Dɛn Na Awofo Betumi Ayɛ De Aboa?

ADWENE ho nimdefo Dr. Bruce Narramore bɔ amanneɛ sɛ “asɛm no fa mmofra adwene ho nimdefo bi a ɔde akwankyerɛ horow anan fii ne dwumadi no ase a mmofra nka ho no ho. Mfe bi akyi no, ohui sɛ na ɔwɔ mmofra anan na onni akwankyerɛ biara!”

Yiw, akwankyerɛ horow a ɛfa mmofra ntetee ho no ba na ɛkɔ. Sɛ́ wɔbɛtete abofra nyɛ adwuma a ɛyɛ mmerɛw. Nanso, wowɔ hokwan biako pɛ a wode bɛtete wo ba. Ɔkwan bɛn na eye sen biara?

Adwenhorow a ɛwɔ hɔ no nyinaa mu no, fibea koro pɛ na ɛde abayɛn ho akwankyerɛ a ɛde yiyedi ba bere nyinaa ma. Ɛyɛ Bible no. Wɔ nkratafa a edidi so yi mu no, hwɛ (1) nea ɛkamfo kyerɛ, (2) nea enti a nnɛyi ɛreboa ɔpepem pii wiase nyinaa ma wɔayɛ awofo pa, ne (3) sɛnea wubetumi de n’afotu adi dwuma wɔ wo fie.

So Awofo Nna Ɔdɔ Adi Denam Aduan, Ntama anaa Atade ne Dabere a Wɔde Ma Abofra So Anaa?

Yiw, na ɛtaa kyerɛ mfe bebree a awofo de wɔn ho bɛma na wɔayɛ saa. Nanso ebia nea ɔwofo betumi de ama abusua no bɛyɛ kakraa bi, te sɛ “mfammiri” anaasɛ kontommire nkwan. Nanso, sɛ nea ɛte saa no fi “ɔdɔ mu” a, ɛnde sɛnea Bible kyerɛ no, eye sen “nantwi a wadɔ na ɔtan wɔ mu.” (Mmeb. 15:17) Ɔdɔ sen aduan pa. Mmofra nya ɔdɔ mu mfaso​—asɛm ketewaa bi a wobɛka afa ne kotodwe anim a aworɔw ho, sɛ wobɛyɛ no atuu, sɛ wode wo nsa bɛbɔ n’akyi, anaasɛ ka a wobɛka sɛ ‘m’ani gye wo ho’ ara kwa mpo boa. Ɛsɛ sɛ mmofra hu ade wɔ ɔkwan bi so a ɛbɛma wɔn adwene a enyinii no atumi ate ɔdɔ a edi mu ne sɛnea awofo ani ku wɔn ho no ase.

Nanso Ɔkwan Bɛn So Na Wubetumi Adɔ Abofra a Ɔyɛ Basabasa?

Ɛnyɛ mmerɛw. Nanso Bible no si ‘ayamhyehye a yebenya ama yɛn ho yɛn ho’ so dua. (1 Pet. 3:8) Mpɛn pii no, nneɛma ahorow bi na ɛma abofra yɛ basabasa. Sɛ nhwɛso no, abofra bi fii ase yɛɛ basabasa wɔ sukuu. N’agya a na n’ani ku ne ho, a ɔde nnɔnhwerew bi kasa kyerɛɛ abarimaa no kae sɛ: “Yɛkɔɔ so kyerɛɛ no sɛ yedwen ne ho. Ɛno akyi no ɔkaa nea na ɛhaw no no kyerɛɛ yɛn.” Mmofra afoforo dii ne ho fɛw esiane ade a ɔde ahyɛ n’aso a ɛboa no ma ɔte asɛm no nti, enti ɔyɛɛ saa wɔ sukuu dan mu na ama wɔn ani asɔ no.

Ná agya no wɔ “ayamhyehye” na, bere a ɔne no bɔɔ nkɔmmɔ ahorow a anigye wom akyi no, abofra no suban yɛɛ yiye. Mfe bi akyi no, abofra no kyerɛw n’awofo sɛ: “Minim sɛ meyɛɛ nneɛma bi a na mo ani nnye ho, nanso meda mo ase sɛ moampa abaw wɔ me ho.” Mpɛn pii no, abasamtu, nitan, abufuw, ehu ne ahotɔ a enni hɔ betumi de subammɔne aba.

Sɛ Wɔde Subammɔne Bi Awo Abofra No Nso Ɛ?

Ebia wuhu mmerɛwyɛ a ɛte saa ara wɔ wo anaasɛ wo hokafo mu. Ɛsɛ sɛ eyi ma ‘wote nka ma no’ na wunya nea wubegyina so de afotu a nyansa wom ama. Sɛ nhwɛso no, ɛnã bi hui sɛ na ne ba a wadi mfe akron ne taa yɛ komm na ɔtew ne ho sɛnea na ɔyɛ bere a na ɔyɛ abofra no. Ose: “Me ne no kaa ho asɛm, na mekyerɛɛ no sɛ, sɛnea ɔte nka, nneɛma a ɛrekɔ so wɔ me mu no, ná mete saa ara bere a meyɛ abofra no. Ná meka sɛ, ‘minim sɛnea wote nka Rowland, efisɛ migu so ara reyɛ ho biribi. Ɛdenam ɛno so no, yɛn yinaa aka abom kɛse na ɔda nsɛm pii adi.”

Ɔkwan Bɛn Na Ɔwofo Betumi Afa So Ahu Bere a Biribi Rehaw Abofra No Ankasa?

Abofra nkate ahorow, nsusuwii ahorow ne n’adwenhorow ankasa wɔ ne koma mu te sɛ nsu a egyina asubura bi a emu dɔ ase. Ɛyɛ den sɛ ebefi adi! Bible se: “Ɔbarima komam agyinatu [obi atirimpɔw anaasɛ n’adwene] yɛ nsu a emu dɔ; na nhumu nipa bɛsaw.” (Mmeb. 20:5) Nsemmisa ahorow bi betumi ‘atwe’ saa nkate ahorow no. Egye NHUMU na wode ahu bere a abofra aboapa retew atua ne bere a ofi abasamtu mu yɛ de.​—Mmeb. 24:3.

So Ɔkwan a Ɔwofo Fa So Kasa Kyerɛ Abofra no Ho Hia Ankasa?

Yiw, ɛho hia. Sɛ yɛbɛyɛ nhwɛso a: Ɔsemmisafo bi a na ne ho adwiriw no bisaa abeawa bi a wadi mfe anum sɛ, “Dɛn nti na wobɛpɛ sɛ wuwu?” Abofra a n’anim ayɛ siamoo no buae sɛ: “Efisɛ anka ɛbɛyɛ nea asomdwoe wom dodo. Anka me maame renteɛteɛm ngu me so bere nyinaa.” Mmofra wɔ nkate ahorow. Nsenhunu a ɔwofo ka betumi asɛe ade. Mmebusɛm no se: “Ɛwɔ nea ɔworo kasa sɛ nkrante nwonwɔe, na onyansafo tɛkrɛma sa yare.” (Mmeb. 12:18, Twi Bible Foforo.) Ma obu a abofra pɛ sɛ onya ma ne ho nkɔ anim denam nkamfo a edi mu a wode bɛma no so. Kamfo nneɛma ahorow a otumi yɛ, ɛmfa ho sɛ esua.

Sɛ abofra susuw sɛ wɔbɛteɛm agu ne so esiane ne nkate ahorow nti a, ɔrenna no adi. Titiriw ɛbɛyɛ den ama no sɛ ɔbɛka ɔbarima ne ɔbea nna ho nkate ahorow a ɔwɔ no akyerɛ. Ebia ɛbɛyɛ abofra no fɛre. Nanso, sɛ nea abofra susuw no nye mpo a, ɛsɛ sɛ otumi ka n’adwene. Ɔwofo bi kae sɛ: “Ɛtɔ da bi a wote nka sɛ wobo repae bere a abofra no ka nea ɛwɔ ne komam no. Nanso ɛnsɛ sɛ wuyi abufuw adi, sɛ woyɛ saa a wɔbɛka wɔn ano atom.”

Bɔ mɔden sɛ wubehu abofra no nsɛm mu, faako a ne nkate ahorow wɔ. Tra ne nkyɛn simma anum bere a wode no to mpa so no. Ka nneɛma a ama woanya anigye, ama wo werɛ ahow, ama w’abasam atu anaasɛ ama ehu aka wo ho asɛm kyerɛ no. Ɛnyɛ osuahu ahorow nko na ɛho hia sɛ woka kyerɛ no na mmom nkate ahorow nso. Nea ɛsen biara mo, tie, bere a w’abofra da ne nkate ahorow adi no.

So Ɔdɔ Kyerɛ Sɛ Wobɛma Abofra no Ayɛ Nea Ɔpɛ Bere Nyinaa?

Bebree susuw saa. Wɔpɛ sɛ abofra mo dɔ wɔn. Abofra no nam ahunahuna so ka sɛ, “sɛ woma me tɔfe” a, mɛdɔ wo. Akyiri yi, ebetumi ayɛ sɛ, “Sɛ woma kwan ma metra ase kosi bere biara a mepɛ,” “di aduan a mepɛ” anaasɛ “me ne m’ankasa me nnamfo nantew a.” Awofo pene so. Nneɛma bɛn na efi mu ba? Awo ntoatoaso anaasɛ wiase bi a mmofra a wɔyɛ asoɔden na wɔyɛ katee wom. Bible ka sɛ: “Nea ɔdɔ [ne ba] no teɛ no so.” Nteɛso kyerɛ nkyerɛkyerɛ a ɛteɛ ade. Ɛma suban yɛ yiye na ɛde ahobammɔ ma.​—Mmeb. 13:24.

Na Sɛ Abofra Ntie Nteɛso Ɛ?

Bible tu fo sɛ: “Teɛ wo ba so na wama woahome, na wama wo kra anika.” (Mmeb. 29:17) Asotwe ka nteɛso ho. Ebetumi ayɛ ɔhwe ankasa anaasɛ hokwan fɛfɛ bi a wɔde bɛkame. Eyi bɛkyerɛ no biribi a ɛho hia​—obu a ɛsɛ sɛ onya ma tumidi. Onyankopɔn yɛ sɛnea ɛsɛ sɛ asotwe no yɛ ho nhwɛso, bere a ɔka sɛ: “Mɛteɛ wo so sɛ ɛfata.” Ɔkɔɔ so ka kyerɛɛ nnipa koro no ara sɛ, ‘midi mo akyi.’ Ná ɔda so ara dɔ wɔn. Enti Yehowa de anohyeto ahorow a ɔdɔ wom nanso enhinhim a ɛfa abrabɔ a eye ho sisi hɔ. Awofo, monyɛ saa ara!​—Yer. 46:28.

Nsɛm Bɛn Na Ɛsɛ Ɛsɛ Ɔwofo Yɛ Den Wom?

Yɛ den sɛ wobɛma abofra adi aduan pa, efisɛ sɛ odi nnuan a ahoɔden nni mu a ebetumi asiw nipadua mu onyin ne ahoɔden kwan. Bere koro no ara mu no, mma w’abofra mfa “nneɛma funu” te sɛ nea woyi wo TV so a ɔbɛhwɛ ne nsɛmma nhoma ahorow ne sini ahorow a ɛhyɛ nsɛmmɔnedi ne aguamammɔ ho nkuran nhyɛ n’adwene mu.

Nanso nea enye sen biara a ebetumi asɛe w’afotu pa no ne wo abofra no nnamfo​—n’atipɛnfo. Sɛ abofra ne wɔn a wɔn bra asɛe fa nnamfo a, hu sɛ bere nyinaa “obesuasua” suban a ɛte saa no na asum no afiri. (Mmeb. 22:24, 25) Ɛyɛ wo asɛyɛdɛ sɛ wotetew nnamfofa bɔne no mu. Eyi gye nteɛso, nanso sɛ ɔwofo de nnamfo pa si nnamfo bɔne ananmu anaasɛ ɔma nneɛma a ɔyɛ wɔ n’ankasa n’abusua mu yɛ anigye a, ɛma adwuma no bɛyɛ mmerɛw kɛse.

Bere Bɛn Na Abofra Behu Nea Ɛteɛ Ne Nea Ɛnteɛ?

Sɛ wogyae ma n’ankasa a ebia ɔrenhu da. Bible no kyerɛ sɛ abarimaa nnim “ɔkwan a ɔbɛfa so apow bɔne na wapaw papa.”​—Yes. 7:16, NW.

Ɔkwan Bɛn Na Wobetumi Afa So De Eyi Akyerɛkyerɛ Abofra?

Ɛsɛ sɛ edu koma no mu. Ɛsɛ sɛ onya nsusuwii a efi n’ankasa mu a ‘ɔde bɛpow adebɔne na wapaw papa.’ Sɛ anyɛ saa a, ebia obenya nyansa a emu nnɔ a ɔde bɛtwe ne ho afi ɔhaw ho. Enti, nea ɛka “nteɛso” ho no, ɛsɛ sɛ awofo ‘tete’ wɔn mma wɔ “Yehowa kasakyerɛ ne nyansakyerɛ mu.”

Eyi hwehwɛ sɛ wode biribi a ɛbɛka abofra no koma hyɛ n’adwenem. Ɛsɛ sɛ ɛkanyan no wɔ ɔkwan pa so na ɛbɔ no asiane ahorow a ɛbɛba daakye ho kɔko. Bible asɛm “kasakyerɛ ne nyansakyerɛ” ka “biribiara a ɛho hia ma woagye afotu no atom, anaa ma akɔ koma mu no ho.”a

Sɛ Wɔbɛkyerɛkyerɛ Abofra Onyankopɔn Asɛm No Ho Hia Dɛn?

Ɔpanyin Kristoni bi susuw mmofra kuw bi a wɔkyerɛ sɛ wɔyɛ Kristofo a na wɔde wɔn ho akɔto asiane bi mu no ho yiye, na nea ɛka ho ne nnubɔne a wɔde adi dwuma, aguamammɔ ne asabow. Dɛn na ɛbae? Ɔkae sɛ: “Ne tiaa ara ne sɛ mmofra yi nsuro Onyankopɔn.” “Tebea no ni: Ade asa. Wɔne ɔbea te kar mu. Nea wohu ara ne sɛ wɔn nkate ano reyɛ den. Wɔamfa nea ebefi mu aba no anyɛ hwee. Na na wɔyɛ no dapɛn biara.” Nanso ebinom ‘pow bɔne no.’ Ɔkae sɛ, na eyinom ama nsɛm aka wɔn koma na wɔne Yehowa anya abusuabɔ a emu yɛ den. Wobu no sɛ Onipa a ɔwɔ ɔdɔ a ohu ade nyinaa.” Enti boa wo abofra ma onya abusuabɔ a ɛte saa.​—Mmeb. 16:6.

Ɛsɛ sɛ ɔwofo di kan ne Onyankopɔn nya abusuabɔ yi. Wo ankasa wo Bible adesua a wobɛyɛ ne susuw a wubesusuw nneɛma ho hia. Yehowa Adansefo pɛ sɛ wɔboa. Nokwarem no, ɛyɛ Bible mu afotu a, efi Adansefo no hɔ yi na ɛsakraa abofra a wɔkaa ne ho asɛm wɔ asɛm yi mfiase hɔ, nea onyaa nhyɛase bɔne a ɛte saa no, ma ɔbɛyɛɛ ɔwofo pa no. Ogye toom sɛ: “Bible no sua na ɛmaa nsakrae no nyinaa bae.”

Wo suban​—sɛ́ ɛyɛ papa anaa bɔne​—bɛkyerɛkyerɛ abofra ntɛmntɛm na ebenya ne so tumi kɛse asen ade foforo biara. Esiane bɔne a wɔde wo no nti, abofra suasua subammɔne ntɛmntɛm. (Dw. 51:5) Enti nea edi kan ne sɛ wobɛhwɛ wo ankasa wo ho.

Sɛ Abofra Fa Ɔkwammɔne So a, So Ɛyɛ Awofo no Mfomso Bere Nyinaa?

Awofo nyɛ pɛ, na saa nso na mmofra nyɛ pɛ. Wɔn nyinaa betumi ayɛ mfomso a ɛyɛ awerɛhow. Nanso esiane sɛ Bible ka sɛ abofra a wɔatete no yiye ‘remfi ho’ nti, awofo binom te nka ankasa sɛ ɛyɛ wɔn mfomso sɛ abofra bi fa ɔkwammɔne so a. (Mmeb. 22:6) Nanso ɛsɛ sɛ wosusuw nkyekyem yi ho wɔ ne kwan a ɛfata so. Ɛyɛ afotu a efi Mmebusɛm no mu a wɔde ma awofo no fã. Sɛ ɔwofo de n’ano ara kwa na ɛkyerɛe sɛ odi afotu yi akyi anaasɛ dabi a, n’ankasa nim.

Wɔde afotu ma mmofra nso. Sɛ wɔbɛyɛ yiye a, ɛnde, wɔhyɛ wɔn sɛ ‘wontie’ awofo kyerɛ ne nteɛso, ‘wɔmfa nsie,’ ‘wɔmmma wɔn werɛ mmfi,’ ‘wɔnyɛ aso mma,’ na ‘wɔnntow nnkyene.’ (Mmeb. 1:8; 2:1; 3:1; 4:1; 6:20) Wɔde afotu a ɛte saa bɛboro mpɛn anan ma mmofra sɛnea wɔde ma awofo wɔ Bible mu nhoma biako yi nkutoo mu!

Mmofra binom ‘bu osetie’ ma awofo ‘animtiaa.’ (Mmeb. 30:17) Agya bi a ɔyɛ nhwɛso pa a na ɔwɔ babarima soɔdenfo bi kae sɛ: “Mabɔ mmɔden biara sɛnea ɛbɛyɛ a me nsɛm bedu ne koma mu. Minhu nea menyɛ efisɛ masɔ nneɛma bebree ahwɛ. Biribiara anyɛ yiye.”

Abofra wɔ asɛyɛde sɛ otie saa nkyekyem a ɛfa ne ho no. Sɛ ɔwofo ne abofra’ no nyinaa tie Bible afotu a, nea ɛbɛba ara ne sɛ abofra renkyea anaasɛ ɔremfa ɔkwammɔne so. Ɛho nhia sɛ ɔwofo ma ne werɛ how anaasɛ ɔma n’abasam tu sɛ odi fɔ wɔ nea aba atwam no ho. Dwen nea wubetumi ayɛ mprempren de aboa wo abofra no ho.

[Ase hɔ nsɛm]

[Kratafa 10 adaka]

NSƐM A ƐSƐ SƐ WOBISA BERE A ABOFRA YƐ BASABASA

Woyare anaa?

Wote nka sɛ mereyɛ biribi a ɛmfata? Dɛn ntia?

So wurehyia ɔhaw ahorow wɔ sukuu?

Wote nka sɛ biribi rehyɛ wo so pii anaa?

Wote nka ara kwa sɛ woayɛ basaa?

Wone wo nnamfonom nantew fɛfɛɛfɛ?

Wote nka sɛ mehwehwɛ pii dodo fi wo nkyɛn?

So metumi aboa ɔkwan bi so?

[Kratafa 11 adaka]

DƐN NTI NA MMOFRA KUM WƆN HO?

Ɔbenfo bi kyerɛkyerɛɛ mu sɛ, “wontumi nnyina nhyɛso no ano.” Osii “hia a nteɛso ho hia so dua​—nea ɛma suban yɛ yiye a ɛmma abofra nkum ne ho bere a ɔwɔ ahokyere mu.”

[Kratafa 12 adaka]

BERE BƐN NA ƐSƐ SƐ WOFI ASE?

Ɔwofo bi a na n’abasam atu kae sɛ: “Mekɔɔ so bɔɔ me mmofra nsɛm gui. Misusuwii sɛ na yɛwɔ mfe pii a yɛde bɛma wɔn asetra ayɛ yiye anaasɛ yɛde bɛkyerɛ wɔn kwan, nanso mprempren yi, ɛkame ayɛ sɛ wɔanyinyin awie. Yɛama tumi ho kwan kɛse a na yɛwɔ wɔ wɔn so no atwam.” Fi ase wɔ mmofraase!

[Kratafa 12 adaka]

“KYERƐ” NO MPANYIMFO ASETRA

“Kyerɛ abofra ade a ɛfata ne kwan.” (Mmeb. 22:6) Ehia sɛ wɔkyerɛ abofra nyansa, te sɛ n’adwene a ɔbɛma ayɛ biako, sɛ ɔbɛda ne pɛ mu a ofi yɛ ade kan ne ahosodi adi. Sɛ ntetee a a ɛte saa nni hɔ a, ebia ɔrennya bi wɔ ne mpanyin bere mu.

Titiriw nea ɛyɛ den ne bere a wonnuu mpanyin mfe so no​—bere a wɔrebɛn mpanyin afe so. Bere bi wɔ hɔ a ebia abofra bɛka sɛ: “Nka nea ɛsɛ sɛ meyɛ nkyerɛ me!” na dɔnhwerew biako akyi no, ebia obebisa sɛ: “Maame, dɛn na ɛsɛ sɛ meyɛ mprempren?” Wubetumi aboa abofra no ma wayɛ nsakrae, denam katee dodo a worenyɛ anaasɛ nneɛma mu pii dodo a worengow no so.

[Kratafa 11 mfoni]

Boa w’abofra ma ɔne Onyankopɔn nya abusuabɔ denam Bible a mobɛbom asua so