Abusua Sohwɛ Ho Asɛyɛde a Wodi Ho Dwuma

“AGYANOM munnyi mo mma abufuw, na mmom monyɛn wɔn [Yehowa, NW] kasakyerɛ ne nyansakyerɛ mu.” (Efesofo 6:4) Ɔsomafo Paulo nam nsɛm a efi honhom mu yi so de abusua sohwɛ ho asɛyɛde too nea ɛsɛ—agya no mmati so.

Wɔ mmusua dodow no ara mu no, ɛnyɛ agya no nkutoo na ɔhwɛ ne mma. Mmofra no maame, ne yere, fi anigye mu ne ne kunu soa asɛyɛde no. Enti Ɔhene Salomo kae sɛ: “Me ba, tie w’agya nteɛso, na mpo wo na mmara.”—Mmebusɛm 1:8.

Honam Fam ne Honhom Fam Ɔhwɛ

Awofo a wɔdɔ wɔn mma nhyɛ da nto wɔn asaworam. Nokwarem no, sɛ Kristofo yɛ saa a ɛbɛkyerɛ sɛ wɔapa gyidi no, sɛnea yebetumi agyina Paulo nsɛm a ɔkyerɛw kɔmaa Timoteo yi so aka no no: “Sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.” (1 Timoteo 5:8) Kristofo hu sɛ mmofra a wɔbɛtete wɔn wɔ “[Yehowa, NW] kasakyerɛ ne nyansakyerɛ mu” no hwehwɛ pii sen honam fam ahiade a wɔde bɛma wɔn.

Susuw Mose afotu a ɔde maa Israel man no bere a na wɔabɔ nsra wɔ Moab tataw so bere tiaa bi ansa na wɔrehyɛn Bɔhyɛ Asase so no ho hwɛ. Ɛhɔ no, otii Onyankopɔn mmara a ɔde maa wɔn no mu na ɔhyɛɛ wɔn sɛ: “Momfa me nsɛm yi nsie mo koma ne mo kra mu.” (Deuteronomium 11:18) Ná wadi kan akae wɔn sɛ ɛsɛ sɛ wofi wɔn koma, ɔkra, ne wɔn ahoɔden nyinaa mu dɔ Yehowa, na ɔde kaa ho sɛ: “Nsɛm yi a merehyɛ wo nnɛ yi nna wo koma so.” (Deuteronomium 6:5, 6) Ná ehia sɛ Israelfo awofo ma kwan ma Onyankopɔn Mmara no mu nsɛm du wɔn komam. Ná Israelfo awofo betumi de koma a anisɔ ahyɛ no ma adi Mose nsɛm a edi so yi so: “Fa [Onyankopɔn Mmara nsɛm] dua wo ba mu na kasa ho, w’afitra mu ne wo kwan so nantew mu ne wo nna mu ne wo sɔre mu.”—Deuteronomium 6:7; 11:19, NW; fa toto Mateo 12:34, 35 ho.

Hyɛ no nsow sɛ na ɛsɛ sɛ agyanom de nsɛm no “dua” wɔn mma mu, “kasa ho.” Merriam-Webster’s Collegiate Dictionary kyerɛ asɛmfua “dua” ase sɛ “sɛ́ wobɛkyerɛkyerɛ na wonam ntimu ntoatoaso anaa afotu so besi biribi so dua.” Bere a awofo kaa Onyankopɔn Mmara ho asɛm da biara—anɔpa, awia, ne anadwo—no, eyi maa wɔn mma nyaa ntease kɛse. Bere a mmofra no huu ɔdɔ a wɔn awofo wɔ ma Onyankopɔn Mmara no, ɛkaa wɔn nso ma wɔbɛn Yehowa. (Deuteronomium 6:24, 25) Nea ɛyɛ anigye ne sɛ, Mose hyɛɛ agyanom pɔtee sɛ wɔnkyerɛkyerɛ wɔn mma wɔ wɔn ‘afitra mu.’ Ná nkyerɛkyerɛ a ɛte saa ka abusua sohwɛ ho. Na nnɛ nso ɛ?

“W’afitra Mu”

Janet, Kristoni ɔwofo a ɔwɔ mma baanana kyerɛkyerɛ mu sɛ: “Ɛnna fam.” Ne kunu Paul nso ka to so sɛ, “egye animia.” Te sɛ Adansefo awofo afoforo pii no, Paul ne Janet bɔ mmɔden sɛ wɔne wɔn mma besua Bible no anyɛ yiye koraa, pɛnkoro nnawɔtwe biara. Paul kyerɛkyerɛ mu sɛ: “Yɛbɔ mmɔden sɛ yɛbɛyɛ yɛn abusua Bible adesua Dwoda anwummere biara wɔ bere a yɛahyɛ mu,” na ogye tom sɛ, “nanso ɛnyɛ bere nyinaa na etumi yɛ yiye.” Sɛ́ ɔpanyin wɔ n’asafo mu no, ɛtɔ mmere bi a na wɔabɛfrɛ no wɔ asɛnhia bi ho. Ne mma mpanyimfo baanu a wodi kan no som sɛ bere nyinaa asomfo. Wohu sɛ anwummere yɛ bere pa a wotumi nya nkurɔfo wɔ ɔsom adwuma no mu. Enti sɛ́ abusua no, wɔayɛ bere a wɔde yɛ wɔn abusua adesua no mu nsakrae. Paul kyerɛkyerɛ mu sɛ: “Ɛtɔ mmere bi a, yedi anwummere aduan wie pɛ na yɛayɛ yɛn adesua no.”

Ɛwom sɛ awofo fi nyansa mu da fakaayɛ adi wɔ bere a wɔde yɛ wɔn abusua adesua no mu de, nanso wɔbɔ mmɔden sɛ wɔntotom. Ɔbabea Clare ka sɛ: “Sɛ ɛba sɛ ɛsɛ sɛ yɛsesa bere a yɛde yɛ adesua no a, Papa taa de bere foforo no bɔ frigye pon no ho, na ama yɛn nyinaa ahu bere a yɛde bɛyɛ no.”

Boa a wɔboa wɔn ho ano ma abusua Bible adesua daa no nso ma mmofra nya hokwan fɛfɛ de ka wɔn ahiasɛm ne nea ɛhaw wɔn kyerɛ wɔn awofo. Sɛ adesua no nyɛ nhyɛ dodo ma mmofra no nkenkan nsɛm a wobisa wɔn no ho mmuae mfi Bible mu nhoma a wɔde di dwuma no mu kɛkɛ a, mfaso pa fi adesua a ɛte saa mu ba. Martin a ɔwɔ mmabarima baanu no kyerɛkyerɛ mu sɛ: “Yɛn abusua adesua ase na yesusuw nsɛm ho.” Ɔka sɛ: “Sɛ muhyiam pɛnkoro nnawɔtwe biara de susuw Kyerɛw nsɛm mu asɛmti bi ho a, muhu sɛnea mo abusua no honhom fam tebea te. Nneɛma pii da adi wɔ nkɔmmɔbɔ no mu. Muhu nea ɛrekɔ so wɔ sukuu mu, na nea ɛyɛ anigye kɛse no, muhu suban a mo mma no renya.” Ne yere Sandra gye tom na ɔte nka sɛ ɔno nso nya mfaso pii fi abusua adesua no mu. Ɔka sɛ: “Bere a me kunu reyɛ adesua no, menam tie a mitie sɛnea me mma no ma ne nsɛmmisa ho mmuae no so sua nneɛma pii.” Afei Sandra gyina ɛno so ma mmuae de boa ne mmabarima no. Onya adesua no mu anigye efisɛ ɔde ne ho hyem. Yiw, bere a wɔde yɛ abusua adesua no boa ma awofo hu sɛnea wɔn mma susuw nsɛm ho.—Mmebusɛm 16:23; 20:5.

Yɛ Fakaa na Mia W’ani

Sɛ mo abusua adesua bere du a, ebia mubehu sɛ mo ba biako bɛyɛ krado na n’ani agye, bere a ebehia sɛ wɔdɛfɛdɛfɛ ɔfoforo na ama ɔde n’adwene aba adesua no so anya mu mfaso no. Kristoni bea bi a ɔwɔ mma ka sɛ: “Saa na abusua asetra te! Sɛ́ ɔwofo no, wunim nea ɛsɛ sɛ woyɛ. Enti sɛ wokɔ so a, Yehowa boa ma ɛsow aba.”

Mfe a abofra bi adi na ebia ɛbɛkyerɛ bere tenten a otumi de n’adwene si biribi so. Ɔwofo a ɔhwɛ ade kɔ akyiri besusuw eyi ho. Awarefo bi wɔ mma baanum, a wɔadi fi mfe 6 kosi mfe 20. Michael a ɔyɛ agya no ka sɛ: “Ma nea osua koraa no kwan ma onni kan mma mmuae. Na afei ma mmofra a wɔanyinyin no mfa nsɛm a emu dɔ nka ho na wɔnka nsɛm a wɔasiesie no.” Saa nhumu kwan yi a awofo fa so ne wɔn mma di no ma wotumi kyerɛ hia a ehia sɛ wosusuw afoforo ho. Martin ka sɛ: “Ebia yɛn mmabarima no mu biako bɛte ase, nanso ɔfoforo behia mmoa bebree ansa na wɔate ase. Mihu sɛ adesua no ase tumi bɛyɛ baabi a yebetumi ayɛ Kristofo boasetɔ ne honhom aba afoforo ho nhwɛso.”—Galatifo 5:22, 23; Filipifo 2:4.

Siesie wo ho sɛ wo ne wo mma no bedi nsɛm sɛnea wɔn ahoɔden ne wɔn mfe te. Simon ne Mark a mprempren wɔrekɔ mfe aduonu no behui sɛ bere a na wosusua kakra no, wɔn ani gyee adesua a na wɔne wɔn awofo yɛ wɔ Onipa a Ɔsen Biara a Watra Ase Pɛn nhoma no mu no ho paa. Wɔkae sɛ: “Ná yɛn papa ma yɛyɛ afã ahorow no ma ɛyɛ te sɛ ɔyɛkyerɛ.” Wɔn papa kaee sɛ bere bi ɔde ne nsa sisii fam weaa ne kotodwe anim na ama ɔne ne mma no ayɛ ɛbɛ a ɛfa Samariani yamyefo no ho no sɛ ɔyɛkyerɛ. (Luka 10:30-35) “Ná ntease wom na na ɛyɛ anigye pii.”

Mmofra pii sɔre tia abusua adesua a wɔyɛ no daa no. So ɛsɛ sɛ eyi ma awofo gyae adesua no yɛ, bere a wɔahyehyɛ awie no? Dabi, ɛnte saa koraa. Mmebusɛm 22:15 ka sɛ: “Agyimisɛm kyekyere abofra koma ho.” Bere a na ɛte sɛ nea mpɛn pii no nneɛma tumi twitware adesua no mu sɛe no no, ɛna bi a onni ɔhokafo susuwii sɛ na mmɔden a ɔrebɔ sɛ abusua adesua sohwɛfo no reyɛ ɔkwa. Nanso omiaa n’ani. Mprempren ne mma da obu kɛse adi kyerɛ no na wɔabenya sɛnea ɔda ɔdɔ adi kyerɛ wɔn na odwen wɔn ho denam mia a omiaa n’ani yɛɛ abusua adesua daa no ho anisɔ.

“Nyisaa” a Yɛbɛboa Wɔn

Ɛsɛ sɛ Kristofo mpanyimfo ‘yɛn Onyankopɔn nguankuw’ no. (1 Petro 5:2, 3) Mmusua a wɔwɔ wɔn asafo ahorow mu a wɔbɛtaa akɔsrasra wɔn no bɛma wɔanya hokwan akamfo awofo a wodi wɔn Kristofo asɛyɛde ho dwuma no. Hena mmati so na nkyerɛkyerɛ a wɔde ma mmofra a wɔwɔ awofo biako mmusua mu no ho asɛyɛde da? Mma wo werɛ mfi da sɛ mmofra no nkyerɛkyerɛ ho asɛyɛde no da ɔwofo no so.

Kristofo anidahɔ bɛboa asafo mu mpanyimfo ma wɔakwati tebea horow a ɛbɛma wɔagyae nneɛma mu asiesie bere a wɔyɛ te sɛ nea wɔresi ɔwofo a onni hɔ no ananmu no. Ɛwom sɛ anuanom baanu betumi akɔsra onuawa Kristoni a ɔyɛ ɔwofo a onni kunu de, nanso ɛsɛ sɛ wosusuw nneɛma ho yiye wɔ mmoa a wɔde boa abusua adesua nhyehyɛe no ho bere nyinaa. Ɛtɔ mmere bi a, to a wɔbɛto nsa afrɛ mmofra no (ne ɔwofo biako no ankasa) ma wɔabɛka asafo mu panyin no ankasa abusua adesua ho no betumi ahyɛ nkuran na mfaso aba so. Nanso mma wo werɛ mfi da sɛ Yehowa ne yɛn soro Agya kɛse. Akyinnye biara nni ho sɛ ɔbɛboa ɛna no bere a ɔhwɛ ɔne ne mma adesua so no, ɛmfa ho sɛ ne nkutoo na ɔyɛ saa no.

Na wɔ tebea a aberante anaa ababaa bi ani ku honhom fam nneɛma ho nanso n’awofo yɛ anibiannaso anaa wobu wɔn ani gu wɔn honhom fam asɛyɛde ahorow so no nso ɛ? Enhia sɛ Yehowa asomfo anokwafo ma wɔn aba mu bu da. Odwontofo no too dwom sɛ: “Wo [Yehowa Nyankopɔn] nsa na ɔbrɛfo de ne ho hyɛ, ayisaa boafo ne wo ara.” (Dwom 10:14) Na afei, asafo mu mpanyimfo a wɔwɔ ɔdɔ bɛyɛ nea wobetumi biara sɛ wɔbɛhyɛ awofo no nkuran bere a wɔhwɛ wɔn mma no. Ebia wɔde nyansahyɛ bɛma ma wɔayɛ abusua nhyiam a wɔde besusuw nsɛm ho na wɔakɔ bi de sɛnea wɔbom yɛ adesua ho nyansahyɛ a mfaso wɔ so ama. Nokwarem no, wɔrennye asɛyɛde no mfi awofo a Kyerɛw nsɛm no de ho asɛyɛde to wɔn mmati so no nsam.

Mmofra a wɔn awofo nyɛ gyidifo no hia mmoa kɛse. Sɛ wɔn awofo bɛpene so a, ka a wode wɔn bɛka mo abusua adesua ho no so betumi aba mfaso. Robert a mprempren wanyin na ɔwɔ n’ankasa abusua no fii ase ne n’awofo kɔɔ Kristofo nhyiam bere a na wadi mfe abiɛsa pɛ no. Ná ɔda so ara kae saa nhyiam ahorow no ɛmfa ho sɛ n’awofo no ne Kristofo asafo no gyae fekubɔ mpo no. Bere a odii mfe du no, ohyiaa Ɔdansefo aberantewa bi a na ɔde no kɔ nhyiam ahorow. Ɔdansefo aberantewa no awofo de anigye gyee Robert sɛ honhom mu ayisaa, na akyiri yi wɔne no suaa ade. Esiane ɔdɔ mu a wofi hwɛɛ no yi nti, onyaa nkɔso ntɛmntɛm na mprempren ɔde anigye som sɛ asafo mu ɔpanyin.

Sɛ ɛba mpo sɛ awofo sɔre tia wɔn mma nkɔso a, ɛnkaa mmofra no nko. Yehowa da so ara yɛ ɔsoro Agya nokwafo. Dwom 68:5 ka sɛ: “Nyisaa se . . . ne Nyankopɔn, ne trabea kronkron mu.” Mmofra a wɔyɛ honhom fam nyisaa nim sɛ wobetumi adan akɔ ne nkyɛn wɔ mpaebɔ mu, na ɔbɛwowaw wɔn. (Dwom 55:22; 146:9) Yehowa ahyehyɛde a ɛte sɛ ɛna no bɔ mmɔden di n’asɛyɛde a ɛne sɛ ebesiesie honhom fam nnuan a ɛyɛ dɛ ho dwuma denam ne nhoma ne Kristofo asafo bɛboro 85,000 a ɛwɔ wiase nyinaa no nhyiam ahorow so. Enti, ɛdenam mmoa a efi yɛn Agya, Yehowa, ne n’ahyehyɛde a ɛte sɛ ɛna no nkyɛn so no, “nyisaa” mpo betumi anya Bible adesua mu kyɛfa kakra.

Kristofo awofo a wɔne wɔn mma yɛ abusua Bible adesua daa no fata nkamfo. Awofo a wonni ahokafo a womia wɔn ani tete wɔn mma wɔ Yehowa akwan so no fata mmoa ne nkamfo soronko wɔ wɔn mmɔdenbɔ no ho. (Mmebusɛm 22:6) Wɔn a wosusuw mmofra a wɔyɛ honhom fam nyisaa ho no nyinaa nim sɛ eyi sɔ yɛn soro Agya, Yehowa ani. Abusua honhom fam ahiade a wodi ho dwuma no yɛ asɛyɛde a emu yɛ duru. Nanso ‘nnyae, efisɛ sɛ woampa abaw a, wubetwa so aba ne bere mu.’—Galatifo 6:9.

[Ase hɔ asɛm]

[Kratafa 23 mfonini]

Abusua adesua ma mmofra nya hokwan fɛfɛ de ka wɔn ahiasɛm kyerɛ wɔn awofo

[Mfonini Fibea wɔ kratafa 20]

Harper’s