Woresi Asi Nhyɛase Bɛn So?

SƐ DAN bi betumi asi hɔ akyɛ a, ebegyina sɛnea ne fapem anaasɛ ne nhyɛase no ahoɔden te so. Ɛtɔ mmere bi a Bible no de saa nnyinasosɛm yi di dwuma wɔ sɛnkyerɛnne kwan so.

Sɛ nhwɛso no, odiyifo Yesaia kaa Yehowa Nyankopɔn ho asɛm sɛ nea “ɔhyɛɛ asase ase.” (Yesaia 51:13) Saa nhyɛase yi gyina hɔ ma Onyankopɔn mmara a ɛnsakra a ɛhwɛ sɛnea asase no keka ne ho na ɛma no gyina faako a wɔde asi no. (Dwom 104:5) Onyankopɔn Asɛm, Bible no, nso ka nea adesamma abusua no ‘gyina so’ ho asɛm. Eyinom ne atɛntrenee, mmara, ne nhyehyɛe. Sɛ wɔde atɛnkyea, amumɔyɛ, ne nsɛmmɔnedi ‘sɛe’ no a, ɔman no nhyehyɛe sɛe.—Dwom 11:2-6; Mmebusɛm 29:4.

Saa nnyinasosɛm yi fa ankorankoro nso ho. Bere a Yesu Kristo de ne Bepɔw so Asɛnka a agye din no reba awiei no, ɔkae sɛ: “Obiara a ɔte me nsɛm yi na ɔyɛ no, wɔde no bɛtoto ɔbadwemma bi a osii ne fie sii ɔbotan so ho. Na osu tɔ yirii, na mframa bɔe bɛbɔɔ fie no, nanso ammu, efisɛ na wɔato asi ɔbotan so. Afei, obiara a ɔte me nsɛm yi na ɔnyɛ no, wɔde no bɛtoto ɔkwasea bi a osii ne fie sii anhwea so ho. Na osu tɔ yirii, na mframa bɔe bɛbɔɔ fie no ma edwiriw gui, na ebubui pasaa.”—Mateo 7:24-27.

Nhyɛase bɛn so na wode w’asetra resi? So woresi asi nnipa nyansapɛ bɔne no fapem a enni ahoɔden, a n’awiei ne ɔsɛe no so? Anaasɛ woresi asi ɔbotan a egyina hɔ ma nsɛm a Yesu Kristo kae, a ɛbɛboa wo ma woagyina sɛnkyerɛnne kwan so ahum ano no so?