Obiara Hia Anidaso

“ANIDASO wɔ onipa mu daa.” Saa na Engiresi anwensɛm kyerɛwfo Alexander Pope kae wɔ “Onipa Ho Nsɛm” a ɔkyerɛwee no mu. Mfe mpem abien ansa na ɔreyɛ eyi no, Helani anwensɛm kyerɛwfo Theocritus kaa no sɛ: “Anidaso wɔ hɔ bere tenten a obi te ase no.” Na nea akyɛ sen saa koraa no, Yudani nyansafo Salomo kyerɛwee sɛ: “Ateasefo nyinaa nkyɛn na anidaso wɔ.”​—Ɔsɛnk. 9:4

Yiw, nnipa ahorow nyinaa ahia anidaso bere nyinaa. Nnɛ, ninipa ɔpepem pii wɔ hɔ a wɔka sɛ anidaso a ɛwɔ hɔ ara ne sɛ wiase yi bɛyɛ yiye denam Komunism so. Wogye di sɛ amammui mu nsakrae horow de ahotɔ bɛbrɛ ɔmamfo. Wɔtwe adwene si Franse Komunistni bi a wokum no, Gabriel Péri, asɛm a ɔkae so sɛ, aseda nka Komunism, awo ntoatoaso a ɛbɛba da bi no benya “daakye a anigye wom.” Ampa, nnipa pii ahu huammɔ a nniso horow a adi Marxist nnyinasosɛm ahorow akyi adi no na ama wɔayɛ basaa. Nanso, Komunism da so ara yɛ adesamma ɔpepem pii a wɔhwehwɛ atɛntrenee wiase no “anidaso.”

Koran no ma Nkramofo ɔpepem ahanum nya anigye a enni awiei wɔ paradise bi a wɔfrɛ no “Turo,” baabi a wɔn a wɔahyira wɔn no nya ahotɔ wɔ wɔn nipadua horow a wɔanyan no mu no ho anidaso. Nkramofo pii mpo wɔ anidaso sɛ mfirihyia apem a asomdwoe wom bɛba asase so ansa ɛna Atemmu Da no aba. Wɔbɛtow wɔn a Allah pow wɔn no agu “Beae a Ɛhɔ Yɛ Hyew No” ma wɔayɛ wɔn ayayade daa a enni awiei.

Hindufo ɛne Budhafo ɔpepehaha no anidaso ne sɛ wobedu Nirvana. Hindufo fam no, eyi gyina hɔ ma nkwa gyaframa a “edum” denam Brahma anaasɛ amansan nyinaa ɔkra a ɛnyɛ obiakofo de mu a wɔhyɛn so. Budhafo fam no, Nirvana yɛ “pɛyɛ tebea a nhyira wom a obi nya denam ne nkutoo asetra a ɛba awiei ne ne kra a wɔtwe kɔ honhom a, ɛkorɔn sen biara de no mu no so.”

Afei wɔ ninipa ɔpepehaha a wɔkyerɛ sɛ wɔyɛ Kristofo fam no, wɔkyerɛ sɛ anidaso yɛ “nyamesom mu su horow a ɛho hia” a gyidi ne ɔdɔ ka ho no mu biako. Su pa abiɛsa yi ho no, M’clintock nie Strong Cyclopaedia se: “Gyidi ne ne ntini, ɔdɔ ne dua a ɛsow aba no, na anidaso ne dua a ɛyɛ Kristofo asetra no atifi a edu soro no.”

Ɛregye nea Protestant nhoma yi a ɛka sɛ Kristoman asɔre horow no mufo anidaso kyerɛ ɔsoro a wɔbɛkɔ no atom no, The Catholic Encyclopedia ka wɔ “anidaso” ase sɛ: “Wɔkyerɛ [anidaso] ase sɛ Onyankopɔn su a ɛma yɛde ahotoso hwɛ kwan sɛ, ɛdenam Onyankopɔn mmoa so no yebenya ahotɔ a enni awiei . . . Eyinom nyinaa yɛ nea ntease wɔ mu, sɛ yɛkae sɛ nhyehyɛe bi a ɛsen ɔdesani de wɔ hɔ, ade a yebu ani gu so, ne sɛ onipa daakye yiyedi wɔ Onyankopɔn nsiesiei a ɛwɔ hɔ mprempren yi mu no gyina saa nhyehyɛe no so. . . . botae titiriw a anidaso wɔ ne sɛ ɛne Onyankopɔn bɛpɛ biako wɔ ɔsoro.” (Yɛn na yɛde nkyerɛwee soronko akyerɛw afã horow yi)

Enti Katolekfo ne Protestantfo dodow no ara fam no, anidaso koro pɛ a wɔde asi wɔn anim ne “daa ahotɔ wɔ ɔsoro.” Sɛ ɛno anyɛ yiye a, na anidaso foforo biara nni hɔ. A Catholic Dictionary se: “Wɔn a wobu wɔn fɔ kɔ hell no nni anidaso, efisɛ wɔrentumi nhwɛ ogye kwan.” Kɔkɔbɔsɛm a Dante susuwii sɛ wɔakyerɛw agu hell pon kɛse no ano no kenkan sɛ: “Anidaso biara nni hɔ mma mo a moba ha.”

Nanso nea ɛwɔ hɔ ma wɔn a wogye Onyankopɔn ne Kristo di ne sɛ “daa ahotɔ” wɔ ɔsoro anaasɛ wobenya daa asotwe a anidaso biara nni mu wɔ “hell” anaa? Esiane sɛ Kristosom gyina Bible no so titiriw nti, ɔkwan bɛn so na Kyerɛwnsɛm kyerɛkyerɛ Kristofo anidaso ne asotwe a ɛwɔ hɔ no mu?

Bio nso, esiane sɛ ɛda adi pefee sɛ “ɔsoro asetra a anigye wom” a Kristoman mu asɔre horow no kyerɛ sɛ ɛne anidaso koro a ɛwɔ hɔ no nyɛ nea etumi twetwe nnipa ɔpepem pii a wɔn ani gye Komunism ho no nti, so ebetumi aba sɛ Bible ma nnipa a wɔte saa yi nya anidaso a wɔte nka sɛ ɛwɔ Komunism mu no, a ɛne, wiase a “nnipa nyinaa yɛ pɛ wɔ asetra nhyehyɛe ne sikasɛm mu, wɔ ɔman a mpaapaemu biara nni mu mu”​—a ɛnyɛ bere tiaa bi mu, na mmom daa nyinaa​—no anaa?

So ebetumi aba sɛ Bible no de anidaso bi ma Nkramofo ɔpepem pii no a ɛte sɛ paradise “Turo” a Koran de ma wɔn no, a asiane a ɛwɔ hɔ sɛ wɔbɛkɔ akowie “Baabi a Ɛhɔ Yɛ Hyew” nka ho anaa?

Na nnipa ɔpepehaha a wɔwɔ Apueifam nyamesom ahorow mu a wɔakyerɛkyerɛ wɔn sɛ honam mu asetra biara nkyerɛ amanehunu, a ɛno nti wɔn fam no, nkwa wɔ asase so yɛ bɔne no nso ɛ? So nnipa a wɔte sɛɛ yi bɛkyerɛ sɛ wɔtwe wɔn ho fi wɔn ankasa asetra wɔ Nirvana no ho, sɛ wɔn ankasa betumi ahu sɛ nkwa wɔ asase so kyerɛ amanehunu bere sɛnea wɔahu no anaa? So Bible no rentumi nsakra wɔn adwene wɔ asetra ho na ɛmma wɔn anidaso a ɛne nea adesamma a wonim nyansa hwehwɛ no hyia anaa?

Bere a asemmisa yi wɔ yɛn adwene mu no, momma yɛnhwehwɛ Bible no ne nyamesom abakɔsɛm mu nhwɛ sɛ anidaso koro pɛ a wɔde ma adesamma ne “ɔsoro a wɔbɛkɔ.” Na, esiane sɛ Bible kyerɛ sɛ wɔde anidaso bi maa adesamma mpo ansa na wɔde Kristosom resi hɔ nti, momma yenni kan nkɔhwɛ anidaso a na tete Yudafo no wɔ.