Onyankopɔn Din

“Sɛ Yehowa ansi ofie no a, wɔn a wosi dan no yɛ adwuma hunu.” Saa na Latin nkyerɛwee yi kenkan. Wɔfaa nsɛm no fii Bible no mu wɔ Dwom 127:1, na ekura nokware a emu dɔ: Adeyɛ biara a Yehowa nhyira nni so no renkosi hwee.

Wohu ade a wɔkyerɛw no 1780 mu no wɔ dan bi ho wɔ Colombo, Sri Lanka, na ehia efisɛ Onyankopɔn din, Yehowa, wom. (Hwɛ mfonini no.) Wɔ tete mmere mu no, na wɔde saa din no di dwuma kɛse. Ná wɔtaa kyerɛw wɔ ahyehyɛde ahorow adan ho, asɔredan ahorow ho, ne sika mpo so. Bere a asɛmpatrɛwfo de Bible kɔɔ akyirikyiri nsase so no, wɔde Onyankopɔn din dii dwuma, na akyinnye biara nni ho sɛ ɛno na ɛma wɔkyerɛw saa nkyerɛwee a ɛwɔ Sri Lanka no.

Hwɛ sɛnea nneɛma asakra nnɛ! Wɔn a wɔkyerɛ sɛ wɔyɛ Kristofo no kakraa bi na Onyankopɔn din ho asɛm hia wɔn. Nhomanimfo binom mpo kasa tia Yehowa Adansefo esiane sɛ wosi so dua nti. Dɛn ntia? Efisɛ sɛnea ebinom kyerɛ no, yennim sɛnea wɔbɔ din no pɔtee wɔ Hebri kasa mu. Nanso nnipa ahe na wonim sɛnea tete no na wɔbɔ Yesu din wɔ Hebri kasa mu? Nanso, wɔde ne din di dwuma wɔ baabiara na wɔkyerɛ ho obu.

Ná Onyankopɔn din no hia Yesu yiye. Ɔkyerɛɛ yɛn sɛ yɛmmɔ mpae sɛ: “Wo din ho ntew.” (Mateo 6:9) Na aka kakra ama wawu no, ɔka kyerɛɛ Onyankopɔn sɛ: “Mayi wo din adi makyerɛ nnipa a wode wɔn fi wiase ama me no.” (Yohane 17:6) Nokware Kristofo di Yesu anammɔn akyi. So ɛnsɛ sɛ wɔn nso ‘woyi Onyankopɔn din kyerɛ’? Yehowa Adansefo yɛ saa, na Yehowa hyira wɔn “fie” kɛse. Dwom yi yɛ nokware wɔ wɔn fam: “Nhyira ne ɔman a [Yehowa] ne wɔn Nyankopɔn.”​—Dwom 144:15.