Boseabɔ Ne Kristofo Dɔ

BERE bi a atwam ni no, okuafo bi babea yaree denneennen. Ná ayaresa ho hia no kɛse, nanso na okuafo no yɛ ohiani na na onni sika a ɛbɛma watumi de ne babea no akohu oduruyɛfo. Wɔ kurow a na wɔte mu no mu no​—sɛnea na ɛte wɔ nkurow pii so wɔ saa man no mu no​—ná obi wɔ kurow no mu a ɔbɔ bosea gye mfɛntom. Sɛ wugye sidi anum a, ɔsram a edi hɔ no wutua sidi asia. Ɔbarima a ɔbɔ bosea yi maa okuafo no sika ntɛm ara, nanso ɔsram a edi hɔ no na ɛsɛ sɛ okuafo no fi ase tua mfɛntom no.

Wubebu saa nhyehyɛe yi dɛn? So ɛbɛyɛ nea ɛfata ma Kristoni sɛ ɔbɔ bosea gye mfɛntom wɔ tebea a ɛtete sɛɛ mu anaa?

Ɔsomafo Yohane ka kyerɛɛ ne mfɛfo Kristofo sɛ ɛnsɛ sɛ wɔbɔ wɔn nuanom a ahia wɔn “ayamɔnwene.’ (1 Yohane 3:17) Na mmara a Onyankopɔn de maa Israelfo no ka no pen sɛ: “Mpirim wo koma, na mmua wo nsa ano nhyɛ wo nua hiani; na bue wo nsam ma no, na fɛm no nea ɛbɛso ne hia a ehia no no.”​—Deuteronomium 15:7, 8.

Enti, onii a ɔbɔ bosea no bɔɔ mmɔden sɛ ɔde sika no mae na wɔde akɔhwɛ abeawa no yare. Anyɛ yiye koraa no onyaa ayaresa a ɛho hia no. Nanso mmara a wɔde maa Israel no fã foforo wɔ hɔ. Ɛkae sɛ: “Sɛ wofɛm me man mu ɔbrɛfo bi a ɔne wo wɔ hɔ sika a, nyɛ no sɛ ɔpepemsifo; munnnye no mfɛntom.” (Exodus 22:25) Dɛn nti na na Israelfo no ntumi mmɔ wɔn ho wɔn ho bosea nnye mfɛntom?

Kae sɛ mfitiase no na Yudafo dodow no ara yɛ akuafo, ná wɔnyɛ aguadifo. Sɛ okuafo a ɔyɛ n’agyanom asase so adwuma kɔpɛ bosea a, mpɛn pii no na ɛyɛ ahokyere bi nti. Mmara no faa no sɛ na obi a ɔregye bosea no bɛyɛ “ɔbrɛfo.” Ebia na asiane bi ato no, n’afuw asɛe, anaasɛ ebia esiane biribi nti ohia sika no na watumi de atra ase akodu twabere a edi hɔ no. Mfɛntom a wobegye wɔ tebea a ɛte sɛɛ mu no bɛyɛ onua amanehunu so a wogyina pɛ mfaso. Ɛrenkyerɛ ɔdɔ, na wɔhyɛɛ Israelfo no sɛ: “Dɔ wo yɔnko sɛ wo ho.”​—Leviticus 19:18.

Bere a Kristofo nni tete mmara no ase nnɛ no, ɛda so yɛ wɔn asɛyɛde sɛ wɔdodɔ wɔn ho. Yesu kae sɛ: “Dɔ wo yɔnko sɛ wo ho.” (Mateo 22:39) Enti, ɛnsɛ sɛ Kristoni nso hwehwɛ sɛ ɔbɛpɛ ne nua amanehunu ho mfaso denam mfɛntom a obebisa bere a ne nua ho akyere no na ɔhwehwɛ bosea no so.

Nokwasɛm no ne sɛ, wɔ ahokyere bere mu no, Kristofo de nea ɛsen boseabɔ boa wɔn ho wɔn ho. Wɔde akyɛde ahorow ma. Wɔ afeha a edi kan no mu no wɔmaa Paulo ne Barnaba de Kristofo a wɔwɔ Asia Kuma no ntoboa ahorow kɔmaa wɔn nuanom a wɔwɔ Yudea a na wɔrehu amane esiane ɔkɔm a na aba hɔ nti no. (Asomafo no Nnwuma 11:29, 30) Saa nso na nnɛ, bere biara a asɛm bɔne bi besi wɔ baabi no, Kristofo de akyɛde horow kɔboa wɔn nuanom.

Honhom koro no ara mu no, Yesu hyɛe sɛ: “Nea ɔpɛ sɛ ɔfɛm wo hɔ ade no, nnan wo ho mfi ne ho.” (Mateo 5:42) Enti Kristoni bu bere tiaa mu ahokyere a ɛba ne nua so no sɛ hokwan a ɔde beyi ɔdɔ adi akyerɛ. Ɛsɛ sɛ ɔboa sɛnea obetumi, na mpo ɔde akyɛde ahorow ma anaa bosea a mfɛntom biara nka ho. Akyinnye biara nni ho sɛ, sɛ onii a ɔbɔ bosea a yedii kan kaa ne ho asɛm no de Kristofo nnyinasosɛm ahorow dii dwuma a, anka ɔno nso besusuw ho wɔ saa kwan yi so.

Ne Tua

Eyi mu no, nea ogye bosea no nso wɔ asɛyɛde. Paulo tuu Kristofo fo sɛ: “Monnne obiara ka gye sɛ ɔdɔ a mode dodɔ mo ho.” (Romafo 13:8) Enti, ɛsɛ sɛ obi a ogye bosea no kae asɛyɛde a ɔwɔ sɛ obetua ɛka a ɔde no ntɛm ara sɛnea obetumi. Ɛnsɛ sɛ ɔka sɛ, esiane sɛ onii a ɔmaa no bosea no wɔ sika sen no nti, ɛho nhia sɛ ɔsan tua. Saa nso na ɛnsɛ sɛ ɔhwɛ kwan sɛ ɔyɔnko Kristoni a ɔyɛ oduruyɛfo anaasɛ mmaranimfo bɛyɛ adwuma bi ama no a ontua no ka.

Yesu kae sɛ: “Momma mo asɛm nyɛ yiw, yiw, dabi, dabi!” (Mateo 5:37) Kyerɛ sɛ, ɛsɛ sɛ Kristoni di n’asɛm so. Sɛ ogye bosea na ɔhyɛ bɔ sɛ obetua, anaa sɛ ɔde ka bi a, ɛsɛ sɛ ɔyɛ nea obetumi nyinaa sɛ obetua saa ka no. Sɛnea ɛbɛyɛ na aboa no wɔ eyi mu, na obiara ate ne ho ase no, ɛyɛ nea nyansa wom sɛ wɔyɛ ho kyerɛwtohɔ, kyerɛ sika dodow no, sɛnea ɛsɛ sɛ wotua no, ne ade.

Bosea A Wɔbɔ Gye Mfɛntom

So ɛyɛ nea ɔdɔ nni mu bere nyinaa sɛ wobebisa mfɛntom? Dabida. Eye sɛ yɛhyɛ no nsow sɛ, bere a na ɛnsɛ sɛ Yudafo gye mfɛntom fi mfɛfo Israelfo nkyɛn no, na ɛyɛ soronko wɔ ananafo fam. Mmara no kae sɛ: “Ɔnanani nkyɛn na gye mfɛntom.” (Deuteronomium 23:20) Dɛn nti na ɛte saa? Efisɛ ɛda adi sɛ na ɔnanani a ɔwɔ Israel no yɛ oguadifo, na bosea a ɔbɔ no betumi ayɛ nea na ɔde kodi gua. Enti na ɛyɛ nea nyansa wom sɛ ɛsɛ sɛ onii a ɔde sika no ma no nya mfaso a ɛbɛba no bi, na obetumi ayɛ eyi denam mfɛntom a obegye no so.

Yesu annkasa antia sika a wɔde ma gye mfɛntom no. Ɔdaa eyi adi wɔ ne mmɛ ahorow no biako mu. Ɔkaa ɔdehye bi a otuu kwan kɔɔ baabi na ɔde sika maa ne nkoa ho asɛm. Bere a ɔsan bae no, ɔfrɛɛ wɔn sɛ wommebu akontaa, na ohui sɛ nkoa a ɔde sika hyɛɛ wɔn nsa no mu dodow no ara de sika no yɛɛ adwuma nyaa mfaso. Ɔkamfoo eyinom. Nanso, akoa biako de, wamfa sika no anyɛ adwuma; enti wannya mfaso biara a ɔde bɛkyerɛ. Wamfa sika no ankɔto sikakorabea mpo, a ɛbɛkyerɛ sɛ na ɔde sika no refɛm sikakorabea no ma wɔde ayɛ adwuma ma ebi abɛka ho. Owura no kaa saa akoa yi anim.​—Luka 19:11-24.

Na nnɛ nso ɛ? Kristofo mmea baanu yɛɛ adwuma nhyehyɛe. Ná obiako de Amerika sika bɛyɛ dɔla 20 ma ɔfoforo no da biara. Nea wɔde sika no ma no no totɔ nnuan tɔn wɔ gua so. Anwummere no onya bɛyɛ dɔla 25 na ɔde emu dɔla 21 ma sikawura no, na ɔfa dɔla 4. Saa man no mu no na dɔla 4 a obi benya no da koro nyɛ nea esua dodo.

Wɔ baabi foforo no, na Kristoni barima bi hwɛ abusua adwuma bi so. Esiane anibuei a aba nti, na onim sɛ ɛrenkyɛ adwuma no bɛkɔ fam. Nanso na hokwan wɔ hɔ sɛ ɔbɛdan akɔ biribi foforo so. Ná nea ɛho hia ara ne sɛ obenya sika a ɛdɔɔso. Enti ɔkɔbɔɔ bosea fii ɔyɔnko Kristoni bi nkyɛn, na ɔhyɛɛ bɔ sɛ obetua sika no ho mfɛntom bi ɔsram biara.

So nhyehyɛe horow yi mu biara ne Onyankopɔn mmara a ɔde maa Israel sɛ mma wonnnye mfɛntom mfi wɔn ho wɔn ho nkyɛn no honhom bɔ abira? Dabida! Sɛ ɛnyɛ sɛ obi ho akyere no kɛse, na mmom ɔpɛ sɛ ogye bosea​—ma ebia ɔde yɛ adwuma​—a, biribiara nni hɔ a enti ɛnsɛ sɛ nea ɔde sika no ma no gye mfɛntom. Mfɛntom ahe na ɛsɛ sɛ ogye? Nea ɛka nneɛma afoforo ho no, ebegyina bosea kõ a wɔrebɔ, nea wɔn baanu nyinaa pene so ne nea ɔman no mu mmara ma kwan no so. Wɔ nhyehyɛe a edi kan a yɛaka ho asɛm mprempren no mu no, dɔla biako a wogye wɔ dɔla 20 ho da koro biara no bɛyɛ te sɛ nea ɛkɔ soro dodo. Nanso na nea ogyee sika no nya mfaso dɔla 5 da koro biara, na na n’ani gye sɛ ɔbɛma sikawura no bi.

Nanso, sɛ nsɛm bi a emu yɛ den sɔre akyiri yi a, ɛrenyɛ nea nyansa wom sɛ nea ogyee bosea no bɛka sɛ mfɛntom no kɔ soro dodo, sɛ ofii n’ankasa ne pɛ mu gye toom mfiase no a. Ɛha nso, ɛyɛ nea nyansa wom sɛ wɔkyerɛw nhyehyɛe a ɛwɔ bosea no ho no to hɔ, na akasakasa biara amma ho akyiri yi.

Hokwan Ahorow Ma Wɔde Akyerɛ Ɔdɔ

Sɛ nhyehyɛe a ɛtete sɛɛ kɔ so fɛfɛɛfɛ a, ɛho tumi ba obiara mfaso. Nanso eyi yɛ wiase a nneɛma di adannan, na mpɛn pii no nneɛma nkɔ yiye. Sɛ nhwɛso no, dɛn na ɛbɛba, sɛ wowia awuraa a yɛadi kan aka ne ho asɛm a ogye bosea dɔla 20 da biara no ɛ? Anaa, sɛ adwuma nhyehyɛe a mmarima baanu no yɛe no ankɔ so yiye sɛnea wɔhwɛɛ kwan no na nea ogyee bosea no antumi antua mfɛntom a ɔhyɛɛ ho bɔ no ɛ?

Bible no nhyɛ mmara horow biara wɔ sɛnea ɛsɛ sɛ wodi nsɛm a ɛtete sɛɛ ho dwuma ho, nanso asɛyɛde no da so wɔ hɔ sɛ: “Dɔ wo yɔnko sɛ wo ho.” (Mateo 22:39) Sɛ wɔn baanu nyinaa de adwene a emu da hɔ susuw wɔn mu biara yiyedi ho, hu sɛnea tebea no te ankasa na wogye akwankyerɛ pa tom a, ɛnde mpɛn pii no wotumi siesie nsɛm wɔ ɔkwan pa so.

Nokwarem no, ɔsomafo Paulo anhyɛ nyansa sɛ Kristofo mfa wɔn nuanom nkɔ asenniibea wɔ sikasɛm ho. Ɔkae sɛ: “Mfomso anya aba mo mu dedaw sɛ mowowɔ mo ho nsɛmnsɛm. Adɛn na momma wonni mo amim mmom? Adɛn na momma wonsisi mo mmom?”​—1 Korintofo 6:7.

Kristoni a ɔde ka no, esiane sɛ ɔnyɛ “odifudepɛfo” nti, ɛsɛ sɛ onya ɔpɛ sɛ obetua ne ka. (1 Timoteo 3:8) Bible no ka kyerɛ yɛn sɛ “ɔbɔnefo fɛm, na ontua.” (Dwom 37:21) Ɛwom sɛ nsɛm a emu yɛ den a wɔnhwɛ kwan betumi asɔre, nanso ɔmpɛ sɛ wobu no ka “abɔnefo” ho. Ɛsɛ sɛ ɔbɔ mmɔden sɛ ɔbɛyɛ obi a ‘ɔnne obiara ka wɔ biribiara mu,’ gye ɔdɔ. (Romafo 13:8) Enti, ɛsɛ sɛ ɔyɛ n’ade nokwaredi mu a ɔnhwehwɛ mmara mu akwan horow a ɔbɛfa so aguan afi n’asɛyɛde horow ho.

Ɔkwan foforo so nso no, ɛsɛ sɛ nea ɔde bosea no ma no nso de adwene a emu da hɔ di dwuma. Ohu sɛ ɛnyɛ bere nyinaa na biribiara kɔ so pɛpɛɛpɛ wɔ boseabɔ mu. Enti, ɛnsɛ sɛ ɔde nhyɛso a ɛtra so ba nea ɔde ne ka no so. Ebetumi aba sɛ ebia na sika no nni hɔ a ɔde betua no ka. Kristofo pii akyerɛ wɔ tebea horow a ɛtete sɛɛ mu sɛ wɔnyɛ ‘sikaniberefo,’ denam bere tenten a wɔma onii no ma ɔde atua, anaasɛ nhyehyɛe foforo a ntease wom a wogye tom so. (1 Timoteo 3:3) Ebinom mpo de kyɛ koraa.

Nsɛm a emu yɛ den a etumi sɔre boseabɔ mu ho asɛm a yɛka no ma asemmisa foforo sɔre: “So ɛho hia ankasa?” Bible no nkasa ntia boseabɔ bere a ɛho hia. Nanso mpɛn pii no ɛho nhia. Mpɛn pii no “aniwa akɔnnɔ” no mu yɛ den sen sika a obi wɔ, na nkurɔfo bɔ bosea de totɔ afɛfɛde a wonhia ankasa. (1 Yohane 2:16) Awiei no na ɛsɛ sɛ wotuatua saa ka no. Enti Bible de kɔkɔbɔ no ma tẽe sɛ: “Odefɛmfo yɛ nea ɔde fɛm akoa.”​—Mmebusɛm 22:7.

Nanso, sɛ ɛsɛ sɛ boseabɔ bi kɔ so wɔ Kristofo ntam a, mpɛn pii no eyi de hokwan a wobetumi de ada Kristofo su ahorow adi ma. Sɛ nhwɛso no, ɔpɛ a obi wɔ sɛ obedi n’asɛyɛde ahorow ho dwuma, afoforo yiyedi ho ayamhyehye ankasa ne sikanibere a ɛsɛ sɛ ɔkwati bɛboa no ma wahwɛ de Kristofo dɔ adi boseabɔ ho dwuma. Saa kwan yi so no yebedi Bible mu ahyɛde yi so: “Monyɛ mo ade nyinaa ɔdɔ mu.”​—1 Korintofo 16:14.

September Da Biara Da Asɛm

(Wopɛ nsɛm a wɔahyehyɛ awie no a, hwɛ nhoma no mu)