Abusua Mu Ɔhaw​—Mmere No Ho Sɛnkyerɛnne

ABUSUA mu ɔhaw​—nnipa pii bu no sɛ ɛyɛ sɛnkyerɛnne a ɛkyerɛ sɛ aware ne ɔwofoyɛ ho tete mmara ahorow no atwam. Afoforo hu no sɛ ɛyɛ ade a amammui, sikasɛm, ne asetra mu nsakrae na ɛde aba. Afoforo nso hu no sɛ nneɛma a nnɛyi mfiridwuma asɛe no mu biako. Nokwarem no, ɔhaw ahorow a mmusua rebɔ mmɔden sɛ wobedi ho dwuma nnɛ no kyerɛ biribi a ɛhohia yiye. Hyɛ Bible mu nsɛm a ɛwɔ 2 Timoteo 3:1-4 no nsow:

“Na hu eyi sɛ, nna a edi akyiri mu no, mmere a emu yɛ den bɛba. Efisɛ nnipa bɛyɛ ahopɛfo, sikapɛfo, ahohoahoafo, ahantanfo, abusɛnkafo, awofo asɛm ho asoɔdenfo, bonniayɛfo, wɔn a biribiara ho ntew mma wɔn, wɔn a wonni dɔ, apamsɛefo, ntwirifo, wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa, afatwafo, anuɔdenfo, wɔn a wɔhoman, wɔn a wɔdɔ anigyede sen Nyankopɔn.”

So nsɛm yi nkyerɛ dekode ankasa a ɛde nnɛ ɔhaw ahorow no ba? Ɛda adi pefee sɛ tebea horow a wɔhyɛɛ nkɔm sɛ ɛbɛba wɔ wiase yi nna a edi akyiri no mu no na ɛde ɔhaw a ɛwɔ abusua mu nnɛ no aba. Na adanse a ɛdan ti wɔ hɔ a ɛkyerɛ sɛ ɔhaw bere yi fii ase wɔ afe 1914 mu.a Efi saa bere no, honhom abɔde a ɔkorɔn sen onipa a wɔfrɛ no Satan Ɔbonsam no nkɛntɛnso adi awu titiriw.​—Mateo 4:8-10; 1 Yohane 5:19.

Efi 1914 a wɔkaa Satan hyɛɛ asase so mpɔtam ha no, ‘wafa abufuw kɛse, efisɛ onim sɛ ne bere a ɔwɔ yɛ tiaa.’ (Adiyisɛm 12:7-12) Esiane sɛ Satan yɛ Onyankopɔn a “abusua biara a ɛwɔ ɔsoro ne asase so nyaa ne din fii ne hɔ no” tamfo kɛse nti, so ɛyɛ nwonwa sɛ asase no abɛyɛ baabi a asiane wɔ ma mmusua? (Efesofo 3:15, New World Translation) Satan asi ne bo sɛ ɔbɛma adesamma nyinaa atwe wɔn ho afi Onyankopɔn ho. Ɔkwan pa bɛn na obetumi afa so ayɛ saa sen sɛ ɔbɛma mmusua ahyia ɔhaw ahorow?

Ebehia nea ɛsen wɔn a wose wɔyɛ abenfo no nkyerɛkyerɛ a ntease nnim no na wɔabɔ mmusua ho ban afi obi a ɔkorɔn sen onipa ntua a ɛte sɛɛ no ho. Nanso, Bible no ka Satan ho asɛm sɛ: “Yenim n’adwene.” (2 Korintofo 2:11) Ahobammɔ bi wɔ akwan pɔtee a ɔfa so de ne ntua no ba a yebehu no mu.

Sika ne Adwuma

Sika fam ahokyere ne Satan ntua akode a ano yɛ den sen biara no mu biako. Mmere yi yɛ “mmere a emu yɛ den,” anaa “ɔhaw mmere,” sɛnea Revised Standard Version ka wɔ 2 Timoteo 3:1 no. Wɔ aman a wɔrenya nkɔso mu no, ɔhaw ahorow te sɛ adwuma a wonnya nyɛ, akatua a esua ne asetrade atitiriw a ɛho yɛ na ma mmusua ho kyere wɔn pii. Nanso, sika fam ahokyere ma wohyia ɔhaw a emu yɛ den wɔ United States, a sɛ wɔde toto ho a, asi wɔn yiye no. Nhwehwɛmu biako a wɔyɛe wɔ U.S. no daa no adi sɛ sika yɛ nneɛma atitiriw a ɛde abusua mu ntawntawdi ba no mu biako. Nhoma Secrets of Strong Families kyerɛkyerɛ mu sɛ “bere, adwene, [ne] ahoɔden” a wɔde di nea adwuma hwehwɛ ho dwuma no nso betumi ayɛ “ɔtamfo nitefo” a ɔsɛe aware mu bɔhyɛ nkakrankakra.

Tebea horow ahyɛ mmea dodow bi ma wɔahwehwɛ adwuma. Nhoma kyerɛwfo Vance Packard bɔ amanneɛ sɛ: “Mprempren, anyɛ yiye koraa no, Amerika nkokoaa a wonnii mfe abiɛsa mu nkyem anan mu biako wɔ ɛnanom a wokura nnwuma bi a wofi fie kɔyɛ.” Mmofra nkumaa ahiade a ɛkame ayɛ sɛ ɛnsa da ne adwuma a wɔyɛ betumi ayɛ adwumaden a ɔbrɛ wom​—na enya awofo ne mma nyinaa so nkɛntɛnso bɔne. Packard de ka ho sɛ esiane sɛ mmofra hwɛ ho nsiesiei ahorow ho ayɛ na wɔ United States nti, “wɔnhwɛ mmofra ɔpepem bi yiye nnɛ wɔ wɔn mmofraase.”​—Our Endangered Children.

Faako a wɔyɛ adwuma ankasa no taa sɛe abusua mu biakoyɛ. Adwumayɛfo pii ne wɔn mfɛfo adwumayɛfo bɔ aguaman. Afoforo nso hwehwɛ yiyedi a wontumi nnya, na wɔde wɔn abusua asetra bɔ afɔre de hwehwɛ adwumam nkɔso. (Fa toto Ɔsɛnkafo 4:4 ho.) Ɔbarima bi de ne ho hyɛɛ n’adwuma sɛ ɔdetɔnfo mu araa ma ne yere kaa n’ankasa ho asɛm “sɛ ɔwofo a ne nkutoo na ɔyɛ awofo nnwuma nyinaa.”

Aware mu Abusuabɔ a Ayɛ Mmerɛw

Aware nhyehyɛe no ankasa nso aba ntua ase. Nhoma The Intimate Environment ka sɛ: “Kan no, na wɔhwɛ kwan sɛ awarefo bɛkɔ so aware gye sɛ wɔn mu biako yɛ bɔne a anibere wom bi tia aware no​—awaresɛe, atirimɔdenne, ani a wobu gu ɔfoforo so koraa. Mprempren nnipa dodow no ara hu aware atirimpɔw sɛ nea ɛma wɔn ankasa nya biribi a wɔhwɛ kwan.” Yiw, wobu aware sɛ awerɛhow, ɔbrɛ, ne ankonamyɛ ano aduru​—ɛnyɛ nkwa nna nyinaa mu bɔ a wɔhyɛ obi foforo. Nea adwene si mprempren ne nea wunya fi aware mu, na ɛnyɛ nea wode boa aware. (Fa toto Asomafo no Nnwuma 20:35 ho.) “Aware ho gyinapɛn ahorow mu nsakrae kɛse yi” ama aware mu abusuabɔ ayɛ mmerɛw yiye. Sɛ awarefo annya nea wɔhwɛɛ kwan no a, wɔtaa gu aware no de di ho dwuma ntɛm.

Wɔka nnipa a wɔwɔ “nna a edi akyiri” yi mu ho asɛm nkɔmhyɛ kwan so wɔ Bible no mu sɛ “wɔwɔ onyamesom pa bi de, nanso wɔpa emu ahoɔden.” (2 Timoteo 3:4, 5, NW) Abenfo pii te nka sɛ nyamesom a akɔ fam no ka ho na aware asɛe no. Ɔbenfo Diane Medved kyerɛwee wɔ ne nhoma The Case Against Divorce no mu sɛ: “Sɛnea nyamesom dodow no ara kyerɛ no, Onyankopɔn kae sɛ ɛsɛ sɛ aware tra hɔ daa. Sɛ wuntumi nhu sɛ Onyankopɔn wɔ hɔ, anaasɛ wunnye No nni a, woyɛ nea wopɛ.” Nea afi mu aba ne sɛ, sɛ ɔhaw ahorow wɔ aware mu a, awarefo nhwehwɛ ano aduru a eye. “Wogu aware no ntɛm ara.”

Mmofra Wɔ Ntua Ase

Nnɛ nhyɛso ahorow no rema mmofra hu amane. Mmofra bebree ankasa awofo hwe wɔn pirapira wɔn yeyaw wɔn anaa wɔto wɔn mmonnaa. Ɛdenam awaregu so no, ɔpepem pii nnya awofo baanu ɔhwɛ a ɔdɔ wom, na ɛyaw a awofo awaregu ma wodi no taa tra hɔ wɔn nkwa nna nyinaa.

Mmofra hyia nkɛntɛnso ahorow a tumi wom bere nyinaa. Sɛ wɔkyekyem a, ebedu bere a Amerikani abofra bedi mfe 14 no, na ɔnam television hwɛ kɛkɛ so ahu awudi 18,000 ne basabasayɛ afoforo pii, aguamammɔ, atirimɔdenne ne nsɛmmɔnedi. Nnwom nso nya mmofra so tumi kɛse, na emu dodow no ara mu nsɛm nnye, nguamansɛm pii anaasɛ adaemonesɛm mpo wom. Sukuu ahorow de nkyerɛkyerɛ te sɛ adannandi a ɛtaa sɛe Onyankopɔn ne Bible no mu gyidi kyerɛkyerɛ mmofra. Atipɛnfo nhyɛso kanyan pii ma wɔde wɔn ho hyɛ nna a edi aware anim mu na wɔbow nsa anaasɛ wɔde nnuru di dwuma ɔkwammɔne so.

Nneɛma a Ɛde Abusua mu Ɔhaw Ba

Enti ntua a ɛba mmusua so no dɔɔso na ebetumi asɛe no. Dɛn na ebetumi aboa mmusua ma wɔagyina ano? Abusua ɔfotufo John Bradshaw de nyansahyɛ ma sɛ: “Wɔnsakraa yɛn awofoyɛ ho mmara no kɛse wɔ mfe 150 mu. . . . Migye di sɛ kan mmara ahorow no nyɛ adwuma bio.” Nanso, ɛnyɛ mmara afoforo pii a onipa ahyɛ no ne ano aduru. Yehowa Nyankopɔn ne abusua no Hyehyɛfo. Onim sɛnea dwuma a abusua asetra di wɔ anigye a yɛn ankasa yenya mu ho hia, ne nea egye na abusua anya anigye na ayɛ den no sen obiara. Ɛnde, so ɛsɛ sɛ ɛyɛ yɛn nwonwa sɛ n’Asɛm Bible no de abusua mu ɔhaw ano aduru ma?

Saa tete nhoma no kyerɛkyerɛ nea ɛyɛe a abusua asetra sɛee no mu. Wɔde nnipa baanu a wodi kan, Adam ne Hawa traa turo fɛfɛ bi mu, na wɔmaa wɔn adwumaden a mfaso wɔ so sɛ wɔnnan asase no wiase nyinaa paradise. Onyankopɔn hyɛɛ mmara sɛ Adam nyɛ abusua no ti. Na ɛsɛ sɛ Hawa boa ne ti no sɛ ne “boafo” anaa ne “sɛso.” Nanso Hawa tew nhyehyɛe yi ho atua. Ogyee ne kunu tiyɛ no fae na wanni mmara biako pɛ a Yehowa de maa wɔn no so. Afei Adam pow ne tiyɛ no na ɔkɔkaa ne ho wɔ atuatew yi mu.​—Genesis 1:26-3:6.

Nneɛma bɔne a efii wɔn ho a wɔtwe fii Onyankopɔn nhyehyɛe ho no mu bae no daa adi ntɛm ara. Esiane sɛ na efĩ ne asɛm aba Adam ne Hawa ho nti, wɔde aniwu ne fɔdi yɛɛ ho ade. Afei Adam a na wadi kan de anwensɛm a ɛyɛ dɛ aka ne yere ho asɛm no kaa ne ho asɛm sɛ ‘ɔbea a wode no maa me no’ a anigye biara nnim. Saa asɛm a ɛmfata a ɔkae no na efii aware mu amanehunu ase. Mmɔden hunu a Adam bɛbɔ sɛ ɔbɛsan anya ne tiyɛ no bɛma ‘wahyɛ ɔbea no so.’ Na Hawa nso ‘ani begyina’ ne kunu, ebia wɔ ɔkwan a ɛtra so anaa ɛnkari pɛ so.​—Genesis 2:23; 3:7-16.

Ɛnyɛ nwonwa sɛ Adam ne Hawa aware mu ntawntawdi no de nneɛma bɔne baa wɔn asefo so. Kain, wɔn ba a odi kan no bɛyɛɛ owudifo tirimɔdenfo. (Genesis 4:8) Lamek, Kain aseni maa abusua asetra no kɔɔ so sɛee denam di a odii kan waree mmea dodow no so. (Genesis 4:19) Enti ɛnyɛ bɔne ne owu nko na Adam ne Hawa de gyaw wɔn na mmom abusua nhyehyɛe a asɛe a abɛyɛ adesamma abusua no tebea fi saa bere no nso. Wɔ nna a edi akyiri yi mu no, abusua mu mpaapaemu akɔ soro sen bere biara a atwam.

Mmusua a Wonya Nkɔso

Nanso, ɛnyɛ mmusua nyinaa na nnɛ nhyɛso ahorow no ama asɛe. Sɛ nhwɛso no, okunu biako ne ne yere ne wɔn mmabea baanu na ɛte kurow ketewaa bi mu wɔ United States. Ɛwom sɛ mpɔtam hɔ awofo pii ne wɔn mma mmɔ de, nanso ɛnte saa wɔ ɔne ne yere fam, na ɛnyɛ nea wɔahaw nso sɛ ebia wɔn mmabea no de nnuru bedi dwuma ɔkwammɔne so anaasɛ wɔne mmarima bɛda. Dwoda anwumere, bere a mmofra afoforo te TV anim rehwɛ no, na wɔn abusua no mufo nyinaa tete wɔn adidipon ho rebɔ Bible mu nkɔmmɔ. Ɔkyerɛkyerɛ mu sɛ: “Dwoda anadwo yɛ anadwo titiriw a yebom hyiam bɔ nkɔmmɔ. Yɛn mmabea no fi wɔn pɛ mu ka wɔn haw ahorow.”

Ɔkwan foforo so no, ɔwofo bi a onni ɔhokafo te New York City a ɔno nso ne ne mmabea baanu nya abusua mu biakoyɛ soronko bi. Dɛn na ɛma otumi yɛ saa? Ɔkyerɛkyerɛ mu sɛ: “Yemmue TV no gye dapɛn no awiei. Yesusuw Bible mu kyerɛwsɛm bi ho da biara. Yeyi anwummere biako nso si hɔ de yɛ abusua Bible adesua.”

Mmusua abien yi nyinaa yɛ Yehowa Adansefo. Wodi afotu a wɔde ma mmusua a wɔada no adi wɔ Bible mu no som​—na wonya nea wɔhwehwɛ. Nanso, ɛnyɛ wɔn nkutoo. Mmusua ɔpehaha pii a wɔte sɛ wɔn ara wɔ hɔ a wɔnam abusua asetra ho mmara ahorow a wohu wɔ saa nhoma no mu a wɔde di dwuma no so nya nnepa.b Saa mmara ahorow yi ne dɛn? Ɔkwan bɛn so na ɛho betumi aba wo ne w’abusua so mfaso? Nea ɛbɛyɛ na woanya mmuae no, yɛto nsa frɛ wo sɛ kenkan nsɛm a efi ase wɔ kratafa a edi hɔ no.

[Ase hɔ asɛm]

[Mfonini wɔ kratafa 4]

Ohia ma aman a ɛrenya nkɔso mu mmusua hyia ɔhaw ahorow pii

[Mfonini Fibea]

U.S. Navy mfonini

[Mfonini wɔ kratafa 7]

Mmusua pii nam Bible nnyinasosɛm ahorow a wɔde di dwuma so regyina nnɛ nhyɛso ahorow no ano