Mmofra Bisa Sɛ . . .

Mɛyɛ Dɛn Atumi Ama Wɔagyae Bɔne a Wɔde Hyɛ Me Bere Nyinaa?

“Na wɔde nneɛma ho asodi to me so bere nyinaa. Sɛ wɔanto ɔdan no mu anaa wɔannum sutof no anaa wɔamfa biribi anto yiye anaasɛ wɔanyɛ a, na ɛyɛ Ramon na ɔma ɛba saa!”—Ramon.

SƐ WUNNII mfe aduonu a, ebetumi ayɛ te sɛ nea ɛtɔ da bi a wɔde ade biara anaasɛ biribiara a ɛnkɔ yiye ho asodi to wo so. Wɔ asɛm bi a aba dedaw mu no, yegye toom sɛ ɛtɔ da bi a awofo pere wɔn ho de bɔne hyɛ wɔn mma.a Nea ɛma eyi ba no betumi ayɛ wo ho a wodwen anaasɛ haw a wɔahaw kɛse. Ɛmfa ho nea ɛma ɛba biara no, nneɛma a ɛnyɛ wo na woyɛe a wɔde ho asodi bɛto wo so no betumi ayɛ wo yaw na agu w’anim ase.

Nokware mu no, sɛ́ onipa a wonyɛ pɛ no wobɛyɛ mfomso bere ne bere mu. (Romafo 3:23) Bio nso, esiane sɛ woyɛ abofra nti wunni osuahu pii. (Mmebusɛm 1:4) Ɛtɔ da bi a, wubetumi ayɛ mfomso wɔ gyinaesi mu. Ɛno nti sɛ wofom a, ɛteɛ na ɛfata sɛ wɔde ɛho asodi to wo so.—Ɔsɛnkafo 11:9.

Ɛnde, ɛsɛ sɛ woyɛ w’ade dɛn bere a wɔde biribi a woayɛ ankasa ho asodi to wo so no? Mmofra binom yɛ wɔn ade te sɛ nea wɔabu wɔn atɛnkyea kɛse bi. Wɔteɛteɛm gu wɔn awofo so sɛ wɔde biribiara ho asodi to wɔn so bere nyinaa. Dɛn na efi mu ba? Awofo a wɔahaw no yɛ ketee kɛse na ama wɔate wɔn ase. Bible no de afotu yi ma sɛ: “Agyimfo bu nyansa ne nteɛso animtiaa. Me ba, tie w’agya nteɛso, na mpo wo na mmara.” (Mmebusɛm 1:7, 8) Sɛ wugye wo mfomso tom na woyɛ nsakrae a ehia a, wubetumi asua biribi afi wo mfomso no mu.—Hebrifo 12:11.

Wɔne Awofo “Agyinakɔ”

Nanso, ɛyɛ asɛm foforo koraa bere a wɔde nneɛma a ɛnyɛ wo na woyɛe ho asodi to wo so anaa wɔde bɔne hyɛ wo bere nyinaa no. Ɛyɛ nea ntease wom sɛ wo bo betumi afuw na woanya menasepɔw. Ebi mpo a wobɛyɛ basabasa bere a wususuw sɛ ɛyɛ dɛn ara a wɔbɛka sɛ woadi mfomso no. (Ɔsɛnkafo 7:7) Nanso, nneɛma a ɛda ɔtan adi pira obiara. (Fa toto Hiob 36:18 ho.) Mmebusɛm 15:22 kyerɛ ɔkwan pa a wɔfa so di nsɛm ho dwuma na ɛka sɛ: “Wɔkwati agyinakɔ a, tirimpɔw yɛ ɔkwa.” Yiw, ɔkwan pa a wubetumi afa so asesa sɛnea w’awofo ne wo di ne sɛ wobɛma wɔahu sɛnea wote nka.

Nea edi kan no, hwehwɛ nea Bible frɛ no “bere a ɛfata” no. (Mmebusɛm 15:23, NW) Nhoma kyerɛwfo Clayton Barbeau de nyansahyɛ ma sɛ: “Paw bere ne beae a mo nyinaa ayɛ dinn na mowɔ anigye no.” Bio nso, Bible no bɔ kɔkɔ sɛ: “Asɛnnennen hwanyan abufuw mu.” (Mmebusɛm 15:1) Ɛno nti bɔ mmɔden sɛ wobɛda odwo ne obu adi bere a wokasa no, na ɛnyɛ atutupɛ. Mma wo bo mmfuw. (Mmebusɛm 29:11) Sɛ anka wobɛkasa atia w’awofo (‘Mode biribiara ho asodi to me so bere nyinaa’) no, bɔ mmɔden kyerɛkyerɛ sɛnea bɔne a wɔde hyɛ wo bere nyinaa no ma wote nka no mu. (‘Sɛ mode nneɛma a ɛnyɛ me na meyɛ ho asodi to me so a, ɛhaw me.’)—Fa toto Genesis 30:1, 2 ho.

Yebetumi aka saa ara afa mmere a w’awofo bo fuw esiane sɛ wɔnte biribi ase nti no ho. Abofra Yesu awofo haw bere bi a na wonhu no no. Nanso Yesu anteɛteɛm anaa wanwiinwii. Ofi odwo mu kyerɛkyerɛɛ asɛm no mu. (Luka 2:49) Dɛn nti na wommɔ mmɔden ne w’awofo nni sɛ obi a wanyin bere a woahaw no? Hu sɛ wɔahaw efisɛ wodwen wo ho! Fi obu mu tie. (Mmebusɛm 4:1) Twɛn kosi sɛ nneɛma ano bɛbrɛ ase ansa na woakyerɛkyerɛ w’asɛm mu.

‘W’ankasa W’adwuma a Wobɛsɔ Ahwɛ’

Nanso nea edi kan no, dɛn nti na awofo binom nya adwene a ɛnteɛ wɔ wɔn mma ho ntɛmntɛm? Nokware mu no, ɛtɔ da bi a mmofra ma wɔn awofo nya biribi gyina so nya wɔn ho adwene a ɛnteɛ. Mmebusɛm 20:11 ka sɛ: “Abofra po, wɔde ne nneyɛe na ehu no, sɛ n’adeyɛ bɛyɛ yiye na ateɛ.” Edin bɛn na woagye wɔ w’awofo anim? So wo “nneyɛe” ada wo adi sɛ “woteɛ” na wofa nneɛma aniberesɛm anaa woyɛ anibiannaso na wontumi mfa ho nto wo so? Sɛ woyɛ anibiannaso a, mma ɛnyɛ wo nwonwa sɛ mpɛn pii no wonya wo ho adwene a ɛnteɛ ntɛm ara. Ramon, aberante a yɛaka ne ho asɛm dedaw no, gye toom sɛ: “Ɛsɛ sɛ meka nokware” wɔ m’awofo kasatia no ho. “Ɛtɔ da bi a ná nokware bi wɔ nea wosusuw no mu.”

Sɛ eyi te saa wɔ wo fam a, ebia nea wubetumi ayɛ ara ne sɛ wobɛma wo werɛ afi nea atwam no. Sɛ woma wonya wo mu ahotoso na sɛ womfa nsɛm nni agoru a, wubetumi de nkakrankakra ama w’awofo agye adi sɛ woayɛ nsakrae na wobetumi anya wo mu ahotoso.

Ramon suahu no kyerɛkyerɛ asɛm yi mu. Ne nnamfo ne n’abusua too ne din agoru kwan so sɛ awerɛfiri wura esiane sɛ na ne werɛ taa fi ade nti. So w’awofo ato wo din a ɛmfata te sɛ obi a “odi mmofrasɛm” anaa “wontumi mfa ho nto no so”? Sɛnea nhoma kyerɛwfo Kathleen McCoy ka no, awofo susuw sɛ edin a ɛte saa no “beyi mfomso no adi sɛnea ɛbɛyɛ a abofra no behu na wayɛ nsakrae.” Nanso, nokware mu no, edin a ɛtete saa no taa ma odi yaw kɛse. Ɛno mpo no, Ramon behui sɛ edin no daa nokwasɛm bi adi. Ogye tom sɛ: “Na m’adwene wɔ ade biako pɛ so bere biara, ɛno nti na meyerayera nneɛma te sɛ nsafe anaa me sukuu dwumadi na me werɛ fi nnwuma a ɛsɛ sɛ meyɛ.”

Enti Ramon fii ase yɛɛ nsakrae. Ɔkae sɛ: “Mifii ase huu asɛyɛde ne nneɛma a ɛho hia. Meyɛɛ bere nhyehyɛe na mefaa kokoam Bible adesua aniberesɛm kɛse. Mihui sɛ nneɛma nketewa ne akɛse nyinaa ho hia Yehowa.” (Luka 16:10) Ɛdenam Bible nnyinasosɛm a Ramon de dii dwuma so no, awiei koraa no ne werɛ a na efi ade no fii hɔ. Dɛn nti na wommɔ mmɔden nyɛ saa ara? Na sɛ edin bi a wɔde ato wo haw wo a, wo ne w’awofo nsusuw ho. Ebia wobehu sɛnea wote nka no.

Bere a Ɛte sɛ Nea Animhwɛ Wom

Ɛtɔ da bi a animhwɛ na ɛma wɔde bɔne hyɛ wo. Ramon kae sɛ: “Me nuanom mmarima ne mmea mpanyimfo mma fie ntɛm nanso wɔnyɛ wɔn hwee. Mamma fie ntɛm a wɔka m’anim.” Guyanani bi a ne din de Albert kae sɛ na ɔte nka saa ara bere a na ɔrenyin no. Na ɔte nka sɛ ne maame teɛ no denneennen sen ne nuabarima.

Nanso, nneɛma nte sɛ nea ɛyɛ a wɔfa no bere nyinaa no. Mpɛn pii no, awofo de ahofadi pii ma wɔn mma mpanyimfo a ɛnyɛ sɛ animhwɛ nti, na mmom wɔte nka sɛ wobetumi adi nneɛma bi ho dwuma yiye. Anaasɛ ebia na ɛyɛ tebea soronko bi nti. Albert gye tom sɛ na wɔnhwe ne nua no esiane sɛ na “osua na ɔyɛ ɔyarefo nti.” So ɛyɛ animhwɛ sɛ awofo behu abofra pɔtee bi ahiade titiriw anaa mmerɛwyɛ a ebia ɔwɔ no?

Nokware mu no, ɛtɔ da bi a awofo wɔ wɔn a wɔpɛ wɔn asɛm. (Fa toto Genesis 37:3 ho.) Albert ka fa ne nua yarefo no ho sɛ: “Na maame wɔ ɔdɔ soronko ma no.” Nea ɛyɛ anigye no, Kristofo dɔ mu trɛw. (2 Korintofo 6:11-13) Ɛno nti sɛ w’awofo wɔ “ɔdɔ soronko” ma wo nuanom mu biako mpo a, ɛno nkyerɛ sɛ wonni ɔdɔ biara mma wo. Asɛm no ne sɛ, Wɔne wo di wɔ ɔkwan a ɛnteɛ so na wɔde bɔne hyɛ wo esiane dɔ a wɔdɔ wo nua no kɛkɛ nti? Sɛ saa na asɛm no te a, ɔkwan biara so no ma wonhu sɛnea wote nka. Wɔ odwo ne ɔkwan a ntease wom so no, ma wɔn nhwɛso ahorow pɔtee a ɛkyerɛ nea enti a wote nka sɛ wɔada animhwɛ adi no. Ebia wobetie.

Mmusua a Ɔhaw Wom

Nokware mu no, ɛnyɛ tebea nyinaa na ɛyɛ mmerɛw sɛ wɔbɛsesa no. Wɔ awofo binom fam no, gu a wogu obi anim ase ne bɔne a wɔde hyɛ no no yɛ wɔn su a aka hɔ. Eyi betumi aba saa titiriw wɔ awofo a wɔwɔ nkate mu haw anaa wɔrepere sɛ wobegyae biribi a ne yɛ aka hɔ. Wɔ tebea horow a ɛte saa mu no, ebia mfaso kakraa bi na ebefi mmɔden a wobɛbɔ sɛ mobɛka ho asɛm no mu aba. Sɛ ɛte sɛnea eyi yɛ nokware wɔ wo fam a, hu sɛ wuntumi nyɛ w’awofo haw no ho hwee na gye sɛ wohwehwɛ mmoa fi baabi ansa na woatumi adi ho dwuma. Ebia nea eye paa a wubetumi ayɛ ne sɛ wode nidi ne obu a ɛfata bɛma wɔn na woabɔ mmɔden sɛ wobɛkwati ntawntawdi a enhia. (Efesofo 6:1, 2) Mmebusɛm 22:3 ka sɛ: “Onitefo hu bɔne a ɛbɛba, na ɔde ne ho hintaw.”b

Bere koro ara no, hwehwɛ mmoa fi baabi. Wo ne ɔpanyin bi a ne ho akokwaw, ebia ɔpanyin Kristoni nkasa. Ɔdɔ mu a obefi atie wo no betumi ayɛ pii ama te a wote nka sɛ wɔde nneɛma ho asodi to wo so bere biara no agyae. Bere koro no ara no, ‘bɛn Onyankopɔn.’ (Yakobo 4:8) Ɛwom sɛ ebia afoforo bɛkɔ so de bɔne ahyɛ wo de, nanso ‘[Onyankopɔn] renkɔ so mpɛ yɛn ho mfomso nkosi daapem, na ɔrennya yɛn menasepɔw nkosi daa. Na onim yɛn su, ɔkae sɛ yɛyɛ mfutuma.’ (Dwom 103:9, 14) Nim a wonim sɛ wosom bo wɔ Onyankopɔn ani so no betumi aboa wo ma woagyina bɔne a wɔde to wo so no ano.

[Ase hɔ nsɛm]

[Kratafa 21 mfonini]

Yɛn mfomso a yegye tom no boa yɛn ma yesua biribi fi mu