Abrabɔ Ne Asɛnka Adesua Nhoma Nhwehwɛmu

MARCH 2-8

BIBLE MU AKORADE | GENESIS 22-23

Tweetwee Bible Mu

it-1 853 ¶5-6

Tumi a Onyankopɔn De Hu Nea Ebesi Daakye

Ɛnyɛ bere nyinaa na ɔde saa tumi no yɛ adwuma. Tumi a Onyankopɔn wɔ a otumi de hu nea ebesi daakye no, ɛnyɛ bere nyinaa na ɔde di dwuma. Sɛ ɔpaw sɛ ɔde bedi dwuma nso a, ɛsɛ sɛ ɛne nea Kyerɛwnsɛm no ka fa ne ho ne ne trenee gyinapɛn no hyia. Bible no ma yehu sɛ, ɛtɔ da a, ansa na Onyankopɔn besi biribi ho gyinae no, odi kan hwehwɛ mu ansa. Wei ne nkrabea nkyerɛkyerɛ no nhyia.

Ɛho nhwɛso ne asɛm a ɛwɔ Genesis 11:5-8 no. Bible ma yehu sɛ, Onyankopɔn kɔhwɛɛ nea na ɛrekɔ so wɔ Babel ansa na ɔresi gyinae sɛ obegu adwuma a na wɔreyɛ no, efisɛ na n’ani nnye ho. Afei nso, bere a nnipa de abɔnefosɛm hyɛɛ Sodom ne Gomora mã no, Onyankopɔn ka kyerɛɛ Abraham sɛ, “Mɛkɔ akɔhwɛ sɛ osu ne nteɛteɛm a mate no te saa ampa, na sɛ ɛnte saa a mehu.” Ɛnyɛ ɔno ankasa na osian bae, mmom ɔsomaa abɔfo. (Ge 18:20-22; 19:1) Nhwɛso foforo nso ne sɛ, na Onyankopɔn ne Abraham ‘abɔ’ akyɛ, nanso ɛyɛ bere a Abraham yɛe sɛ ɔde Isak rekɔbɔ afɔre no na Yehowa kaa sɛ, “Afei na mahu sɛ wusuro Onyankopɔn, efisɛ woamfa wo ba koro no ankame me.”—Ge 18:19; 22:11, 12; fa toto Ne 9:7, 8; Ga 4:9 ho.

MARCH 16-22

BIBLE MU AKORADE | GENESIS 25-26

it-1 1242

Yakob

Bible ka Yakob ho asɛm sɛ, na “ɔyɛ obi a ne ho nni asɛm [Hebri mu no, tam] a ɔte ntamadan mu.” Ná ɔyɛ oguanhwɛfo a ɔmpɛ ne ho asɛm, na na ɔbɔ ne ho mmɔden yɛ fie nnwuma. Ná ne maame pɛ n’asɛm paa. Nanso na ne papa pɛ Esau asɛm. Esau de, na n’ani so yɛ hyew, na na onim ahayɔ. (Ge 25:27, 28) Ɛtɔ da na Bible reka wɔn a Onyankopɔn gye wɔn tom no ho asɛm a, ɛde Hebri asɛmfua tam na edi dwuma. Sɛ nhwɛso no, “Mogyapɛfo tan pɛyɛfo,” nanso Yehowa ma yenya awerɛhyem sɛ “onipa a ɔyɛ pɛ [anaa ne ho nni asɛm] awiei yɛ asomdwoe.” (Mme 29:10; Dw 37:37) Ná Hiob yɛ ‘onipa a ne ho nni asɛm [Hebri mu no, tam], na na ɔteɛ.’—Hio 1:1, 8; 2:3.

it-1 835

Abakan

Tete no, sɛ ɔbarima bi yɛ abakan a, na ɔwɔ hokwan kɛse wɔ abusua no mu. Ná ne papa nni hɔ a, ɔno na osi n’anan sɛ abusua ti. Afei nso, sɛ wɔkyɛ ne papa agyapade no a, onya mmɔho mmienu. (De 21:17) Bere a Yosef too pon maa ne nuanom na ɔhyehyɛɛ wɔn nnidiso nnidiso fi ɔpanyin kosi akumaa so no, ɔde Ruben dii kan efisɛ na ɔno ne abakan. (Ge 43:33) Nanso ɛnyɛ bere nyinaa na sɛ Bible rebobɔ mma a wɔwɔ abusua bi mu din a, ɔde abakan no di kan. Ɛtɔ da a, mmofra no mu nea wagye din anaa nea odii nokware no na wɔde hokwan no ma no.—Ge 6:10; 1Be 1:28; fa toto Ge 11:26, 32; 12:4 ho; hwɛ BIRTHRIGHT; INHERITANCE.

Tweetwee Bible Mu

it-2 245 ¶6

Atoro

Ɛwom, sɛ obi hyɛ da di atoro a, Bible kasa tia. Nanso wei nkyerɛ sɛ, sɛ obi bisa asɛm bi na onni hokwan sɛ ohu nokware a ɛwom a, kyenkyen ara a, ɛsɛ sɛ yɛka nokwasɛm no kyerɛ no. Yesu Kristo tuu yɛn fo sɛ: “Mommfa akronkronne mmma akraman, na monntow mo nhene nngu mprako anim, na wɔantiatia so annan wɔn ho ammɛtetew mo mu.” (Mt 7:6) Ɛno nti na sɛ ɛtɔ da na afoforo bisa Yesu asɛm bi, na ohu sɛ saafo no nni hokwan sɛ wohu nokwasɛm no, na ebetumi de ne nkwa ato asiane mu a, onyi wɔn ano tẽẽ anaa ɔnka nokwasɛm a ɛwom no nyinaa nkyerɛ wɔn no. (Mt 15:1-6; 21:23-27; Yoh 7:3-10) Abraham, Isak, Rahab, ne Elisa nso yɛɛ saa. Bere a nkurɔfo a wɔnsom Yehowa bisaa wɔn nsɛm bi no, wɔanka nokwasɛm a ɛwom no nyinaa ankyerɛ wɔn.—Ge 12:10-19; ti 20; 26:1-10; Yos 2:1-6; Yak 2:25; 2Ah 6:11-23.

MARCH 23-29

BIBLE MU AKORADE | GENESIS 27-28

it-1 341 ¶6

Nhyira

Tete no, na agyanom taa hyira wɔn mma mmarima ansa na wɔawu. Ná wei yɛ biribi a ɛho hia paa, na na wonni ho agorɔ koraa. Sɛ nhwɛso no, Isak hyiraa Yakob. Bere a ɔrehyira no no, na n’adwene yɛ no sɛ ɛyɛ n’abakan Esau. Wei nti ohwiee nhyira no nyinaa guu Yakob so, wannyaw nhyira no bi amma Esau. Ɔkaa sɛ Yehowa mmoa Yakob, na ɔmma ensi no yiye. Ná Isak nim sɛ wabɔ akora, na n’ani nhu ade. Enti akyinnye biara nni ho sɛ, ɔsrɛɛ Yehowa sɛ, ɔmma nhyira a ɔde ama Yakob no nyinaa mmra mu. (Ge 27:1-4, 23-29; 28:1, 6; Heb 11:20; 12:16, 17) Akyiri yi mpo a Isak behui sɛ ɛyɛ Yakob na ohyiraa no no, ohyiraa no bi kaa ho. (Ge 28:1-4) Afei nso, aka kakra ama Yakob awu no, ohyiraa Yosef mma mmienu no ansa na ɔrehyira ɔno ara ne mma mmarima no. (Ge 48:9, 20; 49:1-28; Heb 11:21) Saa ara nso na Mose hyiraa Israel man no ansa na ɔrewu. (De 33:1) Nhyira no akyi no, nea esii wɔ saa nkurɔfo no asetenam ma yehu sɛ, na nhyira ahorow no yɛ nkɔmhyɛ. Ɛtɔ da na sɛ obi rehyira obi a, onii a ɔrehyira obi no de ne nsa to nea ɔrehyira no no apampam.—Ge 48:13, 14.

MARCH 30–APRIL 5

BIBLE MU AKORADE | GENESIS 29-30

it-2 341 ¶3

Aware

Apontow. Ɛwom, na Israelni bi reyɛ ayeforo a, wɔmmɔ gua nto pon kuntann, nanso na saa da no yɛ anigye da. Da a wobehyia ayeforo no, ɔbaa no yɛ ntotoe pii wɔ ɔno ara ne fie. Ade a edi kan a ɔyɛ ne sɛ, oguare; owie a, ɔde aduhuam srasra ne ho. (Fa toto Ru 3:3; Hes 23:40 ho.) Ɛtɔ da a, mmaa foforo boa ɔbaa a wɔrebehyia no ayeforo no ma osiesie ne ho; ɔbɔ abɔso na ɔhyɛ nwera fitaa. Sɛ n’abusua nsam wɔ bi a, otumi hyɛ nwera pa a wɔahyɛ da adi mu adwinni. (Yer 2:32; Adi 19:7, 8; Dw 45:13, 14) Sɛ ɔpɛ a, ɔde nkapo to ne nsa, na ɔde bi nso gu ne kɔn mu (Yes 49:18; 61:10; Adi 21:2). Afei ɔde nwera tenten bi kata n’anim kosi ne nan ase. (Yes 3:19, 23) Wei ma yehu nea enti a anyɛ den sɛ Laban de Lea bɛsesa Rahel ama Yakob no. Efisɛ na Yakob ntumi nhu ɔbaa no anim. (Ge 29:23, 25) Rebeka rebehyia Isak no, ɔde nwera kataa n’anim. (Ge 24:65) Sɛ ɔbaa bi de nwera kata n’anim a, ɛkyerɛ sɛ, obu ɔbarima a ɔrebɛware no no, ne tiyɛ ho nhyehyɛe a Onyankopɔn ayɛ no.—1Ko 11:5, 10.

Tweetwee Bible Mu

it-1 50

Obi a Wogye No De No Yɛ Ɔba

Mmofra a Rahel ne Lea mmaawa wo maa Yakob no, na Rahel ne Lea bu wɔn sɛ wɔn ankasa mma a ‘wɔawo wɔn agu wɔn srɛ so’. (Ge 30:3-8, 12, 13, 24) Sɛ Yakob rekyɛ n’agyapade ama ne mma no a, na saa mmofra yi benya bi, efisɛ Yakob ankasa na ɔwoo wɔn. Afei nso, esiane sɛ na mmaawa no yɛ Lea ne Rahel agyapade nti, na mmaawa no mma no nso yɛ Lea ne Rahel agyapade.