Ti 10

Tumi a Yesu Wɔ Wɔ Adaemone So

SO WOKAE nea enti a Onyankopɔn abɔfo mu biako bɛyɛɛ Satan Ɔbonsam no?— Ɛyɛ pɛsɛmenkominya akɔnnɔ a onyae a ɛne sɛ ɔpɛ sɛ wɔsom no no na ɛma ɔsɔre tiaa Onyankopɔn. So abɔfo foforo bɛyɛɛ Satan akyidifo?— Yiw, wɔyɛɛ saa. Bible frɛ wɔn ‘Satan abɔfo,’ anaa adaemone.—Adiyisɛm 12:9.

So abɔfo bɔne yi, anaa adaemone no gye Onyankopɔn di?— Bible ka sɛ ‘adaemone no gye di sɛ Onyankopɔn wɔ hɔ.’ (Yakobo 2:19) Nanso mprempren wosuro. Nea enti a ɛte saa ne sɛ wonim sɛ Onyankopɔn bɛtwe wɔn aso wɔ nneɛma bɔne a wɔayɛ no ho. Bɔne bɛn na wɔayɛ?—

Bible ka sɛ saa abɔfo yi gyaw wɔn ankasa trabea a eye wɔ ɔsoro hɔnom baa asase so bɛtraa ase sɛ nnipa. Wɔyɛɛ eyi efisɛ na wɔpɛ sɛ wɔne mmea a wɔn ho yɛ fɛ wɔ asase so no nya nna mu nkitahodi. (Genesis 6:1, 2; Yuda 6) Dɛn na wunim fa nna mu nkitahodi ho?—

Nna mu nkitahodi yɛ bere a ɔbarima ne ɔbea hyiam wɔ ɔkwan titiriw bi so. Ɛno akyi no, akokoaa betumi anyin wɔ maame no yafunu mu. Nanso ɛyɛ mfomso sɛ abɔfo benya nna mu nkitahodi. Onyankopɔn pɛ sɛ ɔbarima ne ɔbea a wɔaware nkutoo na wonya nna mu nkitahodi. Saa kwan no so na sɛ wɔwo akokoaa a, okunu ne ɔyere no betumi ahwɛ no.

Bere a abɔfo danee wɔn ho nnipa na wɔne asase so mmea dae no, wɔn mma no nyinyin bɛyɛɛ abran. Na wɔn tirim yɛɛ den yiye, na na wopira nnipa. Enti Onyankopɔn de nsuyiri kɛse bae bɛsɛee abran no ne nnipa abɔnefo nyinaa. Nanso ɔmaa Noa yɛɛ adaka, anaa ɛhyɛn kɛse bi, de gyee nnipa kakraa bi a wɔyɛɛ nea ɛteɛ nkwa. Ɔkyerɛkyerɛfo Kɛse no kae sɛ ehia sɛ yɛkae nea esii wɔ Nsuyiri no mu no.—Genesis 6:3, 4, 13, 14; Luka 17:26, 27.

Bere a Nsuyiri no bae no, so wunim nea ɛtoo abɔfo bɔne no?— Wɔankɔ so amfa honam nipadua a na wɔn ankasa ayɛ no anni dwuma bio, na wɔsan kɔɔ soro. Nanso wɔantumi anyɛ Onyankopɔn abɔfo bio, enti wɔbɛyɛɛ Satan abɔfo, anaa adaemone. Na dɛn na ɛtoo wɔn mma abran no?— Wowuwui wɔ Nsuyiri no mu. Na saa ara na nnipa abɔnefo a wɔantie Onyankopɔn no nyinaa nso wuwui.

Efi bere a Nsuyiri no bae akyi no, Onyankopɔn mmaa adaemone no kwan mma wɔmmɛyɛɛ sɛ nnipa bio. Na ɛwom sɛ yentumi nhu adaemone no de, nanso wɔda so ara bɔ mmɔden sɛ wɔbɛma nnipa ayɛ nneɛma bɔne a enye koraa. Wɔreyɛ nneɛma bɔne sen bere biara. Eyi te saa efisɛ wɔatow wɔn afi soro agu asase so.

So wunim nea enti a yentumi nhu adaemone no?— Efisɛ wɔyɛ ahonhom. Nanso yebetumi agye adi sɛ wɔwɔ hɔ. Bible ka sɛ Satan ‘redaadaa nnipa a wɔwɔ wiase nyinaa’ na n’adaemone no reboa no.—Adiyisɛm 12:9, 12.

So Ɔbonsam ne n’adaemone no betumi adaadaa yɛn nso?— Yiw, sɛ yɛanhwɛ yiye a wobetumi adaadaa yɛn. Nanso ɛnsɛ sɛ yesuro. Ɔkyerɛkyerɛfo Kɛse no kae sɛ: ‘Ɔbonsam nni me so tumi.’ Sɛ yɛkɔ so bɛn Onyankopɔn a, ɔbɛbɔ yɛn ho ban afi Ɔbonsam ne n’adaemone no ho.—Yohane 14:30.

Ehia sɛ yehu nneɛma bɔne a adaemone bɔ mmɔden sɛ wɔbɛma yɛayɛ no. Enti susuw ho hwɛ. Nneɛma bɔne bɛn na adaemone no yɛe bere a wɔbaa asase so no?— Ansa na Nsuyiri no reba no, wɔne mmea nyaa nna mu nkitahodi, biribi a na abɔfo nni ho kwan sɛ wɔyɛ. Ɛnnɛ, sɛ nnipa antie Onyankopɔn mmara a ɛfa nna ho no a, adaemone no ani gye. Ma mimmisa wo, Henanom nkutoo na ɛsɛ sɛ wonya nna mu nkitahodi?— Woabua no yiye, awarefo nkutoo.

Ɛnnɛ, mmarimaa ne mmeawa binom nya nna mu nkitahodi, nanso ɛyɛ bɔne ma wɔn. Bible no kyerɛ sɛ Onyankopɔn na ɔbɔɔ ɔbarima ne ɔbea awode. (Leviticus 15:1-3) Yehowa bɔɔ akwaa ahorow yi maa atirimpɔw titiriw bi a ɛsɛ sɛ awarefo nkutoo na wɔde di dwuma. Sɛ nnipa yɛ nneɛma a Yehowa abara a, ɛma adaemone no ani gye. Sɛ nhwɛso no, sɛ abarimaa ne abeawa de wɔn awode di agoru a, adaemone no pɛ. Yɛmpɛ sɛ adaemone no ani gye, so yɛpɛ saa?—

Biribi foforo nso wɔ hɔ a adaemone no ani gye ho nanso Yehowa kyi. So wunim ade ko?— Basabasayɛ. (Dwom 11:5) Basabasayɛ yɛ bere a nnipa di atirimɔdensɛm na wopira afoforo no. Kae sɛ, ɛno na abran no, adaemone mma no yɛe.

Adaemone no ani gye ho sɛ wobehunahuna nnipa nso. Ɛtɔ mmere bi a wɔyɛ wɔn ho te sɛ nnipa a wɔawuwu. Ebia wobesuasua wɔn a wɔawuwu no nne mpo. Wɔ ɔkwan a ɛte saa so no adaemone no daadaa nnipa pii ma wogye di sɛ nnipa a wɔawuwu no te ase na wobetumi ne ateasefo akasa. Yiw, adaemone ma nnipa pii gye di sɛ nsamanfo wɔ hɔ.

Enti ɛsɛ sɛ yɛma yɛn ani da hɔ na Satan ne n’adaemone no annaadaa yɛn. Bible bɔ kɔkɔ sɛ: ‘Satan bɔ mmɔden sɛ ɔbɛyɛ ne ho sɛ ɔbɔfo pa, na n’asomfo nso yɛ saa ara.’ (2 Korintofo 11:14, 15) Nanso, nokwarem no, adaemone no nye. Ma yɛnhwɛ ɔkwan a ebia wɔnam so bɔ mmɔden sɛ wɔbɛma yɛayɛ sɛ wɔn no.

Ɛhe na nkurɔfo sua basabasayɛ ne nna mu nneyɛe a ɛmfata ne ahonhom abɔde, ne nsamanfo ho ade fi?— Ɛnyɛ television ne sini ahorow bi a wɔhwɛ, kɔmputa ne video agodie ahorow, Intanɛt so a wɔkɔ, ne aseresɛm nhoma a wɔkenkan mu? So eyinom a yɛbɛyɛ no twe yɛn bɛn Onyankopɔn anaa Ɔbonsam ne n’adaemone no? Wususuw ho dɛn?—

Hena na wususuw sɛ ɔpɛ sɛ yetie na yɛhwɛ nneɛma bɔne?— Ɛyɛ Satan ne n’adaemone no. Enti dɛn na ɛsɛ sɛ me ne wo yɛ?— Ehia sɛ yɛkenkan, yetie, na yɛhwɛ nneɛma a ɛso wɔ mfaso a ɛbɛboa yɛn ma yɛasom Yehowa. So wubetumi adwennwen nneɛma pa a yebetumi ayɛ no bi ho?—

Sɛ yɛyɛ nneɛma pa a, ɛnsɛ sɛ yesuro adaemone. Yesu ho yɛ den sen wɔn, na wosuro no. Da bi adaemone no teɛɛm kyerɛɛ Yesu sɛ: “Wobae sɛ wobɛsɛe yɛn?” (Marko 1:24) Sɛ bere du sɛ Yesu bɛsɛe Satan ne n’adaemone no a, so yɛn ani rennye?— Enkosi saa bere no, sɛ yɛbɛn Yesu ne ne soro Agya no a, yebetumi anya awerɛhyem sɛ Yesu bɛbɔ yɛn ho ban afi adaemone ho.

Ma yɛnkenkan nea ehia sɛ yɛyɛ wɔ 1 Petro 5:8, 9 ne Yakobo 4:7, 8.

[Mfonini wɔ kratafa 57]

Dɛn na abɔfo yi yɛe a na ɛnteɛ?

[Mfonini wɔ kratafa 58]

Dɛn nti na ɔhaw pii wɔ asase so nnɛ sen bere biara?

[Mfonini ahorow wɔ kratafa 60]

Sɛ yɛhwɛ basabasayɛ a, dɛn na ebetumi aba?

[Mfonini wɔ kratafa 61]

Dɛn na ɛfata sɛ yɛyɛ?