Dɛn Nti na Ɛsɛ sɛ ‘Yɛkɔ Ntɛtea Nkyɛn’?

ƆHENE nyansafo Salomo de afotu yi mae sɛ: “Kɔ ntɛtea nkyɛn.” Dɛn nti na ɔkaa eyi? Dɛn na yebetumi asua afi ntɛtea hɔ? Salomo de kaa ho sɛ: “Hwɛ [ntɛtea] akwan, na hu nyansa. Ɔno na onni otitiriw, ɔpanyin ne sodifo, nanso osiesie n’aduan ahohurubere, na ɔboaboa n’adidide ano twabere mu.” (Mmebusɛm 6:6-8) Saa tete nsɛm no da nokwasɛm ahorow a nnɛyi abɔde mu nhwehwɛmufo ahu adi. Obebufo Agur kyerɛ sɛ ntɛtea yɛ anyansafo fi nkate mu.’ (Mmebusɛm 30:24, 25 ) Nokwarem no, wɔn nyansa no mfi nsusuwii mu nyansa mu na mmom efi nkate a Ɔbɔadeɛ de ama wɔn no mu. Sɛ́ nhwɛso no, esiane sɛnɛa ntɛtea te nka nti, wɔboaboa wɔn aduan ano wɔ bere a ɛsɛ mu.

Ntɛtea yɛ wɔn biribiara pɛpɛɛpɛ ma ɛyɛ nwonwa. Bere a wɔne wɔn mfɛfo adwumayɛfo yɛ biako na wotie wɔn no, wɔboa ntɛtea a wɔapira anaa wɔabrɛ ma wɔsan kɔ ebuw mu. Wofi nkate mu siesie wɔn ho ma daakye, na wɔyɛ nea wobetumi biara de wie wɔn nnwuma.

Ntɛtea kwan a efi adebɔ su mu no kyerɛ sɛ ɛsɛ sɛ nnipa siesie wɔn ho ma daakye na wɔde nsi yɛ adwuma. Eyi fa sukuu, adwuma, ne honhom fam dwumadi ahorow ho. Sɛnea ɔtɛtea nya mfaso fi adwumaden a ɔyɛ mu no, saa ara na Onyankopɔn pɛ sɛ nnipa’hu adepa wɔ wɔn brɛ nyinaa mu.’ (Ɔsɛnkafo 3:13, 22; 5:18) Te sɛ ntɛtea a wɔyɛ adwuma bere nyinaa no, nokware Kristofo de nsi yɛ adwuma.’Wɔde ahoɔden yɛ biribiara a wɔn nsa bɛka sɛ wɔbɛyɛ,’ ɛnyɛ sɛ adwuma panyin bi rehwɛ wɔn nti, na mmom efi nokwaredi ne ɔpɛ a wɔwɔ sɛ wɔyɛ adwumayɛfo a wɔyɛ nsi a wɔde mfaso ba mu.​—Ɔsɛnkafo 9:10; fa toto Mmebusɛm 6:9-11 ho; hwɛ Tito 2:9, 10 nso.

Nokwarem no, sɛ ‘yɛkɔ ɔtɛtea nkyɛn’ na yɛde nea yesua fi ne hɔ no di dwuma a, yɛn ani begye. Na sɛ yɛde nsi yɛ Yehowa Nyankopɔn apɛde, sɛnea wɔada no adi wɔ Bible mu no a, yɛn ani begye asen biara.