Ɔsoro Nyansa—Ɔkwan Bɛn So na Wɔda no Adi?

“WOBU ohiani nyansa animtiaa, na ne nsɛm no, wɔnte.” Ɔhene Salomo nyansafo no kaa saa asɛm yi faa ɔbarima hiani nyansafo bi a ogyee kurow mũ fii ɔsɛe mu no ho. Nanso awerɛhosɛm ne sɛ, “obiara ankae onipa hiani no.”—Ɔsɛnkafo 9:14-16.

Nnipa taa bu ahiafo animtiaa, ɛmfa ho mpo sɛ ahiafo a wɔte saa no atumi ayɛ biribi a ɛsom bo no. Ná eyi te saa wɔ Yesu asɛm no mu. Yesaia hyɛɛ ne ho nkɔm sɛ: “Wobuu no animtiaa, na nnipa paa no, ɔyɛ onipa a ohuu ayayade na onim yare, na wobuu no animtiaa sɛ obi a nnipa yi wɔn ani hintaw no, na yɛammu no hwee.” (Yesaia 53:3) Ebinom buu Yesu animtiaa esiane sɛ na onni gyinabea anaa anuonyam a na akannifo a wɔwɔ ne bere so no wɔ no bi nti. Nanso na ɔwɔ nyansa a ɛsen nnipa abɔnefo no biara de. Nkurɔfo a na wɔwɔ Yesu kurom no annye anni sɛ, “duadwumfo no ba” no na ɔdaa nyansa a ɛte saa adi na ɔyɛɛ anwonwade a ɛte saa no. Nanso na ɛno yɛ mfomso a ɛyɛ hu kɛse, efisɛ asɛm no kɔ so ka sɛ ‘wɔn gye a wonnye nni nti, Yesu anyɛ ahoɔdenne pii wɔ hɔ.’ Hwɛ sɛnea saa nkurɔfo no hweree ade!—Mateo 13:54-58.

Mommma yennni mfomso koro no ara bi. Yesu kae sɛ, “nyansa nam ne nnwuma so di bem.” Ɛnyɛ asetram gyinabea anaa dibea na ɛma wɔn a wɔreyɛ Onyankopɔn adwuma na wɔka ɔsoro nyansa kyerɛ no da nsow, na mmom “aba pa” a wɔsow—wɔn gyidi ne nnwuma a egyina Bible so no.—Mateo 7:18-20; 11:19.