Adamfo Bɔne

Wowɔ “adamfo” bi. Bere a woyɛ aberante anaa ababaa no na wuhyiaa no. Ɔka wo ho a, ɛyɛ wo sɛ woanyin, na asɛ ɔma wo nnamfonom nso gye wo tom. Sɛ nneɛma hyɛ wo so a, ɔma wo ho “tɔ wo.” Nea ɛwom ne sɛ, onni hɔ a wotena a ɛntena.

Nanso eduu baabi no, wuhui sɛ ɔwɔ subammɔne. Baabi a wobɛkɔ biara, wopɛ oo, wompɛ oo, ose ɔne wo bɛkɔ. Sɛ ɔno nti wɔremma wo kwan mma womma hɔ mpo a, ose da! Ɔrentwe ne ho. Ɛwom sɛ ɔma wotee nka sɛ woanyin, nanso ɔsan maa wo yare. Nea asɛe asɛm no koraa ne sɛ, wunya sika a na wawia bi.

Nnansa yi ara, woyɛɛ sɛ wo ne no retwa adamfo no mu, nanso ose ‘ɛhe ne ha,’ ɔrempene. Wayɛ saa ama seesei woabɛyɛ n’akoa. Ama woanu wo ho koraa sɛ wofaa no adamfo.

NEA yɛreka ho asɛm yi, saa ara na sigaret ayɛ nkurɔfo. Ɔbea bi a wɔfrɛ no Earline nom sigaret mfe 50. Ɔkaa sɛ: “Sɛnea na sigaret boa me no, sɛ obi wɔ me nkyɛn mpo a, na ontumi mmoa me saa. Ɔyɛ m’adamfo a me ne no abɔ akyɛ, na sɛ obiara nni me nkyɛn mpo a, ɔno de ɔnkɔ nnyaw me.” Nanso akyiri yi, Earline behui sɛ sigaret yɛ adamfo bɔne a onya wo a obepira wo paa. Nea yɛkaa wɔ asɛm yi mfiase no, ɛkaa ketewaa bi anka ɛne n’asɛm no hyiaa pɛpɛɛpɛ. Ade a ɛyɛ soronko wɔ n’asɛm no mu ara ne sɛ, ɔno de, bere a ohui sɛ Onyankopɔn kyi sigaret, efisɛ egu nipadua a ɔde ama yɛn no ho fĩ no, ogyaee.—2 Korintofo 7:1.

Owura bi a ne din de Frank nso, na ɔpɛ sɛ ɔyɛ nea Onyankopɔn pɛ, enti ɔyɛɛ n’adwene sɛ obegyae sigaretnom. Nanso bere a ogyaee no, anni nnanu anni nnansa na ofii ase weaweaa ɛdan a ɔte mu no ase sɛ ebia obenya sigaret sin bi anom a. Frank kaa sɛ: “Saa bere no ara na misii gyinae. Sɛnea na mereweawea, na me nsa deda fam repɛ sigaret sin anom no, ɛyɛɛ me aniwu paa. Efi saa bere no besi nnɛ, memfaa sigaret nkaa m’ano bio.”

Adɛn nti na sigaret tumi de nkurɔfo yɛ nkoa saa? Nea ɛma etumi ba saa no, wɔn a wɔyɛ nhwehwɛmu de bi ato gua: (1) Sɛ obi nom wii anaa nnubɔne foforo a, sɛnea etumi ka ne hɔ no, saa ara na sigaret nso te. (2) Aduru bi wɔ sigaret mu a wɔfrɛ no nicotine, na ɛma ne nom ka nkurɔfo hɔ. Sɛ obi twe bi kɔ ne mu a, akyɛ ara anibu nson pɛ na adu n’adwenem. (3) Wɔn a wɔnom sigaret no, wɔredidi no, na wɔrenom bi, wɔrenom nsã no, na sigaret tua wɔn ano, nkɔmmɔ na wɔredi mpo a, na wɔrenom bi, na sɛ nneɛma hyɛ wɔn so nso a, ɛreyɛ ara ni, na wɔatwe sigaret renom.

Nanso, sɛnea yehuu wɔ Earline ne Frank asɛm no mu no, sɛ obi nom sigaret ma ɛka ne hɔ mpo a, obetumi agyae ama ayɛ yiye. Sɛ wonom sigaret na wopɛ sɛ wugyae a, ɛnde kenkan nsɛm a edidi so no, na ebetumi aboa wo ama woasesa w’abrabɔ.

Si W’adwene Pi

“Ade baako a ehia paa a ɛma ebinom tumi gyae sigaretnom ne sɛ, wosi wɔn adwene pi sɛ wobegyae.”—Nhoma a wɔato din, “Stop Smoking Now!”

NEA ɛwom ara ne sɛ, sɛ wopɛ sɛ wugyae sigaretnom a, anyɛ yiye koraa ɛsɛ sɛ wusi w’adwene pi sɛ wubegyae. Wobɛyɛ dɛn asi w’adwene pi? Ade baako a ɛbɛboa ne sɛ, dwen mfaso a wubenya bere a woagyae sigaretnom no ho. Ebi ni:

Ɛremma wonsɛe sika. Sɛ da biara wotɔ sigaret baako a, afe bɛso no, na woabɔ ka buruburoo. “Ná minnim sɛ mesɛe sika wɔ sigaret ho saa.”—Gyanu a ɔwɔ Nepal.

W’ani begye wɔ abrabɔ mu. “Efi bere a migyaee sigaretnom no, m’abrabɔ asesa koraa. Nneɛma rekɔ yiye paa.” (Regina a ɔwɔ South Africa) Sɛ obi gyae sigaretnom a, ɔte aduan dɛ paa, na ɔte ade hua nso yiye. Ɛma onya ahoɔden pii, na ne ho nso yɛ fɛ.

Wubenya apɔwmuden. “Mmea ne mmarima a wɔnom sigaret nyinaa, mmofra oo, mpanyin oo, sɛ wogyae nom a, ɛnkyɛ koraa na wɔafi ase renya apɔwmuden.”—U.S. Asoɛe Ahorow a Ɛhwɛ Siw Nyarewa Ano.

Ɛbɛma ahotoso a wowɔ wɔ wo mu no ayɛ kɛse. “Nea enti a migyaee sigaretnom ne sɛ, na mempɛ sɛ sigaret de me yɛ akoa. Ná mepɛ sɛ me ara midi me nipadua so.”—Henning a ɔwɔ Denmark.

W’abusuafo ne wo nnamfo benya so mfaso. “Sɛ obi nom sigaret a, . . . etumi ma wɔn a wɔbɛn no no yare. . . . Nhwehwɛmu a nkurɔfo ayɛ kyerɛ sɛ, sigaret a nkurɔfo nom gu afoforo so no, afe biara ɛma nkurɔfo nya kansa a ɛyɛ aharawa ne komayare, na saa nyarewa yi kunkum nnipa mpempem pii.”—Amerika Kuw a Ɛko Kansa Yare.

Ɛbɛma Onyankopɔn a ɔbɔɔ wo no ani agye wo ho. “Adɔfo, . . . momma yɛnhohoro yɛn ho mfi ɔhonam ne honhom mu fĩ nyinaa ho.” (2 Korintofo 7:1) “Momfa mo nipadua mmɔ afɔre . . . a ɛyɛ kronkron, na ɛsɔ Onyankopɔn ani.”—Romafo 12:1.

“Bere mibehui sɛ Onyankopɔn ani nnye nneɛma a egu nipadua no ho fĩ ho no, misii gyinae sɛ megyae sigaretnom.”—Sylvia a ɔwɔ Spain.

Eye sɛ wubesi w’adwene pi. Nanso mpɛn pii no, ɛno nko ara nnɔɔso. Ebia wubehia afoforo mmoa. Wubetumi anya saa mmoa no bi afi w’abusuafo ne wo nnamfo hɔ. Dɛn na wobetumi ayɛ aboa wo?

Ma Afoforo Mmoa Wo

“Obi betumi adi ɔbaakofo so, nanso baanu de, wobetumi ne no de asi ani.”—Ɔsɛnkafo 4:12.

SƐ YƐMA afoforo boa yɛn a, ɔtamfo anaa ɔhaw biara nni hɔ a yɛrentumi nni so. Sɛ wopɛ sɛ wugyae sigaretnom a, ne papa mu paa no, hwehwɛ mmoa fi w’abusuafo ne wo nnamfo hɔ. Afei nso, obi foforo biara a obefi ne komam aso w’asen na wanya wo ho abotare no, ma ɔmmoa wo.

Wɔn a wɔatumi agyae sigaretnom no, wɔn paa na wobetumi aboa wo kɛse, efisɛ wɔbɛte wo ase, na wobetumi ama woahu nea wobɛyɛ. Torben yɛ Kristoni bi a ɔwɔ Denmark. Ɔkaa sɛ, “Nkurɔfo boaa me paa.” Abraham a ɔwɔ India kaa sɛ: “Ɔdɔ kann a m’abusuafo ne me nuanom Kristofo de dɔɔ me no, ɛno na ɛboaa me ma mitumi gyaee sigaretnom.” Nanso ɛtɔ da a abusuafo ne nnamfo nko ara rentumi mmoa obi mma onnyae sigaretnom.

Ɔbarima bi a wɔfrɛ no Bhagwandas kaa sɛ: “Menom sigaret mfe 27 mua, nanso, bere a mibehuu nea Bible aka afa nneyɛe bi a egu yɛn ho fĩ ho no, meyɛɛ m’adwene sɛ megyae nom. Metew sigaret dodow a na menom no so. Nnipa a me ne wɔn bɔ no, mesesaa mu. Mekɔɔ wɔn a wɔn adwuma ne sɛ wotu nkurɔfo fo nkyɛn kogyee akwankyerɛ. Nanso ne nyinaa antentam. Afei anadwo bi de, mebɔɔ Yehowa Nyankopɔn mpae kaa me koma mu asɛm nyinaa kyerɛɛ no, na mepaa no kyɛw sɛ ɔmmoa me mma minnyae sigaretnom. Afei de, mitumi gyaee!”

Ade foforo a ehia sɛ woyɛ ne sɛ wubegye atom sɛ sigaret a wopɛ sɛ wugyae nom no renyɛ mmerɛw mma wo. Nneɛma bɛn saa na wobɛfa mu? Asɛm a edi hɔ no bɛkyerɛkyerɛ mu.

[Adaka]

ƐSƐ SƐ WONOM ADURU ANAA?

Wɔayɛ nnuro bi a wɔde boa nkurɔfo ma wogyae sigaretnom. Ebi ne nea wɔfrɛ no nicotine patch no. Nnipa pii de saa nnuru yi yɛ adwuma, na ɛho aguadi abɛyɛ biribi a sika wom paa. Nanso ansa na wode saa nnuru yi bi bɛyɛ adwuma no, dwen nsɛmmisa yi ho hwɛ:

Mfaso bɛn na ɛwɔ so? Nnuru bebree wɔ hɔ a, nkurɔfo kyerɛ sɛ ebetumi aboa wo ama woagyae sigaretnom. Sɛnea obi regyae sigaretnom a ne ho yɛ no basabasa no, wɔkyerɛ sɛ, saa nnuru no brɛ no ase. Nanso ebinom ka sɛ, saa nnuru no mmoa ahe biara.

Ɔhaw bɛn na ebetumi de aba? Nnuru bi tumi kɔfa ɔhaw ba. Ɔhaw no bi ne sɛ ɛma obi bo fono no, ɛma n’adwene tu fra, na etumi yɛ no sɛ onkum ne ho mpo. Kae nso sɛ, nnuru a wɔde si nicotine ananmu no, nea ɛte ne sɛ, nicotine wɔ ɛno nso mu, na enye mma apɔwmuden. Nokware a ɛwom ne sɛ, sɛnea obi nom sigaret a etumi ka ne hɔ no, saa ara na sɛ obi fa saa nnuru no bi a, ɛno nso tumi ka ne hɔ.

Mmoa foforo bɛn na ɛwɔ hɔ? Nkurɔfo yɛɛ nhwehwɛmu bi faa wɔn a wɔagyae sigaretnom ho. Wohui sɛ, sɛ wofa nnipa 100 a wɔagyae sigaretnom a, emu 88 kaa sɛ, wogyaee nom prɛko pɛ a wɔannom aduru biara.

Hu Nea Wobɛfa Mu Ne Nea Wobɛyɛ

“Yɛn ba a yɛawo no foforo no nti, meyɛɛ m’adwene sɛ megyae sigaretnom. Enti mekyerɛw biribi bɔɔ yɛn fie hɔ sɛ, ‘Yɛnnom Sigaret Wɔ Ha.’ Nanso bɛyɛ dɔnhwerew baako pɛ, me kɔn dɔɔ sigaret ara ma na migye me ho a ennye. M’ani baa me ho so no, na masɔ sigaret.”​—Yoshimitsu a ɔwɔ Japan.

SƐNEA Yoshimitsu asɛm no ama yɛahu no, sɛ obi pɛ sɛ ogyae sigaretnom a, nea ɔfa mu no nyɛ agorɔ. Afei nso, nhwehwɛmu ama abɛda adi sɛ, nnipa a wɔyɛ sɛ wɔregyae sigaretnom a wɔsan kɔ ho no, yeyi mu 10 a, emu 9 de ahwease yɛ nna. Wei nti, sɛ wopɛ sɛ wutumi gyae paa a, ade a ɛbɛboa wo ne sɛ wubehu ɔhaw a wobɛfa mu ne nea wobɛyɛ wɔ ho. Wɔn a wɔregyae no, ɔhaw a wɔfa mu no bi ne sɛn?

Wɔn kɔn dɔ nicotine: Sɛ obi gyae sigaretnom na edi bɛyɛ nnansa a, ne kɔn san dɔ sigaret paa, na edi bɛyɛ nnawɔtwe mmienu a, na akɔnnɔ no abrɛ ase. Obi a wagyae sigaretnom kaa sɛ: “Akɔnnɔ no, ɛyɛ a ɛntoam; ɛba na ɛkɔ.” Sɛ wugyae a, mfe pii akyi mpo, etumi ba wo mu prɛko pɛ sɛ kɔnom bi. Ɛba saa a, ntutu mmirika nkɔpɛ bi nnom. Wotwɛn bɛyɛ simma nnum a, akɔnnɔ no betu ayera.

Ɔhaw foforo a wugyae a ebetumi aba: Sɛ obi gyae sigaretnom a, ahyɛase no, ɛreyɛ ara ni na ɔreda, na etumi yɛ den nso sɛ ɔde n’adwene besi ade baako so. Etumi ma nipa no yɛ kɛse nso. Ɔhaw foforo a etumi ba ne sɛ, etumi ma onii no ho tutu no, ne ho keka no, ɔtew fifiri, na ɔbɔ waw. Afei nso etumi ma nneɛma yɛ no ahi, ɛnkyɛ na ne bo afuw, na n’adwene nso tumi tu fra. Nanso saa nneɛma yi pii wɔ hɔ a, akyɛ ara, bosome baako kosi bosome baako ne fã na abrɛ ase.

Sɛ worefa saa ɔhaw yi bi mu a, nneɛma bi wɔ hɔ a wubetumi ayɛ na ama abrɛ ase. Ebi ni:

● Ɛyɛ a da yiye.

● Nom nsu pii, anaa nom biribi te sɛ akutu anaa aduaba foforo mu nsu. Di aduan a ahoɔden wom.

● Ɛyɛ a teɛteɛ w’apɔw mu.

● Wohome a, ɛyɛ a twe mframa kɔ wo mu paa, na fa w’adwene twa ho mfoni sɛ mframa pa ahyɛ w’aharawa ma.

Nneɛma a ebetumi ama wo kɔn asan adɔ sigaret: Nneɛma bi wɔ hɔ a, ebetumi ama wo kɔn adɔ sigaret paa. Ebi ne sɛ, ebia kan no sɛ worenom anonne bi a, wonom kakra a, na woatwe sigaret kakra. Sɛ saa a, ɛnde seesei a woregyae sigaretnom no, sɛ worenom annone bi a, nom no ntɛm. Ebedu baabi no, wubetumi anom anonne nkakrankra a hwee rensi.

Sɛ wugyae sigaretnom na nicotine no fi wo mu mpo a, akyiri yi koraa, nneɛma bi a woyɛ no daa no, ebetumi ama ayɛ wo sɛ nom sigaret. Torben a yɛkaa n’asɛm no kyerɛ mu sɛ, “Migyaee sigaretnom mfe 19 ni. Nanso ɛnnɛ yi nyinaa, sɛ mewɔ adwumam na mekɔnom kɔfe a, etumi ba me mu sɛ mennom sigaret.” Ne nyinaa mu no, nnipa pii fam no, nneɛma bi a wɔyɛ a ɛma wɔte nka sɛ wɔnkɔnom sigaret no, ebedu baabi no, wɔyɛ saa nneɛma no a, ɛremma wɔnte nka saa bio.

Sɛ woregyae sigaretnom a, nsã de, ɛnsɛ sɛ ɛba w’akwan mu. Ɛbɛyɛ papa sɛ worennom nsã koraa. Baabi a nkurɔfo nom nsã nso, ɛbɛyɛ papa sɛ worenkɔ hɔ, efisɛ wɔn a wɔregyae sigaretnom no, bere a wɔn mu pii san kɔ ho bio yɛ bere a wɔne nkurɔfo ahyiam renom nsã. Dɛn na ɛma ɛba saa?

● Wɔn a wɔnom sigaret no, sɛ wɔnom nsa kakraa bi mpo na sɛ wɔnom sigaret no a, ɛma wɔte nka sɛ wɔn ho asɛpɛw wɔn paa.

● Sɛ nnamfo hyiam sɛ wɔrenom nsa a, saa bere no ara nso na wɔtaa nom sigaret.

● Sɛ obi nom nsã a, etumi ka sɛnea ɔyɛ n’ade, na nea ɔmpɛ sɛ ɔyɛ koraa a, na ɔreyɛ. Ɛnyɛ nwonwa sɛ Bible kaa sɛ: ‘Nsã yi nea ɛma obi yɛ adepa fi hɔ.’—Hosea 4:11.

Ayɔnkofo: Hwehwɛ mu yiye ansa na wone obi abɔ. Ɛho nhwɛso ne sɛ, wɔn a wɔnom sigaret ne wɔn a ebia wɔbɛka sɛ wo ne wɔn nnom bi no, ɛnsɛ sɛ wo ne wɔn bɔ. Afei wɔn a woregyae a wobu w’abam, anaa wodi wo ho fɛw nso, twe wo ho fi wɔn ho.

Sɛnea wote nka: Wɔn a wogyae sigaretnom a wɔsan kɔnom no, nhwehwɛmu bi kyerɛ sɛ, wokyɛ wɔn mu mmiɛnsa a, emu mmienu de, ansa na wɔresan akɔ ho no, na wɔn bo afuw anaa nneɛma ahyɛ wɔn so. Sɛ wo bo fuw anaa biribi hyɛ wo so na ɛma w’adwene kɔ sigaret so a, ɛnde yɛ biribi ma w’adwene mfi so. Wubetumi anom nsu, woawe kyingam, anaa woakotu mpase. Bɔ mmɔden sɛ wubedwen nneɛma pa ho. Nea woyɛ a ɛbɛma woatumi ayɛ saa ne sɛ wobɛbɔ Onyankopɔn mpae anaa wobɛkan Bible mu asɛm bi.—Dwom 19:14.

Mfa Nsɛm Yi Nyiyi Wo Ho Ano

● Mɛtwe baako pɛ.

Nea ɛwom paa: Sɛ wosɔ sigaret na wotwe wusiw no baako pɛ a, nicotine dodow a na kan no ɛkɔ adwene no mu a ɛma wote nka sɛ wo ho asɛpɛw wo no, wubenya emu fã, na ebetumi adi nnɔnhwerew mmiɛnsa. Ɛba saa a, wobɛsan akɔ sigaretnom no mu bio.

● Sɛ nneɛma hyɛ me so na menom sigaret a, ɛma me ho tɔ me.

Nea ɛwom paa: Nkurɔfo ayɛ nhwehwɛmu ahu sɛ, sɛ nneɛma hyɛ obi so na ɔnom sigaret a, nicotine a ɛwom no ma dadwen no yɛ kɛse mmom. Sɛ obi te nka sɛ ne ho atɔ no a, nea ama aba saa ne sɛ, sigaret a ɔsan de kaa n’ano nti, sɛnea na ne ho yɛ no basabasa bere a ogyaee nom no akɔ fam bere tiaa bi.

● Madu akyiri dodo; merentumi nnyae.

Nea ɛwom paa: Sɛ w’abam bu a, worentumi nyɛ nea ɛsɛ sɛ woyɛ. Bible ka sɛ: “Sɛ w’aba mu bu amanehunu da mu a, w’ahoɔden bɛyɛ ketewaa bi.” (Mmebusɛm 24:10) Enti, mpa abaw. Obiara a n’ani abere sɛ obegyae sigaretnom no, sɛ ɔde akwankyerɛ te sɛ nea ɛwɔ nhoma yi mu no yɛ adwuma a, obetumi agyae.

● Migyae a, sɛnea me ho yɛ me no, mintumi koraa.

Nea ɛwom paa: Ɛwom, sɛ wugyae a wo ho betumi ayɛ wo basabasa paa, nanso nnawɔtwe kakraa bi akyi, ɛbɛba fam. Enti mia w’ani! Sɛ abosome anaa mfe bi akyi, ɛyɛ wo sɛ san nom sigaret a, nya abotare. Akyɛ ara simma kakraa bi, saa akɔnnɔ no nso bɛtew akɔ. Nea ehia ara ne sɛ worensɔ sigaret.

● Mewɔ adwene mu yare.

Nea ɛwom paa: Sɛ wowɔ adwene mu yare bi te sɛ adwenemhaw anaa nneɛma nkɔ yiye koraa wɔ adwene no mu (schizophrenia), na dɔkota rehwɛ wo a, ka kyerɛ no sɛ ɔmmoa wo na gyae sigaretnom. Ɛbɛyɛ no dɛ sɛ ɔbɛboa wo ama woagyae. Ebia ɔbɛsesa nnuru a ɔde ma wo no mu sɛnea ɛbɛyɛ a wugyae sigaretnom a, ɛrenhaw wo pii.

● Sɛ mesan kɔ sigaret ho a, ɛma mete nka sɛ magye nsam.

Nea ɛwom paa: Wɔn a wɔregyae sigaretnom no, ɛtɔ da a, biribi tumi si ma wɔsan kɔ sigaret ho bio. Sɛ biribi saa to wo a, ɛnkyerɛ sɛ agye nsam koraa. Mma w’aba mu mmu, mmom kɔ so bɔ wo ho mmɔden. Sɛ woretu mmirika na wohwe ase a, ɛnkyerɛ sɛ ɛno ara ne no. Wopa abaw mmom a na enye. Enti mfa ahwease nyɛ nna. Nkakrankakra wubedi nkonim!

Ma yɛnhwɛ nea ɛtoo ɔbarima bi a wɔfrɛ no Romualdo a ɔnom sigaret mfe 26. Bɛboro mfe 30 ni a ogyaee nom. Ɔkyerɛwee sɛ, “Mpɛn dodow a mesan kɔɔ sigaret ho de, yɛnkan. Bere biara a ɛbɛba saa no, na mayɛ basaa. Ná ɛyɛ me sɛ gyama merentumi nnyae nom da. Nanso misii m’adwene pi sɛ mepɛ sɛ me ne Yehowa Nyankopɔn nya ayɔnkofa papa, na mebɔɔ mpae mpɛn pii srɛɛ no sɛ ɔmmoa me. Ɛno na ɛboaa me ma mitumi gyaee nom koraa.”

Asɛm edi so a yɛde bewie no bɛma yɛahu nneɛma foforo a woyɛ a ɛbɛboa wo ama woatumi agyae sigaretnom koraa ama w’ani agye.

[Adaka/​Mfoni]

SƐNEA WƆAYƐ NO BIARA, ETUMI KUM

Wɔde tawa yɛ nneɛma pii. Sotɔɔ a wɔtontɔn nnuan ne abibiduru mpo, ɛtɔ da a wɔtɔn tawa ho nneɛma wom. Nanso, Wiase Nyinaa Akwahosan Ahyehyɛde no ka sɛ, “Tawa de, sɛnea wɔayɛ no biara, etumi kum.” Tawa tumi de nyarewa a edi awu pii te sɛ kansa ne komayare ba. Afei sɛ ɔbea nyem na ɔnom tawa a, ebetumi apira ne ba a ɔhyɛ yafunu mu no. Nneɛma a wɔde tawa ayɛ no, ebi ne sɛn?

Bidi: Ɛyɛ tawa a wɔakyekyere no te sɛ sigaret. Aman a ɛwɔ Asia paa na nkurɔfo taa nom bidi. Sɛ obi nom a, nicotine, carbon monoxide, ne awuduru bi a wɔfrɛ no tar a ɛkɔ ne mu no, sigaret a nkurɔfo nom no daa no mpo nto no.

Sigaa: Ɛyɛ tawa a wɔde tawa ahaban anaa tawa krataa akyekyere no denneennen. Sigaa nte sɛ sigaret a nkurɔfo nom no daa no. Sigaa de, tawa a ɛwɔ mu no, wɔayɛ no kwan bi so a, sɛ etua obi ano na ɔnsɔe koraa a, nicotine a ɛwom no tumi kɔ ne mu.

Kretek, anaa pɛprɛ sigaret: Ɛyɛ sigaret bi a wɔde tawa ne pɛprɛ ayɛ. Wɔfa tawa no susukuruwa 6 a, na wɔafa pɛprɛ no nso susukuruwa 4, na wɔde afra. Sɛ obi nom kretek a, nicotine, carbon monoxide, ne awuduru bi a wɔfrɛ no tar a ɛkɔ ne mu no, ɛkyɛn nea efi sigaret a nkurɔfo nom no daa mu no.

Abua: Sɛ obi nom abua a, enye nsen sigaret a nkurɔfo nom no daa no, efisɛ ne nyinaa tumi ma obi nya kansa ne nyarewa foforo.

Tawa a wɔnnom no sɛ sigaret: Ebi ne bonto a obi twiw, asra a wohua, ne gutkha a nkurɔfo we wɔ Asia anaafo apuei. Nicotine a ɛwom no fa onii no anom kɔ ne mogya mu. Sɛnea nneɛma afoforo a wɔde tawa ayɛ tumi di awu no, saa ara na tawa a wɔnnom no sɛ sigaret te.

Shisha: Ɛyɛ biribi a nkurɔfo de nom tawa. Ɛde tawa wusiw no fa nsu mu ansa na nea ɔrenom no atwe akɔ ne mu. Nanso, ɛde wusiw no fa nsu mu mpo a, awuduru a etumi kɔfa kansa ne nyarewa foforo ba a ɛkɔ aharawa no mu no, ɛntew so ahe biara.

[Adaka/​Mfoni]

OBI PƐ SƐ OGYAE A, NEA WUBETUMI AYƐ ABOA NO

● Hyɛ no nkuran. Sɛ obi rebɔ mmɔden sɛ obegyae sigaretnom, na wokamfo no bɔ n’aba so a, ɛboa sen sɛ wobɛka n’anim anaa wobɛkasa pii. Sɛ woka biribi te sɛ, “Mma w’abam mmmu, ɛbɛyɛ yiye” a, ɛbɛboa no paa asen sɛ wobɛka biribi te sɛ “Enti woasan akɔnom bio?”

● Mfa w’adwene nsi ne mfomso so. Sɛ obi pɛ sɛ ogyae sigaretnom na ɔde abufuw keka nsɛm a ɛyɛ yaw kyerɛ wo a, mma no nnhaw wo. Wubetumi aka nsɛm bi te sɛ, “Minim sɛ ɛnna fam, nanso migye wo di sɛ wubetumi agyae.” Nka da sɛ, “Efi bere a wugyaee sigaretnom yi, minhu wo yiye koraa!”

● Yɛ adamfo pa. Bible ka sɛ: “Ɔyɔnko berɛbo de, ɔkyerɛ ne dɔ bere nyinaa, na ɔyɛ onua a wɔwoo no maa amanehunu bere.” (Mmebusɛm 17:17) Enti sɛ obi rebɔ mmɔden sɛ obegyae sigaretnom a, ne suban sesa sɛ dɛn mpo a, bere biara a obehia wo mmoa no, nya ne ho abotare na dɔ no “bere nyinaa.”

Wubetumi Adi Nkonim!

BERE aso sɛ ‘wunya akokoduru’ na wutu anammɔn. (1 Beresosɛm 28:10) Nneɛma bɛn bio na woyɛ a ebetumi ama woagyae sigaretnom?

Hyɛ da a wubegyae. U.S. Asoeɛ a Ɛhwɛ Apɔwmuden Ne Nnipa Ahiade Ho Nsɛm So no kaa sɛ, efi da a wubesi gyinae sɛ woregyae sigaretnom kosi da a wopɛ sɛ wugyae koraa no, ɛnsɛ sɛ ɛboro nnawɔtwe mmienu. Anyɛ saa a, sɛnea aba wo mu sɛ wubegyae no bɛkɔ fam. Ɛda a wopɛ sɛ wugyae no, fa hyɛ wo kalenda so, ka ho asɛm kyerɛ wo nnamfo, na sɛ nneɛma sesa mpo a, bɔ mmɔden di so.

Kyerɛw biribi wɔ krataa so na ɛmmɔ wo nkae. Nea wubetumi akyerɛw wɔ so ne nea edidi so yi ne biribi foforo biara a ɛbɛhyɛ wo den ama woatumi agyae:

● Nea enti a wopɛ sɛ wugyae

● Nnipa a ɛba sɛ wo kɔn dɔ sigaret a wobetumi aboa wo no fon nɔma

● Nsɛm a wubetumi adwen ho na ahyɛ wo den. Ebi ne Bible mu nsɛm bi te sɛ nea ɛwɔ Galatifo 5:22, 23 no.

Krataa a woakyerɛw nsɛm wɔ so no, fa hyɛ wo ho bere nyinaa, na da mu no nyinaa kan mu mpɛn pii. Sɛ wutumi gyae nom mpo a, bere biara a wo kɔn bɛdɔ no, san fa krataa no kan mu.

Nneɛma a ɛma wo kɔn taa dɔ sigaret no, di kan yɛ ho biribi. Ansa na da a woahyɛ sɛ wubegyae no bɛso no, fi ase yɛ nneɛma bi a ɛbɛma ayɛ den sɛ wobɛnom sigaret. Sɛ wo haw ne sɛ anɔpa biara wosɔree ara na worenom a, ɛnde ɛyɛ a twɛn bɛyɛ dɔnhwerew baako anaa nea ɛboro saa ansa na woanom. Sɛ woyɛ obi a wonom sigaret bere a woredidi anaa bere a woadidi awie a, ɛnde nnom no saa bere no bio. Afei baabiara a nkurɔfo nom sigaret no, mmɛn hɔ. Sɛ obiara nni wo nkyɛn a, ɛyɛ a ka ma empue w’ano sɛ: “Daabi, merennom. Magyae sigaretnom.” Wutu saa anammɔn no a, ɛbɛma woasiesie wo ho atwɛn da a wubegyae koraa no. Afei nso ɛbɛma woakae sɛ ɛrenkyɛ wubegyae sigaretnom.

Boaboa wo ho. Bere a woahyɛ sɛ wubegyae sigaretnom no, sɛ ɛreyɛ adu a, pɛ nneɛma bi gu hɔ na ɛyɛ a woawe. Ebi ni: karɔt a wɔatwitwa no nteaanteaa, kyingam, nkate, anaa nneɛma foforo a wubetumi awe. Ɛyɛ a kae wo nnamfo ne w’abusuafo sɛ ɛda sei na woahyɛ sɛ wubegyae, na kyerɛ wɔn nea wobetumi ayɛ aboa wo. Ɛda no reyɛ adu a, ade a ɛyɛ a wode sigaret sin ne nsõ gu mu, ne nea wode sɔ sigaret no, tow ne nyinaa gu. Biribiara a ebetumi atwetwe wo ama woasan akɔ sigaret ho no, yi ne nyinaa kɔtow gu. Ebi ne sigaret a ɛdeda fie hɔ, nea ɛwɔ wo kar mu anaa ɛhyɛ wo bɔtɔ mu, ne nea ɛwɔ adwumam. Sɛ ebi mmɛn wo a, ɛbɛyɛ mmerɛw sɛ wubegyae, efisɛ ɛyɛ den sɛ wobɛka akyerɛ w’adamfo bi sɛ ɔmma wo sigaret nnom anaasɛ wobɛkɔ akɔtɔ bi anom. Afei nso, kɔ so ara bɔ Onyankopɔn mpae sɛ ɔmmoa wo. Bere a woagyae no, saa bere no koraa na ehia sɛ wobɔ mpae no kɛse.—Luka 11:13.

Sigaret yɛ adamfo bɔne a onya wo a obepira wo, nanso nnipa bebree atumi ne saa adamfo bɔne a bere bi na wɔne no nam yi “atwa adamfo” mu. Wo nso wubetumi atetew wo ho. Woyɛ saa a, wubenya apɔwmuden, na fahodi kɛse da hɔ retwɛn wo.

[Mfoni]

Krataa a woakyerɛw nsɛm wɔ so no, fa hyɛ wo ho bere nyinaa, na da mu no nyinaa kan mu mpɛn pii