Wubetumi Anya Anigye Ankasa Afi Asetra Mu

OBIARA pɛ sɛ n’ani gye wɔ asetra mu. Nnipa taa di nea wɔn kɔn dɔ yi ho dwuma denam anigyede ahorow a wɔde hyɛ bere a wɔde gye wɔn ani mu no so. Akyinnye biara nni ho sɛ ahomegye betumi de mfaso horow aba wɔ adwene ne nipadua mu.

Nanso nnansa yi mfe mu akatua pii a adwumayɛfo gye ne ahomegye bere pii a ɛwɔ hɔ no ama nkurɔfo pii aka eyi ho asɛm. Wɔnam osuahu so ahu sɛ ‘asetra pa a obi benya’ ntumi mfa ɔhaw horow ano aduru mma, na ɛmfa anigye nso mma.

Ɛnde, ɔkwan bɛn na nnipa betumi afa so anya anigye ankasa wɔ asetra mu? Ɛbɛyɛ nea mfaso wom sɛ yebesusuw ɔkekahwɛ anaasɛ sɔhwɛ bi a ‘Ɔhene Salomo, a ɔde boasetɔ pɛɛpɛɛ nea enti a nnipa pii di huammɔ wɔ anigye ankasa a wɔn nsa bɛka mu no yɛe no ho. Bere a Onyankopɔn honhom wɔ no so no, Salomo kyerɛw ne suahu ahorow no sɛnea ɔtee nsɛm ase fae no wɔ Ɔsɛnkafo nhoma no mu. ‘Wɔ anigye a ɔhwehwɛ denam nneɛma a ɛbɛma ne koma atɔ ne yam akyi a odii no ho no, ɔkyerɛwee sɛ:

“Mepɛee me komam sɛ mede nsã mɛhwɛ me honam, nso na merema nyansa akyerɛ me koma kwan, na maso nkwaseasɛm mu makosi sɛ mehu nea eye ma nnipa mma a wɔbɛyɛ ɔsoro ase, wɔn nkwa nna dodow. Memaa me nnwuma sosoe akɛse, misisii adan, meyɛɛ bobe nturo, meyɛɛ nturo ne mfikyifuw afɛfɛ, na metetɛw mu nnua a ɛsow aba ahorow nyinaa; meyeyɛɛ nsu atare, na mede mu nsu magugu kwae mu nnua a ɛrenyin no so; minyaa nkoa ne mfenaa, na ofie nnipa nso wɔ me; nso minyaa anantwi ne nguan akuwakuw sen wɔn a wodii me kan Yerusalem nyinaa; nso meboaa dwetɛ ne sika ne ahene ne nsase so ademude ano; misii mmarima ne mmea nnwontofo ne nnipa mma anigyede ne ɔyerenom bebree; na meyɛɛ kɛse mekɔɔ so mesen wɔn a wodii me kan Yerusalem nyinaa, na me nyansa nso wɔ me hɔ, na biribiara a m’aniwa hwehwɛe no, mankame no; mansiw me koma anigye biara ho kwan, na me koma ani gyei me brɛ no nyinaa mu, na eyi yɛɛ me brɛ no nyinaa mu kyɛfa.”​—Ɔsɛnk. 2:3-10.

Bible kyerɛwfo no tɔɔ ne bo ase pɛɛpɛɛ anigye nkate a ɛba fi nsã a ano yɛ den a wɔnom mu a nnipa pii di akyi nnɛ denam nnuru bɔne a wɔde di dwuma so no mu. Ɔboaboaa ahode pii ano na ɔde nneɛma a ɛyɛ fɛ a ɛte sɛ paradise twaa ne ho hyiae. Ɔpɛɛpɛɛ anigyede biara mu, na ɔhyehyɛɛ nnwontofo kuw a wɔto nnwom a ɛyɛ dɛ sen biara ne “ɔyerenom bebree.”

Bere a ɔrekyerɛ sɛnea ɔpɛɛpɛɛ nneɛma mu yiye fae no mu no, Salomo kyerɛwee sɛ: “Na medan m’ani sɛ merehwɛ nyansa no adammɔ no nkwaseasɛm, na dɛn na onipa a ɔbɛba ɔhene akyi no bɛyɛ? Nea wɔayɛ no tete nteredee!” (Ɔsɛnk. 2:12) Asɛntitiriw no ne sɛ: Salomo apɛɛpɛɛ nneɛma mu akosi ase, efisɛ sɛ́ ɔhene no, ɔwɔ bere a ɛdɔɔso ne nea obegyina so de ayɛ. “Dɛn na onipa a ɔbɛba ɔhene akyi no” a onni nneɛma a ɛdɔɔso te sɛ ɔhene no “bɛyɛ?” Onipahunu biara betumi ayɛ biribi kakraa bi, nea afoforo ayɛ dedaw no. Ɔhene no betumi ama obi a ogye di yiye sɛ obetumi afa nneɛma a ɛbɛma obi koma atɔ ne yam so anya anigye ankasa no mmuae sɛ: ‘Mayɛ eyinom dedaw, na mfaso biara nni mu.’

Ɛho hia yiye sɛ wɔhyɛ no nsow sɛ Salomo anka sɛ anigyede akyidi nyinaa yɛ bere sɛe. Nea ɛne eyi bɔ abira no, ɔpenee so sɛ onyaa anigye fii nea ɔyɛe no mu. (“me koma ani gyei mo brɛ no nyinaa mu, na eyi yɛɛ me brɛ no nyinaa mu kyɛfa”) . Nanso gyinae bɛn na osii wɔ daa anigye a obenya afi nsã, adedodow, anigyede ne nneɛma a ɛtete saa no mu no ho? Ɔmaa mmuae tee: “Ɛna medan m’ani mehwɛɛ me nnwuma a me nsa yɛe no nyinaa ne me brɛ a mebrɛ meyɛe no, na hwɛ, ne nyinaa yɛ ahuhude ne ɔdadwen hunu, na mfaso bi nni mu owia ase.”​—Ɔsɛnk. 2:11.

Ɛnsɛ sɛ wobu nea ohui yi sɛ okura adwene a ɛnteɛ. Mmom, ɛyɛ nea nyansa wom na ɛbɛboa nnipa nkorɛnkorɛ ma wɔakwati mfe pii a wɔbɛsɛe no de adi anigyede a wɔn nsa renka no akyi. Wɔ ɔkwan foforo so no, saa Bible kyerɛwfo koro yi ara de afotu pa ma wɔ ɔkwan a obi bɛfa so anya anigye ankasa wɔ asetra mu no mu. Nneɛma a akamfo kyerɛ no mu binom ne adwuma ne anigyede a wɔbɛma akari pɛ.

Yɛ Adwuma Denneennen, Nanso “Hu Adepa”

Bere a ɔkyerɛkyerɛ sɛnea anigyede a wobesi so dua dodo no yɛ “ɔdadwen hunu, na mfaso ‘bi nni mu owia ase” no mu no, Bible kyerɛwfo nyansafo no kɔɔ so kae sɛ: “Biribi pa bi nni ho mma onipa sɛ obedidi na wanom na wama ne kra ahu adepa ne brɛ no mu; eyi nso mahu sɛ Onyankopɔn nsam na efi: na hena na odidi, na hena na onya biribi sen me?” (Ɔsɛnk. 2:11, 24, 26) Ɛda adi sɛ Bible no kamfo adwumaden kyerɛ. “Ɔkwasea pompono ne nsa te hɔ [ɔmpɛ sɛ ɔyɛ adwuma], na odi n’ankasa ne honam.”(Ɔsɛnk. 4:5) Nanso ɛho hia sɛ woma adwumaden ne “adepa” a wobenya no kari pɛ, ama obi anya ne brɛ mu anigye. Ɔkyerɛwfo a honhom ka no no kae sɛ, “nsa ma ne ɔhome ye sen nsa abien amaama ne ɔbrɛ ne ɔdadwen hunu.”​—Ɔsɛnk. 4:6.

Ɛda adi sɛ wunim nnipa a wɔde nnɔnhwere pii yɛ adwuma boro so dapɛn biara anaasɛ wɔyɛ nnwuma horow abien bere koro no ara mu. Bere a na ebia eyi ho hia wɔ asɛnhia bi nti, anaasɛ wɔ ɛka bi a ɛda hɔ a ɛsɛ sɛ wɔyɛ adwuma de tua nti no, pii wɔ hɔ a nnɔnhwere a, wɔde yɛ adwuma no dɔɔso dodo na ɛnsɛ sɛ wɔyɛ saa. Sɛ ebetumi ayɛ yiye a, Bible no hyɛ nkuran sɛ “nsa ma ne ɔhome ye” na eyi na ɛsɛ sɛ wode hyɛ w’asetra mu. Nya bere na fa nya aduan a wudi ne nsã a wo nom mu anigye na wo ne wɔn a wodɔ wɔn no nso mmɔ nkɔmmɔ pa. Wɔakyerɛkyerɛ eyi mu fɛfɛɛfɛ wɔ nsɛm a edidi so yi mu:

“Kɔ na fa anigye kodi w’aduan, na fa koma pa nom wo nsa, na Onyankopɔn ani asɔ wo nneyɛe dedaw. Ma wo ntade nhoa bere nyinaa mu, na mma ngo mmpa wo tiri so. Wo ne wo yere a wodɔ no ntra ase nni wo nkwa huhuw nna a wɔde ama wo wɔ wiase no nyinaa, w’ahuhude nna nyinaa, na ɛne wo kyɛfa nkwa yi mu ne wo brɛ a worebrɛ owia ase no mu.”​—Ɔsɛnk. 9:7-9.

Nea ɛbɛn eyi nso ne asuade foforo bi a ɛwɔ Ɔsɛnkafo nhoma no mu no.

Mmu W’ani Ngu Mprempren Asetra Yi So

Adwene mu tumi a yɛwɔ a yetumi de susuw bere a atwam no ho na afei yɛyɛ nhyehyɛe ma daakye no yɛ Onyankopɔn akyɛde ma adesamma Nea ɛma daakye yɛ anigye kɛse yiye ne Kyerɛwnsɛm mu awerɛhyem a ɛde ma a ɛfa nneɛma nhyehyɛe foforo a ɛyɛ ‘ɔsoro foforo ne asase foforo a trenee te mu’ no ho no. (2 Pet. 3:13; Adi. 21:1-5) Eye koraa sɛ yɛbɛhwɛ nhyira horow a ɛte sɛɛ kwan.

Ebia woahyɛ no nsow sɛ nnipa taa susuw nea atwam no ne daakye ho yiye, na ɛma wobu wɔn ani gu mprempren so. Sɛ́ obi de bɛyɛ ne su sɛ obesusu ‘tete mmere pa no ho’ no kanyan abufuw wɔ obi mu wɔ sɛnea nneɛma te mprempren no ho. Bible no bɔ kɔkɔ tia eyi sɛ: “Nka sɛ: ɛdɛn na kan nna no ye sen eyinom yi, na ɛnyɛ nyansa so na wubisa eyi ase.” (Ɔsɛnk. 7:10) Saa ara nso na ɛyɛ nea nyansa nnim sɛ obi de n’anidaso nyinaa ma anigye bɛto daakye so.

Anigye ankasa a obi benya afi asetra mu no hwehwɛ sɛ obi besusuw mprempren ho yiye. Salomo kaa no sɛɛ: “Efanim aniwa adehu mmom sen ɔkra kyini. Eyi nso yɛ ahuhude ne ɔdadwen hunu.” (Ɔsɛnk. 6:9) Wɔn a wɔyɛ adefo a wɔwɔ honam fam nneɛma a wɔn kɔn dɔ no nyinaa hu wɔ wɔn ankasa mu sɛ ɔkra no wɔ nneɛma bi a ɛhwehwɛ a honam fam adedodow rentumi mfa mma no. Akɔnnɔ horow bi a obi hwehwɛ a ne nsa ntumi nka a ‘ɛma okyini’ no ma nnipa kɔ so hwehwɛ tebea horow a ɛsakra. Ɛwom sɛ nsakrae a ɛba wɔ obi adwuma a ɔyɛ no daa mu no de mfaso bɛba de, nanso ebinom yɛ tra so, na wɔsakra wɔn atrae ne wɔn adwuma wɔ bere ne bere mu a wofi ade biako so kɔ foforo so a nea wɔhwehwɛ ara ne anigye. Sɛnea Kyerɛwnsɛm no kyerɛ no “ɛfanim aniwa adehu mmom.” Ɔkwan a ɛyɛ nyansakwan ankasa ne sɛ onii ko no koma bɛtɔ ne yam na n’ani agye wɔ nea ohu mprempren no ho, ‘a ɛne sɛ, nea ɔwɔ mprempren no. Ɛbɛyɛ nea mfaso wom sɛ wɔ oyi mu no yebesusuw nea nnipa baanu bi kae a ɛfa ɔkwan a wɔbɛfa so anya anigye wɔ asetra mu no ho.

“Ɛyɛ Mprempren Yi na Ɛyɛ Yɛn De”

McCall nsɛmma nhoma (May 1978) kyerɛw osuahu bi faa ɔbea bi a bere a wayɛn ne mma awie na wɔafi fie kɔ no ofii kurow kɛse a ɔte mu no mu kɔtraa akyirikyiri akuraa bi a woyi nam wɔ hɔ no ase. Ɔbea no kyerɛwee sɛ:

“Biribiara nni nhyehyɛe a yɛte mu no mu a ɛkyerɛ yɛn sɛnea yɛbɛtra ase mprempren; biribiara a ɛwɔ nhyehyɛe a yɛte mu no mu no aka yɛn ahyɛ mu. Ennu sɛ yemfi ase nkɔ sukuu no na yɛn awofo ne yɛn akyerɛkyerɛfo afi ase ka sɛ, Dɛn bio? Munsiesie mo ho! Yɛhyɛn ntoaso sukuu na nhyɛso no kɔ anim: Dɛn bio? Wosiesie yɛn ma yefi ase susuw daakye ho, na yɛde di dwuma wɔ baabiara; adan yɛn nsusuwii no fa. Yɛhwɛ daakye kwan sɛ yebedu baabi​—baabiara, a nea ɛte mfa ho. Yɛhwɛ da soronko a yebehu nkunyaa ‘ade’ a ɛbɛma yɛn koma atɔ yɛn yam wɔ asetra mu no, ne afei afe a ɛreba akwamma bere no, anaasɛ nea yɛbɛyɛ bere a yɛn ba anyin anaasɛ yɛagyae adwumayɛ esiane onyin nti. Yɛn adwenem nyinaa ayɛ yɛn hoo a yennim nea ɛbɛba, na sɛ daakye no ba na sɛ ɛbɛfa nkonyaayi so asa yɛn yare asakra yɛn a, nea yehu ne sɛ nsonsonee biara nni ɛno ne nnɛ mu.

“Ebetumi aba saa​—na ɛsɛ sɛ ɛba saa​—na yɛatumi anya asetra ho adwene foforo na yɛatumi de anigye atra ase na yɛn ani ada yɛn ho so, na yɛama da biara da asetra ayɛ nea yɛn koma bɛtɔ yɛn yam wɔ ho. Yebu yɛn ani gu nneɛma ahorow so sɛ ɛnyɛ hwee, yɛn ani wɔ ɔkyena so, nanso ɛyɛ mprempren de yi na ɛyɛ yɛn de na hokwan ahorow pii wom a ɛsɛ sɛ yeso mu, na ɛnyɛ daakye, a ennya mmae no. Bere a yɛde yɛn ho hyɛ tebea bi mu na yɛtra mu a yɛn ani da yɛn ho so wɔ mu no so nkutoo na yɛfa nya anigye wɔ asetra mu.”

“Yiyedi Yɛ Akwantu”

Simma aduanan anum a Dr. Wayne W. Dyer de susuw nsɛm ho no ma ɔde asɛm no baa awiei wɔ bɛn koro no ara mu. Dyer kyerɛw wɔ ne nhoma Pulling Your Own Strings no mu sɛ:

“M’asetra mu nsakrae bere akɛse no mu biako bae bere a mede simma aduanan anum hwɛɛ asa bi a wɔresua ade wɔ hɔ no so sɛ ɔkyerɛkyerɛfo a ɔresi obi ananmu no. Nea wɔakyerɛw wɔ kaseɛbɔ pon a ɛwɔ saa asa no so no akyi no kenkan sɛ, ‘Yiyedi yɛ akwantu, na ɛnyɛ beae a obi rekɔ akodu.’

“Mede simma aduanan anum suaa saa nsɛm no ma ɛkɔɔ me nipadua mu ankasa. De besi saa da no na wɔ nokwarem no misusuw asetra ho sɛ beae a onipa tumi kodu ne nsɛm a esisi wɔ obi asetra mu. Sukuu a wowie, abodin nkrataa a wonya, ayeyi nkrataa ahorow, aware, awo, nkɔanim wɔ adwumayɛ mu ne nneɛma horow a esisi wɔ asetra mu no nyinaa yɛ beae a onipa tumi kodu, na nea meyɛ ne sɛ mifi biako so kɔ foforo so.

“Misii me bo amonom hɔ ara wɔ saa ɔdan no mu sɛ megyae nea mitumi yɛ a misusuw sɛ ɛno na ɛde anigye ba a misusuw ho bere biara no, na mmom mahwɛ m’asetra nyinaa sɛ akwantu a ɛkɔ so bere nyinaa, a emu biara de anigye brɛ me. Saa asa a wosua ade wɔ hɔ no de asuade kɛse maa ɔkyerɛkyerɛfo yi ma ɛkaa n’asetra nyinaa a ne werɛ remfi da: Mfa nea woatumi ayɛ wɔ w’asetra mu, sɛ́ esua anaasɛ ɛsõ no nnto w’asetra ho. Sɛ woyɛ saa a wubedi huammɔ, efisɛ wobɛkɔ so ahwehwɛ nneɛma horow bere nyinaa. Biribiara a woatumi ayɛ no ma wufi ase yɛ nhyehyɛe ma mmɔdenbɔ foforo na woatumi agyina ɛno so ahwɛ sɛnea woanya anigye afa.

“Mmom, sɛ wosɔre a, ma w’ani nsɔ biribiara a wuhyia wɔ w’asetra mu no. Nya nhwiren afɛfɛ a wuhu no ho anigye. Ma w’ani so hwɛ owia a apue, mmofra nketewaa ne wɔn serew, osu a ɛtɔ ne nnomaa. Nya eyinom nyinaa ho anigye kyɛn sɛ wode w’ani bɛto daakye bi a ɛhɔ na wo koma bɛtɔ wo yam wɔ hɔ no so. Wɔ nokwarem no, yiyedi ​—asetra ankasa mpo​—nyɛ biribiara sɛ anigye bere a ɛba mmiako mmiako. Sɛ wote saa nnyinasosɛm yi ase a, ɛnde woremfa w’anigye no nto nea woatumi ayɛ so na mmom wobɛhwɛ asetra nyinaa sɛ biribi a w’ani betumi agye ho. Anaasɛ, sɛ yɛbɛka ne nyinaa abom a, ɔkwan biara nni hɔ a wɔfa so nya anigye, efisɛ anigye ne ɔkwan no.”

Sɛnea “Onyankopɔn Som Pa Ahofama” Ho Hia

SƐ́ obi besi ne bo na wammu n’ani angu mprempren nhyira horow no so no yɛ nea ɛbɛma asetra ayɛ nea anigye wom ankasa. Nanso ansa na obi benya nea eye sen biara afi asetra mu no hwehwɛ biribi foforo bio. Ɔkwan bɛn so?

Ɔsomafo Paulo kyerɛkyerɛɛ eyi mu, sɛ: “Nso Onyankopɔn som pa ahofama a ɔpene wɔ mu yɛ adenya kɛse mmom.” (1 Tim. 6:6, NW) Su a ehia ne “Onyankopɔn som pa ahofama” a ɛfa asetra a ɛma obi de ɔsom ma Ɔbɔadeɛ no ho. Wohu eyi sɛ biribi a ɛyɛ ade a ɔyɛ ma ne yɔnko nipa wɔ ɔkwan a Onyankopɔn pɛ so. Ɛsɛ sɛ obi a ɔpɛ sɛ ɔtra ase wɔ Onyankopɔn som pa ahofama mu no gye bere na ɔde asua Bible no yiye, efisɛ ɛno na ɛbɛboa no na wasua ahu suban a Onyankopɔn pɛ.

Sɛ́ obi besua na watra ase wɔ ɔkwan a ɛne Onyankopɔn apɛde behyia so no yɛ adenya kɛse. Ɔkwan a ɛte sɛɛ de obi kɔ daakye asetra mu wɔ nhyehyɛe foforo no mu, faako a “owu nni hɔ bio, na awerɛhow ne osu ne ɛyaw nni hɔ bio. Efisɛ kan nneɛma no atwam” no mu.​—Adi. 21:4.

Wɔ mprempren de, nea efi Bible mu nnyinasosɛm a obi de tra ase no mu ba ne Onyankopɔn anim dom a onya ne afei nso ayɔnkobɔ pa a ɛbɛda ɔne ne mfɛfo nnipa ntam. Sɛ obi yi ayamhyehye, ayamye, odwo, boasetɔ ne papayɛ a ɛhyɛ Kristoni no “nipa foforo” no agyirae adi a, ɛma nnipa sua na wɔyɛ saa ara na ɛma wɔn a eyi fa wɔn ho no nyinaa asetra yɛ nea anigye wom.​—Luka 6:38; Kol. 3:10-14.

Ɛnyɛ anigyede akyi a wodi pii no na ɛde anigye ankasa ba. Bible no hyɛ adwumaden ne “nsa ma ne ɔhome” ho nkuran da biara da sɛ ɛno na obi betumi afa so anya no brɛ mu anigye. Nea ɛka ho bio no, Kyerɛwnsɛm no si sɛnea ɛho hia sɛ yesua Onyankopɔn ho nokware na yɛtra ase ma ɛne Bible mu nnyinasosɛm ahyia no so dua.

Salomo kae sɛ, “asɛm no awiei ne nea yɛate nyinaa ne sɛ: Suro Onyankopɔn, na di ne mmara nsɛm so. Na eyi ne nnipa nyinaa asɛde.” (Ɔsɛnk. 12:13) So wubedi saa asɛde no ho dwuma na woatra ase ma ɛne eyi ahyia denam w’asetra a wobɛma Bible no akyerɛ no kwan so anaa? Sɛ woyɛ saa a wubenya adwene mu asomdwoe ne akomatɔyam. Ɛno nkutoo ne ɔkwan a wobɛfa so anya anigye ankasa a ɛtra hɔ daa wɔ asetra mu.