‘Ne Nyinaa Yɛ Ne Mfomso!’​—Asomdwoe A Adwene A Enhyia Mfa Ho

SHERRY kae sɛ, “Sɛ woma w’akwan teɛ na woyɛ nea ɛsɛ sɛ woyɛ a, ɛnde me nso mɛyɛ nea ɛsɛ sɛ meyɛ.” Ne kunu, Allen, anni abufuw no akyi. Nanso wɔ n’adwene mu de na ɔte nka sɛ ɔbea no fam na ɛte saa. Ná wɔn baanu nyinaa nim nea Bible no ka, nanso wɔn mu biara tee nka sɛ ɔyɛ nea ɔfoforo no mfa nni dwuma.

Awarefo taa nya adwene a ɛte saa a wogye di sɛ wɔn haw ahorow no fi wɔn hokafo no titiriw. Esiane sɛ na Sherry gye di sɛ ɛyɛ Allen mfomso, ne sɛ Allen rensakra nti, otui. Ɔkae sɛ: “Metee nka sɛ ɛho nhia sɛ mɛbɔ mmɔden biara. Ná tebea no te sɛ nea anidaso biara nnim.” So woate nka saa pɛn? Anigyesɛm ne sɛ, awarefo yi nyaa ano aduru na egyee wɔn aware no.

So Ɛyɛ Onipa Biako Pɛ Mfomso?

Bere a na Sherry wɔ Yehowa Adansefo nhyiam ase no ɔtee biribi a ɛkaa ne koma. Ɔsomfo no kae sɛ ahobrɛase ho hia wɔ aware mu nkitahodi a wobenya mu. Sherry de ahobrɛase fii ase hwehwɛɛ ne ho mu hwɛe sɛ ɔno nso ka ho na ɔhaw ahorow no ba.

Nokwarem no, yɛtaa de ntɛmpɛ yi yɛn ho ano. “Nea ɔbɔ ne nkuro kan yɛ sɛ ɔtreneeni kosi sɛ ne yɔnko ba bɛpɛɛ no mu.” (Mmebusɛm 18:17) Nea ɛde ɔhaw no ba a wode bɛto wo hokafo so yɛ anoyi a enni mũ, na ɛmma wonhwehwɛ wo ho mu nhu nea ɛde ɔhaw no ba. Sɛnea Bible kyerɛ no, wubetumi de “w’ankasa nsa” ‘asiesie’ w’aware anaa wode ‘adwiriw agu.’ (Mmebusɛm 14:1) Yɛn ho mu a ‘yɛpɛe’ ma yehu sɛ nkɔso ho hia.

Ho mu a wɔhwehwɛ yi na efii ano aduru a Sherry nyae no ase. Ohui sɛ ɛnyɛ nea obetumi ama ne kunu a ogye tom sɛ ɔyɛ katee no asakra denam ɔkwan a ɔfa so no so. Nanso na obetumi asakra sɛnea ɔyɛ n’ade wɔ ne ho ne sɛnea ɔkasa kyerɛ no no. Ebia eyi bɛma ɔbarima no asakra. Enti ɔsan kɔɔ fie a afei de wabɔ ne tirim sɛ ɔbɛhwɛ ne kasa yiye. Biribi pa fii mu bae.

Tumi a Tɛkrɛma no Wɔ

Tɛkrɛma a ɛka asomdwoesɛm yɛ dua a n’aba ma nkwa. Tɛkrɛma a wɔnteɛ no so betumi abubu koma,” saa na Bible no ka. (Mmebusɛm 15:14, The Holy Bible a Ronald A. Knox kyerɛwee.) Kasa a wonsusuw ho de abufuw ne yawdi ba mpɛn pii. Sherry gye toom sɛ: “Ná metaa ka kyerɛ no sɛ nea enti a ɔwaree me ara ne sɛ obenya obi a ɔbɛhwɛ ne fi ne mmofra no. Ɛma ne bo fuw na ofi ase teɛteɛm. Migyaee saa ka. Migyaee atutupɛ ne ɔkasatia no. Sɛ́ mɛma wafɛre wɔ mmofra no anim mmom no, metwɛn kosi bere a ɛfata ansa na me ne no aka biribi a m’ani annye ho no ho asɛm. Mebɔ mmɔden sɛ metie no kɛse na maboa no sɛnea metumi.”

Wɔn aware no yɛɛ anigye bere a Allen yɛɛ ne fam de no. So nsɛm a woka ma w’aware no yɛ anigye anaasɛ ɛde awerɛhow ba, ‘ebubu wo hokafo koma’? So wutie Bible asɛm a ese ‘yennya tema ne ayamhyehye mma yɛn ho’ no?​—1 Petro 3:8, NW.

Sɛ nhwɛso no, na Larry ne Michele resusuw nnɔkɔnnɔkɔwade a wobedi wɔ anadwo apontow bi akyi ho. Larry kae sɛ, “Yɛ no ketewa bi kɛkɛ. Kɔtɔ keeki.” Michele kae sɛ ɔno ankasa bɛtõ keeki no bi a ɛso. Ampa, bere a ahɔho no reyɛ aba no, Larry tee nteɛm bi wɔ mukaase hɔ. Keeki a ɔretõ no anyɛ yiye. Larry a wansusuw sɛnea ɔbea no te nka ho no kae sɛ: “Manka ankyerɛ wo sɛ mmɔ mmɔden sɛ w’ankasa bɛyɛ keeki na ɛrenyɛ yiye? Afei dɛn na wobɛyɛ de ahyɛ ananmu?”

Michele kae sɛ: “Ɛkaa kakraa anka metow ade no nyinaa bɔɔ n’anim.” Ahɔho no ba no na amma ntɔkwaw ansi. Wɔne wɔn ho ankasa nna pii wɔ ɛno akyi. Nanso so Larry betumi aka sɛ ne nyinaa yɛ ɔbea no mfomso? Nea ɛne eyi bɔ abira no, n’asɛm a ɔkae a wansusuw ho no ‘wowɔɔ no sɛ nkrante’ na ɛde abufuw bae. (Mmebusɛm 12:18) Hwɛ oye ara a anka ɛbɛyɛ nea eye sɛ ɔbɛte nka ama no na wakyerɛ biribi foforo a wobetumi de asi ananmu!

Na sɛ wo hokafo no bo fuw esiane n’ankasa haw bi a emu yɛ den nti ɛ? Wuhu sɛ ɛnyɛ wo na ne bo afuw. Nanso wɔ eyi mu mpo no, dɛn na wobɛyɛ bere a eyi ma ɔteɛteɛm gu wo so no?

Ho a Wɔde Bɔ Afɔre Dɔ

Sɛ́ wobɛtwe wo ho mmom no, Bible no tu fo sɛ: “Munnyigye mo ho ade a ɛyɛ mo duru nsoa, na saa na mode bewie Kristo mmara so di.” (Galatifo 6:2) Esiane sɛ mmoa a wɔde bɛma bere a ɔhokafo ahaw no yɛ den nti, “Kristo mmara” no ho hia kɛse.

Yesu de ho a wɔde bɔ afɔre dɔ ho ahyɛde mae. (Yohane 13:34, 35) Ɔdɔ yi ‘nhwehwɛ nea ɛyɛ n’ankasa de.’ (1 Korintofo 13:5) Sɛ ɛyɛ nea w’asɛm yɛ dɛ mpo a, ɔdɔ yi bɛka wo ma wode afiri no na woabu w’ani agu so. (Kolosefo 3:13) Ho a wɔde bɔ afɔre hwehwɛ sɛ ‘wubedi kan’ adi no ni na wode papa atua bɔne so ka.​—Romafo 12:10, 17-21

Nanso wo ho a wode bɛbɔ afɔre no nkyerɛ sɛ wobɛyɛ biribiara de ama wo hokafo no bo adwo. Bible no ka Sara ho asɛm sɛ na ɔbrɛ ne ho ase na ɔde ne ho bɔ afɔre. Nanso wantwentwɛn ne nan ase sɛ ɔbɛka nea osusuw akyerɛ ne kunu bere a na ɛho hia sɛ ɔyɛ saa no. Ɔmaa mfaso a ɛkyɛ a abusua no benya ho hiaa no sen wɔn ntam asomdwoe a ɛbɛsɛe bere tiaa bi no.​—Genesis 16:1-6; 21:8-11.

Enti sɛ wo hokafo no refa ɔkwan a enye so a, “animka pefee ye sen ɔdɔ a ahintaw.” (Mmebusɛm 27:5) Nanso paw bere a ɛfata​—bere a mmofra no ne afoforo nni hɔ. Ma wo hokafo no nte ase na boa no ma onhu nyansa a ɛwom sɛ ɔbɛyɛ nsakrae.

Nea Ɛho Hia Titiriw

Nanso ɛtɔ bere bi a ɔhokafo no pow sɛ ɔbɛyɛ nsakrae. Ebia wobɛhyɛ ɔfotufo a ɔfata nkyɛn a wɔbɛkɔ ho nyansa. Wɔ Yehowa Adansefo asafo ahorow mu no, honhom mu ahwɛfo a wɔfata a wɔwɔ ɔpɛ sɛ wɔbɛboa wɔ hɔ. (Yakobo 5:14, 15) Ebia mmoa a ɛte sɛɛ bɛka ɔhokafo no ma ɔde Bible afotu adi dwuma, ne titiriw no, sɛ ɔne Onyankopɔn ntam abusuabɔ pa som bo ma no a.

Na sɛ amma saa wɔ ɔhokafo no fam nso ɛ? Ɛnde nea ɛsɛ sɛ ehia wo titiriw ne ɔdɔ ma Onyankopɔn mmara. Odwontofo a na bere bi a adwennwene atɔ no so no kyerɛwee sɛ: “Mafa nokwaredi kwan. . . . Mitu wo mmara nsɛm kwan so mmirika, na wotrɛw me komam.” (Dwom 119:11, 30, 32) Ɛnyɛ Onyankopɔn ho nimdeɛ kɛse nko na odwontofo a Onyankopɔn mmra som bo ma no no nyae wɔ ne komam na mmom onyaa Onyankopɔn mu ahotoso kɛse sɛ obetumi awowaw no. Enti Onyankopɔn boaa no maa ne komam ‘trɛwee’ na ɔde gyinaa ɔhaw no ano.

Enti Yehowa betumi aboa wo nso ma wo komam atrɛw ma woatumi ne ɔhokafo a ɔnte asɛm ase mpo atra. Hu a wubehu sɛ woreyɛ nea ɛsɔ Onyankopɔn ani denam n’ahyɛde a wudi so so no ma wunya asomdwoe.

Ɛboa Ankasa!

Nea ɛyɛ anigye no, bɛyɛ mfe du ni a Sherry ne Allen san boom bio. Ɛwom sɛ wɔn baanu nyinaa nyɛ pɛ de, nanso wɔabɔ mmɔden sɛ wɔde afotu a ɛwɔ Bible mu no bedi dwuma. Allen gye tom sɛ: “Ɛtɔ bere bi a mesan kɔfa me kwan dedaw no bi so. Nanso mekɔ so ara bɔ mmɔden sɛ mɛyɛ nsakrae.”

Sherry nso bɔ mmɔden sɛ ɔrenyɛ ade ntra so. Ɔkae sɛ: “Ɛsɛ sɛ wusua sɛ wubegye biribi a ɛwɔ obi ho atom. Saa na ɔte. Worentumi mma biribiara a ɛwɔ ne ho nsakrae​—saa ara na merentumi nsakra sintɔ ahorow a ɛwɔ me ho nyinaa.” Nea ɛte ne sɛ, Sherry sii gyinae a eye: hia a ɛho hia sɛ ɔde mfomso nketenkete befiri. (Mateo 18:21, 22) Bere a Sherry rekaakae nitan a ɛkɔɔ so mfe ason ansa na ntetewmu reba no, ɔkae sɛ: “Esiane sɛ mihui sɛ Allen reyɛ biribi wɔ ne su a asakra no ho nti, misusuw ho sɛ, ‘Dɛn nti na manyɛ eyi kan no?’ Anka ɛbɛyɛ mmerɛw kɛse saa bere no.”

Enti nhwɛ kwan sɛ wo hokafo no bɛyɛ obi a ɔyɛ pɛ. Wɔ awarefo a wɔne wɔn ho ka mpo mu no, ‘wɔn ho hia wɔn honam mu’ ara. (1 Korintofo 7:28) Munnyina ɔhaw ahorow ano, munnguan mfi ho denam ntetewmu anaa awaregyae so.a Hyɛ wo tirim a w’ankasa woabɔ sɛ wubedi Onyankopɔn mmara so no mu den na wubehu nokware a Dwom 119:165 yɛ: “Asomdwoe pii wɔ wɔn a wɔdɔ [Onyankopɔn] mmara, na biribi ntõatõa wɔn.”

[Ase hɔ nsɛm]

[Kratafa 12 adaka]

“Ɛyɛ tebea horow kakraa bi mu, te sɛ bere a obi nnim na ɔware ɔsadweam anaa obi a ɔyare n’adwene nkutoo na wobetumi de aware mu ɔhaw ahorow no pii ato ɔhokafo biako so a ɛnyɛ wɔn baanu nyinaa.” Eyi ne gyinae a Gary Birchler a ɔwɔ California aduruyɛ ho nimdeɛ sukuupɔn mu no sii bere a wayɛ nhwehwɛmu kɛse a ɛfa aware ho no.

[Kratafa 11 mfoni]

Sɛ abufuw ba a, so asɛm a woka ma tebea no yɛ yiye anaasɛ ɛma ɛsɛe?