Ntoboa Ahorow a Ɛma Onyankopɔn Koma Ani Gye

ASƐM a esii yi yɛ awerɛhosɛm. Ná Ɔhemmaa Atalia nam nnaadaa ne awudi so agye Yuda ahenni no. Osusuwii sɛ gyama wakunkum adedifo no nyinaa, enti osii ne ho ɔhemmaa. Ɔbea foforo, ɔhene babea Yehoseba a na ɔdɔ Yehowa ne ne Mmara kɛse no fi akokoduru mu de abofra Yoas a na ɔyɛ ɔhene ba no siei. Yehoseba ne ne kunu, Ɔsɔfo Panyin Yehoiada, de ɔdedifo no siei mfe asia wɔ beae a na wɔte wɔ asɔrefie hɔ no.—2 Ahene 11:1-3.

Bere a Yoas dii mfe ason no, afei de na Ɔsɔfo Panyin Yehoiada betumi adi ne tirimbɔ ho dwuma atu ɔhemmaa Atalia afi ahenni a ɔnam ɔkwammɔne so nyae no so. Yehoiada yii abofra no fii adi na ɔde ahemmotiri bɔɔ ne ti sɛ nea ɔwɔ hokwan sɛ odi hene. Afei wɔn a wɔhwɛ ahemfie hɔ no tow Ɔhemmaa Atalia tirimmɔdenfo no fii asɔrefie hɔ too abɔnten na wokum no, na ɛno maa nkurɔfo no nyaa ahotɔ ne anigye. Yehoiada ne Yehoseba nam nea wɔyɛe no so boae kɛse maa wɔsan de nokware som sii hɔ wɔ Yuda asase so. Nanso nea ɛho hia sen saa no, wɔboae ma wɔkoraa Dawid adehye abusua a na Mesia no befi mu aba no so.—2 Ahene 11:4-21.

Ná ɛsɛ sɛ ɔhene a wɔasi no foforo no nso yɛ biribi titiriw a ɛbɛma Onyankopɔn koma ani agye. Na ehia sɛ wosiesie Yehowa fie no denneennen. Anibere bɔne a na Atalia wɔ sɛ ɔno nkutoo bedi Yuda so no maa wobuu wɔn ani guu asɔrefie no ho adwuma so na wɔfow mu nneɛma nso. Enti Yoas de too ne koma so sɛ ɔbɛsan asi asɔrefie no na wasan asiesie. Wantwentwɛn ne nan ase koraa na ɔde ahyɛde mae sɛ wɔmmoaboa sika a ɛsɛ ano mfa nsiesie Yehowa fie no. Ɔkae sɛ: “Yoas ka kyerɛɛ asɔfo no sɛ: Akronkronne sika a wɔde ba [Yehowa, NW] fi sikamono mu nyinaa ne obiara kra ti sika sɛ wɔbɔ no bo no, ne sika biara nso a ɛba obi koma mu sɛ ɔde bɛba [Yehowa, NW] fi no, asɔfo no nnyigye wɔn amannifo nkyɛn, na wɔmfa mpompam ofi no faako a ayɛ gow no, baabiara a wobehu sɛ gow bi wɔ.”—2 Ahene 12:4, 5.

Nkurɔfo no fi wɔn pɛ mu yii ntoboa. Nanso, na asɔfo no mmfi koma nyinaa mu nni wɔn asɛyɛde a ɛne sɛ wɔnhwɛ nsiesie asɔrefie no ho dwuma. Ɛno nti, ɔhene no ankasa gye too ne ho so dii nneɛma anim, na ɔhyɛe sɛ wɔmfa ntoboa nyinaa ngu adaka titiriw bi mu tee. Ɔpaw Yehoiada sɛ ɔnhwɛ so, na kyerɛwtohɔ no ka sɛ: “Ɛnna ɔsɔfo Yehoiada faa adaka bi, na otuu ne mmuaso mu tokuru, na ɔde sii afɔremuka no ho, nea wɔfa ba [Yehowa, NW] fi no nifa; na asɔfo a wɔhwɛ ɔpon no ano no de sika a wɔde ba [Yehowa, NW] fi no nyinaa guu mu. Na sɛ wohu sɛ sika pii wɔ adaka no mu a, ɔhene kyerɛwfo ne ɔsɔfo panyin no foro ba, na wɔbɛkyekyere, na wɔkan sika a wohu no [Yehowa, NW] fi no. Na wɔde sika a wɔakari no hyɛɛ wɔn a wɔyɛɛ adwuma no a wɔde wɔn sisii [Yehowa, NW] fi so hwɛfo no nsa, na woyi maa nnua adwumfo ne adansifo a wɔyɛ [Yehowa, NW] fi no, ne abantofo, ne abotwafo, ne nea wɔde bɛtɔ nnua ne abo a wɔatwa, nea wɔde bɛpompam [Yehowa, NW] fi adangow no, ne nea wɔde betua ofi no adangow no pompam ho ade a wɔhwere nyinaa ka.”—2 Ahene 12:9-12.

Nkurɔfo no fi koma nyinaa mu yii ntoboa. Wɔsan siesiee Yehowa asɔrefie no, ma wotumi kɔɔ so som no wɔ nidi mu. Enti, wɔde ntoboa a woyii no nyinaa dii dwuma wɔ ɔkwampa so. Ɔhene Yoas hwɛ ma wɔyɛɛ no saa!

Ɛnnɛ, Yehowa ahyehyɛde no fã a aniwa hu no hwɛ yiye sɛ wɔde ntoboa a ɛyɛ sika a afoforo ayi nyinaa bedi dwuma wɔ ɔkwampa so ama Yehowa som anya nkɔso, na nokware Kristofo fi wɔn koma nyinaa mu ayi ntoboa sɛnea tete Israelfo no yɛe no. Ebia woka wɔn a woyii ntoboa maa Ahenni nneɛma nyaa nkɔso wɔ ɔsom afe a etwaam no ho. Ma yensusuw akwan a wɔafa so de ntoboa a wuyii no adi dwuma no bi ho nhwɛ.

NHOMA TINTIM

Wotintim nhoma a edidi so yi wɔ wiase nyinaa ma yesuae na yɛkyekyɛɛ bi maa afoforo nso:

• Nhoma ahorow: 47,490,247

• Nhomawa nketewa: 6,834,740

• Nhomawa akɛse: 167,854,462

• Kalenda: 5,405,955

• Nsɛmma Nhoma: 1,179,266,348

• Nkratawa: 440,995,740

• Video ahorow: 3,168,611

Wotintim nhoma wɔ Afrika, Amerika Atifi, Mfinimfini, ne Anafo fam, Asia, Europa, ne aman a ɛwɔ Pacific nsupɔw so. Aman no nyinaa yɛ 19.

“Me din de Katelyn May. Madi mfe awotwe. Mede U.S. dɔla 28 yi rema mo, na mepɛ sɛ mode tua mfiri a mode tintim nhoma no ho ka. Ɛyɛ mo nuabea kumaa, Katelyn.”

“Yɛn abusua no hyiaam susuw mfiri a wɔde tintim nhoma foforo no ho. Yɛn babarima a wadi mfe 11 ne yɛn babea a wade mfe 9 no ayi wɔn sika a wɔaboaboa ano mu bi reyi ntoboa. Ɛyɛ yɛn anigye sɛ yɛde wɔn ntoboa no bɛka yɛn de ho amena mo.”

ADANSI

Nea edidi so yi ka adan a wɔasisi de reboa Yehowa Adansefo nnwuma ho:

• Ahenni Asa wɔ aman a wodi hia so: 2,180

• Nhyiam Asa: 15

• Yehowa Adansefo Dwumadibea: 10

• Amanaman Ntam Atuhoamafo a wɔwɔ bere nyinaa som adwuma mu: 2,342

“Yɛyɛɛ asafo nhyiam a edi kan wɔ yɛn Ahenni Asa foforo so wɔ dapɛn yi awiei. Ɛyɛ yɛn anigye sɛ yɛanya beae a ɛfata saa de reyi yɛn Agya, Yehowa Nyankopɔn ayɛ. Yɛda Yehowa ne mo ase sɛ momaa mo ani kuu yɛn ahiade ho na moasisi Ahenni Asa bebree ama yɛn. Nokwarem no, yɛn Ahenni Asa no ama yɛn mpɔtam ha ayɛ fɛ ankasa.”—Chile.

“Anuanom mmarima ne mmea no ani sɔ mmoa a Yehowa ahyehyɛde no de ma no kɛse. Ɛde besi saa bere yi, yɛda so ara ka fekubɔ a ɛyɛ anigye a yɛne adansi kuw no nyae ho asɛm.”—Moldova.

“Me ne me yere hyɛɛ yɛn mfirihyia 35 aware ho fã nnansa yi ara. Na yɛresusuw nea yɛn mu biara betumi de akyɛ ne yɔnko saa da no ho, na yɛyɛe sɛ yɛde biribi bɛsan ama Yehowa ne n’ahyehyɛde no, efisɛ sɛ ɛnyɛ wɔn mmoa a, ebia anka yɛn aware no annyina. Yɛpɛ sɛ mode sika a ɛhyɛ krataa yi mu no boa Ahenni Asa a moresisi ma aman a wodi hia no biako.”

“Nnansa yi ara na me nsa kaa agyapade bi, na esiane sɛ ‘nneɛma a mepɛ’ nnɔɔso na ‘m’ahiade’ nso sua koraa nti, mepɛ sɛ mede sika a ɛhyɛ krataa yi mu no ma mo na mode boa Ahenni Asa a wohia no yiye a moresisi wɔ aman pii so no.”

ATOYERƐNKYƐM MU MMOA

Awiei bere yi mu no, atoyerɛnkyɛm sisi mpofirim. Yehowa Adansefo pii yi ntoboa ka nea woyi daa daa ho de boa wɔn nuanom a wɔwɔ mmeae a atoyerɛnkyɛm asisi no. Yɛrekae mo sɛ yɛde ntoboa a wɔde boa wɔn a atoyerɛnkyɛm ato wɔn no ka nea wɔde boa wiase nyinaa adwuma no ho di dwuma. Nea edidi so yi yɛ mmeae a Yehowa Adansefo aboa wɔn a asiane ama wɔahu amane no bi:

• Afrika

• Asia

• Caribbean mantam mu

• Pacific nsupɔw so

“Me ne me kunu da mo ase paa sɛ mode nneɛma bɛboaa yɛn bere a ahum bi a ano yɛ den yiye tu sɛee yɛn nneɛma no. Yetumi bɔɔ yɛn dan no so foforo. Yɛn ani sɔ ahoɔhare so a mode bɛyɛɛ yɛn mmoa no yiye.”

“Me din de Connor, na madi mfe 11. Bere a mihui sɛ ɛpo asorɔkye a ano yɛ den a esii nnansa yi ara akunkum nnipa pii no, na mepɛ sɛ meboa. Migye di sɛ eyi bɛboa me nuanom mmarima ne mmea no.”

BERE NYINAA ASOMFO TITIRIW

Kristofo pii de wɔn bere nyinaa yɛ asɛmpaka adwuma no anaa wɔsom wɔ Betel afie mu. Wɔde ntoboa a afoforo fi wɔn pɛ mu yi na ɛhwɛ bere nyinaa asomfo a wɔatu wɔn ho ama no mu binom. Eyinom bi na edidi so yi:

• Asɛmpatrɛwfo: 2,635

• Ahwɛfo akwantufo: 5,325

• Betel abusua mufo: 20,092

“Esiane sɛ merentumi nkɔsom wɔ Betel seesei nti [abarimaa a wadi mfe anum], mifi ɔdɔ pii mu de sika yi remena mo. Sɛ minyin a, mɛkɔ akɔyɛ adwumaden wɔ Betel.”

Wɔde Boa Ma Bible Nkyerɛkyerɛ Nya Nkɔso

Yesu Kristo hyɛɛ n’akyidifo sɛ “monkɔ nkɔyɛ aman nyinaa m’asuafo.” (Mateo 28:19) Yehowa Adansefo adi n’asɛm no so de nsi reka Bible mu asɛm no rekyerɛkyerɛ wɔ nsase 235 so. Wotintim Bible ho nhoma wɔ kasa ahorow 413 mu na wɔkyekyɛ.

Nokwarem no, ntoboa a ɛsom bo paa a Kristoni betumi ayi ne sɛ ɔde ne bere bɛboa nnipa pii ma wɔasua Yehowa ne N’atirimpɔw ho ade. Yehowa Adansefo de wɔn bere ne wɔn ahoɔden pii abɔ afɔre de reboa wɔn afipamfo. Wɔsan fi ayamye mu yi sika de boa, na wɔn ntoboa no nyinaa aboa wɔ akwan horow pii so ama wɔahu Yehowa din ne n’atirimpɔw wɔ wiase nyinaa. Ɛmmra sɛ Yehowa bɛkɔ so ahyira mmɔden a yɛbɔ de boa afoforo ma wosua ne ho ade pii no so. (Mmebusɛm 19:17) Yɛn pɛ mu a yefi de mmoa a ɛte saa ma no ma Yehowa koma ani gye!—Hebrifo 13:15, 16.

[Adaka wɔ kratafa 28-30]

Akwan a Ebinom Fa So Yi Ntoboa

NTOBOA MA WIASE NYINAA ADWUMA NO

Nnipa pii yi sika to hɔ, anaa wɔyɛ nhyehyɛe, de kɔto ntoboa nnaka a wɔakyerɛw ho “Ntoboa Ma Wiase Nyinaa Adwuma No—Mateo 24:14” no mu.

Ɔsram biara, asafo ahorow de sika yi mena Yehowa Adansefo dwumadibea a ɛhwɛ wɔn aman dwumadi so no. Wubetumi de sika a wufi wo pɛ mu yi nso amena Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483 tẽẽ, anaa wode akɔ Yehowa Adansefo dwumadibea a ɛhwɛ wo man dwumadi so. Ɛsɛ sɛ wokyerɛw “Watch Tower” wɔ krataa a wɔde yi sika no so de kɔma address a ɛwɔ atifi hɔ no. Wubetumi de agude anaa nneɛma foforo a ɛsom bo nso ama. Ɛsɛ sɛ wode krataa bi a ɛkyerɛ sɛ saa ntoboa yi yɛ akyɛde koraa ka ho.

NTOBOA A WƆDE MA KOSI BERE BI HO NHYEHYƐE

Obi betumi de sika ama Ɔwɛn Aban Asafo no ahwɛ so ma wɔde ayɛ adwuma wɔ wiase nyinaa. Nanso, sɛ ɛba sɛ onipa a ɔde mae no bisa a, wɔbɛsan de ama no. Sɛ wopɛ ho nsɛm pii a, yɛsrɛ sɛ wo ne “Treasurer’s Office” no nni nkitaho denam address a yɛaka ho asɛm no so.

ADƆE HO NHYEHYƐE

Wɔ sika a wɔde kyɛ koraa akyi no, akwan foforo wɔ hɔ a wubetumi afa so ayi bi ama de aboa wiase nyinaa Ahenni som adwuma no. Ebi ne:

Nsiakyibaa (Insurance): Obi betumi ayɛ nhyehyɛe ma Ɔwɛn Aban Asafo no anya kyɛfa wɔ ne nsiakyibaa sika anaa sika a sɛ ogyae adwuma anaa ɔkɔ pɛnhyen a, wɔde bɛma no no mu.

Sika a Wɔde Sie Wɔ Sikakorabea: Obi betumi ayɛ nhyehyɛe de ne sika a ɛwɔ sikakorabea, sika kɛse a ɛda sikakorabea ho adanse krataa, anaa sika a sɛ ogyae adwuma a wobetua ama no no ato hɔ ama Ɔwɛn Aban Asafo no anaa sɛ owu a wɔatua ama Ɔwɛn Aban Asafo no, sɛnea ɛne ne man mu sikakorabea ahwehwɛde hyia.

Adwuma Mu Kyɛfa ne Sika a Wɔde Bɔ Bosea: Obi betumi de adwuma a ɔyɛ mu kyɛfa a ɔwɔ ne sika a ɔde abɔ bosea a wɔbɛsan atua ama no no ama Ɔwɛn Aban Asafo no sɛ akyɛde koraa.

Adan ne Nsase: Obi betumi de adan anaa nsase a wotumi tɔn ama sɛ akyɛde koraa anaa, ɛdefa adan a wɔte mu ho no, wobetumi ayɛ ho nhyehyɛe sɛnea ɛbɛma nea ɔde mae no akɔ so atra mu bere a ɔte ase no. Ɛsɛ sɛ wo ne wo man mu baa dwumadibea di nkitaho ansa na wode adan anaa nsase bi ama.

Akyɛde a Wɔde Ma na Wodidi Ho: Akyɛde a wɔde ma na wodidi ho yɛ nhyehyɛe a obi yɛ de sika bi ma adwumakuw bi a Yehowa Adansefo di di dwuma. Nea ɔde ma no anaa obi a nea ɔde ma no bɛpaw no no didi ho denam sika pɔtee bi a wotua ma no afe biara kosi sɛ obewu no so. Wɔtew tow a nea ɔde akyɛde a wodidi ho ma no tua no so wɔ afe a wɔyɛ ho nhyehyɛe no mu.

Nsamansew ne Sika a Wɔde Sie Ma Wɔhwɛ So: Obi betumi de agyapade anaa sika ama Ɔwɛn Aban Asafo no denam mmara kwan so nsamansew so, anaa obetumi ayɛ nhyehyɛe na sɛ owu a, wɔde sika bi a ɔde asie sɛ wɔnhwɛ so no ama Ɔwɛn Aban Asafo no. Wotumi tew tow a wotua wɔ sika a wɔde asie sɛ wɔnhwɛ so a wɔde ma nyamesom ahyehyɛde bi no so.

Sɛnea asɛm, “adɔe ho nhyehyɛe” kyerɛ no, saa ntoboa yi hwehwɛ ankasa sɛ nea ɔde ma no bɛyɛ nhyehyɛe wɔ nneɛma bi ho. Nea ɛbɛyɛ na wɔaboa wɔn a wɔpɛ sɛ wɔboa Yehowa Adansefo wiase nyinaa adwuma no denam adɔe ho nhyehyɛe bi so no, wɔasiesie Engiresi ne Spania kasa mu nhomawa a wɔato din Charitable Planning to Benefit Kingdom Service Worldwide. Wɔkyerɛw nhomawa no na wɔnam so de nkyerɛkyerɛmu a ɛfa akwan a wobetumi afa so de akyɛde ahorow ama mprempren anaasɛ bere a onipa no awu no ho ama. Bere a nnipa pii akenkan nhomawa no na wɔne wɔn ankasa mmaranimfo anaa towtua ho afotufo adi nkitaho no, wɔatumi aboa Yehowa Adansefo som adwuma ne adɔe a wɔyɛ nkurɔfo no wɔ wiase afanan nyinaa, na saa a wɔayɛ no ama wɔatew tow a wotua no so koraa. Wubetumi abisa Charitable Planning Office no tẽẽ ma wɔabrɛ wo nhomawa yi bi.

Sɛ wopɛ ho nsɛm pii a, wubetumi afa krataa-kyerɛw anaa telefon so de ase hɔ address no ne Charitable Planning Office no adi nkitaho. Saa ara na wubetumi ne Yehowa Adansefo dwumadibea a ɛhwɛ wo man no dwumadi so no nso adi nkitaho.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[Mfonini Fibea wɔ kratafa 27]

Faithful video: Stalin: U.S. Army photo