Boasetɔ—Dɛn Nti na Ɛho Yɛ Na Saa?

NÁ EMILIO wɔ ne mfe 60 mu.a Awerɛhosɛm bi nti na ɔbaa Oahu—sɛ ɔrebesie ne babarima panyin. Bere a Emilio nam bepɔw so kwan so na ɔne ne nnamfo rebɔ nkɔmmɔ no, kar bi de n’akyi fi fie bi mu besii kwan no mu maa ne koma tui. Ɛkaa kakraa bi sɛ kar no bɔɔ Emilio, na bere a ne bo fuwii na wannya boasetɔ no, ɔteɛteɛɛm guu ofirikafo no so, de ne nsa hwee kar no mu. Ɛde akasakasa bae. Ɛte sɛ nea ofirikafo no piaa Emilio, na ɔhwee ase maa ne ti kɔbɔɔ fam wɔ kar kwan a ɛso yɛ den no so. Nna kakraa bi akyi no, Emilio wui esiane ne ti mu a ɛpaee no nti. Hwɛ awerɛhosɛm a ɛkowiei!

Yɛte wiase bi a boasetɔ ho yɛ na mu. Mfirikafo pii tu mmirika tra so. Ebinom nso di kar a ɛkɔ sɛnea ɛsɛ akyi pɛɛ—wɔbɛn ho—dodo. Yɛwɔ afoforo nso a wokodi fã ha kakra a na wɔakodi ha nso kakra esiane sɛ wɔmpɛ sɛ wodi kar afoforo akyi nti. Wɔ fie nso, abusuafo tumi da abufuw a ano yɛ den adi yɛ afoforo basabasa. Kristofo binom mpo betumi ahaw kɛse esiane wɔn honhom fam anuanom sintɔ ne mfomso ahorow nti.

Dɛn nti na boasetɔ ho yɛ na saa? Saa na ɛte bere nyinaa anaa? Dɛn nti na ɛyɛ den sɛ obi bɛtɔ ne bo ase wɔ yɛn bere yi mu saa?

Nnipa Binom a Wɔannya Boasetɔ

Bible no ka ɔbea bi a wantwɛn ne ne kunu ansusuw nsɛm ho ansa na ɔresi gyinae kɛse bi ho asɛm. Ná wɔfrɛ no Hawa. Ɛbɛyɛ sɛ ahopere ka ho nti na odii Adam anim kodii aduaba a wɔabara no bi. (Genesis 3:1-6) Na ne kunu nso ɛ? Ɛbɛyɛ sɛ ɔno nso ahopere na ɛmaa okodii Hawa akyi kɔyɛɛ bɔne a wanni kan ankɔ ne soro Agya, Yehowa hɔ ankogye mmoa ne akwankyerɛ no. Wɔn adifudepɛ, ne ebia boasetɔ a wɔannya a ɛkowiee bɔne mu no de ɔhaw brɛɛ yɛn nyinaa. Yɛn nso yɛanya apɛgyade bi afi wɔn hɔ a ɛma yɛyɛ bɔne, a ebi ne ahantan ne ahopere.—Romafo 5:12.

Yɛn awofo a wodi kan no bɔne akyi bɛyɛ mfe 2,500 no, Onyankopɔn nkurɔfo a wapaw wɔn, Israelfo no, daa no adi mpɛn pii sɛ wonni gyidi ne boasetɔ koraa. Ɛwom sɛ na Yehowa gyee wɔn fii Misraim nkoasom mu nkyɛe de, nanso ankyɛ na “wɔn werɛ fii ne nneyɛe ntɛm,” na “wɔantwɛn n’agyinatu.” (Dwom 106:7-14) Mpɛn pii no wɔyɛɛ bɔne a anibere wom esiane sɛ wɔannya boasetɔ nti. Wɔyɛɛ sika nantwi ba som no; wonwiinwii wɔ honam fam nsiesiei a Yehowa de maa wɔn a ɛne mana no ho; na wɔn mu pii tew atua mpo tiaa Yehowa nanmusifo a wapaw no, Mose. Nokwarem no, boasetɔ a wɔannya no de awerɛhow ne amanehunu brɛɛ wɔn.

Onipa a odi kan a odii hene wɔ Israel, Saul, hweree hokwan a na ɛwɔ hɔ sɛ ne mma betumi abedi n’ade no. Dɛn ntia? Efisɛ wantwɛn odiyifo Samuel a na ɔrebɛbɔ afɔre ama Yehowa no. Onipa ho suro maa Saul dii Samuel anim bɔɔ afɔre no. Susuw sɛnea Saul bɛte nka bere a Samuel duu hɔ a na afei ara na wabɔ afɔre no awie no ho hwɛ! Anka ɔtwɛnee simma kakraa bi mpo kaa ho a!—1 Samuel 13:6-14.

Anka Hawa twɛnee Adam kakra sen sɛ ɔde ahopere kodii aduaba no a! Anka Israelfo no kae twɛn Yehowa agyinatu a! Yiw, anka boasetɔ tumi boa gyee wɔn ne yɛn fii awerɛhow ne ɛyaw bebree mu.

Nneɛma a Ɛmma Nkurɔfo Nnya Boasetɔ

Bible no boa yɛn ma yɛte ade titiriw bi a ɛmma nkurɔfo nnya boasetɔ nnɛ ase. Timoteo nhoma a ɛto so abien ti 3 ka yɛn awo ntoatoaso yi ho asɛm sɛ ɛwɔ “mmere a emu yɛ den” mu. Ɛka sɛ nnipa “bɛyɛ ahopɛfo, sikapɛfo, ahohoahoafo, ahantanfo . . . wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa.” (Nkyekyem 2, 3) Adifudepɛ ne ahopɛ su a ɛte saa wɔ nnipa pii koma ne wɔn adwene mu, na ɛma no yɛ den ma obiara, a nokware Kristofo mpo ka ho, sɛ obenya boasetɔ. Sɛ yehu sɛ wiasefo de kar tu mmirika dodo anaa wosian afoforo ho wɔ santen mu anaa wodidi yɛn atɛm a, ebetumi asɔ yɛn gyidi ahwɛ aboro so. Anhwɛ a yebesuasua wɔn anaa yɛbɛyɛ bi atua wɔn ka, na yɛnam saayɛ so akɔyɛ sɛ wɔn wɔ wɔn pɛsɛmenkominya ahantan no mu.

Ɛtɔ da bi a nsɛm a yɛn ankasa nsusuw ho ɔkwampa so na ɛmma yennya boasetɔ. Hyɛ sɛnea onyansafo Ɔhene Salomo kyerɛɛ abusuabɔ a ɛda ahopere ne adwemmɔne ne boasetɔ a wonni ne abufuw ntam yi nsow: “Boasetɔ honhom ye sen ahomaso honhom. Mma wo honhom mmpere abohuru ho, na nkwasea kokom na abohuru te.” (Ɔsɛnkafo 7:8, 9) Sɛ yegye bere de hu asɛm bi ani so korakora ansa na yɛayɛ ho biribi a, ɛda adi sɛ yebenya ntease, mmɔborohunu, ne boasetɔ kɛse ama afoforo. Nanso, ahomaso ne ahopɛ honhom betumi ama yɛato yɛn adwene mu, de ahopere ayɛ ade, na yɛafa abufuw, te sɛ Israelfo anwiinwiifo a wɔsenee wɔn kɔn a wɔmaa Mose ho yeraw no no.—Numeri 20:2-5, 10.

Ade foforo nso a ama boasetɔ ho ayɛ na kɛse wɔ wiase ne ne tebea a anidaso nnim a efi ne ho a atwe afi Yehowa ho no. Dawid daa hia a ehia sɛ onipa nya Yehowa mu ahotoso adi sɛ: “Ampa, me kra, yɛ komm hwɛ Onyankopɔn ara, na ne nsam na minya nea m’ani da so.” (Dwom 62:5) Nnipa pii a wonnim Yehowa nni akwanhwɛ a edi mu a anidaso wom, enti wɔbɔ mmɔden sɛ wobenya anigyede ne mfaso a wobetumi anya nyinaa ansa na wɔn bere aso. Te sɛ wɔn honhom fam agya, Satan Ɔbonsam no, wɔntaa nnwen sɛnea wɔn nneyɛe no betumi apira afoforo no ho.—Yohane 8:44; 1 Yohane 5:19.

Ɛnyɛ nwonwa sɛ boasetɔ ho yɛ na saa nnɛ. Saa pɛsɛmenkominya nneɛma nhyehyɛe bɔne yi, ne nyame Satan, ne yɛn honam a ɛyɛ mmerɛw no sintɔ ahorow ma ɛyɛ den ma obiara sɛ obenya boasetɔ, a komapafo mpo ka ho. Nanso, Bible tu yɛn fo sɛ ‘yɛntɔ yɛn bo ase,’ titiriw ɛdefa Onyankopɔn atirimpɔw ahorow ho dwumadi ho. (Yakobo 5:8) Dɛn nti na boasetɔ som bo saa? Mfaso horow bɛn na ebetumi de abrɛ yɛn?

Boasetɔ—Nea Enti a Ɛsom Bo Saa

“Wɔn a wɔde boasetɔ twɛn nkutoo nso na ɛboa wɔn.” Engiresi kasa mu anwensɛm kyerɛwfo John Milton kaa saa nsɛm no bɛboro mfe ahasa a atwam ni wɔ n’anwensɛm “Ɛdefa N’anifurae Ho” mu. Ná wadi kan aka abasamtu ne ahoyeraw a onyae bere a na ɔte nka sɛ ontumi nsom Onyankopɔn yiye esiane n’ani a efurae bere a na ɔwɔ ne mfe 40 mu nti no ho asɛm wɔ anwensɛm no mu. Nanso sɛnea ɛdaa adi wɔ anwensɛm no mu asɛm a etwa to a yɛafa aka wɔ atifi hɔ mu no, obehui sɛ obi betumi asom Onyankopɔn denam ahohia ano a ɔde boasetɔ begyina, na wafi odwo mu ahwehwɛ hokwan a obetumi anya de asom so. Milton huu hia a ehia sɛ obi befi boasetɔ mu de ne ho ato Onyankopɔn so.

Ebia na yɛn mu dodow no ara hu ade yiye, nanso yɛn nyinaa wɔ sintɔ ahorow a ebetumi ama yɛn bo afuw anaa yɛn ho ayeraw yɛn. Yɛbɛyɛ dɛn atumi anya boasetɔ na yɛada no adi?

Nhwɛso Horow a Ɛhyɛ Nkuran

Bible ma yɛn boasetɔ ho nhwɛso pa pii. Yehowa boasetɔ nti, nnipa ɔpepem huhaa benya daa nkwa. (2 Petro 3:9, 15) Yesu nam ayamye mu a ofi to nsa frɛ yɛn sɛ yɛmfa ne kɔndua nto yɛn ho so na yɛanya “ɔhome ama [yɛn] kra” no so da n’Agya boasetɔ ho nhwɛso nwonwaso no bi adi. (Mateo 11:28-30) Yehowa ne Yesu nhwɛso a yebedwennwen ho no betumi aboa yɛn ma yɛanya boasetɔ kɛse.

Obi a ayɛ te sɛ na ɔwɔ biribi a obetumi agyina so ama ne bo afuw, ayi nitan adi, anaa watɔ were ne Yakob ba Yosef. Ne nuabarimanom ne no dii no ɔkwammɔne so bɔɔ pɔw sɛ wobekum no, na awiei koraa wɔtɔn no kɔɔ nkoasom mu. Bere a Yosef wɔ Misraim no, ɛmfa ho sɛ ofi ahonim pa mu de nokwaredi som Potifar no, wɔde asɛm too ne so de no too afiase. Ɔde boasetɔ gyinaa n’ahohia no nyinaa ano, na ɛbɛyɛ sɛ ɔtee ase sɛ sɔhwɛ a ɛtete saa no betumi adi Yehowa atirimpɔw ahorow ho dwuma. (Genesis 45:5) Esiane sɛ Yosef nyaa gyidi ne anidaso wɔ Yehowa mu na ɔde ahobrɛase ne ntease kaa ho nti, otumi tɔɔ ne bo ase wɔ sɔhwɛ tebea ahorow a emu yɛ den yiye mpo mu.

Ade foforo a ɛboa kɛse ne Yehowa honhom kronkron. Sɛ nhwɛso no, sɛ yɛn bo fuw ntɛmntɛm na yɛn ano yɛ yaw a, yebetumi abɔ mpae asrɛ honhom kronkron no mmoa na ama yɛatumi asow n’aba no. Su horow yi a ebi ne abodwokyɛre ne ahosodi, mu biara ho a yebedwennwen no bɛboa yɛn ma yɛahu sɛnea ɛne boasetɔ wɔ abusuabɔ kɛse.—Galatifo 5:22, 23.

Boasetɔ So Akatua

Boasetɔ a yebenya no betumi de mfaso pii abrɛ yɛn. Ɛma yɛn suban yɛ fɛ, na ɛma yɛkwati sɛ yɛde ahopere bedi nkwaseasɛm. Yɛn mu hena na onnii mfomso a ɛsɛe ade esiane sɛ yɛde ahopere yɛɛ ade wɔ tebea a emu yɛ den anaa nea ahoyeraw wom ho nti? Ebetumi aba sɛ yɛkaa asɛm bi a ɛnkyerɛ ayamye anaa yɛyɛɛ biribi a ɛmfa kwan mu. Ebia yɛmaa asɛm ketewa bi mu yɛɛ den kosii sɛ ɛde akameakame bɛtoo yɛne obi a yɛdɔ no paa ntam. Ebia bere a yɛn bo fuwii, yɛyɛɛ basaa, na yedii yaw pii akyi no, yɛde ahonu besusuw sɛ, ‘Anka metɔɔ me bo ase kakra a.’ Boasetɔ a yebenya no betumi ama yɛakwati awerɛhow pii. Saa nokwasɛm no nkutoo ma yenya asomdwoe, ahodwo, ne abotɔyam wɔ asetra mu.—Filipifo 4:5-7.

Boasetɔ a yebenya no betumi nso aboa yɛn ma yɛanya koma a edwo na ɛwɔ ahotoso. Eyi betumi ama yɛanya ɔhonam fam, nkate fam, ne honhom fam akwahosan pa. (Mmebusɛm 14:30) Sɛ wɔansiw abufuw ano a, ebetumi de nkate ne honam fam ɔyare a emu yɛ den ne owu aba. Nanso sɛ yenya boasetɔ a, yebetumi anya afoforo ho adwempa kɛse, titiriw yɛn honhom fam nuanom ne abusuafo. Ɛno bɛma yɛadwen afoforo ho kɛse aboa wɔn sen sɛ yɛn bo befuw wɔn ayɛ katee wɔ wɔn so. Ɛno nso bɛma ayɛ mmerɛw ne anigye kɛse ama afoforo sɛ wɔbɛbɛn yɛn.

Mpanyimfo a wɔwɔ Kristofo asafo no mu paa na ehia sɛ wɔda boasetɔ adi. Ɛtɔ da bi a, wɔn mfɛfo Kristofo de ɔhaw a emu yɛ den ba wɔn nkyɛn. Ebia na saa komapafo yi ayɛ basaa, wɔn bo afuw, anaa wɔanya adwenemhaw, na bere koro no ara nso ebetumi aba sɛ mpanyimfo no ara mpo abrɛ anaa wɔn ankasa haw anaa wɔn abusua de, agye wɔn adwene. Nanso, hwɛ sɛnea ɛho hia sɛ mpanyimfo no bɛda boasetɔ adi wɔ sɔhwɛ tebea a ɛtete saa mu! Saa kwan yi so no, wobetumi ‘de odwo’ akyerɛkyerɛ ‘nguankuw no ayɛ wɔn brɛbrɛ.’ (2 Timoteo 2:24, 25; Asomafo no Nnwuma 20:28, 29) Nnipa a wɔsom bo nkwa da asiane mu. Hwɛ sɛnea mpanyimfo a wɔwɔ ayamye, ɔdɔ, ne boasetɔ yɛ nhyira ma asafo no!

Ɛsɛ sɛ mmusua ti da boasetɔ, ntease, ne ayamye adi kyerɛ wɔn fiefo. Ɛsɛ sɛ wɔhwɛ kwan nso sɛ abusua no mufo nyinaa bɛda su horow yi ara adi na wɔhyɛ wɔn nkuran ma wɔyɛ saa. (Mateo 7:12) Eyi bɛma ɔdɔ ne asomdwoe kɛse aba fie hɔ.

Boasetɔ a Kristofo asomfo de bɛyɛ asɛnka adwuma no bɛboa wɔn ma wɔanya ɔsom adwuma yi mu anigye akosi ase. Ɛbɛma wɔatumi agyina anibiannaso ne ɔsɔretia biara a wohyia ano yiye. Sɛ́ anka wɔne ofiewuranom a wɔn bo afuw begye akyinnye no, asomfo a wɔwɔ boasetɔ betumi ama mmuae a odwo wom anaa wɔafi hɔ komm na asomdwoe ne anigye atra hɔ. (Mateo 10:12, 13) Bio nso, sɛ Kristofo ne obiara di wɔ boasetɔ ne ayamye mu a, ɛbɛtwetwe nnipa a wɔte sɛ nguan aba Ahenni asɛm no ho. Yehowa ahyira mmɔden a wɔde boasetɔ abɔ so wɔ wiase nyinaa bere a nnipa a wodwo ɔpehaha pii a wɔhwehwɛ nokware no puw ba Yehowa asafo a ɔdɔ wom no mu afe biara no.

Nokwarem no, boasetɔ a yɛbɛda no adi de mfaso pa bɛbrɛ yɛn. Yɛbɛkwati akwanhyia ne ɔhaw pii a ahopere anaa nsɛm a yɛntɔ yɛn bo ase nka de ba no. Yebenya anigye ne odwo kɛse, na ebia yɛanya akwahosan pa. Yebenya anigye ne asomdwoe kɛse wɔ yɛn som adwuma no mu, asafo no mu, ne fie. Nanso nea ɛsen biara no, yɛne Onyankopɔn benya abusuabɔ a emu yɛ den. Enti twɛn Yehowa. Da boasetɔ adi!

[Ase hɔ asɛm]

[Kratafa 10 mfonini ahorow]

Wotɔ wo bo ase dɛn wɔ da biara asetra mu?