyɛ nea ɛyɛ tan; owitɔe a ɛyɛ anika, ɛnyɛ nea ɛnyɛ fɛ. Yiw, Yehowa adebɔ nyinaa di adanse sɛ ɔwɔ dɔ ne ayamye. (Dwom 19:1, 2; 139:14) Afei nso, Yehowa yɛ Ɔdemafo a ɔtew n’anim. N’ani gye sɛ ɔbɛyɛ nneɛma pa ama n’asomfo.—Dwom 84:11; 149:4.

Wɔmaa Israelfo no ahyɛde sɛ wɔnna Onyankopɔn ayamye no bi adi bere a wɔne wɔn mfɛfo redi nsɛm no. Mose ka kyerɛɛ wɔn sɛ: “Mpirim wo koma, na mmua wo nsa ano nhyɛ wo nua hiani . . . Yi wo yam ma no, na mma ɛnnyɛ wo koma ahi sɛ wobɛma no.” (Deuteronomium 15:7, 10) Esiane sɛ na ɛsɛ sɛ Israelfo fi wɔn komam ma nti, na ɛsɛ sɛ wɔn ani gye sɛ wobeyi ayamye adi akyerɛ afoforo.

Wɔmaa Kristofo nso ahyɛde a ɛte saa ara. Nokwarem no, Yesu kae sɛ “ɔma mu wɔ nhyira.” (Asomafo no Nnwuma 20:35) Yesu asuafo no yɛɛ nhwɛso pa wɔ animtew mu a wofi mae mu. Sɛ mfatoho no, Bible bɔ amanneɛ wɔ wɔn a wɔbɛyɛɛ gyidifo wɔ Yerusalem no ho sɛ “wɔtɔn wɔn ahonyade ne wɔn nneɛma, na wɔkyɛɛ mu maa wɔn nyinaa, sɛnea ehia obiara.”—Asomafo no Nnwuma 2:44, 45.

Nanso akyiri yi, Yudeafo ayamyefo yi bɛyɛɛ ahiafo. Bible no nka dekode pɔtee a ɛma wɔkɔɔ saa tebea no mu. Nhomanimfo binom ka sɛ ebefi ɔkɔm a wɔkaa ho asɛm wɔ Asomafo no Nnwuma 11:28, 29 no. Ɛmfa ho nea efi biara no, na Yudeafo Kristofo no wɔ ahokyere mu, na na Paulo pɛ sɛ ɔhwɛ ma wɔn nsa ka nea wohia. Ɔkwan bɛn so na ɔbɛfa ayɛ saa?

Wogyigye Ntoboa Kɔma Ahiafo No

Paulo too nsa frɛɛ asafo ahorow kɔkaa Makedonia nohoa sɛ wɔmmɛboa, na ɔyɛɛ nhyehyɛe ma wogyigyee ntoboa de kɔmaa Kristofo a na wɔwɔ Yudea a na ohia aka wɔn no. Paulo kyerɛw Korintofo no sɛ: “Sɛnea mehyehyɛe Galatia asafo [ahorow] mu no, mo nso monyɛ saa ara. Daa nnawɔtwe mu da a edi kan no, mo mu biara mfa nea ebesi no yiye ama wanya no nsie.”a—1 Korintofo 16:1, 2.

Paulo pɛe sɛ anka wɔde saa sika no kɔma anuanom a wɔwɔ Yerusalem no ntɛm, nanso Korintofo no anni Paulo akwankyerɛ no ho dwuma ntɛm. Dɛn ntia? Ná nea ato wɔn nuanom Yudeafo no mfa wɔn ho anaa? Dabi, na Paulo nim Korintofo no sɛ “[wɔboro] so ade nyinaa mu, gyidi ne ɔkasa ne nimdeɛ ne mmɔdenbɔ nyinaa” mu. (2 Korintofo 8:7) Ebia na wɔn ani abere redi nsɛm bi a Paulo kaa ho asɛm wɔ ne krataa a edi kan a ɔkyerɛw kɔmaa wɔn no mu ho dwuma. Nanso na tebea a ɛwɔ Yerusalem saa bere no gye ntɛmpɛ. Enti Paulo kaa tebea no ho asɛm wɔ ne krataa a ɛto so abien a ɔde kɔmaa Korintofo no mu.

Ayamye Ho Nkuranhyɛ

Nea edi kan no, Paulo kaa Makedoniafo a wɔdaa nhwɛso pa adi wɔ mmoa a wɔde kɔmae no mu ho asɛm kyerɛɛ Korintofo no. Paulo kyerɛwee sɛ: “Wɔn ahohia sɔhwɛ kɛse mu [ne] wɔn anigye mmoroso ne wɔn hia bebrebe mu mpo, woyii wɔn ayamye kɛse adi kyerɛe.” Ná ɛho nhia sɛ wɔhyɛ Makedoniafo no. Mmom no, Paulo kae sɛ “wɔde wɔn ankasa pɛ . . . na wɔkotɔ srɛɛ yɛn pii sɛ yennye ɔsom a wɔsom ahotefo no mu dom.” Nea ɛma Makedoniafo no ayamye no da nsow koraa ne sɛ na wɔn ankasa wɔ “hia bebrebe” mu.—2 Korintofo 8:2-4.

Bere a Paulo rekamfo Makedoniafo no, so na ɔreyɛ ama Korintofo no ne wɔn apem so? Ɛnte saa koraa, efisɛ na onim sɛ ɛno nyɛ ɔkwampa a wɔfa so kanyan afoforo. (Galatifo 6:4) Afei nso na onim sɛ ɛho nhia sɛ wɔhyɛ Korintofo no aniwu ansa na wɔayɛ nea ɛfata. Mmom no, na ɔwɔ ahotoso sɛ Korintofo no dɔ wɔn nuanom Yudeafo no paa, na na wɔwɔ ɔpɛ sɛ wobeyi ntoboa de aboa wɔn. Ɔka kyerɛɛ wɔn sɛ: “Afe ni [a] ɛnyɛ ɔyɛ nko na mufii ase yɛe, na mmom munyaa ho pɛ nso.” (2 Korintofo 8:10) Asɛm no ne sɛ na Korintofo no ankasa bɔ mmoa a wɔde ma ahiafo no mu mmɔden wɔ akwan bi so. Paulo ka kyerɛɛ wɔn sɛ: “Minim ɛho koma a mowɔ a mede mehoahoa me ho mekyerɛ Makedoniafo,” na ɔde kaa ho sɛ: “Mo mmɔdenbɔ no akɔkanyan bebree nso.” (2 Korintofo 9:2; yɛn na yɛasi ɔfã bi so dua no.) Nanso, afei de na ɛho abehia sɛ Korintofo no de nneyɛe ka wɔn mmɔdenbɔ ne ɔpɛ a wɔwɔ no ho.

Enti Paulo ka kyerɛɛ wɔn sɛ: “Sɛnea obiara asusuw ne komam no, ɔmma, ɛnyɛ amemmenemfe anaa ɔhyɛ mu; efisɛ nea ɔtew n’anim ma no na Onyankopɔn dɔ no.” (2 Korintofo 9:7) Enti na ɛnyɛ Paulo adwene ne sɛ ɔbɛhyɛ Korintofo no, efisɛ sɛ wɔhyɛ obi a, ontumi ntew n’anim mma. Nneɛma nyinaa di adanse sɛ Paulo faa no sɛ wɔwɔ adwempa dedaw, a wɔn mu biara asusuw ho dedaw sɛ ɔbɛma. Nea ɛka ho bio no, Paulo ka kyerɛɛ wɔn sɛ: “Sɛ koma a ɛpɛ wɔ hɔ a, ɛsɔ ani, sɛnea onii no wɔ ade, na ɛnyɛ sɛnea onni.” (2 Korintofo 8:12) Yiw, sɛ ɔpɛ no wɔ hɔ—sɛ ɔdɔ kanyan obi—a, nea ɔbɛma biara no, ɛmfa ho sɛ ebia esua wɔ nnipa ani so no, ɛbɛsɔ Nyankopɔn ani.—Fa toto Luka 21:1-4 ho.

Wɔn a Wɔtew Wɔn Anim Ma Nnɛ

Mmoa a wɔde kɔmaa Yudeafo Kristofo no yɛ nhwɛso fɛfɛ ma yɛn bere yi. Yehowa Adansefo reyɛ wiase nyinaa asɛnka ɔsatu bi de ama ɔpepem pii a honhom fam kɔm atwitware wɔn, aduan. (Yesaia 65:13, 14) Wɔyɛ eyi de di Yesu ahyɛde yi so: “Enti monkɔ nkɔyɛ amanaman nyinaa m’asuafo. Mommɔ wɔn asu . . . na monkyerɛkyerɛ wɔn sɛ wonni nea mahyɛ mo nyinaa so.”—Mateo 28:19, 20.

Saa ahyɛde yi sodi nyɛ mmerɛw. Ɛhwehwɛ sɛ wonya asɛmpatrɛwfo atrae ahorow ne baa dwumadibea bɛboro ɔha wɔ wiase nyinaa, na wɔyɛ ho adwuma. Ɛhwehwɛ nso sɛ wosisi Ahenni Asa ne Nhyiam Asa ahorow na ama Yehowa asomfo anya baabi a ɛfata ahyiam de ahyɛ wɔn ho wɔn ho nkuran. (Hebrifo 10:24, 25) Ɛtɔ mmere bi nso a, Yehowa Adansefo de mmoa kɔma nkurɔfo a wɔtete mmeae a asiane bi asi hɔ.

Afei nso susuw sika kɛse a egye ansa na wɔatumi atintim nhoma horow no ho hwɛ. Sɛ wɔkyekyem pɛpɛɛpɛ a, dapɛn biara, wotintim Ɔwɛn-Aban mfuamfua bɛboro 22,000,000 anaa Nyan! mfuamfua bɛyɛ 20,000,000. Honhom fam aduan a daa wɔde ma yi akyi no, wɔyɛ nhoma, nhomawa, kasɛt, ne video kasɛt ɔpepem pii afe biara.

Ɛhe na wonya sika de yɛ nnwuma yi nyinaa? Efi ntoboa a nkurɔfo fi wɔn pɛ mu yi mu. Wonyi mfa nhwehwɛ din anaa emfi pɛsɛmenkominya mu, na mmom woyi de boa nokware som. Enti adema a ɛte saa de anigye a Onyankopɔn nhyira ka ho brɛ ɔdemafo no. (Malaki 3:10; Mateo 6:1-4) Mmofra a wɔwɔ Yehowa Adansefo mu mpo yi wɔn yam tew wɔn anim ma. Sɛ nhwɛso no, bere a Allison a wadi mfe anan no tee sɛ ahum bi asɛe United States baabi no, ɔde $2 kɔboae. Ɔkyerɛwee sɛ: “Sika a mewɔ da me foto mu nyinaa ni. Minim sɛ mmofra no hweree nneɛma a wɔde di agoru, wɔn nhoma ne wɔn abaduaba nyinaa. Mubetumi de sika yi atɔ nhoma ama abeawa ketewa a ɔne me bɔ tipɛn.” Maclean a wadi mfe awotwe no kyerɛwee sɛ ɛyɛ no anigye sɛ ahum no ankum onua biara. Ɔde kaa ho sɛ: “Minyaa $17 fii nnade bi a me ne me papa tɔnee mu. Anka mede me sika no rekɔtɔ biribi, nanso mesan susuw anuanom no ho.”—Hwɛ atifi hɔ adaka mu asɛm no nso mu.

Nokwarem no, Yehowa koma tɔ ne yam bere a ohu sɛ mmofra ne mpanyin de N’ahenni ho nneɛma di kan denam ‘wɔn ahonyade a wɔde hyɛ no anuonyam’ no so. (Mmebusɛm 3:9, 10) Nokwasɛm ne sɛ obiara ntumi mma Yehowa ahonyade, efisɛ ɔno na biribiara wɔ no. (1 Beresosɛm 29:14-17) Nanso ntoboa a woyi de boa adwuma no yɛ hokwan a ɛma ɔsomfo tumi kyerɛ ne dɔ ma Yehowa. Yɛn ani sɔ obiara a ne koma aka no ma wayɛ saa.

[Ase hɔ asɛm]

[Adaka wɔ kratafa 26, 27]

Akwan a Ebinom Fa So Yi Ntoboa Ma Wiase Nyinaa Adwuma No

Pii yi sika bi to hɔ a wɔde kɔto ntoboa nnaka a wɔakyerɛw ho sɛ: “Ntoboa Ma Asafo ti no Wiase Nyinaa Adwuma No—Mateo 24:14,” mu. Ɔsram biara, asafo ahorow de sika yi mena wiase nyinaa adwumayɛbea ti wɔ Brooklyn, New York, anaa wɔn man mu baa dwumadibea.

Wubetumi de sika ntoboa a wufi wo pɛ mu de ma nso amena Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483 tẽẽ, anaa Asafo ti no baa dwumadibea a ɛhwɛ wo man no dwumadi so. Wubetumi de agude anaa nneɛma foforo a ɛsom bo nso ama. Ɛsɛ sɛ wode krataa tiawa bi a ɛkyerɛ sɛ eyi yɛ akyɛde koraa ka ntoboa yi ho.

Ntoboa A Wɔde Ma Kosi Bere Bi Ho Nhyehyɛe

Obi betumi de sika ama Ɔwɛn Aban Asafo no, na wɔayɛ nhyehyɛe soronko bi wɔ ho sɛ sɛ ɛba sɛ ehia nea ɔde mae no a, wɔbɛsan de n’ade ama no. Sɛ wopɛ ho nsɛm pii a, yɛsrɛ sɛ wo ne Treasurer’s Office no nni nkitaho denam address a ɛwɔ atifi hɔ no so.

Tirimbɔ

Nea ɛka sika a wɔde kyɛ koraa ne ntoboa a nhyehyɛe bi bata ho ho no, akwan foforo wɔ hɔ a wubetumi afa so ayi bi ama de aboa wiase nyinaa Ahenni adwuma no. Nea ɛka eyinom ho ni:

Insurance: Obi betumi ayɛ nhyehyɛe na sɛ owu a, wɔde ne insurance sika anaa sika a sɛ ogyae adwuma anaa ɔkɔ pɛnhyen a, wɔde bɛma no no ama Ɔwɛn Aban Asafo no.

Sika a Wɔasie Wɔ Sikakorabea: Obi betumi de sika a wasie wɔ sikakorabea, sika kɛse a ɛda sikakorabea ho adanse krataa, anaa sika a sɛ ogyae adwuma a wobetua ama no ato hɔ ma Ɔwɛn Aban Asafo no ahwɛ so anaa sɛ owu a wɔatua ama Ɔwɛn Aban Asafo no, sɛnea ɛne ne man mu sikakorabea ahwehwɛde horow hyia.

Adwuma mu Kyɛfa ne Sika a Wɔde Bɔ Bosea: Obi betumi de adwuma bi mu kyɛfa a ɔwɔ ne sika a ɔde abɔ bosea a wɔbɛsan atua ama no no ama Ɔwɛn Aban Asafo no sɛ akyɛde koraa anaa wɔayɛ ho nhyehyɛe bi a ɛbɛma wɔakɔ so atua mfaso a efi mu ba no nkutoo ama nea ɔde mae no.

Adan ne Nsase: Obi betumi de adan anaa nsase a wotumi tɔn ama Ɔwɛn Aban Asafo no sɛ akyɛde koraa anaasɛ wobetumi ayɛ ho nhyehyɛe wɔ ɔkwan a ɛbɛma nea ɔde mae no akɔ so atra mu bere a ɔte nkwa mu so. Ɛsɛ sɛ obi ne Asafo ti no di nkitaho ansa na ɔde adan ne nsase biara ama Asafo ti no.

Nsamansew ne Sika a Wɔde Sie Ma Wɔhwɛ So: Obi betumi de agyapade anaa sika ama Ɔwɛn Aban Asafo no denam mmara kwan so samansew so, anaa ɔbɛyɛ nhyehyɛe na sɛ owu a, wɔde sika bi a ɔde asie sɛ wɔnhwɛ so no ama Asafo ti no. Wɔtaa tew tow a wotua wɔ sika a wɔde sie sɛ wɔnhwɛ so a wɔde ma nyamesom ahyehyɛde bi ho no so.

Sɛnea asɛm “tirimbɔ” no kyerɛ no, ntoboayi ahorow a ɛte saa yi hwehwɛ ankasa sɛ nea ɔde ma no bɔ ne tirim wɔ nneɛma bi ho. Nea ɛbɛyɛ na wɔaboa ankorankoro a wɔpɛ sɛ wɔboa Asafo ti no denam tirimbɔ bi so no, Asafo ti no asiesie Engiresi kasa mu nhomawa bi a wɔato din Planned Giving to Benefit Kingdom Service Worldwide. Wɔkyerɛw nhomawa no de dii nsɛmmisa pii a Asafo ti no anya fa akyɛde, nsamansew, ne sika a wɔde sie ma wɔhwɛ so ho no ho dwuma. Ɛsan kura nsɛm foforo a mfaso wɔ so a ɛfa adan ne nsase, sikasɛm, ne towtua ho nhyehyɛe ho. Na wɔayɛ na aboa ankorankoro a wɔwɔ United States a wɔpɛ sɛ wɔma Asafo ti no akyɛde soronko nnɛ anaa wɔpɛ sɛ sɛ wowu a, wogyaw Asafo ti no ade no na wɔapaw akwan a edi mũ a mfaso wɔ so sen biara a wɔbɛfa so ayɛ saa bere a wosusuw wɔn mmusua ne wɔn ankasa nsɛm tebea ho no.

Bere a nnipa pii akenkan nhomawa no na wɔne wɔn a wɔyɛ adwuma wɔ Planned Giving Desk no adi nkitaho no, wɔatumi aboa Asafo ti no, na bere koro no ara no, wɔanya saa a wɔyɛ no ho towtua a wɔtew so no so mfaso kɛse. Ɛsɛ sɛ wɔbɔ Planned Giving Desk no amanneɛ wɔ nhyehyɛe yi mu biara ho, na wɔkɔma wɔn ɛho nkrataa biara a ɛho hia. Ɛsɛ sɛ wɔn a wɔn ani gye nhomawa no anaa tirimbɔ nhyehyɛe yi biara ho no nam nkrataa-kyerɛw anaa telefon so ne Planned Giving Desk no di nkitaho wɔ address a ɛwɔ ase hɔ no anaa Asafo ti no baa dwumadibea a ɛhwɛ wɔn man no dwumadi so no.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Kratafa 28 adaka]

Mmofra Nso Tew Wɔn Anim Ma!

Mede eyi rema mo na mode ayɛ nhoma pii ama yɛn. Mekɔyɛɛ adwuma boaa me papa na minyaa saa sika yi. Yɛda mo ase paa wɔ adwumaden a moreyɛ no ho.—Pamela, wadi mfe ason.

Mede $6.85 remena mo na ama moatumi asisi Ahenni Asa pii. Metɔn ankaa nsu wɔ kwankyɛn ahohuru bere yi mu na minyaa saa sika yi.—Selena, wadi mfe asia.

Meyɛn akokɔbere bi nyaa onini ne ɔbere foforo. Mihyiraa nea etwa to no so maa Yehowa. Afei ohuanee nkokɔbere abiɛsa ma metɔnee. Mede sika a minyae no rema Yehowa adwuma.—Thierry, wadi mfe awotwe.

Sika a mewɔ nyinaa ni! Mesrɛ sɛ momfa nni dwuma yiye. Mebrɛe ansa na merenya. Ɛyɛ $21.—Sarah, wadi mfe du.

Mebɔɔ mmɔden sen obiara wɔ sukuu dwumadi bi mu, enti wɔmaa me ne wɔn a wɔbɔ mmɔden paa wɔ ɔmansin no mu kohyiae ma wɔsɔɔ yɛn hwɛe. Ɛhɔ nso midii wɔn kan, na metoo so abien wɔ ɔmantam no nso mu. Minyaa sika fii emu biara mu. Mepɛ sɛ mede sika no bi ma Asafo ti. Mete nka sɛ ntetee a manya afi Teokrase Ɔsom Sukuu no mu nti na mitumi nyaa akyɛde ahorow yi. Mitumi de m’amanneɛbɔ no too gua wɔ mpanyimfo no anim a me ho ampopo.—Amber, ɔwɔ ne sukuu afe a ɛto so asia mu.

Mepɛ sɛ mugye eyi ma Yehowa. Mummisa no nea ɛsɛ sɛ mode yɛ. Onim biribiara.—Karen, wadi mfe asia.

[Kratafa 25 mfonini ahorow]

Ntoboa a nkurɔfo fi wɔn pɛ mu yi na wɔde boa Yehowa Adansefo adwuma no