Dario—Ɔhene a Ɔwɔ Atɛntrenee Su

BERE bi, ɔhene bi a wagye din de adan a na wasisi hoahoaa ne ho sɛ: “Metoo ɔfasu a ɛyɛ den faa Babilon ho hyiae wɔ apuei fam. Mitwaa suka . . . mede ama ne ntayaa too ɔfasu kɛse a ɛte sɛ bepɔw a wɔrentumi ntutu.” Yiw, na Babilonni Ɔhene Nebukadnesar asisi adan pii ayɛ adwumaden de agye n’ahemman no kurowpɔn no ho ban. Nanso Babilon kurow no anyɛ nea wontumi mmu mfa so sɛnea na osusuw no.

Eyi ho adanse bae wɔ October 5, 539 A.Y.B. Persia sodifo Kores II a na Media asraafo ka ne ho no dii Babilon so nkonim na wokum Kaldeafo hene Belsasar. Hena na na ɔbɛyɛ ɔhene a odi kan wɔ kurow a wɔadi so nkonim foforo yi so? Onyankopɔn diyifo Daniel a na ɔwɔ kurow no mu bere a ɛhwee ase no, kyerɛwee sɛ: “Mediani Dario faa ahenni no, na wadi mfe aduosia abien.”—Daniel 5:30, 31.

Ná hena ne Dario? Ná ɔyɛ sodifo bɛn? Ɔkwan bɛn so na ɔne odiyifo Daniel a na watra nnommumfa mu bɛboro mfe 70 wɔ Babilon no dii nsɛm?

ƆHENE A NE HO ABAKƆSƐM NNƆƆSO

Abakɔsɛm mu nsɛm a ɛfa Mediani Dario ho no nnɔɔso. Ɛte sɛ nea Mediafo no annyaw kyerɛwtohɔ biara. Bio nso cuneiform abopon a wotu fii fam wɔ Mediterranea Supɔw no so no ho kyerɛwtohɔ no nni mũ na egyigya nsɛm pii. Tete nkyerɛwee foforo a enni Bible mu a ɛda so wɔ hɔ no yɛ kakraa bi na afeha biako anaa nea ɛboro saa na ɛda nsɛm a ɛka no ne Dario ho nsɛm no ntam.

Nanso, adanse kyerɛ sɛ bere a Persia sodifo Kores II dii Ecbatana, a ɛyɛ Media ahenkurow so nkonim no, otumi nyaa Mediafo no ma wɔtaa n’akyi. Ɛno akyi no, Mediafo ne Persiafo yɛɛ biako koe wɔ n’akanni ase. Ɛdefa wɔn abusuabɔ no ho no, nhoma kyerɛwfo Robert Collins kae wɔ ne nhoma The Medes and Persians mu sɛ: “Na Mediafo ne Persiafo no wɔ gyinabea koro a na asomdwoe wom. Na wɔtaa ma wɔn aban dibea a ɛkorɔn ne mpanyinni wɔ Persia sraadi no mu. Ananafo kaa Mediafo ne Persiafo no ho asɛm boom a wɔankyerɛ nsonsonoe biara a ɛda nea odi ne yɔnko so ntam.” Enti Media ne Persia ka boom bɛyɛɛ Medo-Persia Ahemman no.—Daniel 5:28; 8:3, 4, 20.

Akyinnye biara nni ho sɛ Mediafo no nyaa kyɛfa kɛse wɔ Babilon a wotu gui no mu. Kyerɛwnsɛm no ka “Ahasweros ba Dario a n’ase fi Media” ho asɛm sɛ ɔhene a odi kan wɔ Medo-Persia Ahemman a edii Babilon so no mu. (Daniel 9:1) Tumi a na odi sɛ ɔhene no bi ne sɛ ɔbɛma ɔmamfo ahyɛde “sɛ Media ne Persia mmara a wɔnnan ani no te no.” (Daniel 6:8) Nea Bible no ka fa Dario ho no nso ma yehu ne nipasu yiye, na yɛte nea enti a ne ho asɛm nni wiase abakɔsɛm mu no ase.

WƆDOM DANIEL

Bere a obedii tumi wɔ Babilon akyi bere tiaa bi no, Bible no ka sɛ Dario paw ‘amantam ahene ɔha aduonu sisii n’ahenni no so, sɛ wonni ahemman no nyinaa so, ne wɔn so abirɛmpɔn baasa a Daniel yɛ wɔn mu biako.’ (Daniel 6:1, 2) Nanso, Daniel dibea a na ɛkorɔn no yɛɛ abirɛmpɔn afoforo no ahi. Akyinnye biara nni ho sɛ ne nokwaredi siw abɔnefosɛm ano, na ebia ɛma wonyaa ne ho menasepɔw. Ɛbɛyɛ sɛ anibere nso kanyan abirɛmpɔn no, esiane sɛ Daniel nyaa ɔhene no anim dom na ɔyɛɛ n’adwene sɛ ɔbɛyɛ no soafo panyin no nti.

Nea ɛbɛyɛ na wɔasɛe saa nhyehyɛe no, abirɛmpɔn baanu ne amantam ahene no sum mmara kwan so afiri bi. Wɔkɔɔ ɔhene no anim sɛ ɔmfa ne nsa nhyɛ mmara bi a ɛkyerɛ sɛ obiara nni hokwan sɛ Dario akyi no, “obebisa onyame bi anaa onipa bi hɔ ade biara” nnafua 30. Wosusuw ho kyerɛɛ no sɛ ɛsɛ sɛ wɔde obiara a ɔbɛto mmara no to agyata amoa mu. Wɔmaa Dario begye dii sɛ saa mmara no ye ma mpanyimfo a wɔwɔ nniso no mu nyinaa, na nea wɔde ato n’anim no kyerɛ sɛ wodi ɔhene no nokware.—Daniel 6:1-3, 6-8.

Dario de ne nsa hyɛɛ mmara no ase, na ankyɛ na ohuu nea ɛrekowie. Daniel ne obi a odii kan too mmara no, esiane sɛ ɔkɔɔ so bɔɔ Yehowa Nyankopɔn mpae nti. (Fa toto Asomafo no Nnwuma 5:29 ho.) Wɔtoo ɔnokwafo Daniel kyenee agyata amoa mu ɛmfa ho mmɔden biara a ɔhene no bɔe sɛ anka ɔbɛsakra mmara a wɔnnan ani no mu no. Dario asɛm a ɔkae kyerɛe sɛ na ɔwɔ awerɛhyem sɛ Daniel Nyankopɔn no wɔ tumi a ɔde begye odiyifo no nkwa.—Daniel 6:9-17.

Wɔ kɔdaanna ne mmuadadi akyi no, Dario yɛɛ ntɛm kɔɔ agyata amoa no ano. Hwɛ sɛnea n’ani gyei sɛ ohuu Daniel sɛ ɔte ase a hwee nyɛɛ no no! Wɔ atɛntrenee kwan so no, ɔhene no maa wɔde Daniel asɔretiafo ne wɔn mmusua koguu agyata amoa mu ntɛm ara de tuaa wɔn ka. Ɔsan hyɛɛ mmara sɛ ‘wɔ n’ahemman a odi so tumi nyinaa mu no, wɔmfɛre na wonsuro Daniel Nyankopɔn no.’—Daniel 6:18-27.

Ɛda adi sɛ, na Dario wɔ obu ma Daniel Nyankopɔn ne ne som, na na ne ho pere no sɛ obesiesie mfomso no. Nanso, ebia Daniel asɔretiafo a ɔtwee wɔn aso no maa mpanyimfo a na wɔaka no tanee no. Bio nso, ebia Dario mmara a ɔhyɛe sɛ wɔn a wɔwɔ ahemman no mu nyinaa ‘nsuro Daniel Nyankopɔn’ no maa Babilon asɔfo a na wɔwɔ tumi no nyaa menasepɔw kɛse. Esiane sɛ saa nsɛm yi nyaa akyerɛwfo no so tumi kɛse nti, ɛrenyɛ nwonwa sɛ wɔbɛsesa wiase nsɛm ho kyerɛwtohɔ no na wɔayi adanse a ɛfa Dario ho no afi mu. Nanso, kyerɛwtohɔ tiawa a ɛwɔ Daniel nhoma no mu no ka Dario ho asɛm sɛ sodifo a ɔmpɛ asisi na ɔwɔ atɛntrenee su.