Bo A Nash Mmɛw Nsaano Nkyerɛwee No Som

WOYƐ dɛn bu bere a wɔde kyerɛw Hebri Bible nsaano nkyerɛwee bi pɛpɛɛpɛ? Na ɛno ne ɔhaw a Ɔbenfo John C. Trever rehyia wɔ 1948 mu bere a ohuu Po a Awu Yesaia Nhoma Mmobɔwee no bere a edi kan no. Sɛnea na Hebri nkyerɛwde ahorow no te no maa n’ani gyei. Ná onim sɛ nkyerɛwde ahorow no na ɛbɛma wahu mfe a adi, nanso na dɛn ho na obetumi de atoto? Osii gyinae a ɛteɛ sɛ: Nash Mmɛw Nsaano Nkyerɛwee no so nkyerɛwee no nkutoo na obetumi de atoto ho. Dɛn ntia? Eyi yɛ nsaano nkyerɛwee bɛn, na efi he?

Nash Mmɛw Nsaano Nkyerɛwee no yɛ Hebri kyerɛwsɛm nsensanee 24 asinasin ahorow anan pɛ, ne trɛw yɛ sɛntimita 7.5 na ne tenten yɛ sɛntimita 12.5. Wɔde W. L. Nash a na ɔyɛ Society of Biblical Archaeology no kyerɛwfo a ɔtɔ fii Misrini bi hɔ wɔ 1902 mu no din na ɛtoo so. S. A. Cooke tintimii wɔ afe a edi hɔ no mu wɔ saa kuw no nhoma Proceedings mu, na wɔde maa Cambridge Sukuupon Nhomakorabea wɔ England, na ɛda so ara wɔ hɔ. Bo a mmɛw nsaano nkyerɛwee asinasin yi som no gyina mfe a adi no so. Nhomanimfo kyerɛ sɛ efi afeha a ɛto so abien anaa nea edi kan A.Y.B. mu, enti na ɛyɛ Hebri nsaano nkyerɛwee krataa a akyɛ sen biara a wɔahu.

Bere a ɔbenfo Trever de Nash Mmɛw Nsaano Nkyerɛwee no mfonini a wɔde kɔla ahorow ayɛ totoo nhoma mmobɔwee a ɛda n’anim no ho no, ɔtɔɔ ne bo ase hwɛɛ sɛnea nkyerɛwde nkorɛnkorɛ no biara te. Akyinnye biara nni ho sɛ na ɛsɛ yiye. Saa mpo, na ɛte sɛ nea onnye nni sɛ nsaano nkyerɛwee akɛse foforo a wɔahu no akyɛ te sɛ Nash Mmɛw Nsaano Nkyerɛwee no. Nanso, bere bi akyi no, ɛbɛdaa adi sɛ nea na osusuw no yɛ nokware. Po a Awu Yesaia Nhoma Mmobɔwee no fi afeha a ɛto so abien A.Y.B. mu!

Nash Mmɛw Nsaano Nkyerɛwee no Mu Nsɛm

Nash Mmɛw Nsaano Nkyerɛwee no so kyerɛwsɛm no mu nhwehwɛmu da no adi sɛ ne nsensanee 24 no nyinaa nyɛ pɛpɛɛpɛ, a na asɛmfua anaa nkyerɛwde ahorow bi ayera wɔ ne mfiase ne n’awiei. Ekura Mmara Nsɛm Du a efi Exodus ti 20 no afã horow bi, ne Deuteronomium atiri 5 ne 6 no nkyekyem bi. Enti na eyi nyɛ Bible nsaano nkyerɛwee a na wɔde di dwuma daa, na mmom kyerɛwsɛm a adi afra a wɔde di atirimpɔw titiriw bi ho dwuma. Na ɛda adi sɛ ɛyɛ nsɛm bi a wɔde kyerɛkyerɛ a wɔde kae Yudani bi wɔ adwuma a ɛsɛ sɛ ɔyɛ ma Onyankopɔn no ho fã bi. Ná kyerɛwsɛm no fã bi a ɛde Deuteronomium 6:4 fi ase, a wɔfrɛ no Shema no yɛ nea wɔtaa ti mu. Saa nkyekyem no kenkan sɛ: “Israel tie, [Yehowa] yɛn Nyankopɔn ne [Yehowa] koro.”

Wohu Tetragrammaton, YHWH, “Yehowa” no mprenu wɔ mmɛw nsaano nkyerɛwee no so nsensanee a etwa to no so, na epue wɔ mmeae afoforo anum. Epue pɛnkoro nso a ne nkyerɛwde a edi kan no ayera.

Ná adwene no ne sɛ wɔde Shema no titiriw si “Onyankopɔn nipasu koro no” so dua. Yudafo Talmud (Berakoth 19a) kyerɛ sɛ “ɛsɛ sɛ wosi” asɛmfua ʼE·chadhʹ (“Koro”) a etwa to “no so dua titiriw bere a wɔrebɔ denam asɛmfua no fã biara a wɔde kyerɛ no so.” (W. O. E. Oesterley ne G. H. Box) Ɛreka Onyankopɔn ho asɛm no, ʼE·chadhʹ a wɔatwem no nso bɔ da a ɔda nsow no dawuru.

Ɛnnɛ, Nash Mmɛw Nsaano Nkyerɛwee no bere so nsaano nkyerɛwee afoforo pii wɔ hɔ, titiriw wɔ nhoma mmobɔwee ahorow a wohui wɔ Po a Awu no ano abodan a ɛbɛn Qumran no mu. Nhwehwɛmu a ɛkɔ akyiri asi so dua sɛ nsaano nkyerɛwee yi mu pii fi afeha a edi kan no ne nea ɛto so abien A. Y. B. no mu.a Ɛwom sɛ ɛnna so ara nyɛ Hebri nsaano nkyerɛwee a wonim sɛ akyɛ sen biara no bio de, nanso ani da so ara gye Nash Mmɛw Nsaano Nkyerɛwee no ho kɛse. Ɛda so ara yɛ Hebri Bible nsaano nkyerɛwee biako pɛ a akyɛ yiye a wohuu wɔ Egypt.

[Ase hɔ asɛm]