Yi a Wubeyi Ama Ato Wo Honam

EFI NYAN! KYERƐWFO A ƆWƆ AUSTRALIA HƆ

SƐ ƆBARIMA bi de simma anum yi n’abogyesɛ da biara mfirihyia 50 a, n’asetra mu nnafua 63 ne kakra na ɔde yi n’abogyesɛ! Mmarima bu ade a wɔyɛ no daa yi dɛn?

Nsɛm yi na ɛdaa adi wɔ nhwehwɛmu bi a wɔyɛɛ no nnansa yi fa ayi ho mu: “M’ani nnye ho.” “Mikyi.” “Ɛyɛ asetra mu nneɛma a ɛhaw adwene no biako.” “Ɛyɛ biribi a sɛ wo yam a anka enni hɔ koraa.” Dɛn nti na mmarima binom wɔ ɔpɛ a emu yɛ den sɛ woyi wɔn abogyesɛ? Momma yensua anim nhwi a woyi ho ade kakra. Ebia yebetumi ahu nea enti a ɛte saa.

Efi Nworaa so Kosi Blade So

Wobɛgye adi sɛ nkurɔfo de ɔworaa, oboodede sē, anaa twerɛbo mpo yi? Adesamma atumi afa ɔkwan a ɛyɛ nwonwa so ayɛ nnwinnade a wɔde yi! Wɔ tete Misraim no, na mmarima de oyiwan a ɛte sɛ akuma a wɔde kɔbere ayɛ na eyi. Nnansa yi ara wɔ afeha 18 ne 19 mu, na wɔyɛɛ nea na nkurɔfo frɛ no atwamene wɔ Sheffield, England. Wɔtaa siesie blade yi kama a wɔatu tokuro wom a sɛ wɔremfa nyɛ hwee a, wutumi ka hyɛ tokuro no mu. Ná ɛsɛ sɛ wɔyɛ ahwɛyiye kɛse bere a wɔde blade ahorow yi redi dwuma no, efisɛ akyinnye biara nni ho sɛ ansa na obi behu sɛnea wɔde di dwuma yiye no, na atwitwa no kakra. Wɔ wɔn a na wɔn ho nkokwaw kɛse fam no, na wotumi pira bere a wɔde nnwinade yi di dwuma no. Nanso, ɔhaw no fii hɔ wɔ afeha 20 no mu.

Wɔ 1901 mu no, ɔbarima bi a ofi United States a wɔfrɛ no King Camp Gillette yɛɛ blade bi a ɛfata a sɛ woyi wie a wotumi to kyene. Nnipa a wɔwɔ wiase nyinaa fii ase yɛɛ ne de no bi, na awiei koraa no, nnipa pii yɛɛ blade a egu ahorow a wɔde dwetɛ anaa sika kɔkɔɔ na ayɛ. Blade a wɔayɛ nnansa yi bi ne nea sɛ woyi wie a wotumi tow kyene, nea blade abien anaa abiɛsa hyehyem, ne blade a wotumi bue so.

Nea ɛnsɛ sɛ yɛma yɛn werɛ fi nso ne blade a ɛde anyinam ahoɔden na ɛyɛ adwuma, a wodii kan tɔnee wɔ 1931 mu no. Sɛnea etumi yi no ama nnipa pii ani agye ho, nanso nnipa dodow no ara a wɔpɛ sɛ woyi ma ɛto honam no ani da so ara gye blade a ano yɛ nnam paa ho.

Ɛnnɛ Wɔyɛ a, Ɔkyena na Wɔagyae

Abogyesɛ a woyi anaa wogya adi akɔneaba wɔ adesamma abakɔsɛm mu. Everyday Life in Ancient Egpypt nhoma no ka sɛ, na tete Misrifo “mma wɔn nhwi mfuw, na na wɔde hoahoa wɔn ho sɛ wonim yi sen obiara, efisɛ na wɔde blade papa a na wɔkora no wɔ boaa a wɔde aboa nhoma ayɛ mu na eyi.” Eyi ma yehu nea enti a Yosef a na ɔyɛ Hebrini deduani no yii ansa na ɔrekɔ Farao anim no.—Genesis 41:14.

Ná Asiriafo yɛ nnipa a wogya wɔn abogyesɛ. Na wɔsɛe bere pii wɔ wɔn abogyesɛ ho gyaw ma no bɔ nkyerewa fɛfɛɛfɛ, na wɔagye bere abɔ nhwi no kama.

Ná tete Israelfo mmarima nso gyaw abogyesɛ wɔ ɔkwan a ɛfata so, na na wɔde blade yi nhwi no kama. Ɛnde dɛn na na Onyankopɔn Mmara kyerɛ bere a ɛhyɛɛ Israelfo mmarima sɛ ‘wɔnnkonton wɔn nhwi ano’ anaa ‘wɔnnsɛe wɔn abogyesɛ ano’ no? Ná eyi nkyerɛ sɛ ɛnsɛ sɛ obi bubu ne ti nhwi anaa n’abogyesɛ so. Mmom no, ɛkaee Israelfo mmarima no sɛnea ɛbɛyɛ a wɔrensua aman a wɔsom abosom a na wɔatwa wɔn ho ahyia no nyamesom nneyɛe a ɛtra so no.a—Leviticus 19:27; Yeremia 9:25, 26; 25:23; 49:32.

Wɔ tete Helafo mu no, na wɔn nyinaa gyaw wɔn abogyesɛ, gye adehye no nkutoo na na ɛsɛ sɛ woyi wɔn abogyesɛ ma ɛkɔ fam kama. Ayi fii ase wɔ Roma wɔ afeha a ɛto so abien A.Y.B. mu, na ɛno akyi mfehaha pii no, yi a woyi daa bɛyɛɛ wɔn amammerɛ fa.

Nanso bere a Roma Ahemman no hwee ase no, wofii ase gyaw wɔn abogyesɛ bio, na wɔyɛɛ saa mfirihyia 1,000 de kosii afeha a ɛto so 17 no fã a edi akyi no mu, na abogyesɛ a woyi san bɛyɛɛ ade a wɔyɛ daa. Abogyesɛ a woyi ma no to honam kɔɔ so wɔ afeha 18 no mu nyinaa. Nanso, ɛde besi afeha 19 no mfinimfini de rekɔ n’awiei no, abogyesɛ ho asɛm no san sakrae. Enti, C. T. Russell, a na ɔyɛ Ɔwɛn Aban Asafo no titrani a odi kan ne ne yɔnko Kristoni W. E. Van Amburgh mfonini no kyerɛ sɛ na mmarima baanu yi gyaw abogyesɛ a wɔatwitwa so kama a na ɛfata wɔn bere no so. Nanso, wasan fii ase yii abogyesɛ bio wɔ afeha 20 yi mfiase no mu, na aman pii akɔ so ayi wɔn abogyesɛ de abesi nnɛ.

So woyɛ mmarima ɔpepem pii a wogyina ahwehwɛ anim de blade yi wɔn abogyesɛ daa no mu biako? Sɛ ɛte saa a, akyinnye biara nni ho sɛ wopɛ sɛ woyɛ saa wɔ ɔkwan a ɛfata na wumpira so. Nea ɛbɛyɛ na woatumi ayɛ saa no, ebia wobɛpɛ sɛ wususuw nyansahyɛ a ɛwɔ adaka “Blade a Wɔde Yi Ho Akwankyerɛ” mu no ho. Ɛda adi sɛ wode nyansahyɛ ahorow yi mu bi di dwuma dedaw. Sɛnea ɛte biara no—yi w’abogyesɛ kama!

[Ase hɔ asɛm]

[Adaka/Mfonini wɔ kratafa 13]

Blade a Wɔde Yi Ho Akwankyerɛ

Men’s Hair nhoma no de nyansahyɛ ahorow yi ma na ama wɔatumi de blade ayi yiye.b

 1. Fɔw w’asontɔrem nhwi no: Ɔkwan biako pɛ a wubetumi afa so ama w’abogyesɛ afɔw yiye ne sɛ wode nsuɔhyew pii bɛyɛ. Sɛ ebetumi a, guare ansa na woayi efisɛ eyi ma nhwi no tumi fɔw yiye.

 2. Fa nnuru a wɔde yi yɛ hɔ: Samina, ahuru, nku, ne srade horow nyinaa a wɔde yi di nneɛma titiriw abiɛsa ho dwuma. (1) Ɛfɔw nhwi no, (2) ɛma nhwi no mu sane na (3) ɛma honam no yɛ tromtrom sɛnea ɛbɛyɛ a blade no betumi afa so yiye. Ɛsɛ sɛ wode nnuru a eye ma wo na eyi. O, woasɔ srade a wɔde sra nhwi mu no ahwɛ? Ɛno nso tumi ma nhwi yɛ mmerɛw.

 3. Fa blade papa yi wɔ ɔkwampa so: Blade a ɛyɛ papa no ne nea ano yɛ nnam. Blade a ano akum betumi apira wo. Hwɛ baabi a wo nhwi no fuw kɔ na yi no saa ara. Sɛ woanyi ankɔ faako a wo nhwi no fuw kɔ no a, ebetumi atɔ so de, nanso ebetumi atwetwe nhwi no afi honam no mu, na ɛbɛma nhwi no afuw afa baabiara a ɛpɛ sen sɛ anka ɛbɛfa ɔkwan a ɛfa so fuw no ara so. Sɛnea ebinom kyerɛ no, ɔkwampa a wɔmfa so nyi—wɔ mmarima ne mmea fam—no betumi ama nsoa agu wɔn anim.

 4. Nnuru a wɔde sra faako a wɔayi no: Bere biara a wubeyi no, wotwerɛ ɔhonam no fa bi a aniwa nhu gu, na ɛma no yɛ mmerɛw sɛ ɔyare mmoawa bɛkɔ wo honam mu. Enti, ɛyɛ papa sɛ wode nsu pa bɛhohoro efi biara a aka wɔ w’anim no—nea edi kan no fa nsuɔhyew hohoro, na afei fa nsuonwini gu so ma nhwi ntokuru no ntuatua. Sɛ wopɛ a, wubetumi de nnuru asra faako a woayi no na ama ɛhɔ adwo fɔmm.

[Ase hɔ asɛm]

[Adaka/Mfonini wɔ kratafa 14]

Dɛn Ne Asontɔrem Nhwi?

Ɛyɛ nhwi a efuw wɔ obi asontɔrem. Protein a ɛwɔ ahoɔdennuru te sɛ keratin mu na ɛma saa nhwi yi fuw. Keratin yɛ biribi a ɛma nhwi fuw a ahoɔdennuru te sɛ protein a sulfur wom a ɛwɔ nipa anaa aboa honam mu, na ɛno titiriw na ɛma nhwi, bɔwerɛ, ntakra, mmoa tɔte, ne mmɛn fuw. Asontɔrem nhwi ka nhwi a ɛwɔ nipadua no ho a ɛyɛ den na ne yi nna fam no ho, ɛte sɛ nea ɛyɛ den sɛ obi betwa kɔbere dade a ne kɛse te sɛ asontɔrem nhwi no ara pɛ. Nhwi yi bɛyɛ 25,000 na ɛwɔ ɔbarima biara anim, na nnɔnhwere 24 biara efuw bɛyɛ milimita fã.

[Asɛm Fibea]

Men: A Pictorial Archive from Nineteenth-Century Sources/Dover Publications, Inc.

[Mfonini ahorow wɔ kratafa 14]

Abogyesɛ a woyi abɛyɛ biribi a ɛnnɛ wɔyɛ a, ɔkyena na wɔagyae

Asiriani

Misrini

Romani

[Nsɛm Fibea]

Museo Egizio di Torino

Britania tete nneɛma Akorae na wɔmaa kwan maa wotwaa mfonini yi