Genesis Ma Gyidi, Anidaso Ne Akokoduru

June ɔsram no mu no, Yehowa Adansefo befi ase asua Bible mu nhoma Genesis. Wɔde bere tenten bi besusuw saa kyerɛwtohɔ a ɛkanyan adwene yi ho wɔ wɔn dapɛn dapɛn Teokrase Ɔsom Sukuu no mu. Sɛ́ nea ɛbɛboa ma yɛate ase no, wɔasiesie saa asɛm yi, na yɛwɔ awerɛhyem sɛ ebebua nsemmisa ahorow a ebia wowɔ wɔ Genesis ho no, Kyerɛw Kronkron no fã a ɛhyɛ gyidi den ankasa.

WƆN a wɔda Yehowa mu gyidi a edi mu adi nkutoo na n’ani gye wɔn ho. Na wɔwɔ biribi pa a enti ɛsɛ sɛ wonya no mu ahotoso, efisɛ ɔyɛ “anidaso Nyankopɔn” na ne bɔhyɛ ahorow nyɛ kwa da. Ampa, bere a wɔtwɛn ne mmamu no, ebia wobehyia ahokyere ne sɔhwɛ. Nanso wɔn a ‘wɔtwɛn Yehowa’ no betumi anya akokoduru a ɛnsã da, efisɛ ɔbɔ wɔn a wɔsom no nokware mu no ho ban daa.​—Romafo 15:13; Dwom 31:23, 24; Hebrifo 11:6.

Wɔda eyinom nyinaa adi yiye wɔ Genesis nhoma a ɛwɔ Bible mu no mu. Onyankopɔn Asɛm no fã yi a ɛsom bo, a Mose kyerɛwee wɔ Sinai sare no so wɔ 1513 A.Y.B. mu no ma obi nya gyidi, anidaso ne akokoduru.

Nhoma No Mu Nsɛm Tiaa

Ɛresan akyi mfe ɔpepepem pii no, Genesis fi ase sɛ: “Mfiase no Onyankopɔn bɔɔ ɔsoro ne asase”​—nneɛma a ɛwɔ ɔsoro ne asase so. Wosiesie asase ma nnipa atra so, na awiei koraa no nnipa gyina Ɔbɔadeɛ no anim wɔ pɛyɛ mu. Ɛwom sɛ Paradise no ayera esiane bɔne nti, nanso Yehowa ma anidaso denam “aseni” a ɔbɛbɔ ɔwɔ no ti ho nkɔm a ɔhyɛ so. Gyidi mu no, ɔtreneeni Habel bɔ afɔre a ɛsɔ ani ma Onyankopɔn, nanso ne nua kum no sɛ́ Yehowa dansefo a wodii kan kum no.​—Genesis 1:1​—4:26.

Henok ‘ne Onyankopɔn nantew,’ ma ɔyɛ nea ɛne ɔsoro apɛde hyia. Nanso tebea horow sɛe bere a ‘Onyankopɔn mma’ abɔfo asoɔdenfo fa mmea sɛ yerenom na wɔwo Nefilim no. Nanso, ɛdenam gyidi, anidaso ne akokoduru so no, Noa pam adaka, bɔ Nsuyiri a ɛreba ho kɔkɔ na awiei koraa no ɔne n’abusua kwati ɔsɛe a ɛde bae no. Wiase a na ɛwɔ hɔ ansa na Nsuyiri no reba no fi hɔ, adesamma hyɛn bere foforo mu. Nanso bere rekɔ so no Babel abantofo bɔ mmɔden sɛ wobegye din ama wɔn ho, na wɔn nhyehyɛe no sɛe bere a Yehowa yɛ wɔn kasa basabasa na ɔbɔ wɔn pete wiase nyinaa no.​—Genesis 5:1​—11:9.

Bere a ɔreyɛ ade gyidi mu sɛnea Onyankopɔn kyerɛ no, Abram fi Kaldeafo kurow a wɔfrɛ no Ur mu kɔtraa ntamadan mu wɔ asase a Yehowa hyɛ bɔ sɛ ɔde bɛma ɔne n’asefo so. Wofi soro sɛe Sodom ne nkurow a ɛdeda ho no mu nnipa bɔne no. Bere bi akyi no Onyankopɔn bɔhyɛ nya mmamu ma wɔwo Isak. Nanso, mfe bi akyi no Abraham hyia sɔhwɛ kɛse bere a Yehowa ka kyerɛ no sɛ ɔmfa ɔbabarima yi mmɔ afɔre no. Ɔbɔfo siw no kwan akyi no, agya panyin a ne mfe akɔ anim no gyae. Nanso afei de na akyinnye biara nni ho sɛ ɔyɛ ɔbarima gyidifo, na wɔhyɛ no bɔ sɛ n’aseni so na aman nyinaa nam behyira wɔn ho. Abraham yere Sara a ɔdɔ no yiye no wu de awerɛhow ba, nanso na obetumi anya owusɔre no mu anidaso.​—Genesis 11:10​—23:20; Hebrifo 11:8-19.

Ɛdenam n’akoa so no, Abraham yɛ nhyehyɛe ma Isak ware Rebeka, ɔbea a ɔwɔ Yehowa mu gyidi. Bere bi akyi no ɔwo ntafo Esau ne Yakob. Esau bu panyin a ɔyɛ no animtiaa na ɔtɔn ma Yakob, a akyiri yi onya n’agya nhyira. Yakob guan kɔ Padan-aram (anaa Mesopotamia) , faako a ɔware Lea ne Rahel na ɔhwɛ wɔn agya Laban nguan bɛyɛ mfe 20 ansa na ɔne n’abusua refi hɔ. Akyiri yi, Yakob ne ɔbɔfo di aperepere, ohyira no na ɔsesa ne din yɛ no Israel. Sɛ́ ɔbarima a ɔwɔ gyidi na ɔwɔ anidaso no, Israel kɔ so tra hɔ sɛ ɔnanani wɔ Kanaan, bɔhyɛ asase no so.​—Genesis 24:1​—37:1.

Ahoɔyaw ma Yakob mma tɔn wɔn nua Yosef sɛ́ akoa. Wɔ Misraim no, Onyankopɔn ahyɛde a ɛfa abrabɔ pa ho akyi a Yosef de nokwaredi ne akokoduru di no ma wɔde no kɔto afiase. Nanso bere bi akyi no woyi no fi afiase sɛ ɔmmɛkyerɛ Farao adae bi a na ɛfa aduan a ɛbɛba mfirihyia ason na ɛno akyi no ɔkɔm aba ho no ase, denam Yehowa mmoa so. Wɔyɛ no Misraim aduan sohwɛfo Yosef nuanom ba bɛhwehwɛ aduan wɔ Misraim nanso wonhu sɛ ɛyɛ ɔno. Odi kan sɔ wɔn hwɛ, na awiei no ɔda ne ho adi kyerɛ wɔn. Ɔnokwafo Yakob ne ne ba a wayera bere tenteenten no san hyia na wɔma agya panyin no abusuafo tra Gosen asase pa no so. Wɔ ne wupa so no, Yakob hyira ne mmabarima no, na ɔhyɛ nkɔm sɛ ahempoma ne mmarahyɛ poma no remfi Yuda nsa kosi sɛ Silo bɛba​—nkɔmhyɛ a ɛde nhyira kɛse a ɛbɛba wɔ mfehaha no mu ho anidaso ma. Wɔde Yakob amu kɔ Kanaan kosie, na bere a Yosef wu a na wadi mfe 110 no, wɔhyɛ n’amu no aduru, sɛ da koro wɔde bɛkɔ Bɔhyɛ Asase no so.​—Genesis 37:2​—50:26; Exodus 13:19.

Ɛdenam Genesis a wobɛkan no yiye so no, wubenya mfaso pii afi saa asɛm a ɛkanyan gyidi, anidaso ne akokoduru yi mu. Nanso, eyi yɛ mu no, ebia wubehyia nsemmisa ahorow. Ebia yebenya nsemmisa ahorow no mu binom ho mmuae bere a yɛhwɛ Bible mu nhoma a edi kan no mu yiye no.

Wiase A Na Ɛwɔ Hɔ Ansa Na Nsuyiri No Reba

●1:26​—Ɔkwan bɛn so na wɔyɛɛ onipa Onyankopɔn suban so ne ne sɛso?

Onipa nnim sɛnea Onyankopɔn nipadua te. (Deuteronomium 4:15-20) Nanso wɔyɛɛ onipa Yehowa suban so ne ne sɛso efisɛ wɔde Onyankopɔn su ahorow bi te sɛ atɛntrenee, nyansa, tumi ne ɔdɔ bɔɔ no. (Deuteronomium 32:4; Hiob 12:13; Yesaia 40:26; 1 Yohane 4:8) Esiane sɛ Onyankopɔn Ba, Asɛm no, nso wɔ su ahorow yi bi nti, Yehowa tumi ka kyerɛɛ no sɛ: “Ma yɛnyɛ onipa wɔ yɛn suban so, sɛ yɛn sɛso.”​—Yohane 1:1-3, 14, New World Translation.

●4:17​—Ɛhe na Kain nyaa ne yere?

Adam “woo mmabarima ne mmabea.” (Genesis 5:4) Enti Kain faa ne nuanom mmea no mu biako sɛ ɔyere. Akyiri yi, Onyankopɔn mmara a ɔde maa Israelfo no amma ɔhonam fam nuabarima ne nuabea aware ho kwan.​—Leviticus 18:9.

●6:6​—Ɔkwan bɛn so na Yehowa “nuu ne ho” sɛ ɔyɛɛ nnipa?

Ɛha no Hebri asɛmfua a wɔkyerɛɛ ase “nuu ne ho” no fa sakra a obi sakra n’adwene ho. Yehowa yɛ pɛ, na enti wanyɛ mfomso wɔ onipa bɔ mu. Mmom no n’adwene sesae wɔ awo ntoatoaso bɔne a na ɛwɔ hɔ ansa na Nsuyiri no reba no ho. Onyankopɔn sesã fii nipa Bɔfo a na ɔyɛ no ho bɛyɛɛ wɔn sɛefo esiane wɔn nnebɔne no ho abufuw a onyae nti. Ɛyɛɛ Yehowa yaw sɛ nnipa nsɛmmɔnedi nti ɛsɛ sɛ ɔde ɔsɛe kɛse a ɛte saa ba, nanso na ɛsɛ sɛ ɔyɛ saa na wama ne trenee nhyehyɛe horow no atra hɔ. Nokwasɛm a ɛyɛ sɛ ɔkoraa nnipa bi so no da no adi sɛ ne ho a onni no fa wɔn a na wɔasɛe wɔ ɔkasa ne nneyɛe mu no ho.​—2 Petro 2:5, 9.

Adesamma Hyɛn Bere Foforo Mu

●8:11​—Sɛ Nsuyiri no sɛee nua a, ɛnde ɛhe na aborɔnoma no nyaa ngodua ahaban no?

Akyinnye biara nni ho sɛ Nsuyiri no sɛee nnua pii. Nanso, Helani nyansapɛfo ne abɔde ho nimdefo Theophrastus ne Romani nnua ne mmoa ho nimdefo Pliny the Elder bɔɔ amanneɛ sɛ ngodua nyinii wɔ Ɛpo Kɔkɔɔ no ase, ma ɛyɛɛ frɔmm wɔ hɔ mpo. Enti ebetumi aba sɛ ngodua bi kɔɔ so sii hɔ wɔ nsu no ase asram dodow bi a anwu wɔ Nsuyiri no mu. Bere a nsu no twetwee no, na ngodua a nsu akata so no betumi apue bio na ayi nhaban ma aborɔnoma no atumi anya bi.

●9:24, 25​—Dɛn nti na Noa domee Kanaan bere a Ham na odii mfomso no?

Ɛbɛyɛ sɛ Kanaan yɛɛ biribi a ɛmfata wɔ ne nena Noa ho, na Ham huu eyi a wanyɛ ho hwee. Mmom no, ɛte sɛ nea Noa ba Ham keka kyerɛɛ afoforo, na Sem ne Yafet yɛɛ ho biribi ma wɔkataa wɔn agya so. Enti, wohyiraa wɔn, na ɛda adi sɛ wɔdomee Kanaan a ɔyɛɛ dekode no ankasa no, na Ham a ogyinaa nkyɛn hwɛe na ɔkeka kyerɛe no nso huu amane denam animguase a n’aseni no de baa no so no so. Ɛwom sɛ Kyerɛwnsɛm no nkyerɛkyerɛ ne nyinaa mu de, nanso asɛm titiriw no ne sɛ Yehowa maa Noa hyɛɛ nkɔm na Onyankopɔn ma ɛbaa mu bere a Israelfo sɛee Kanaanfo no na wɔde wɔn yɛɛ nkoa maa Sem asefo no.​—Yosua 9:23; 1 Ahene 9:21.

●10:25​—Ɔkwan bɛn so na “wɔkyekyɛɛ” asase no mu wɔ Peleg bere so?

Peleg traa ase efi 2269 besi 2030 A.Y.B. Ná ne din ase kyerɛ “nkyekyem,” na sɛ wɔde saa din no too no bere a wɔwoo no no a, ɛnde na ɛyɛ nkyekyem titiriw bi a ɛbaa ne bere so no ho nkɔmhyɛ. Saa bere no na “wɔkyekyɛɛ asase [anaasɛ, “asase so tefo”] mu.” Bible no da no adi sɛ ne “nna mu” na Yehowa de mpaapaemu kɛse bi bae denam Babel abantofo no kasa a ɔyɛɛ no basabasa na ‘ɔbɔɔ wɔn petee asase nyinaa ani’ no so.​—Genesis 11:9; hwɛ 10:1, 6, 8-10; 11:10-17 nso.

Agyanom Mpanyimfo A Wɔwɔ Gyidi A Ɛtra Hɔ Daa

●15:13​—Ɔkwan bɛn so na Abram asefo mfirihyia 400 ayayadeyɛ a wɔka siei no baa mu?

Saa ayayadeyɛ bere yi fii ase 1913 de besii 1513 A.Y.B. Bere a Abraham babarima Isak twaa nufu a na wadi bɛyɛ mfe 5 wɔ 1913 A.Y.B. mu no, n’agya ba Ismael (a na wadi bɛyɛ mfe 19 no) ‘dii ne ho fɛw.’ Aniberesɛm a na ɛwɔ Abraham ɔdedifo yi ho fɛw a odii yi mu no da adi wɔ nea Sara yɛe wɔ ho ne pene a Yehowa penee ka a ɔkae sɛ wɔmma Hagar ne ne babarima Ismael mfi fie hɔ nkɔ no so no mu. (Genesis 21:8-14; Galatifo 4:29) Saa mfe 400 ayayadeyɛ bere yi baa awiei bere a wogyee Israelfo no fii Misraim nkoasom mu wɔ 1513 A.Y.B. mu no.

●19:30-38​—So Yehowa buu ani guu nsa a Lot nom bowee ma ɔne n’ankasa ne mmabea baanu woe no so sɛ ɛnyɛ hwee anaa?

Yehowa mpene mogyafra a wodi anaa asabow so. (Leviticus 18:6, 7, 29; 1 Korintofo 6:9, 10) Afei nso, Abraham wɔfase Lot sɔre tiaa “nnebɔne” a Sodom kurow no mufo yɛe no, na ɛda adi sɛ ne werɛ howee wɔ abrabɔ bɔne a na ɛrekɔ so wɔ faako a ɔte no ho, efisɛ koma mu hwehwɛfo no buu no “trenee.” (2 Petro 2:8) Nokwasɛm a ɛyɛ sɛ Lot mmabea no ma ɔbowee no kyerɛ sɛ wohui sɛ na ɔrempene so sɛ ɔne wɔn bɛda bere a n’ani da hɔ. Nanso sɛ́ ahɔho wɔ asase no so no mmabea no tee nka sɛ eyi ne ɔkwan koro pɛ a wobetumi afa so asiw Lot abusua no ase hyew a ɛbɛhyew ano. Kyerɛwtohɔ no wɔ Bible mu, ɛnyɛ sɛ ɛbɛkanyan akɔnnɔ, na mmom sɛ ɛbɛda abusuabɔ a Moabfo ne Amonfo ne Abraham asefo, Israelfo, wɔ no adi.

●28:12, 13​—Ná Yakob dae a ɛfa “antweri” ho no kyerɛ dɛn?

Saa “antweri” (a ebetumi aba sɛ na ɛte sɛ atrapoe a ɛforo kɔ soro) no kyerɛe sɛ nkitahodi wɔ ɔsoro ne asase ntam. Ɛkyerɛe sɛ abɔfo di dwuma wɔ Yehowa ne nnipa a wɔwɔ ne dom no ntam.​—Fa toto Yohane 1:51 ho

●31:19​—Dɛn ne terafim (abusua honi) a Rahel wia fii Laban nkyɛn no?

Ná terafim no yɛ mmusua anyame anaa ahoni. Tete nneɛma a wɔatutu fam ahu wɔ Mesopotamia no kyerɛ sɛ na ahoni a ɛte saa a obi benya no kyerɛ onii a ne nsa bɛka abusua agyapade no. Ebetumi aba sɛ na eyi wɔ Rahel adwene mu na ɔtee nka sɛ ɛfata sɛ ɔfa abusua honi no esiane nnaadaa kwan a n’agya Laban faa so ne ne kunu Yakob dii no nti. (Genesis 31:14-16) Nanso biribiara nni hɔ a ɛkyerɛ sɛ Yakob bɔɔ mmɔden sɛ ɔde abusua honi no bedi dwuma de agye abusua agyapade no. Akyiri yi no, wɔtow ahoni yi nyinaa gui bere a Yakob tow anyame ananafo a na ɛwɔ ne fi nyinaa gui no.​—Genesis 35:1-4.

●44:5​—So Yosef de kuruwa bi kenae ankasa?

Ná Yosef abɔ ne tirim sɛ ɔbɛsɔ ne nuanom a wɔanhu no no ahwɛ. Enti ɔka kyerɛɛ n’akoa no sɛ ɔmfa aduan nhyɛ wɔn nkotoku no amaama, na ɔmfa obiara sika nsan nhyɛ ne kotoku ano, na ɔmfa ne dwetɛ kuruwa no nhyɛ Benyamin kotoku de no ano. Eyi nyinaa mu no na Yosef reyɛ ne ho te sɛ sodifo wɔ abosonsomfo asase so. Enti ɛda adi sɛ na kuruwa no ne nea wɔkae wɔ ho no yɛ sɔhwɛ nhyehyɛe no bi. Sɛ́ Yehowa nokware somfo no, Yosef amfa saa kuruwa no ankena sɛnea Benyamin nso anwia ankasa no.

●49:10​—So nsonoe da ahempoma ne mmarahyɛ poma ntam anaa?

Yiw. Ahempoma yɛ poma a sodifo kura sɛ ahenni tumi ho sɛnkyerɛnne. Mmarahyɛ poma yɛ poma tenten bi a ɛyɛ mmarahyɛ tumi ho agyiraehyɛde. Ɛda adi sɛ n’abien nyinaa a Yakob dan adwene kɔɔ so no kyerɛe sɛ Yuda abusua no benya tumi titiriw kosi sɛ Silo bɛba. Yuda aseni yi ne Yesu Kristo, onii a Yehowa de ɔsoro ahenni ama no no. Kristo wɔ ahenni tumi na ɔwɔ mmarahyɛ tumi nso.​—Dwom 2:8, 9; Yesaia 55:4; Daniel 7:13, 14.

Gyidi, Anidaso Ne Akokoduru Nnyinaso

Genesis ma yɛn gyidi, anidaso ne akokoduru nnyinaso ampa. Ɛkanyan gyidi wɔ Yehowa mu ne “aseni” a wɔahyɛ ne ho bɔ a wɔnam no so de nhyira bɛba no mu anidaso. (Genesis 3:15; 22:18) Saa nhoma yi nso boa ma yɛde akokoduru hyia daakye, sɛnea Yehowa adansefo a wodi kan yɛe no.

Ná Onyankopɔn asomfo yi ‘rehwehwɛ kurow a eye kyɛn so, a ɛyɛ ɔsoro de,’ na Yehowa ‘asiesie kurow bi ama wɔn.’ (Hebrifo 11:15, 16) Sɛnea wɔhwɛɛ Ahenni nhyehyɛe no kwan no, momma yɛn nso mfa yɛn werɛ nhyɛ mu. Na te sɛ saa Yehowa adansefo no, momma yennya nokware gyidi, anidaso ne akokoduru.

[Kratafa 9 mfoni]

Yakob ne Esau

Yosef

Abraham ne Isak

Kain ne Habel

Noa