Teokrase Ɔhwɛ Adwuma Wɔ Kristofo Bere So

‘Sɛnea n’anisɔ te no, ɔbɛboaboa nneɛma nyinaa ano abom bio Kristo mu, nea ɛwɔ ɔsoro ne nea ɛwɔ asase so.’—EFESOFO 1:9, 10.

1, 2. (a) Ɔkwan bɛn so na ‘ɔsoro nneɛma’ anoboaboa no fii ase wɔ 33 Y.B. mu? (b) Ɔkwan bɛn so na Kristofo a wɔasra wɔn no ada Mose ne Elia honhom adi fi 1914 mu?

‘NNEƐMA a ɛwɔ soro’ a wɔbɛboaboa ano yi fii ase wɔ 33 Y.B. mu bere a wɔwoo ‘Onyankopɔn Israel’ no. (Galatifo 6:16; Yesaia 43:10; 1 Petro 2:9, 10) Wɔ afeha a edi kan Y.B. mu akyi no, anoboaboa adwuma no kɔɔ fam bere a awaefo a wɔne “nwura” a Satan duae no bunkam nokware Kristofo (a Yesu frɛɛ wɔn “awi”) so no. Nanso eduu “awiei bere no,” Onyankopɔn Israel no ankasa san daa wɔn ho adi, na 1919 mu no, wɔde wɔn sii Yesu nneɛma nyinaa so.a—Mateo 13:24-30, 36-43; 24:45-47; Daniel 12:4.

² Wɔ wiase ko a edi kan mu no, Kristofo a wɔasra wɔn no yɛɛ anwonwade te sɛ nea Mose ne Elia yɛe no.b (Adiyisɛm 11:5, 6) Efi 1919 no, wɔaka asɛmpa no wɔ wiase a basabasayɛ wom mu, na wɔde Elia akokoduru no bi na ayɛ saa. (Mateo 24:9-14) Na efi 1922 no, wɔaka Yehowa atemmu a ɔde bɛba adesamma so no ho asɛm sɛnea Mose de Onyankopɔn haw baa Misraim so no. (Adiyisɛm 15:1; 16:2-17) Saa Kristofo a wɔasra wɔn no nkaefo yi so na ɛnnɛ Yehowa Adansefo wiase foforo abusua no gyina.

Sodikuw Bi Yɛ Adwuma

3. Nsɛm a esisii bɛn na ɛkyerɛ sɛ nneɛma kɔɔ so pɛpɛɛpɛ wɔ tete Kristofo asafo no mu?

³ Mfiase no, wɔhyehyɛɛ Yesu akyidifo a wɔasra wɔn no. Bere a asuafo no dodow nyaa nkɔanim no, wɔtee asafo ahorow, na wɔpaw mpanyimfo. (Tito 1:5) Afe 33 Y.B. mu akyi no, asomafo 12 no somee sɛ sodikuw a wɔwɔ tumi na biribiara gyina wɔn so. Ne saa nti, wodii adansedi adwuma no anim a wɔansuro. (Asomafo no Nnwuma 4:33, 35, 37; 5:18, 29) Wɔyɛɛ aduan a wɔde ma ahiafo ho nhyehyɛe, na wɔsomaa Petro ne Yohane kɔɔ Samaria ma wokodii anigye a na wɔate sɛ nkurɔfo anya wɔ hɔ no ho dwuma. (Asomafo no Nnwuma 6:1-6; 8:6-8, 14-17) Barnaba de Paulo kɔmaa wɔn de sii so dua sɛ kan ɔtaafo yi abɛyɛ Yesu kyidini seesei. (Asomafo no Nnwuma 9:27; Galatifo 1:18, 19) Na bere a Petro kaa asɛm no kyerɛɛ Kornelio ne ne fifo akyi no, ɔsan kɔɔ Yerusalem kɔkyerɛkyerɛɛ sɛnea na honhom kronkron no akyerɛ Onyankopɔn pɛ wɔ saa asɛm yi mu no mu kyerɛɛ asomafo no ne Yudafo anuanom a wɔaka no.—Asomafo no Nnwuma 11:1-18.

4. Mmɔden bɛn na wɔbɔe sɛ wobekum Petro, na ɔkwan bɛn so na wogyee no nkwa?

⁴ Afei sodikuw no baa ntua a emu yɛ den ase. Wɔde Petro too afiase, na bere a ɔbɔfo bi de ne ho gyee nsɛm mu nkutoo na wogyaee no. (Asomafo no Nnwuma 12:3-11) Saa bere yi ne nea edi kan a obi a ɔnyɛ asomafo 12 no muni benyaa dibea titiriw wɔ Yerusalem. Bere a woyii Petro fii afiase no, ɔka kyerɛɛ nnipakuw a na wɔaboa wɔn ho ano wɔ Yohane a wɔfrɛ no Marko no maame fie no sɛ: “Monkɔka nsɛm yi nkyerɛ Yakobo [Yesu maame ba] ne anuanom no.”—Asomafo no Nnwuma 12:17.

5. Ɔkwan bɛn so na nnipa a wɔwɔ sodikuw no mu sesae wɔ Yakobo kum no akyi?

⁵ Kan a Yuda Iskariot, ɔsomafo fatwafo no hyɛɛ akɔmfo no, ɛho behiae sɛ wɔde ɔsomafo no “hwɛ adwuma no” ma obi a ɔne Yesu nantewee wɔ ne som adwuma no mu na odii ne wu ne ne wusɔre ho adanse. Nanso, bere a wokum Yohane nua Yakobo no, obiara ansi n’anan sɛ 12 no mu biako. (Asomafo no Nnwuma 1:20-26; 12:1, 2) Mmom no, Kyerɛwnsɛm a edi hɔ a ɛfa sodikuw no ho no kyerɛ sɛ na wɔatrɛw mu. Bere a akyinnyegye sɔree wɔ sɛ ebia ɛsɛ sɛ Amanaman mufo a na wodi Yesu akyi no di Mose Mmara so ho no, wɔde asɛm no kɔmaa “asomafo ne mpanyimfo a wɔwɔ Yerusalem no” ma wosii ho gyinae. (Asomafo no Nnwuma 15:2, 6, 20, 22, 23; 16:4) Dɛn nti na na “mpanyimfo” ka sodikuw no ho seesei? Bible no nka, nanso ɛda adi sɛ na mfaso bi wɔ so. Ná Yakobo wu ne Petro afiasenna no ama ada adi sɛ wobetumi de asomafo no agu afiase anaa wɔakum wɔn daakye. Wɔ ahokyere a ɛte saa mu no, na mpanyimfo a wɔn ho akokwaw a wonim akwan a sodikuw no fa so di dwuma no bɛhwɛ ma ɔhwɛ adwuma no akɔ so pɛpɛɛpɛ.

6. Ɔkwan bɛn so na sodikuw no kɔɔ so dii dwuma wɔ Yerusalem, bere a na emufo ankasa nni saa kurow no mu bio mpo no?

⁶ Bere a Paulo baa Yerusalem bɛyɛ afe 56 Y.B. mu no, ɔkɔɔ Yakobo nkyɛn, na Bible ka sɛ, “na mpanyimfo no nyinaa baa hɔ bi.” (Asomafo no Nnwuma 21:18) Dɛn nti na wɔammɔ asomafo din wɔ saa nhyiam yi ase? Ɛha nso, Bible no nka. Nanso abakɔsɛm kyerɛwfo Eusebius bɔɔ amanneɛ akyiri yi sɛ aka kakra ma adu 66 Y.B. no, “wɔpam asomafo nkae no a na bere nyinaa wɔrehwehwɛ wɔn akum wɔn no fii Yudea. Nanso nea ɛbɛyɛ na wɔakyerɛkyerɛ asɛm no, wotuu akwan kɔɔ ɔman biara mu wɔ Kristo tumi mu.” (Eusebius, Book III, V, v. 2) Ɛyɛ ampa sɛ Eusebius nsɛm no nyɛ kyerɛwtohɔ a efi honhom mu no fã de, nanso ɛne nea kyerɛwtohɔ no ka no hyia. Sɛ nhwɛso no, wɔ 62 Y.B. mu no, na Petro wɔ Babilon—a ɛne Yerusalem ntam kwan ware. (1 Petro 5:13) Nanso, ɛda adi pefee sɛ na sodikuw bi reyɛ adwuma wɔ Yerusalem wɔ 56 Y.B. mu kosi 66 Y.B. mu.

Ɔhwɛ Adwuma Wɔ Nnɛ Mmere Mu

7. Sɛ yɛde afeha a edi kan no mu Sodikuw no toto nnɛyi de ho a, nsonsonoe titiriw bɛn na ɛwɔ emufo no mu?

⁷ Efi 33 Y.B. mu kosi bere a ahohiahia baa Yerusalem so no, ɛda adi sɛ na Yudafo Kristofo nkutoo na wɔwɔ sodikuw no mu. Wɔ Paulo nsrahwɛ wɔ 56 Y.B. mu no, ohui sɛ ɛmfa ho sɛ na Yudafo Kristofo a wɔwɔ Yerusalem no pii ‘kura yɛn Awurade Yesu Kristo gyidi’ no, na wɔda so ara “bɔ [Mose] mmara no ho mmɔden.”c (Yakobo 2:1; Asomafo no Nnwuma 21:20-25) Ebia na ɛyɛ den ma saa Yudafo no sɛ wobehu sɛ Amanaman muni bi aba sodikuw no mu. Nanso, wɔ nnɛ mmere yi mu no, wɔayɛ nsakrae foforo wɔ nnipa dodow a ɛsɛ sɛ wɔyɛ saa kuw yi mufo no mu. Ɛnnɛ, Amanaman mufo Kristofo a wɔasra wɔn nkutoo na wɔwom, na Yehowa ahyira wɔn hwɛ adwuma no so kɛse.—Efesofo 2:11-15.

8, 9. Nkɔso bɛn na aba Sodikuw no mu ɛnnɛ mmere mu?

⁸ Efi bere a wɔde Watch Tower Bible and Tract Society of Pennsylvania hyɛɛ mmara ase wɔ 1884 mu kosi 1972 no, na Asafo ti no titrani no na ɔwɔ tumi kɛse wɔ Yehowa ahyehyɛde no mu, bere a na Sodikuw no ne Asafo ti no mpanyimfo no bom yɛ biribiara. Nhyira a wonyae wɔ saa mfe no mu no daa no adi sɛ na Yehowa pene saa nhyehyɛe no so. Wɔ 1972 ne 1975 ntam no, wɔtrɛw Sodikuw no mu maa emufo bɛyɛɛ 18. Nneɛma yɛɛ sɛ afeha a edi kan no mu de pɛpɛɛpɛ bere a wɔde tumi kɛse maa kuw a emufo adɔɔso yi a na wɔn mu bi yɛ Watch Tower Bible and Tract Society of Pennsylvania no mpanyimfo no.

⁹ Efi 1975 no, saa nnipa 18 yi mu dodow bi awie wɔn asase so adwuma. Wɔadi wiase so nkonim, na wɔne ‘Yesu atra ne soro ahengua no so.’ (Adiyisɛm 3:21) Esiane eyi ne nneɛma foforo bi nti, seesei Sodikuw no mufo yɛ du, a biako a wɔde no kaa ho 1994 mu no ka ho. Wɔn mu dodow no ara mfe akɔ anim yiye. Nanso, anuanom a wɔasra wɔn yi nya mmoa a ɛfata bere a wodi wɔn asɛyɛde a emu yɛ duru ho dwuma no. Ɛhe na wonya saa mmoa no? Nkɔso a Onyankopɔn nkurɔfo anya nnɛyi ho a yebesusuw no bebua saa asɛm no.

Mmoa a Onyankopɔn Israel no Nya

10. Henanom na wɔabɛka wɔn a wɔasra wɔn no ho wɔ Yehowa som mu wɔ nna a edi akyiri no mu, na ɔkwan bɛn so na wɔhyɛɛ eyi ho nkɔm?

¹⁰ Wɔ 1884 mu no, na ɛkame ayɛ sɛ wɔn a wɔne Onyankopɔn Israel no bɔ nyinaa yɛ Kristofo a wɔasra wɔn. Nanso, bere bi akyi no, kuw foforo bi fii ase daa wɔn ho adi, na 1935 mu no wɔdaa saa kuw yi adi sɛ “nnipakuw kɛse” a wɔka wɔn ho asɛm wɔ Adiyisɛm ti 7 no. Eyinom a wɔwɔ asase so anidaso no na wogyina hɔ ma ‘asase so nneɛma’ a Yehowa abɔ ne tirim sɛ ɔbɛboaboa ano wɔ Kristo mu no. (Efesofo 1:10) Wogyina hɔ ma “nguan foforo” a wɔwɔ Yesu bɛ a ɛfa nguankuw ho no mu. (Yohane 10:16) Efi 1935 no, nguan foforo no asen yuu aba Yehowa ahyehyɛde no mu. “Wotu sɛ omununkum, ne mmorɔnoma a wɔba wɔn ahunaniankasa mu.” (Yesaia 60:8) Esiane sɛ nnipakuw kɛse no redɔɔso na kuw a wɔasra wɔn no so retew bere a wowie wɔn asase so adwuma wɔ owu mu nti, wɔde nguan foforo a wɔfata redi dwuma kɛse wɔ Kristofo dwumadi ahorow mu. Wɔ akwan bɛn so?

11. Hokwan ahorow a mfiase no na ɛyɛ Kristofo a wɔasra wɔn no nkutoo de bɛn na wɔde ama nguan foforo no?

¹¹ Yehowa mmaninyɛ a wɔbɛka akyerɛ bere nyinaa no ne Onyankopɔn ‘man kronkron’ no asɛyɛde titiriw. Paulo kaa ho asɛm sɛ asɔrefie afɔrebɔ, na Yesu de ahyɛde a ɛne sɛ wɔnka asɛm no na wɔnkyerɛkyerɛ no maa wɔn a wɔbɛyɛ “ahene asɔfokuw” no. (Exodus 19:5, 6; 1 Petro 2:4, 9; Mateo 24:14; 28:19, 20; Hebrifo 13:15, 16) Nanso, August 1, 1932, Engiresi Ɔwɛn-Aban no hyɛɛ da hyɛɛ wɔn a Yonadab yɛɛ wɔn ho mfonini no nkuran sɛ wɔnyɛ saa adwuma yi bi. Nokwarem no, na saa nguan foforo no mufo pii reyɛ saa dedaw. Ɛnnɛ, ɛkame ayɛ sɛ nguan foforo no na wɔreyɛ asɛnka adwuma no nyinaa sɛ ‘ɔsom a wɔde ma Nyankopɔn awia ne anadwo wɔ n’asɔredan mu’ no fã titiriw. (Adiyisɛm 7:15) Ɔkwan a ɛte saa ara so no, wɔ Yehowa nkurɔfo nnɛyi abakɔsɛm mfiase no, na Kristofo a wɔasra wɔn, “nsoromma” a ɛwɔ Yesu Kristo nsa nifa mu, no na wɔyɛ asafo mu mpanyimfo. (Adiyisɛm 1:16, 20) Nanso May 1, 1937, Engiresi Ɔwɛn-Aban no bɔɔ amanneɛ sɛ nguan foforo no mufo a wɔfata betumi ayɛ adwumakuw asomfo (ahwɛfo guamtrafo). Sɛ na mmarima a wɔasra wɔn no bi wɔ hɔ mpo a, na wobetumi de nguan foforo no adi dwuma bere a mmarima a wɔasra wɔn yi ntumi nni saa asɛyɛde yi ho dwuma no. Ɛnnɛ, ɛkame ayɛ sɛ asafo mu mpanyimfo nyinaa yɛ nguan foforo no mufo.

12. Adanse a egyina Kyerɛwnsɛm so bɛn na ɛwɔ hɔ ma nguan foforo no mufo a wɔfata sɛ wonya asɛyɛde a emu yɛ duru wɔ asafo no mu no?

¹² So ɛyɛ mfomso sɛ wɔde asɛyɛde a emu yɛ duru saa bɛma nguan foforo no? Dabi, ɛyɛ abakɔsɛm mu nhwɛso akyi na wodi. Ananafo a na wɔyɛ Yudasom mufo (atubrafo) bi nyaa dibea a ɛkorɔn wɔ tete Israel. (2 Samuel 23:37, 39; Yeremia 38:7-9) Wɔ Babilon nnommumfa akyi no, wɔde asɔrefie adwuma hokwan a kan no na ɛyɛ Lewifo nkutoo de no maa Nethinim (asɔrefie asomfo a wɔnyɛ Israelfo) a wɔfata no. (Esra 8:15-20; Nehemia 7:60) Bio nso, Mose a wohuu ɔne Yesu wɔ ahosakra ho anisoadehu no mu no tiee afotu pa a Midiani Yetro de maa no no. Akyiri yi, ɔka kyerɛɛ Yetro babarima Hobab sɛ onni wɔn anim wɔ sare so hɔ.—Exodus 18:5, 17-24; Numeri 10:29.

13. Hena honhom pa na wɔn a wɔasra wɔn no asuasua bere a wofi ahobrɛase mu de asɛyɛde ma nguan foforo no mufo a wɔfata no?

¹³ Bere a mfirihyia 40 a wodii wɔ sare so rekɔ awiei no, Mose a na onim sɛ ɔrenkɔ Bɔhyɛ Asase no so no bɔɔ mpae sɛ Yehowa nyi obi a obedi n’ade. (Numeri 27:15-17) Yehowa ka kyerɛɛ no sɛ ɔmpaw Yosua wɔ nkurɔfo no nyinaa anim, na Mose yɛɛ saa, ɛwom mpo sɛ na ne ho da so ara yɛ den honam fam, na wannyae sɛ ɔbɛsom Israel amonom hɔ ara de. (Deuteronomium 3:28; 34:5-7, 9) Wɔ odwo honhom a ɛte saa ara mu no, Kristofo a wɔasra wɔn no de hokwan pii ama nguan foforo no mu mmarima a wɔfata no.

14. Nkɔmhyɛ ahorow bɛn na ɛtwe adwene si nguan foforo no dwumadi a ɛreyɛ kɛse wɔ ahyehyɛde no mu so?

¹⁴ Nguan foforo no a wɔde dwumadi pii ahyɛ wɔn nsa wɔ ahyehyɛde no mu no nso yɛ asɛm a wɔkaa ho asɛm wɔ nkɔmhyɛ mu. Sakaria hyɛɛ nkɔm sɛ Filistifo a wɔnyɛ Israelfo no bɛyɛ ‘sɛ sheik a ɔwɔ Yuda.’ (Sakaria 9:6, 7) Ná sheikhnom no yɛ abusua mpanyimfo, enti na Sakaria reka sɛ Israel kan tamfo bi begye nokware som na wabɛyɛ sɛ abusua panyin wɔ Bɔhyɛ Asase no so. Bio nso, bere a Yehowa reka Onyankopɔn Israel no ho asɛm no, ɔkae sɛ: “Ahɔho begyina ahwɛ mo nguan, na ananafo mma ayeyɛ mo akuafo ne mo turoyɛfo. Na mo de, wɔbɛfrɛ mo Awurade [Yehowa, NW] asɔfo, na wɔase mo sɛ: Yɛn Nyankopɔn asomfo.” (Yesaia 61:5, 6) “Ahɔho” ne “ananafo” no ne nguan foforo no. Wɔde asɛyɛde ahorow ahyehyɛ saafo yi nsa sɛnea ɛbɛyɛ a wobedi nneɛma pii ho dwuma bere a nkaefo a wɔasra wɔn a wɔn mfe akɔ anim no wie wɔn asase so adwuma na wɔkɔsom koraa sɛ “Awurade [Yehowa, NW] asɔfo” wɔ soro, a wɔatwa Yehowa tumidi agua no ho ahyia sɛ “Yɛn Nyankopɔn asomfo” no.—1 Korintofo 15:50-57; Adiyisɛm 4:4, 9-11; 5:9, 10.

“Nkyirimma . . . a Wɔbɛba”

15. Wɔ awiei bere yi mu no, Kristofo kuw bɛn na wɔadu “nkwakoraaberem,” na kuw bɛn na egyina hɔ ma “nkyirimma . . . a wɔbɛba no”?

¹⁵ Wɔn a wɔasra wɔn nkaefo no de anigye atete nguan foforo no ama dwumadi pii. Dwom 71:18 ka sɛ: “Onyankopɔn, nkwakoraabere ne dwen mu nso nnyaw me, kosi sɛ mɛka wo tumi ho asɛm makyerɛ nkyirimma, na maka wo mmaninyɛ makyerɛ wɔn a wɔbɛba nyinaa.” Bere a December 15, 1948, Engiresi Ɔwɛn-Aban no reka saa nkyekyem yi ho asɛm no, ɛdaa no adi sɛ Kristofo a wɔasra wɔn asafo no adu nkwakoraabere mu ankasa. Ɛkɔɔ so kae sɛ wɔn a wɔasra wɔn no de anigye “hwɛ hann a ɛwɔ Bible nkɔmhyɛ mu no kwan, na wohu awo ntoatoaso foforo bi.” Ná henanom na eyi fa wɔn ho? Ɔwɛn-Aban no kae sɛ: “Yesu kaa wɔn ho asɛm sɛ ne ‘nguan foforo.’” ‘Nkyirimma a wɔbɛba’ no fa nnipa a wɔbɛtra ase wɔ asase so hwɛ adwuma foforo no ase bere a ɔsoro Ahenni di so no ho.

16. Nhyira ahorow bɛn na wɔn a wɔyɛ ‘nkyirimma a wɔbɛba’ no de anigye hwɛ kwan?

¹⁶ Bible no nhyɛ da nka bere a Kristofo a wɔasra wɔn no nyinaa begyaw wɔn nuanom a wɔne ‘nkyirimma a wɔbɛba’ no hɔ ma wɔakɔhyɛ wɔne Yesu Kristo anuonyam. Nanso wɔn a wɔasra wɔn yi wɔ anidaso sɛ eyi rebɛn. Nsɛm a ebesisi a wɔkaa ho asɛm wɔ Yesu nkɔmhyɛ a agye din a ɛfa “awiei bere” ho mu no abam fi 1914, a ɛkyerɛ sɛ wiase yi awiei abɛn. (Daniel 12:4; Mateo 24:3-14; Marko 13:4-20; Luka 21:7-24) Ɛrenkyɛ na Yehowa de wiase foforo a emu na ‘nkyirimma a wɔbɛba’ no ‘benya [asase so] ahenni a wɔasiesie ama wɔn fi wiase asefi no adi’ no aba. (Mateo 25:34) Wɔde anigye rehwɛ Paradise a wɔbɛsan de asi hɔ ne awufo ɔpepem pii a wobenyan wɔn afi Asaman no kwan. (Adiyisɛm 20:13) So wɔn a wɔasra wɔn no bɛwɔ hɔ na wɔama wɔn a wɔanyan wɔn yi akwaaba? Wɔ 1925 mu no, May 1 Engiresi Ɔwɛn-Aban no kae sɛ: “Ɛnsɛ sɛ yɛbɔ yɛn tirim ka nea Onyankopɔn bɛyɛ anaa ɔrenyɛ. . . . [Nanso] yebetumi aka sɛ wɔbɛhyɛ Asɔre no mufo [Kristofo a wɔasra wɔn] no anuonyam ansa na wɔanyan wɔn a wɔtraa ase tete no [adansefo anokwafo a wɔtraa ase ansa na Kristofo mmere reba no].” Saa ara na bere a September 1, 1989, Ɔwɛn-Aban no reka sɛnea ebia wɔn a wɔasra wɔn no bi bɛwɔ hɔ ama wɔn a wɔanyan wɔn no akwaaba ho asɛm no, ɛkae sɛ: “Eyi ho nhia.”d

17. Hokwan a ɛyɛ anigye bɛn na wɔn a wɔasra wɔn, sɛ kuw no, ne Ɔhene a wɔde no asi agua so, Yesu Kristo, benya?

¹⁷ Nokwarem no, yennim nea ebesi wɔ Kristofo a wɔasra wɔn no biara fam. Nanso Mose ne Elia a na wɔka Yesu ho wɔ ahosakra ho anisoadehu mu no kyerɛ sɛ yɛhwɛ kwan sɛ Kristofo a wɔasra wɔn a wɔanyan wɔn no bɛka Yesu ho bere a ɔba anuonyam mu ‘betua onipa biara ka sɛnea ne nneyɛe te’ bere a obu atɛn na ɔtɔ were no. Bio nso, yɛkae Yesu bɔhyɛ a ɛne sɛ Kristofo a wɔasra wɔn a ‘wodi nkonim’ no ne no ‘de dade poma bɛyɛn amanaman’ wɔ Harmagedon no. Sɛ Yesu ba anuonyam mu a, wɔne no bɛtra ahengua so “abu Israel mmusuakuw dumien no atɛn.” Wɔne Yesu de ‘wɔn nan bɛpɛtɛw Satan.’—Mateo 16:27–17:9; 19:28; Adiyisɛm 2:26, 27; 16:14, 16; Romafo 16:20; Genesis 3:15; Dwom 2:9; 2 Tesalonikafo 1:9, 10.

18. (a) Nsɛm tebea bɛyɛ dɛn bere a ‘wɔboaboa ɔsoro nneɛma ano wɔ Kristo mu’ no? (b) Dɛn na yebetumi aka afa ‘asase so nneɛma a wɔboaboa ano wɔ Kristo mu’ no ho?

¹⁸ Nea ɛbɛyɛ na Yehowa adi ne nneɛma sohwɛ ho dwuma no, ɔde nkakrankakra reyɛ ade ‘aboaboa nneɛma nyinaa ano abom bio wɔ Kristo mu.’ Ɛdefa ‘ɔsoro nneɛma’ ho no, n’atirimpɔw reba awiei. Bere a Yesu ne 144,000 no nyinaa bɛbom ahyia wɔ soro ama “oguammaa no ayeforohyia” no abɛn. Enti, wɔde asɛyɛde a emu yɛ duru ama nguan foforo no mufo a wɔn ho akokwaw a wɔde bere pii asom a wogyina hɔ ma ‘asase so nneɛma’ no ama wɔaboa wɔn nuanom a wɔasra wɔn no. Anigye mmere bɛn ara na yɛte mu yi! Hwɛ anigye a ɛyɛ sɛ yehu sɛ Yehowa atirimpɔw renya mmamu! (Efesofo 1:9, 10; 3:10-12; Adiyisɛm 14:1; 19:7, 9) Na hwɛ sɛnea nguan foforo no di ahurusi sɛ wɔbɛboa wɔn nuanom a wɔasra wɔn no bere a kuw abien no nyinaa bom som sɛ “kuw biako” wɔ “ɔhwɛfo biako” ase de brɛ wɔn ho ase ma Ɔhene, Yesu Kristo, na wɔhyɛ Amansan Hene, Yehowa Nyankopɔn, anuonyam no!—Yohane 10:16; Filipifo 2:9-11.

[Ase hɔ nsɛm]

Wubetumi Akyerɛkyerɛ Mu?

◻ Ɔkwan bɛn so na Onyankopɔn ahyehyɛde no nyaa nkɔanim wɔ afeha a edi kan no mu?

◻ Ɔkwan bɛn so na Sodikuw no akɔ so wɔ Yehowa Adansefo nnɛyi abakɔsɛm mu?

◻ Kyerɛw nsɛm bɛn na ɛfoa so sɛ wɔmfa tumi mma Yehowa ahyehyɛde mu nguan foforo no?

◻ Ɔkwan bɛn so na wɔde ‘ɔsoro nneɛma’ ne ‘asase so nneɛma’ abom wɔ Kristo mu?

[Kratafa 16 mfonini]

Bere a na sodikuw no mufo ankasa nni Yerusalem bio mpo no, kuw no kɔɔ so dii dwuma wɔ hɔ

[Kratafa 18 mfonini ahorow]

Kristofo a wɔasra wɔn a wɔn ho akokwaw no ayɛ nhyira ama Yehowa nkurɔfo

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-