Dɛn na Ɛma Wonya Aware Pa?

So wobɛtɔ asubɔnten mu bere a wunnii kan nsuaa asuguare? Nkwaseade a ɛte saa betumi apira wo—anaasɛ akum wo mpo. Nanso, susuw nnipa dodow a wɔpere wɔn ho de wɔn ho hyɛ aware mu bere a wonni sɛnea wobedi emu asɛyɛde ahorow ho dwuma ho nimdeɛ ahe biara no ho hwɛ.

YESU kae sɛ: “Mo mu hena na ɔpɛ sɛ ɔto abantenten, na ɔrentra ase mmu ho akontaa ansa sɛ ɔwɔ nea ɔde betumi awie?” (Luka 14:28) Sɛnea abantenten to te no, saa ara na aware hyehyɛ nso te. Ɛsɛ sɛ wɔn a wɔpɛ sɛ wɔware no de ahwɛyiye bu ho akontaa sɛ wobetumi adi emu asɛyɛde ho dwuma anaa.

Aware Mu a Wobɛhwehwɛ

Ɔhokafo a wubenya na wo ne no akyɛ asetram anigye ne awerɛhow no yɛ nhyira ankasa. Aware betumi ayi ɔhaw a ankonamyɛ anaa abasamtu de ba no afi hɔ. Ebetumi ama yɛanya ɔdɔ, ayɔnkofa, ne nkitahodi a yefi awosu mu hwehwɛ no. Ntease pa mu na bere a Onyankopɔn bɔɔ Adam wiei no, ɔkae sɛ: “Enye sɛ onipa nko tra, mɛyɛ ne sɛso boafo mama no” no.—Genesis 2:18; 24:67; 1 Korintofo 7:9.

Yiw, aware betumi adi ɔhaw ahorow bi ho dwuma. Nanso ɛde foforo nso bɛba. Dɛn ntia? Efisɛ aware yɛ nnipa baanu a ebia wɔn nsusuwii hyia nanso ɛsono wɔn mu biara suban. Enti, akasakasa bɛba awarefo a wɔfata wɔn ho wɔn ho yiye mpo mu bere ne bere mu. Kristoni ɔsomafo Paulo kyerɛwee sɛ, wɔn a wɔware no “ho behia wɔn ɔhonam mu”—anaa sɛnea The New English Bible ka no no, wɔbɛte “yaw, adi awerɛhow wɔ ɔhonam asetra yi mu.”—1 Korintofo 7:28.

So na Paulo rebu abam? Dabida! Na ɔrehyɛ wɔn a wɔresusuw aware ho no nkuran sɛ wonsusuw nneɛma ho kɛkɛ. Obi ani a egye obi ho no nyɛ biribi a edi mũ a wobetumi agyina so ahu nea aware no bɛyɛ wɔ asram ne mfe a edi ayeforohyia no akyi no mu. Aware biara ne emu nsɛnnennen ne ɔhaw ahorow. Ɛnyɛ nsɛnnennen a ɛbɛsɔre no ne asɛm no, na mmom sɛ ɛsɔre a, sɛnea wobegyina ano.

Ɔhaw a ɛsɔre no ma okunu ne ɔyere nya hokwan de da nokware dɔ a wɔwɔ ma wɔn ho wɔn ho no adi. Sɛ yɛbɛyɛ mfato ho a: Po so hyɛn a esi faako a wɔato no sɛkyɛ a ɛnyɛ hwee no bɛyɛ sɛ nea ɛwɔ ahoɔden. Nanso, n’ahoɔden ankasa da adi wɔ po so—ebia bere a ahyia ahum ne asorɔkye a ano yɛ den no. Saa ara na wontumi nhu biakoyɛ a ɛwɔ aware mu wɔ mmere a asomdwoe wom na wɔkyerɛ wɔn ho wɔn ho anigye no mu nkutoo. Ɛtɔ mmere bi a, ɛda adi wɔ tebea ahorow a ɛsɔ gyidi hwɛ mu, bere a awarefo no tumi gyina amanehunu ano no.

Sɛ awarefo betumi ayɛ saa a, gye sɛ wonya ahofama ma wɔn ho wɔn ho, efisɛ Onyankopɔn atirimpɔw ne sɛ ɔbarima ‘bɛbata ne yere ho’ na nnipa baanu no ‘ayɛ ɔhonam koro.’ (Genesis 2:24) Nnipa pii suro sɛ wobenya ahofama ama wɔn ho wɔn ho nnɛ. Nanso, ntease wom sɛ nnipa baanu a wɔdɔ wɔn ho wɔn ho nokwarem no bɛpɛ sɛ wonya ahofama anibere so sɛ wɔbɛbom atra. Ahofama ma aware no yɛ nea nidi wom. Ɛma okunu ne ɔyere nya ahotoso sɛ, nea ɛbɛba biara no, wɔbɛboa wɔn ho wɔn ho.a Sɛ wunsiesiee wo ho sɛ wubenya ahofama a ɛte saa a, ɛnde na wunsiesiee wo ho koraa sɛ wobɛware. (Fa toto Ɔsɛnkafo 5:4, 5 ho.) Ehia sɛ wɔn a wɔaware dedaw no mpo ma anisɔ a wɔwɔ ma sɛnea ahofama ho hia na ama aware atra hɔ no mu yɛ den.

Wo Ho Mu a Wobɛhwehwɛ

Akyinnye biara nni ho sɛ wubetumi akyerɛ su ahorow a wobɛpɛ sɛ wuhu wɔ wo hokafo ho. Nanso, ɛyɛ den yiye sɛ wobɛhwehwɛ wo ho mu ahu sɛnea wubetumi aboa ama aware no agyina. Wo ho mu a wobɛhwehwɛ ansa na woaka aware ntam no ne ɛno akyi no ho hia. Sɛ nhwɛso no, bisa wo ho nsɛm a edidi so yi.

• So mepɛ sɛ me ne me hokafo no tra ase me nkwa nna nyinaa?—Mateo 19:6.

Wɔ Bible mu diyifo Malaki bere so no, okununom pii gyaee wɔn ahokafo, sɛnea ebia ɛbɛma wɔanya kwan akɔwareware mmabaa. Yehowa kae sɛ ɔyerenom a wɔagyae wɔn aware no nusu akata n’afɔremuka so, na ɔkasa tiaa mmarima a ‘wotwaa’ wɔn ahokafo “nkontompo” no.—Malaki 2:13-16.

• Sɛ meresusuw ho sɛ mɛware a, so matwam wɔ mmerantebere ne mmabaabere mu, bere a nna ho akɔnnɔ mu yɛ den a ebetumi afura m’adwene ani no?—1 Korintofo 7:36.

Nikki a ɔwaree na wadi mfe 22 no kae sɛ: “Asiane wom sɛ wobɛware bere a wunnyinii.” Ɔbɔ kɔkɔ sɛ: “Sɛ wunya nnii mfe aduonu a, wo nkate, wo botae ahorow ne nneɛma a w’ani gye ho bɛkɔ so asesa akosi sɛ wubenya mfe 25 rekɔ no.” Nokwarem no, wontumi nnyina mfe a obi adi nkutoo so nhu sɛ wasiesie ne ho ama aware. Nanso, sɛ́ obi bɛware bere a ontwaam wɔ mmerantebere ne mmabaabere mu, bere a nna ho nkate yɛ foforo na emu yɛ den titiriw no betumi ama ne nsusuwii ayɛ nea ɛmfata, na ama wabu n’ani agu ɔhaw ahorow so.

• Su ahorow bɛn na mewɔ a ɛbɛma matumi aboa ma aware no asɔ?—Galatifo 5:22, 23.

Ɔsomafo Paulo kyerɛw Kolosefo sɛ: “Monhyɛ ayamhyehye, ayamye, ahobrɛase adwene, odwo, abodwokyɛre.” (Kolosefo 3:12) Afotu yi fata ma wɔn a wɔresusuw aware ho ne wɔn a wɔaware dedaw no.

• So me ho akokwaw sɛnea ɛfata a ɛbɛma matumi aboa me hokafo wɔ mmere a emu yɛ den mu?—Galatifo 6:2.

Oduruyɛfo bi kae sɛ: “Sɛ ɔhaw ahorow bi ba a, nea yɛtaa yɛ ne sɛ yɛbɛbɔ yɛn hokafo no sobo. Ɛnyɛ nea ehia ne nea ɛsɛ sɛ yɛbɔ no sobo. Mmom no, nea ehia ne sɛnea okunu ne ɔyere betumi ayɛ biako na wɔama wɔn aware no atu mpɔn.” Ɔhene Salomo nyansafo no nsɛm yi fa awarefo ho. Ɔkyerɛwee sɛ: “Baanu ye sen obiako, efisɛ . . . wɔhwe ase a, obiako bɛma ne yɔnko so, na obiakofo a ɔhwe ase a obi nka ne ho mma no so nnue.”—Ɔsɛnkafo 4:9, 10.

• So meda anigye ne adwempa adi, anaasɛ metaa munamuna na minya adwemmɔne?—Mmebusɛm 15:15.

Da biara yɛ da bɔne ma onipa a ɔwɔ adwemmɔne. Aware nsesa saa su yi anwonwa kwan so! Ɔhokwafo—ɔbarima anaa ɔbea—a ɔyɛ katee anaa onni adwempa bɛyɛ ɔwarefo a ɔyɛ katee na onni adwempa. Su bɔne a ɛte saa betumi asɛe aware bi koraa.—Fa toto Mmebusɛm 21:9 ho.

• So meyɛ koom wɔ nhyɛso ase, anaasɛ meda abufuhyew adi?—Galatifo 5:19, 20.

Wɔhyɛ Kristofo sɛ wɔnyɛ “nyaa mfa abufuw.” (Yakobo 1:19) Ansa na ɔbarima anaa ɔbea bɛware anaa bere a wɔaware awie no, ɛsɛ sɛ wonya saa su yi na wɔde tra ase: “Mo bo mfuw, na monnyɛ bɔne! Mommma owia nnkɔtɔ mo abufuw so.”—Efesofo 4:26.

Nea Ɔrebɛyɛ Wo Hokafo no Mu a Wobɛhwehwɛ

Bible mu bɛ bi ka sɛ: “Onitefo hwɛ ne nantew mu yiye.” (Mmebusɛm 14:15) Eyi yɛ nokware ankasa wɔ bere a worepaw aware mu ɔhokafo no. Aware mu ɔhokafo paw yɛ gyinae ahorow a ɛho hia sen biara a ɔbarima anaa ɔbea besisi no mu biako. Nanso, wɔahyɛ no nsow sɛ nnipa pii de bere pii susuw kar a wɔbɛtɔ anaa sukuu a wɔbɛkɔ ho ansa na wɔasi ho gyinae sen onipa a wɔpɛ sɛ wɔware no.

Wɔ Kristofo asafo mu no, ‘wodi kan sɔ’ wɔn a wɔde asɛyɛde hyɛ wɔn nsa no ‘hwɛ sɛ asɛm bi nni wɔn ho’ ansa. (1 Timoteo 3:10) Sɛ woresusuw ho sɛ wobɛware a, wobɛpɛ sɛ wuhu sɛ ‘asɛm bi nni’ onipa foforo no ho. Sɛ nhwɛso no, susuw nsɛmmisa a edidi so yi ho hwɛ. Ɛwom sɛ egyina ɔbea ahwehwɛde so de, nanso nnyinasosɛm no mu pii fa ɔbarima nso ho. Na sɛ wɔn a wɔaware dedaw mpo susuw saa nsɛm yi ho a, wobetumi anya so mfaso.

• Din bɛn na ɔwɔ?—Filipifo 2:19-22.

Mmebusɛm 31:23 ka okunu a ‘wonim no kurow apon mu, bere a ɔte asase no so mpanyimfo mu’ no ho asɛm. Ná kurow mu mpanyimfo no tra kurow apon ano bu ntɛn. Enti, ɛda adi sɛ, na ɔmanfo no agye no atom. Sɛnea nkurɔfo bu ɔbarima bi no kyerɛ biribi wɔ edin a ɔwɔ ho. Sɛ ɛbɛyɛ yiye a, susuw sɛnea nkurɔfo a wɔwɔ ne hwɛ ase bu no no nso ho. Eyi betumi akyerɛ sɛnea wo a woyɛ ne hokafo no bebu no wɔ bere bi akyi.—Fa toto 1 Samuel 25:3, 23-25 ho.

• Ne bra te dɛn?

Nyansa a efi Onyankopɔn hɔ de, “nea edi kan ne sɛ ɛho tew.” (Yakobo 3:17) So nea ɔrebɛyɛ wo aware mu ɔhokafo no ani gye nna mu anigye a n’ankasa benya ho sen ɔno ne wo gyinabea a mowɔ wɔ Onyankopɔn anim no? So ɔmmɔ mmɔden sɛ ɔde Onyankopɔn abrabɔ ho gyinapɛn ahorow bɛtra ase mprempren, na dɛn na wubegyina so agye adi sɛ ɔbɛyɛ saa wɔ mo aware no akyi?—Genesis 39:7-12.

• Ɔne me di nsɛm dɛn?—Efesofo 5:28, 29.

Bible nhoma a ɛne Mmebusɛm no ka okunu a ne “koma da” ne yere “so” ho asɛm. Afei nso, “oyi no ayɛ.” (Mmebusɛm 31:11, 28) Ɔntwe ninkunu pii, na saa ara na ɔnhwehwɛ nneɛma pii sɛnea ɛnsɛ. Yakobo kyerɛwee sɛ nyansa a efi soro ‘wɔ asomdwoe, ɛwɔ odwo, mmɔborohunu, na aba pa ayɛ no ma.’—Yakobo 3:17.

• Ɔne n’ankasa abusuafo di nsɛm dɛn?—Exodus 20:12.

Obu a mmofra de ma awofo nyɛ ahwehwɛde ara kwa. Bible ka sɛ: “Tie w’agya, ɔno na ɔwoo wo, na wo na, sɛ ɔbɔ aberewa a, mmu no animtiaa.” (Mmebusɛm 23:22) Nea ɛyɛ anigye no, Oduruyɛfo W. Hugh Missildine kyerɛwee sɛ: “Sɛ ɔbea ne ɔbarima a wɔrebɛware no srasraa wɔn ho wɔn ho wɔ wɔn afie mu a wɔammɔ wɔn ho wɔn ho nkae kɔhwɛɛ abusuabɔ a ɛwɔ ‘nea wɔrebɛware no’ no ne n’awofo ntam a, anka wobetumi akwati aware mu nsɛnnennen ne fata a wɔmfata wɔn ho no pii—anaasɛ anyɛ yiye koraa no, anka wobedi kan ahu. Sɛnea ɔbarima no bu n’awofo no bɛma woanya sɛnea obebu ne hokafo no ho adwene bi. Ɛsɛ sɛ obi bisa ne ho sɛ: ‘So mepɛ sɛ ɔne me di nsɛm sɛnea ɔne n’awofo di nsɛm no?’ Na sɛnea n’awofo ne no di nsɛm no bɛyɛ sɛnea ɔbɛyɛ n’ade ne sɛnea ɔbɛpɛ sɛ wo ne no di nsɛm ho sɛnkyerɛnne a ɛfata—wɔ ayeforohyia no akyi.”

• So ɔwɔ bobɔne anaa ɔka abususɛm?

Bible tu fo sɛ: “Momma wonyi anobow nyinaa ne bobɔne ne abufuw ne ano kurokuro ne abususɛm . . . mfi mo mu.” (Efesofo 4:31) Paulo bɔɔ Timoteo kɔkɔ sɛ Kristofo bi ‘bɛyare akyinnyegye ne ɔnokotwa,’ na wɔagyae wɔn ho mu ama ‘nitan, kunsunkunsun, ntwiri, nnipa ho adwemmɔne, ne nneɛma nketenkete ho mansotwe.’—1 Timoteo 6:4, 5.

Afei nso, Paulo kyerɛwee sɛ ɛnsɛ sɛ obi a ɔfata sɛ onya hokwan atitiriw wɔ asafo no mu yɛ “ɔmaanefo”—sɛnea Hela asɛmfua a wodii kan de dii dwuma kyerɛ no, “ɔmmobɔ akuturuku.” (1 Timoteo 3:3, NW ase hɔ asɛm) Ontumi nyɛ obi a ɔbobɔ nkurɔfo akuturuku ankasa anaasɛ ɔyeyaw wɔn. Obi a ɔtaa yɛ basabasa bere a ne bo afuw no nyɛ aware mu hokafo a ɔfata.

• Ne botae ahorow ne dɛn?

Ebinom di ahonyade akyi na wotwa so aba a enye. (1 Timoteo 6:9, 10) Afoforo nso nenam asetram a wonni botae ahorow biara. (Mmebusɛm 6:6-11) Nanso, ɔbarima a osuro Onyankopɔn bɛyɛ n’ade te sɛ Yosua a ɔkae sɛ: “Me ne me fi de, yɛbɛsom [Yehowa, NW]” no.—Yosua 24:15.

Akatua ne Asɛyɛde Ahorow

Aware yɛ Onyankopɔn nhyehyɛe. Yehowa Nyankopɔn na ɔhyehyɛe. (Genesis 2:22-24) Ɔhyehyɛɛ aware na ama ɔbarima ne ɔbea abom atra daa, aboa wɔn ho wɔn ho. Sɛ okunu ne ɔyere de Bible mu nnyinasosɛm di dwuma a, wobetumi ahwɛ kwan sɛ wɔn asetra bɛyɛ nea anigye wom.—Ɔsɛnkafo 9:7-9.

Nanso, ɛsɛ sɛ yehu sɛ yɛte “mmere a emu yɛ den” mu. Bible ka siei sɛ wɔ saa mmere yi mu no, nnipa bɛyɛ “ahopɛfo, sikapɛfo, ahohoahoafo, ahantanfo, . . . wɔn a biribiara ho ntew mma wɔn, wɔn a wonni dɔ, apamsɛefo, . . . afatwafo, anuɔdenfo, wɔn a wɔhoman.” (2 Timoteo 3:1-4) Saa su ahorow yi betumi anya nkɛntɛnso a emu yɛ den wɔ obi aware so. Enti ɛsɛ sɛ wɔn a wɔpɛ sɛ wɔware no susuw ho anibere so. Na ɛsɛ sɛ wɔn a wɔaware mprempren no kɔ so sua sɛnea wɔde Onyankopɔn akwankyerɛ a ɛwɔ Bible mu no bedi dwuma na ama wɔn aware atu mpɔn.

Yiw, ɛyɛ papa sɛ wɔn a wɔresusuw aware ho no hwɛ boro ayeforohyia da no. Na ɛnsɛ sɛ obiara susuw aware a ɔbɛware nkutoo ho, na mmom aware no akyi asetra ho nso. Fa wo ho to Yehowa so ma ɔnkyerɛ wo kwan, na ama woasusuw nneɛma ho sɛnea ɛte ankasa mmom sen sɛ wubesusuw akɔnnɔ ho kɛkɛ. Sɛ woyɛ saa a, ɛda adi sɛ wubenya aware pa.

[Ase hɔ asɛm]

[Kratafa 5 adaka]

“Ɔdɔ Ho Asɛm a Ɛsen Biara a Makenkan Pɛn”

Ɔbenfo Kevin Leman kyerɛwee sɛ: “Woyɛ dɛn hu sɛ wodɔ obi ankasa? Tete nhoma bi wɔ hɔ a ɛka ɔdɔ ho nsɛm. Nhoma no reyɛ adi mfe mpem abien, nanso ɛda so ara yɛ ɔdɔ ho asɛm a ɛsen biara a makenkan pɛn.”

Ná ɛyɛ Kristoni ɔsomafo Paulo nsɛm a ɛwɔ Bible mu wɔ 1 Korintofo 13:​4-8 no ho asɛm na Ɔbenfo Leman reka no:

“Ɔdɔ wɔ abodwokyɛre, ne yam ye; ɔdɔ nyɛ ahoɔyaw; ɔdɔ nyɛ ahoahoa, ɛnhoran, ɛnyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no, ɛmfa bɔne nhyɛ ne yam, n’ani nnye nea ɛnteɛ ho, na ɛne nokware ani gye. Etie ade nyinaa, egye ade nyinaa di, enya ade nyinaa mu anidaso, ɛtɔ ne bo ase ade nyinaa mu. Ɔdɔ to ntwa da.”

[Kratafa 8 adaka]

Nkate Betumi Ayɛ Nnaadaa

Ɛda adi sɛ na Sulamit abeawa a ɔtraa ase Bible mmere mu no nim tumi a akɔnnɔ nnaadaa wɔ no. Bere a Ɔhene Salomo a ɔwɔ tumi see no pɛ no, abeawa no ka kyerɛɛ ne mfɛfo mmeawa sɛ “munnnyan na monnhwanyan ɔdɔ kosi sɛ ɔno ara pɛ.” (Nnwom mu Dwom 2:7) Ababaa nyansafo yi ampɛ sɛ ne nnamfonom bɛhyɛ no ma wagyina ne nkate so ayɛ biribi. Eyi nso fata ma wɔn a wɔresusuw aware ho nnɛ no. Di wo nkate so yiye. Sɛ woware a, ɛsɛ sɛ ɛyɛ sɛ wodɔ onipa no ntia, na ɛnyɛ adwene a ɛne sɛ woaware kɛkɛ nti.

[Kratafa 6 mfonini]

Wɔn a wɔaware bere tenten mpo betumi ahyɛ wɔn aware no mu den

[Kratafa 7 mfonini]

Ɔne n’awofo di nsɛm dɛn?