Adesamma Anidaso A Ɛyɛ Nwonwa Wɔ Anigye Paradise

“Onyankopɔn hyiraa wɔn, na Onyankopɔn ka kyerɛɛ wɔn sɛ: Monwo, na monnɔ, na monyɛ asase so ma, na monhyɛ so, na munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so.’”​—GENESIS 1:28.

 1, 2. Atirimpɔw bɛn na Yehowa fi ɔdɔ mu redi ho dwuma ama adesamma, na adwuma bɛn na ɔde maa Adam?

WƆKA kyerɛ yɛn wɔ Bible Kronkron no mu sɛ “Onyankopɔn ne ɔdɔ.” Ɔwɔ ɔdɔ na ɔkyerɛ adesamma ho anigye a pɛsɛmenkominya nnim na ɔyɛ adwuma daa sɛnea ɛbɛyɛ a wobetumi anya asetra pa a asomdwoe wom daa wɔ asase so anigye paradise mu. (1 Yohane 4:16; fa toto Dwom 16:11 ho.) Onipa a odi kan, Adam a ɔyɛ pɛ no nyaa asetra a asomdwoe wom ne adwuma a ɛyɛ anigye. Onipa Bɔfo ka kyerɛɛ no sɛ ɔnnɔw Eden turo fɛfɛ no mu na onnuadua nneɛma wom. Afei onipa Bɔfo maa no adwuma foforo, adwuma titiriw bi, adwumaden bi, sɛnea nea esii ho kyerɛwtohɔ da no adi no:

² “Na [Yehowa] Nyankopɔn de dɔte nwenee wuram mmoadoma nyinaa ne wim nnomaa nyinaa, na ɔde wɔn baa onipa no nkyɛn sɛ obehu sɛnea ɔbɛfrɛ wɔn. Na nea onipa de frɛɛ abɔde a ɛte ase biara no, ɛno ara ne ne din. Na onipa totoo afieboa nyinaa ne wim nnomaa ne wuram mmoadoma nyinaa din.”​—Genesis 2:19, 20.

 3. Na dɛn nti na Adam ne mmoa no nsuro?

³ Onipa frɛɛ ɔpɔnkɔ sɛ sus, nantwinini sɛ shohr, oguanten sɛ seh, abirekyi sɛ ‘ez, anomaa sɛ ‘ohph, aborɔnoma sɛ yoh·nahʹ, kohaa sɛ tuk·kiʹ, gyata sɛ ʼar·yehʹ anaasɛ ‘ariʹ, osisi sɛ dov, kontromfi sɛ gohph, ɔkraman sɛ keʹlev, ɔwɔ sɛ na·chashʹ, ne nea ɛkeka ho.a Bere a ɔkɔɔ asubɔnten a ɛsen fi Eden turo no mu ho no, ohuu apata. Ɔtoo apataa no din sɛ da·gahʹ. Onipa a na onni akode no ansuro saa mmoa yi, afieboa ne wuram mmoadoma anaa nnomaa no, na wɔn nso wɔansuro onipa no na wofi nkate mu hui sɛ ɔkorɔn sen wɔn, na ɔyɛ abɔde a ɔkorɔn. Na wɔyɛ Onyankopɔn abɔde a Wama wɔn nkwa, na na onipa no nni ɔpɛ sɛ obepira wɔn anaasɛ obekum wɔn.

 4. Adwene bɛn na yebetumi anya wɔ mmoa ne nnomaa a Adam totoo wɔn din nyinaa no ho, na na eyi bɛyɛ osuahu bɛn?

⁴ Kyerɛwtohɔ no nka bere tenten a wɔde afieboa ne wuram mmoadoma ne wim nnomaa kyerɛɛ onipa no nkyerɛ yɛn. Wɔyɛɛ ne nyinaa wɔ ɔsoro akwankyerɛ ne nhyehyɛe ase. Ɛda adi sɛ Adam gyee bere de suaa aboa biara ho ade, ɔhwɛɛ ne su ahorow a ɛyɛ soronko ne ne sɛnea wɔyɛ no; na afei ɔpaw din a ɛbɛfata no titiriw maa no. Eyi betumi akyerɛ sɛ egyee bere pii. Na ɛyɛ osuahu a ɛyɛ anigye ma Adam sɛ ɔnam saayɛ so huu asase yi so abɔde ahorow ahorow pii no, na na egye adwene a emu dɔ yiye ne kasa na ama wama abɔde ahorow a wɔte ase yi mu biara din a ɛfata de ahyɛ no nsow.

5-7. (a) Nsemmisa bɛn na ɛda adi sɛ ɛbɛsɔre? (b) Mmuae bɛn na wɔde mae wɔ adebɔ ho kyerɛwtohɔ no mu wɔ Genesis 1:1-25 no?

⁵ Nanso wɔbɔɔ saa abɔde a wɔte ase yi nyinaa nnidiso nnidiso dɛn? So wodii kan bɔɔ asase so mmoa ansa na wɔrebɔ nnomaa anaasɛ ɛnte saa, na sɛ wɔde onipa toto abɔde ahorow a wɔte ase a wɔba fam yi nyinaa ho a, wɔbɔɔ onipa bere bɛn, na ɔto so ahe wɔ adebɔ mu? Ɔkwan bɛn so na Onyankopɔn siesiee asase no ani maa abɔde a wɔte ase a wogu ahorow pii saa no. Ɔkwan bɛn so na ɔde mframa a nnomaa tumi tu kɔ sorosoro wom no mae, ɔkwan bɛn so na ɔde nsu a wɔbɛnom ne afifide a ɛbɛyɛ aduan mae, ɔkwan bɛn so na ɔyɛɛ kanea kɛse bi a ɛbɛhyerɛn awia na ama onipa atumi ahu ade, na ɔkwan bɛn so na ɔyɛɛ akanea nketewa a ɛbɛma anadwo ayɛ fɛ? Dɛn nti na wim dwo na ɛyɛ hyew ma enti na onipa no betumi anantenantew ayɛ adwuma na wada a ɔda adagyaw?

⁶ Wɔannyaw amma onipa sɛ ɔmfa n’adwene mmu mmuae no. N’adwene a ɛpɛ sɛ ehu nneɛma mu no hia mmuae a nyansa wom fi tumi bi a enim biribiara pɛpɛɛpɛ hɔ. Wɔannyaw no sɛ Onyankopɔn ba a onnim de, na mmom ɛda adi sɛ ne nyansa kɛse no ma adebɔ ho abakɔsɛm a ɛyɛ nwonwa a wɔakyerɛw wɔ Genesis l:1-25 no da adi.

⁷ Esiane saa adebɔ ho kyerɛwtohɔ a ɛyɛ anigye no nti, na Adam de aseda kɛse bɛma. Ɛkyerɛkyerɛɛ nneɛma pii mu. Ɔkwan a wɔfaa so kyerɛwee ma ɔtee ase sɛ na mmere tenten ahorow abiɛsa a Onyankopɔn frɛ no nna sɛnea ɔkwan a Ɔfa so bu bere te wɔ hɔ, ansa na adebɔ bere a ɛto so anan a Onyankopɔn yɛɛ akanea akɛse abien a epue wɔ ɔsoro ntrɛwmu no mu de hyɛɛ onipa da tiaa a ɛyɛ nnɔnhwerew 24 no nsow no reba. Saa onipa asase so da tiaa no ne bere a, kanea kɛse no dum kosi sɛ ɛbɛsɔ na asan adum bio no. Adam hui nso sɛ obenya mfe pii, na akyinnye biara nni ho sɛ ofii ase kan n’asetra mu mfe ntɛm ara. Na kanea kɛse a ɛwɔ ɔsoro ntrɛwmu no mu bɛma watumi ayɛ eyi. Nanso ɛdefa Onyankopɔn adebɔ nna a ɛware no ho de, onipa a odi kan no hui se na ɔte ase wɔ Onyankopɔn asase so adebɔ nnwuma no da a ɛto so asia mu wɔ saa bere no mu. Na wɔnka nkyerɛɛ no se da ɛto so asia a wɔbɔɔ saa asase so mmoadoma nyinaa ne afei onipa nkutoo no aba awie. Afei na ɔbɛte sɛnea wɔbɔɔ afifide, nsu mu mmoa, nnomaa, ne asase so mmoa nnidiso nnidiso no ase. Nanso bere a na Adam nkutoo wɔ Eden turo no mu no, na ɔnyɛ Onyankopɔn atirimpɔw a ɔdɔ wom ma onipa wɔ Paradise asase so no ho nhwɛso a ɛyɛ pɛ.

Ɔbea a Odi Kan No Bɔ

 8, 9. (a) Dɛn na onipa a ɔyɛ pɛ no hui wɔ mmoa no ho, nanso adwene bɛn na onyae wɔ n’ankasa ho? (b) Na dɛn nti na ɛfata sɛ onipa a ɔyɛ pɛ no ammisa Onyankopɔn sɛ ɔmma no ɔhokafo? (d) Bible kyerɛwtohɔ no ka ɔyere a odi kan no bɔ ho asɛm dɛn?

⁸ Onipa a odi kan a na ɔwɔ adwene a edi mũ na otumi hu ade no hui sɛ wɔ nnomaa ne mmoadoma ahemman mu no, anini ne abere wɔ hɔ ne sɛ, na wɔwo wɔn ankasa sɛso. Nanso na ɛnte saa wɔ onipa no fam saa bere no. Sɛ nea ohui yi ma onyaa adwene sɛ obenya ɔhokafo a, ɛnde wanhu ɔhokafo bi a ɔfata wɔ mmoa ahemman no mu biara mu, wanhu bi wɔ nkontromfi mpo mu. Ɛnde na Adam benya adwene sɛ onni ɔhokafo, efisɛ sɛ ɔwɔ bi a, so anka Onyankopɔn mfa ne hokafo yi mmrɛ no? Wɔammɔ onipa te sɛ saa mmoa ahorow nyinaa no, na na wɔpɛ sɛ ɔyɛ soronko! Na ɛnyɛ ne pɛ sɛ n’ankasa besi nsɛm ho gyinae ama ne ho na ama wabɛyɛ obi a ommu ade a obisa Onyankopɔn a ɔne ne Bɔfo no sɛ ɔmma no ɔhokafo. Na ɛfata sɛ onipa a ɔyɛ pɛ no dan biribiara hyɛ Onyankopɔn nsa, efisɛ bere tiaa bi akyi no, ohui sɛ Onyankopɔn asi N’ankasa gyinae wɔ tebea no ho. Kyerɛwtohɔ no ka eyi ne nea afei esii no ho asɛm sɛ:

⁹ “Nanso onipa de, wɔannya ne sɛso boafo amma no. Na [Yehowa] Nyankopɔn maa nnahɔɔ tɔɔ onipa no so, na ɔdae, na oyii ne mparow mu biako, na ɔde nam tuaa anan mu. Na [Yehowa] Nyankopɔn de mparow a oyi fii onipa no mu no yɛɛ ɔbea, na ɔde no brɛɛ onipa no. Na onipa no kae sɛ: Afei me nnompe mu dompe ne me honam mu nam ni. Oyi na wɔbɛfrɛ no ɔbea, efisɛ ɔbarima mu na woyii no fii. Ne saa nti na ɔbarima begyaw n’agya ne ne na, na ɔde ne ho akɔbata ne yere ho, na wɔayɛ ɔhonam koro. Na wɔn baanu no deda adagyaw, onipa no ne ne yere, na wɔn ani nwu.”​—Genesis 2:20-25.

10. Onipa a ɔyɛ pɛ no yɛɛ n’ade dɛn bere a wɔde ɔbea a ɔyɛ pɛ no brɛɛ no no, na dɛn na ne nsɛm no betumi akyerɛ?

¹⁰ Na akomatɔyam a edi mu wɔ asɛm a ɔkae no mu bere a wɔde ɔbea a ɔyɛ pɛ no maa no sɛ ɔboafo no: “Afei me nnompe mu dompe ne me honam mu nam ni.” Esiane nsɛm yi nti, ebetumi aba sɛ bere a awiei koraa no ohuu ne yere a wɔabɔ no foforo no, na watwɛn bere bi sɛ ne nsa bɛka ne hokafo hoɔfɛfo a ɔyɛ onipa no. Adam reka ne boafo no ho asɛm no, ɔfrɛɛ no “ɔbea” (ʼish·shahʹ anaasɛ “ɔbea a ofi ɔbarima mu”), “efisɛ ɔbarima mu na woyii no fii.” (Genesis 2:23, New World Translation Reference Bible, asehɔ asɛm) Adam ante nka sɛ ɔne nnomaa a wotu ne asase so mmoadoma a na Onyankopɔn adi kan de wɔn aba n’anim sɛ ɔntoto wɔn din no wɔ honam fam abusuabɔ. Na ne honam nte sɛ wɔn de. Nanso na ɔbea yi yɛ ne honam ankasa. Ne mfe mparow a woyii no yɛɛ mogya koro no ara a na ɛwɔ ne nipadua mu no bi. (Hwɛ Mateo 19:4-6.) Afei na wanya obi a obetumi ayɛ sɛ Onyankopɔn diyifo ama no, a obetumi ne no anya abɔde ho kyerɛwtohɔ a ɛyɛ anigye no mu kyɛfa.

11-13. (a) Bere a Adam nyaa ɔyere no, nsemmisa bɛn na ebetumi asɔre? (b) Na Onyankopɔn atirimpɔw ma nnipa baanu a wodi kan no ne dɛn? (d) Na dɛn na ɛbɛyɛ adesmma abusua a wɔyɛ pɛ no aduan?

¹¹ Nanso atirimpɔw bɛn nti na onipa Bɔfo de ɔyere brɛɛ no no? So ɛyɛ sɛnea ɛbɛma wanya ɔboafo ara kwa, ne sɛso hokafo a ɛremma ɔnkɔ so nyɛ ankonam? Kyerɛwtohɔ no kyerɛkyerɛ Onyankopɔn atirimpɔw mu bere a ɛka hyira a Onyankopɔn hyiraa wɔn aware no so ho asɛm no:

¹² “Na Onyankopɔn kae sɛ: Momma yɛnyɛ onipa wɔ yɛn suban so sɛ yɛn sɛso, na wonni ɛpo mu mpataa ne wim nnomaa ne ntɔteboa ne asase nyinaa ne mmoa a wɔwea asase so nyinaa so. Na Onyankopɔn bɔɔ onipa wɔ ne suban so, Onyankopɔn suban so na ɔbɔɔ no, ɔbarima ne ɔbea na ɔbɔɔ wɔn. Na Onyankopɔn hyiraa wɔn, na Onyankopɔn ka kyerɛɛ wɔn sɛ: Monwo, na monnɔ, na monyɛ asase so ma, na monhyɛ so, na munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so.

¹³ “Na Onyankopɔn kae sɛ: Hwɛ, mede nhaban a ɛsow aba nyinaa a ɛwɔ asase nyinaa ani, ɛne nnua nyinaa a adua a n’aba wɔ mu wɔ so mama mo sɛ ɛnyɛ mo aduan. Na asase so mmoadoma nyinaa ne wim nnomaa nyinaa ne mmoa a wɔwea asase so nyinaa a ɔkra a ɛte ase wɔ wɔn mu no, mede nhaban momono mama wɔn sɛ wonni. Na ɛyɛɛ saa.”​—Genesis 1:26-30.

Anidaso a na Ɛda Nnipa Baanu a Wodi Kan No Anim

14. Esiane sɛ na Onyankopɔn ahyira ɔbarima ne ɔbea a wɔyɛ pɛ no nti, na daakye bɛn na ɛda wɔn anim, na dɛn na na wobetumi ayɛ ho mfonini wɔ wɔn adwenem wɔ ɔkwan a ɛfata so?

¹⁴ Hwɛ anwonwade a ɛyɛ sɛ saa onipa a ɔyɛ pɛ ne ne yere a ɔyɛ pɛ no tee Onyankopɔn nne sɛ ɛkasa kyerɛ wɔn, na ɛka nea ɛsɛ sɛ wɔyɛ kyerɛ wɔn na ohyira wɔn! Esiane sɛ na Onyankopɔn ahyira wɔn nti, na wobenya biribi afi asetra mu, na na wobetumi ayɛ nea wɔaka akyerɛ wɔn sɛ wɔnyɛ no. Daakye a na ɛda wɔn anim bɛn ara ni! Bere a na awarefo a wɔwɔ anigye no gyina wɔn fie a ɛne Eden turo no mu no, ɛda adi sɛ wodwen nea ɛbɛba bere a wɔyɛ Onyankopɔn apɛde a ɔde ama wɔn no ho. Bere a na wɔde wɔn adwene aniwa hwɛ nea ɛbɛba daakye no, wɔanhu “Eden a ɛwɔ apuei fam” no nko, na mmom nso asase mũ no nyinaa a mmarima ne mmea a wɔn anim da anigye adi ahyɛ so ma. (Genesis 2:8) Adwene a ɛkyerɛ sɛ wɔn nyinaa yɛ wɔn mma ne wɔn asefo no bɛma ɔbarima ne ɔbea no koma ani agye. Na wɔn nyinaa yɛ pɛ, wonni nipadua mu sintɔ, wɔyɛ mmerante ne mmabaa daa, wɔwɔ akwahosan pa ne asetra mu anigye, wɔn nyinaa yi ɔdɔ adi kyerɛ wɔn ho wɔn ho, wɔn nyinaa de biakoyɛ som wɔn Bɔfo kɛse ne wɔn soro Agya no, na wɔne wɔn agya ne wɔn na a wodi kan no yɛ Onyankopɔn apɛde. Hwɛ sɛnea ɛbɛyɛ sɛ ɔbarima ne ɔbea a wodi kan no ani gyei mmoroso wɔ adwene a ɛkyerɛ sɛ wobenya abusua a ɛte sɛɛ no ho!

15, 16. (a) Na dɛn nti na adesamma abusua no benya aduan pii? (b) Bere a abusua a wɔwɔ anigye no reyɛ kɛse no, adwuma bɛn na wobenya wɔ turo no akyi?

¹⁵ Adesamma abusua a wɔahyɛ asase so ma yi mu biara benya aduan a ɛdɔɔso adi. Mfiase no na aduan abu so wɔ Eden turo no mu. Onyankopɔn na ɔde maa wɔn na ɔde afifide nyinaa a ɛso aba ne nnua a ɛsow nnuaba mae sɛ ɛnyɛ wɔn aduan a ahoɔden wom a ɛma nkwa.​—Fa toto Dwom 104:24 ho.

¹⁶ Bere a wɔn abusua a wɔwɔ anigye no mufo redɔɔso no, wɔbɛtrɛw turo no mu ma atra Eden ahye, efisɛ Onyankopɔn asɛm kyerɛe sɛ na wonsiesiee asase a ɛwɔ Eden turo no akyi no. Ɛkame ayɛ sɛ na wɔnnɔwee, na na wonnnuaa nneɛma wom te sɛ Eden turo no. Enti na wɔn Bɔfo no ka kyerɛɛ wɔn sɛ ‘wɔnhyɛ asase so’ bere a wɔyɛ so ma no.​—Genesis 1:28.

17. Na dɛn nti na nnipa a wɔredɔɔso no benya aduan pii, na awiei koraa no, dɛn na ɛbɛba bere a wɔtrɛw turo no mu no?

¹⁷ Bere a akuafo ne ahwɛfo a wɔyɛ pɛ ma turo no mu trɛw no, asase a wɔahyɛ so no bɛbɔ aduan pii ama nnipa a wɔredɔɔso no. Awiei no, turo a ɛreyɛ kɛse nkakrankakra no bɛtrɛw afa asase so nyinaa, na asase so nyinaa paradise bɛba na atra hɔ sɛ adesamma daa fie. Sɛ wufi soro hwɛ a, ɛbɛyɛ beae fɛfɛ, na Ɔbɔadeɛ a ɔwɔ soro no betumi aka sɛ eye papa.​—Fa toto Hiob 38:7 ho.

18. Na dɛn nti na basabasayɛ remma wiase nyinaa Eden turo no mu, na asomdwoe bɛn na na ɛbɛtra hɔ?

¹⁸ Na asomdwoe ne ahotɔ bɛtra hɔ te sɛ Eden turo a ɔbarima ne ɔbea a wɔaware foforo no hui sɛ wɔwom no mu. Na ɛho renhia sɛ wosuro sɛ saa mmoa ne wim nnomaa nyinaa a onipa a odi kan no hwɛɛ wɔn na ɔtotoo wɔn din no bɛma asiane bi ato wɔn anaasɛ wobepira wɔn. Te sɛ wɔn agya ne wɔn na a wodi kan no, wɔbɛtra saa asase nyinaa so Paradise mu na ɛpo mu mpataa, wim nnomaa ne biribiara a ɛkeka ne ho wɔ asase so a wuram mmoadoma mpo ka ho ahyɛ wɔn ase. Bere a wɔwɔ nkate a ɛkyerɛ sɛ ɛsɛ sɛ wɔbrɛ wɔn ho ase hyɛ onipa a wɔbɔɔ no “Onyankopɔn suban so,” no ase no, asomdwoe bɛtra saa mmoa a wɔba fam yi ne wɔn ntam. Bere a saa abɔde a wɔte ase yi brɛ wɔn ho ase hyɛ wɔn wuranom a wɔyɛ nnipa a wodwo na wɔyɛ pɛ no ase no, ɛbɛma asomdwoe aba mmoa no ntam. Wɔn wuranom a wɔyɛ nnipa a wɔte sɛ anyame no nkɛntɛnso a asomdwoe wom no mu bɛtrɛw na abɔ abɔde a wɔba fam a wɔte ase a wɔwɔ akomatɔyam no ho ban. Nea ɛsen ne nyinaa no, asomdwoe bɛtra adesamma a wɔyɛ pɛ no ne Onyankopɔn a wobenya ne nhyira daa no ntam.​—Fa toto Yesaia 11:9 ho.

Onyankopɔn Home fi N’adebɔ Nnwuma Ho

19. (a) Na dɛn na ɛsɛ sɛ ɔbarima ne ɔbea a wodi kan no bu wɔ Onyankopɔn atirimpɔw ho? (b) Dɛn na Onyankopɔn kyerɛe wɔ bere ho?

¹⁹ Bere a awarefo baanu a wɔyɛ pɛ no dwen asase a wɔasiesie so awie sɛnea Onyankopɔn atirimpɔw kyerɛ no ho no, wobehu biribi. Wɔ wɔn fam no, na saa ahyɛde a ɛyɛ nwonwa a efi Onyankopɔn hɔ a wobedi so no begye bere. Bere tenten ahe? Na wɔn Bɔfo ne wɔn soro Agya no nim. Ɔkyerɛɛ wɔn sɛ afei na adebɔ nna a ɛtoatoa so no da foforo aba awiei, na wɔwɔ ‘anwummere’ bere mu, da foforo mfiase, sɛnea ɔkwan Onyankopɔn fa so hyɛ n’adebɔ nna no nsow kyerɛ no. Na ɛbɛyɛ nhyira da a wɔde atew Onyankopɔn ankasa atirimpɔw kronn a ɛteɛ no ho. Onipa a ɔyɛ pɛ no, Onyankopɔn diyifo no huu eyi. Asɛm a efi honhom mu no ka kyerɛ yɛn sɛ:

20. Dɛn na Bible kyerɛwtohɔ no ka wɔ “da a ɛto so ason” no ho?

²⁰ “Na Onyankopɔn huu nea ɔyɛe nyinaa, na hwɛ, eye papa. Na ade sae, na ade kyee, da a ɛto so asia nen. Na wowiee ɔsoro ne asase ne emu asafo nyinaa bɔ. Na da a ɛto so ason no, Onyankopɔn wiee n’adwuma a ɔyɛe no, na da a ɛto so ason no, ɔhome fii n’adwuma a ɔyɛe nyinaa ho. Na Onyankopɔn hyiraa da a ɛto so ason no, na ɔtew ho, efisɛ ɛno mu na Onyankopɔn home fii n’adwuma a ɔbɔe na ɔyɛe nyinaa ho. Eyinom ne ɔsoro ne asase awo ntoatoaso wɔ wɔn bɔ a wɔbɔɔ wɔn no mu, ɛda a [Yehowa] Nyankopɔn yɛɛ asase ne soro no.”​—Genesis 1:31-2:4.

21. (a) So Bible no ka sɛ Onyankopɔn maa ne homeda no baa awiei, ne sɛ eye papa? (b) Nsemmisa bɛn na ɛsɔre?

²¹ Kyerɛwtohɔ no nka sɛ Onyankopɔn maa ne homeda no baa awiei na ohui sɛ eye papa ne sɛ ade sae na ade kyee, da a ɛto so ason. Na wonnya nkae sɛ da a ɛto so ason no yɛ papa na ama da a ɛto so ason no ne adebɔ nna asia a edi kan no ayɛ pɛ, efisɛ na ɛmaa awiei ɛ. Ebesi saa bere yi, so Yehowa Nyankopɔn betumi aka sɛ da no ye papa? Ebesi saa bere yi, so ayɛ homeda a asomdwoe wom ama no? Na saa anidaso a ɛma koma ani gye a ɔbarima ne ɔbea a wodi kan no yɛɛ ho mfonini wɔ wɔn adwenem da a wɔwaree wɔ Paradise no nso ɛ? Ma yɛnhwɛ, bere a ɛda adi wɔ adesua a edi hɔ no mu no.

[Ase hɔ asɛm]

Wubebua Dɛn?

◻ Adwuma bɛn na Onyankopɔn de maa Adam de kaa hwɛ a na ɔbɛhwɛ turo no ho, na na dɛn na ɛwɔ eyi mu?

◻ Dɛn na adebɔ ho kyerɛwtohɔ a ɛwɔ Genesis 1:1-25 no da no adi?

◻ Ɔkwan bɛn so na wɔbɔɔ ɔyere a odi kan no, na da a wɔwaree no, Adam yɛɛ n’ade dɛn?

◻ Na anidaso bɛn na ɛda nnipa baanu a wodi kan no anim?

◻ Ɔkwan bɛn so na Onyankopɔn kyerɛe sɛ adebɔ nna a ɛtoatoa so no da foforo awiei adu?