Wɔyɛɛ Yehowa Apɛde
Bɔne Fafiri Bue Kwan Ma Nkwagye
YAKOB mmabarima du no a na wogyina Misraim man soafo panyin no anim no daa ahintasɛm bi a ɛyɛ hu yiye adi. Mfe bi a atwam no, na wɔatɔn wɔn nuabarima Yosef kɔ nkoasom mu, na wɔbɔɔ wɔn tirim ka kyerɛɛ wɔn agya sɛ aboa bɔne bi akum Yosef.—Genesis 37:18-35.
Afei, bɛyɛ mfe 20 akyi no, ɔkɔm a ano yɛ den bi maa mmarima du yi kɔɔ Misraim sɛ wɔrekɔtɔ aduan. Nanso nneɛma anyɛ mmerɛw amma wɔn. Ɔman soafo panyin no, a na ɔsan som sɛ aduan sohwɛfo no, bɔɔ wɔn sobo sɛ wɔyɛ akwansrafo. Ɔde wɔn mu biako too afiase na ɔhyɛɛ wɔn a wɔaka no sɛ wɔnkɔ fie nkɔfa wɔn nua kumaa, Benyamin, mmra. Bere a wɔyɛɛ saa no, ɔman soafo panyin no faa kwan bi so maa wɔkyeree Benyamin.—Genesis 42:1–44:12.
Yuda, a ɔyɛ Yakob mmabarima no mu biako no, ne wɔn anyɛ adwene. Ɔkae sɛ, ‘Sɛ yɛkɔ fie a Benyamin nka ho a, yɛn agya bewu.’ Afei biribi sii a na Yuda ne wɔn a wɔka ne ho wɔ akwantu no mu nyinaa nhwɛ kwan. Bere a ɔhyɛe sɛ obiara mfi dan no mu, ma ɛnka Yakob mma no akyi no, ɔman soafo panyin no sui denneennen. Afei, bere a ne ho baee no no, ɔkae sɛ: “Mene Yosef.”—Genesis 44:18–45:3.
Mmɔborohunu ne Ogye
Yosef bisaa n’agya mma no sɛ: “M’agya da so te ase anaa?” Wɔammua. Nokwarem no, na Yosef agya mma no nhu nea wɔnka. So wɔntɔ piti anaasɛ wɔmmɔ hu? Anyɛ yiye koraa no, mfe 20 a atwam ni no, wɔtɔn saa nipa yi kɔɔ nkoasom mu. Ná Yosef wɔ hokwan biara sɛ ɔde wɔn to afiase, ma wɔkɔ fie a ɔmma wɔn aduan, anaa—nea ɛyɛ hu sen saa koraa—okum wɔn! Ntease pa mu no, Yosef agya mma no “antumi ammua no, na mmom wɔn ho dwiriw wɔn wɔ n’anim.”—Genesis 45:3.
Yosef dwudwoo wɔn ntɛm ara. Ɔkae sɛ: “Muntwiw mmɛn me.” Wɔyɛɛ saa. Afei ɔkae sɛ: “Mene mo nua Yosef a motɔn no baa Misraim no. Na afei mommma ɛnnyɛ mo yaw, nso mo bo mmfuw mo ho mo ho sɛ motɔn me baa ha, efisɛ nkwagye nti na Onyankopɔn somaa me dii mo anim.”—Genesis 45:4, 5.
Yosef anna mmɔborɔhunu a enni nnyinaso adi. Ná wadi kan ahu biribi a ɛkyerɛ sɛ wɔanu wɔn ho. Sɛ nhwɛso no, bere a Yosef bɔɔ n’agya mma no sobo sɛ wɔyɛ akwansrafo no, ɔtee sɛ wosisee wɔn ho sɛ: “Ampa ara, yedi yɛn nua no ho fɔ . . . enti na saa ahohia yi aba yɛn so.” (Genesis 42:21) Afei nso, Yuda tuu ne ho mae sɛ ɔbɛyɛ akoa asi Benyamin ananmu na aberantewaa no atumi akɔ n’agya nkyɛn.—Genesis 44:33, 34.
Enti, na ɛfata sɛ Yosef da mmɔborɔhunu adi. Nokwarem no, ohui sɛ saa a ɔbɛyɛ no betumi ama n’abusua mũ no nyinaa anya nkwa. Enti, Yosef ka kyerɛɛ n’agya mma no sɛ wɔnsan nkɔ wɔn agya Yakob nkyɛn nkɔka nkyerɛ no sɛ: “Sɛ wo ba Yosef se ni: Onyankopɔn de me ayɛ Misraim nyinaa so wura. Sian bra me nkyɛn. Nkyɛ! Na bɛtra Gosen asase so, na woabɛn me, wo ne wo mma ne wo mma mma ne wo nguan ne w’anantwi ne nea wowɔ nyinaa, na mɛhwɛ wo wɔ hɔ.”—Genesis 45:9-11.
Yosef Ɔkɛseɛ No
Yebetumi afrɛ Yesu Kristo, Yosef Ɔkɛseɛ, efisɛ nsɛdi kɛse da mmarima baanu yi ntam. Te sɛ Yosef no, Yesu nuanom a wɔyɛ Abraham asefo no yɛɛ no ayayade. (Fa toto Asomafo no Nnwuma 2:14, 29, 37 ho.) Nanso, mmarima baanu yi nyinaa nyaa asetra mu nsakrae a ɛyɛ nwonwa. Bere bi akyi no, Yosef dibea sɛ akoa no sesa bɛyɛɛ ɔman soafo panyin a na Farao pɛ na ɔsen no. Saa ara na, Yehowa nyanee Yesu fii awufo mu, maa no so kɛse “kɔɔ Onyankopɔn nifa.”—Asomafo no Nnwuma 2:33; Filipifo 2:9-11.
Sɛ ɔsoafo panyin no, na Yosef betumi ama wɔn a wɔbɛba Misraim sɛ wɔrebɛtɔ aduan no nyinaa aburow. Ɛnnɛ, Yosef Ɔkɛseɛ no wɔ akoa nokwafo ne ɔbadwemma kuw no wɔ asase yi so a ɔnam wɔn so de honhom mu aduan rema wɔ “ɛbere a ɛsɛ mu.” (Mateo 24:45-47; Luka 12:42-44) Yiw, wɔn a wɔba Yesu nkyɛn no yɛ nea “ɔkɔm renne wɔn bio, nso osukɔm renne wɔn bio, . . . Na oguammaa a ɔwɔ ahengua no mfinimfini no bɛyɛn wɔn, na ɔde wɔn akɔ nkwa asuti ho.”—Adiyisɛm 7:16, 17.
Asuade Ma Yɛn
Yosef de mmɔborɔhunu ho nhwɛso a ɛda nsow ma. Ná ɛteɛ koraa sɛ ɔtwe wɔn a wɔtɔn no kɔɔ nkoasom mu no aso. Nea ɛne no bɔ abira no, anka timmɔbɔ betumi ama wabu n’ani agu wɔn mfomso no so. Yosef anyɛ emu biara. Mmom no, ɔsɔɔ n’agya mma no hwɛe sɛ wɔanu wɔn ho anaa. Afei, bere a ohui sɛ wɔn awerɛhowdi no yɛ pa ara no, ɔde kyɛɛ wɔn.
Yebetumi asuasua Yosef. Sɛ obi a wafom yɛn da ahonu a efi komam adi a, ɛsɛ sɛ yɛde kyɛ no. Nokwarem no, ɛnsɛ sɛ timmɔbɔ ma yebu ani gu bɔne a emu yɛ duru so. Ɔkwan foforo so no, ɛnsɛ sɛ menasepɔw nso ma yebu yɛn ani gu nokware ahonu a obi kyerɛ so. Enti momma ‘yɛnkɔ so nhuhu mma yɛn ho na yɛmfa nkyekyɛ yɛn ho yɛn ho.’ (Kolosefo 3:13) Saayɛ so no, na yɛresuasua yɛn Nyankopɔn, Yehowa, a wayɛ ‘krado sɛ ɔde befiri’ no.—Dwom 86:5; Mika 7:18, 19.