Dɔ a Obi Bɛdɔ Nyankopɔn no Kyerɛ Dɛn?

BƐYƐ mfe mpem asia a atwam no, wɔwoo abofra a odi kan. Wɔ n’awo akyi no, ne maame, Hawa, kae sɛ: “Awurade adaworoma, manya ɔbarima.” (Genesis 4:1) N’asɛm no da no adi sɛ, ɛwom sɛ na wɔabu wɔn kumfɔ dedaw esiane wɔn atuatew no nti de, nanso na Hawa ne ne kunu, Adam, da so ara nim sɛ Yehowa ne Nyankopɔn. Akyiri yi, wɔwoo ɔbabanin a ɔto so abien. Wɔtoo mmarimaa no din Kain ne Habel.

Bere a mmabarima no nyinyinii no, akyinnye biara nni ho sɛ wosuaa Yehowa dɔ ho ade pii denam n’abɔde a wɔhwehwɛɛ mu kɛkɛ so. Wohuu abɔde mu kɔla a ɛyɛ fɛ ne mmoa ne afifide a egu ahorow no. Ɛnyɛ sɛ Onyankopɔn maa wɔn nkwa nko, na mmom ɔmaa wɔn tumi a wɔde benya asetra mu anigye nso.

Wosuae sɛ wɔbɔɔ wɔn awofo no, na wɔyɛ pɛ, na na Yehowa mfitiase atirimpɔw ne sɛ nnipa bɛtra ase daa. Adam ne Hawa kaa fɛ a na Eden turo no yɛ ho asɛm kyerɛɛ wɔn, na ɔkwan bi so no, na ɛsɛ sɛ wɔkyerɛkyerɛ nea enti a wotuu wɔn fii paradise fie a na ɛte saa mu no mu. Ebia na Kain ne Habel nim ɔsoro nkɔmhyɛ a wɔayɛ ho kyerɛwtohɔ wɔ Genesis 3:15 no. Ɛdenam saa nkɔmhyɛ no so no, Yehowa daa n’atirimpɔw a ɔde besiesie nsɛm wɔ bere a ɛsɛ mu de aboa wɔn a wɔdɔ no na wodi no nokware no adi.

Ɛbɛyɛ sɛ Yehowa su horow ho ade a Kain ne Habel suae na ɛma wonyaa ɔpɛ sɛ wɔbɛhwehwɛ Onyankopɔn anim dom. Enti wɔkɔɔ Yehowa anim denam ayɛyɛde a wɔde kɔmaa no so. Bible kyerɛwtohɔ no ka sɛ: “Ɛbae sɛ nna bi akyi no, Kain de afum nneɛma bɛyɛɛ Awurade ayɛ. Na Habel nso de ne nguan mu mmakan ne wɔn a wɔadɔ no bi bɛmae.”—Genesis 4:3, 4.

Onyankopɔn anim dom a na wɔhwehwɛ no too nhyɛase maa abusuabɔ a wɔne no benya. Nea ekowiei ne sɛ Kain tew atua tiaa Onyankopɔn, na nokware dɔ a Habel wɔ ma Onyankopɔn no kɔɔ so kanyan no. Habel anni kan anya Yehowa su ne n’atirimpɔw ahorow ho nimdeɛ a, anka ontumi ne Onyankopɔn nnya abusuabɔ a ɛte saa da.

Wo nso wubetumi ahu Yehowa. Sɛ nhwɛso no, wubetumi asua wɔ Bible mu sɛ Onyankopɔn yɛ obi ankasa, ɔnyɛ tumi bi a nkwa nni mu a ɛbɔ nneɛma ara kwa. (Fa toto Yohane 7:28; Hebrifo 9:24; Adiyisɛm 4:11 ho.) Bible kyerɛ nso sɛ Yehowa yɛ “Onyankopɔn mmɔborohunufo ne ɔdomfoɔ, nea n’abodwo kyɛ na n’adɔeyɛ ne ne nokware dɔɔso pii.”—Exodus 34:6.

“Osetie Ye Sen Afɔre”

Sɛnea Kain ne Habel ho kyerɛwtohɔ no kyerɛkyerɛ mu no, Onyankopɔn ho nimdeɛ ne ɔpɛ a wubenya sɛ wo ne no benya abusuabɔ a emu yɛ den no ara nnɔɔso. Ɛyɛ nokware sɛ anuanom baanu no de ayɛyɛde brɛɛ Onyankopɔn. Nanso, “Awurade ani sɔɔ Habel ne n’ayɛyɛde no, nanso Kain ne n’ayɛyɛde de, n’ani ansɔ. Na Kain bo fuwii pii, na omunae.”—Genesis 4:3-5.

Dɛn nti na Yehowa ani ansɔ Kain afɔrebɔ no? Ná biribi atoto wɔ n’ayɛyɛde no ho? So Yehowa bo fuwii esiane sɛ Kain de “afum nneɛma” bɔɔ afɔre na wamfa aboa nti? Ɛnte saa ankasa. Akyiri yi, Onyankopɔn de anigye gyee nnɔbae ne afuw mu nneɛma foforo sɛ ayɛyɛde fii n’asomfo pii hɔ. (Leviticus 2:1-16) Enti, adanse a ɛwɔ hɔ kyerɛ sɛ na biribi atõtõ wɔ Kain koma ho. Yehowa tumi huu Kain komam na ɔbɔɔ no kɔkɔ sɛ: “Ɛdɛn nti na wo bo afuw, na ɛdɛn nti na woamuna yi? Sɛ woyɛ yiye a, anka w’anim rentew anaa? Na sɛ woanyɛ yiye a, bɔne butuw ɔpon ano, na w’akyi kwan na ɛhwehwɛ.”—Genesis 4:6, 7.

Nokware dɔ a yebenya ama Onyankopɔn no kyerɛ pii sen afɔre a yɛbɛbɔ kɛkɛ. Ɛno nti na Yehowa hyɛɛ Kain nkuran sɛ ‘ɔnyɛ nea eye’ no. Ná Onyankopɔn pɛ osetie. Anka osetie a ɛte saa a Kain bɛyɛ ama Onyankopɔn no bɛboa no ma wato nhyɛase pa ama abusuabɔ a ɔdɔ wom a ɔne ne Bɔfo no benya. Bible de nsɛm a edi so yi si bo a osetie som so dua: “So Awurade pɛ ɔhyew afɔre ne okum afɔre sɛ otie a wotie Awurade anaa? Hwɛ, osetie ye sen afɔre, na asoyɛ kyɛn adwennini srade.”—1 Samuel 15:22.

Akyiri yi, wɔde nsɛm a ɛwɔ 1 Yohane 5:3 no sii hia a eyi ho hia so dua kɛse: “Eyi ne Nyankopɔn dɔ, sɛ yebedi n’ahyɛde so, na n’ahyɛde no nyɛ den.” Ɔkwampa biara nni hɔ a yɛbɛfa so ada yɛn dɔ adi akyerɛ Yehowa asen sɛ yɛbɛbrɛ yɛn ho ase ama ne tumidi. Eyi kyerɛ osetie a yɛbɛyɛ ama Bible abrabɔ ho mmara no. (1 Korintofo 6:9, 10) Ɛkyerɛ papa a yɛbɛdɔ na yɛakyi bɔne.—Dwom 97:10; 101:3; Mmebusɛm 8:13.

Ɔkwan titiriw biako a yɛbɛfa so ada yɛn dɔ adi akyerɛ Onyankopɔn ne ɔdɔ a yebenya ama yɛn yɔnko. Bible ka kyerɛ yɛn sɛ: “Sɛ obi ka sɛ: Medɔ Onyankopɔn, na ɔtan ne nua a, ɔyɛ ɔtorofo. Na nea ɔnnɔ ne nua a ohu no no, ɛbɛyɛ dɛn na obetumi adɔ Onyankopɔn a onhuu no ɛ?”—1 Yohane 4:20.

Yebetumi ne Onyankopɔn Anya Abusuabɔ a Emu Yɛ Den

Ebia ebinom bɛka sɛ, ‘Mesom Yehowa. Midi ne mmara so. Me ne me yɔnko nipa di no ɔkwampa so. Meyɛ ne nyinaa. Nanso, mete nka sɛ memmɛn Onyankopɔn ankasa. Minni ɔdɔ a emu yɛ den ma no, na ɛno ma mete afobu nka.’ Ebia ebinom besusuw sɛ wɔmfata sɛ wɔne Yehowa benya abusuabɔ a emu yɛ den saa no.

Bere a Kristoni bi hyiraa ne ho so som Yehowa bɛyɛ mfe 37 akyi no, ɔkyerɛwee sɛ: “Mate nka mpɛn pii wɔ m’asetra mu sɛ minni anigye wɔ me som a mede ma Yehowa no mu, na ebia na emfi me koma mu. Nanso na minim sɛ Yehowa a yɛbɛsom no no yɛ ade pa a ɛsɛ sɛ yɛyɛ, na na mempɛ sɛ migyae. Na bere biara a mɛkan obi ho asɛm a ɔka sɛ ‘Yehowa ho dɔ hyɛɛ ne koma ma no,’ mibisa me ho sɛ, ‘Dɛn na ɛhaw me, efisɛ mentee nka saa da?’” Yɛbɛyɛ dɛn atumi ne Onyankopɔn anya abusuabɔ a emu yɛ den?

Sɛ wodɔ obi ampa a, wotaa susuw saa nipa no ho. Wowɔ ɔpɛ a emu yɛ den sɛ wobɛbɛn no efisɛ wudwen ne ho. Dodow a wuhu no, ne no kasa, na wususuw ne ho no, dodow no ara na ɔdɔ a wowɔ ma no no nyin. Saa nnyinasosɛm yi fa Onyankopɔn a wubenya ɔdɔ ama no nso ho.

Wɔ Dwom 77:12 no, ɔkyerɛwfo a wɔde honhom kaa no no ka sɛ: “Masusuw w’adwuma nyinaa ho, na madwen wo nneyɛe ho.” Nsusuwho ho hia na obi anya ɔdɔ ama Onyankopɔn. Eyi te saa titiriw esiane nokwasɛm a ɛyɛ sɛ yenhu no no nti. Nanso dodow a wususuw ne ho no, dodow no ara na wubehu sɛ ɔyɛ paara. Ɛno ansa na wubetumi afi koma ne ɔdɔ mu ne no anya abusuabɔ—efisɛ ɔyɛ paara ma wo.

Adwene a wubenya sɛ wubesusuw Yehowa akwan ne nneyɛe ho daa no begyina sɛnea wotaa tie no so. Wutie no denam N’asɛm, Bible, a wokenkan na wusua no daa so. Odwontofo no ka sɛ onigyefo ne onipa a “Awurade mmara sɔ n’ani, na odwen ne mmara ho awia ne anadwo.”—Dwom 1:1, 2.

Ade foforo a ɛho hia nso ne mpaebɔ. Ɛno nti na Bible no kɔ so tu yɛn fo sɛ yɛmmɔ mpae—“daa,” ‘yennya mpaebɔ ho adagyew,’ ‘yenkura mpaebɔ mu,’ ‘na yennnyae mpaebɔ da’ no. (Efesofo 6:18; 1 Korintofo 7:5; Romafo 12:12; 1 Tesalonikafo 5:17) Mpae a yɛbɛbɔ Yehowa daa no bɛma n’ani agye yɛn ho, na awerɛhyem a yɛwɔ sɛ otie yɛn no bɛtwe yɛn abɛn no. Odwontofo no sii eyi so dua bere a ɔkae sɛ: “Medɔ Awurade sɛ otie me nne ne me nkotɔsrɛ. Na wabrɛ n’aso ase ama me, enti mete ase yi, mɛbɔ ne din.”—Dwom 116:1, 2.

Ɔdɔ Nyankopɔn no a Yebesuasua No

Yehowa ye ma yɛn. Sɛ́ amansan Bɔfo no, akyinnye biara nni ho sɛ ɔwɔ nneɛma pii a ɛsɛ sɛ osusuw ho na odi ho dwuma. Nanso, Bible ka kyerɛ yɛn sɛ ɛmfa ho sɛnea ɔkorɔn no, ɔda so ara dwen n’abɔde a wɔyɛ nnipa no ho. Ɔdɔ yɛn. (1 Petro 5:6, 7) Odwontofo no de ne nsɛm yi si eyi so dua: “Awurade, yɛn Awurade, nim bɛn na wo din nni, asase nyinaa so, wo a wode w’anuonyam akata ɔsoro. Sɛ mehwɛ wo soro, wo nsateaa ano adwuma, ɔsram ne nsoromma a woasiesie a, ɔdesani ne hena a wokae no, na onipa ba ne hena a w’ani ku ne ho.”—Dwom 8:1, 3, 4.

Ɔkwan bɛn so na Yehowa akae ɔdesani? Bible bua sɛ: “Eyi mu na Onyankopɔn dɔ no yii ne ho adi wɔ yɛn ho, sɛ Onyankopɔn somaa ne ba a ɔwoo no koro no baa wiase sɛ yɛmfa no so nnya nkwa. Eyi mu na ɔdɔ no wɔ, ɛnyɛ sɛ yɛn na yɛdɔɔ Onyankopɔn, na mmom ɔno na ɔdɔɔ yɛn na ɔsomaa ne ba sɛ ɔmmɛyɛ yɛn bɔne ho mpata.”—1 Yohane 4:9, 10.

Ɔkwan bɛn so na saa bɔne ho mpata yi yɛ Onyankopɔn dɔ ho adanse a ɛsen biara? Ma yensusuw nea esii Eden turom no ho. Ná ɛsɛ sɛ Adam ne Hawa paw sɛ wobedi Yehowa mmara so na wɔanya daa nkwa wɔ pɛyɛ mu anaasɛ wɔbɛtew atua atia Yehowa na wɔawuwu. Wɔpawee sɛ wɔbɛtew atua. (Genesis 3:1-6) Wɔnam saayɛ so buu adesamma nyinaa kumfɔ nso. (Romafo 5:12) Wɔmaa wɔn ani traa wɔn ani ntɔn ma yɛhweree hokwan a yɛn ankasa de besi gyinae no. Yɛn mu biara annya kyɛfa wɔ asɛm no mu.

Nanso, Yehowa fi ɔdɔ mu akae ɔdesani, ahu n’awerɛhow tebea. Ɛdenam Ne Ba, Yesu Kristo, wu afɔrebɔ no so no, Yehowa ama yɛn mu biara mmara kwan so hokwan sɛ ɔmpaw nkwa anaa owu, osetie anaa atuatew. (Yohane 3:16) Ɛte sɛ nea Yehowa de da bi ama yɛn ankasa wɔ asɛnnibea—hokwan a yɛbɛsan de akɔ Eden, sɛnea yɛbɛka no no, na yɛn ankasa asi yɛn gyinae. Eyi yɛ ɔdɔ a ɛsen biara a wɔada no adi pɛn.

Susuw yaw a Yehowa dii bere a ohui sɛ wɔreyeyaw n’abakan, wɔreyɛ no ayayade, na wɔabɔ no dua mu sɛ ɔdebɔneyɛfo no. Na Onyankopɔn maa ɛno ho kwan esiane yɛn nti. Ɛsɛ sɛ nim a yenim sɛ Yehowa fi ne pɛ mu dii kan dɔɔ yɛn no ka yɛn nso ma yɛdɔ no na ɛkanyan yɛn ma yɛhwehwɛ no. (Yakobo 1:17; 1 Yohane 4:19) Bible to nsa frɛ yɛn sɛ ‘yɛmpɛ Awurade ne ne tumi akyi kwan, yɛnhwehwɛ n’anim daa yi. Yɛnkae n’anwonwade a wayɛ, n’ahodwiriwde ne n’anom atemmusɛm no.’—Dwom 105:4, 5.

Yɛn ho a yɛde bɛbɔ Nyankopɔn, na yɛne no anya abusuabɔ a ɔdɔ wom, na yɛabɛyɛ n’adamfo, no nyɛ biribi a entumi nyɛ yiye. Yebetumi ayɛ. Nokwarem no, yentumi mfa ɔdɔ a yebenya ama Onyankopɔn no ntoto abusuabɔ a yɛne nnipa benya no ho mma no nyɛ pɛ. Ɔdɔ a yenya ma yɛn ahokafo, awofo, yɛn nuanom, yɛn mma, anaa yɛn nnamfo no yɛ soronko wɔ ɔdɔ a yebenya ama Onyankopɔn no ho. (Mateo 10:37; 19:29) Nea ɛka Yehowa a yɛbɛdɔ no ho ne ahofama a yebenya, ɔsom ne ahosohyira a edi mũ a yɛde bɛma no. (Deuteronomium 4:24) Abusuabɔ foforo biara nni hɔ a ɛte saa. Nanso, yebetumi anya nkate a emu yɛ den na ɛkɔ akyiri ama Onyankopɔn wɔ obu ne osuro kwan so.—Dwom 89:7.

Ɛwom sɛ yɛnyɛ pɛ de, nanso te sɛ Kain ne Habel no, wubetumi adɔ wo Bɔfo no. Kain paw nea ɔpɛ, ɔkɔkaa Satan ho, na ɔbɛyɛɛ nipakumfo a odi kan. (1 Yohane 3:12) Nea ɛne no bɔ abira no, Yehowa bɛkae Habel sɛ ɔbarima gyidini a ɔteɛ, na ɔde asetra wɔ Paradise a ɛreba no mu betua no ka.—Hebrifo 11:4.

Wo nso wubetumi apaw nea wopɛ. Nokwarem no, ɛdenam Onyankopɔn honhom ne N’asɛm mmoa so no, wubetumi de “wo koma nyinaa ne wo kra nyinaa ne w’ahoɔden nyinaa” adɔ Onyankopɔn. (Deuteronomium 6:5) Yehowa nso bɛkɔ so adɔ wo, efisɛ ɔyɛ “wɔn a wɔhwehwɛ n’akyi kwan no katuafo.”—Hebrifo 11:6.

[Kratafa 7 mfonini]

Onyankopɔn ani sɔɔ Habel afɔrebɔ no