“Onipa Asɛde Nyinaa”
“Suro Onyankopɔn, na di ne mmara nsɛm so. Na eyi ne onipa asɛde nyinaa.”—ƆSƐNKAFO 12:13, NW.
1, 2. Dɛn nti na ɛfata sɛ yesusuw yɛn asɛde a yɛwɔ wɔ Onyankopɔn anim no ho?
‘DƐN na Yehowa hwehwɛ wo hɔ?’ Tete diyifo bi na obisaa saa asɛm no. Afei osii nea Yehowa hwehwɛ so dua—adetreneeyɛ, adɔepɛ, ne ahobrɛase a wode ne wo Nyankopɔn bɛnantew.—Mika 6:8.
2 Ɛnnɛ yi a obiara yɛ nea ɔpɛ na ɔmpɛ sɛ ɔdan obi no, nnipa pii ani nnye adwene a ɛne sɛ Onyankopɔn hwehwɛ biribi fi wɔn hɔ no ho. Wɔmpɛ sɛ obi bɛhyɛ wɔn so. Nanso asɛm bɛn na Salomo ka de wiee Ɔsɛnkafo nhoma no? “Asɛm no awiei, ne nea yɛate nyinaa ne sɛ: Suro Onyankopɔn, na di ne mmara nsɛm so. Na eyi ne onipa asɛde nyinaa.”—Ɔsɛnkafo 12:13, NW.
3. Dɛn nti na ɛsɛ sɛ yesusuw Ɔsɛnkafo nhoma no ho anibere so?
3 Ɛmfa ho tebea biara a yɛwom ne asetra ho adwene biara a yekura no, sɛ yesusuw nea enti a ɔkaa saa asɛm no ho a, yebetumi anya mu mfaso kɛse. Ɔhene Salomo a ɔkyerɛwee nhoma a efi honhom mu yi no susuw nneɛma titiriw bi a ɛyɛ yɛn da biara da asetra no fã ho. Ebia ebinom de ahopere bɛka sɛ ne nhwehwɛmu no nteɛ. Nanso efi honhom mu, na ebetumi aboa yɛn ma yɛasusuw yɛn dwumadi ne yɛn ahiade ahorow ho, na ama yɛanya anigye pii.
Asetram Ahiade Atitiriw Ho Dwuma a Wubedi
4. Dɛn na Salomo hwehwɛɛ mu na ɔkaa ho asɛm wɔ Ɔsɛnkafo nhoma no mu?
4 Salomo yɛɛ ‘onipa mma dwumadi’ mu nhwehwɛmu kɔɔ akyiri. “Mede me koma memae sɛ mede nyansa merebisa na mahwehwɛ nneɛma a wɔyɛ no ɔsoro ase nyinaa mu.” ‘Dwumadi’ a Salomo kaa ho asɛm no nkyerɛ adwuma ankasa, na mmom biribiara a egye mmarima ne mmea bere wɔ wɔn asetram nyinaa. (Ɔsɛnkafo 1:13) Ma yensusuw nneɛma atitiriw bi, anaa dwumadi ahorow no ho, na afei yɛmfa ntoto yɛn ankasa dwumadi ne yɛn ahiade ahorow ho.
5. Nneɛma atitiriw a egye nnipa adwene no biako ne dɛn?
5 Nokwarem no, sika na wɔde di onipa ahiade ne dwumadi pii ho dwuma. Obiara rentumi nka no nokwarem sɛ na Salomo wɔ sika ho adwene a ɛnteɛ sɛnea asikafo bi wɔ no. Ogyee hia a sika ho hia no toom ntɛm ara; sika kakra a wubenya no ye sen sɛ wobɛtra ahokyere mu anaa wubedi hia. (Ɔsɛnkafo 7:11, 12) Nanso ebia woahu sɛ sika, ne nneɛma a ɛtɔ no, betumi abɛyɛ asetram botae titiriw—ama ahiafo ne asikafo nyinaa.
6. Dɛn na yebetumi asua afa sika ho wɔ Yesu mfatoho ahorow no mu biako ne Salomo ankasa suahu mu?
6 Kae Yesu bɛ a ɛfa osikani no a sika ammee no da, na ɔyɛɛ adwuma de pɛɛ nneɛma pii ho no. Onyankopɔn buu no obi a onnim nyansa. Dɛn ntia? Efisɛ ‘ɛnyɛ nneɛma a yɛanya mu na yɛn nkwa wɔ.’ (Luka 12:15-21) Salomo suahu—a ebia ɛkɔ akyiri sen yɛn de—no si Yesu nsɛm no so dua. Kenkan asɛm no wɔ Ɔsɛnkafo 2:4-9. Salomo de bere bi hwehwɛɛ ahonyade. Osisii afie fɛfɛ yeyɛɛ nturo. Otumi waree mmea a wɔn ho yɛ fɛ. So ahonyade ne nea ɛma otumi yɛe no ma onyaa abotɔyam kɛse, ma ɔtee nka sɛ wayɛ nneɛma pa bi, na ɛma ohuu asetra so mfaso? Obuae akokoduru so sɛ: “Ɛnna medan m’ani mehwɛɛ me nnwuma a me nsa yɛe no nyinaa ne me brɛ a mebrɛ meyɛe no, na hwɛ, ne nyinaa yɛ ahuhude ne ɔdadwen hunu, na mfaso bi nni mu owia ase.”—Ɔsɛnkafo 2:11; 4:8.
7. (a) Dɛn na osuahu da no adi wɔ bo a sika som ho? (b) Dɛn na w’ankasa woahu a edi nea Salomo kae no ho adanse?
7 Ɛno yɛ nokware, nokwasɛm a ɛda adi wɔ nnipa pii asetra mu. Ɛsɛ sɛ yegye tom sɛ sika pii a yebenya nni ɔhaw nyinaa ho dwuma. Ebetumi adi ebi ho dwuma, te sɛ aduan ne ntade a ɛbɛma ayɛ mmerɛw sɛ yebenya. Nanso atade koro pɛ na obi betumi ahyɛ bere bi, na wadi aduan anom nsa kakra bi. Na woakenkan asikafo a awaregyae, asabow anaa nnubɔnenom, ne abusua mu ntɔkwa ayɛ wɔn asetra ma ho asɛm. J. P. Getty a onni sika na no kae sɛ: “Sika ne anigye nhyɛ da nni abusuabɔ biara. Ebia ɛne awerɛhow na ɛnam.” Wɔ ntease pa mu no, Salomo kaa sikanibere ho asɛm sɛ ahuhude. Fa saa nokwasɛm no toto nea Salomo hui no ho: “Odwumayɛfo didi kakraa oo, pii oo, ne nna yɛ no dɛ, na ɔmee a ɔdefo mee no mma onnya adaye.”—Ɔsɛnkafo 5:10-12.
8. Ntease bɛn nti na ɛnsɛ sɛ yebu sika sɛ ɛho hia dodo?
8 Sika ne ahonyade nso mma obi nnya daakye ho anigye bi. Sɛ wowɔ sika ne ahonyade pii a, akyinnye biara nni ho sɛ wubenya dadwen foforo wɔ ɛho ban a wobɛbɔ ho, nanso worenhu nea ɛbɛba ɔkyena. Sɛ ɛkɔba sɛ wohwere ɛne wo nkwa nyinaa ɛ? (Ɔsɛnkafo 5:13-17; 9:11, 12) Esiane sɛ eyi te saa nti, ɛnsɛ sɛ ɛyɛ yɛn den sɛ yebehu nea enti a ɛsɛ sɛ yɛn nkwa anaa yɛn adwuma yɛ nea ehia yɛn kɛse na mfaso wɔ so sen sika ne ahonyade.
Abusua, Edin, ne Tumi
9. Dɛn nti na abusua asetra ho nsɛm baa Salomo nhwehwɛmu no mu ma ɛfatae?
9 Nea na ɛka nkwa mu nhwehwɛmu a Salomo yɛe no ho ne nneɛma a egye mmusua adwene no. Bible twe adwene si abusua asetra so, a mma a wɔbɛwo na wɔatete wɔn ho anigye ka ho. (Genesis 2:22-24; Dwom 127:3-5; Mmebusɛm 5:15, 18-20; 6:20; Marko 10:6-9; Efesofo 5:22-33) Nanso, so ɛno ne asetram ade titiriw? Ɛte sɛ nea nnipa pii dwen saa, bere a yesusuw adwene a mmusua bi de si aware, mma, ne abusuasɛm so ho no. Nanso Ɔsɛnkafo 6:3 kyerɛ sɛ ɛnyɛ mma ɔha mpo a obi bɛwo no ne ade a ɛbɛma wanya asetram abotɔyam. Susuw awofo pii a wɔde wɔn ho abɔ afɔre ama wɔn mma sɛnea ɛbɛyɛ a wobenya mfiase pa na ama wɔn asetra ayɛ mmerɛw no ho. Ɛwom sɛ ɛno yɛ adwempa de, nanso nokwarem no, ɛnyɛ nea na yɛn Bɔfo no hwehwɛ wɔ yɛn asetram ara ne sɛ yɛbɛwo mma kɛkɛ, sɛnea mmoa fi nkate mu yɛ na wɔn ase antɔre no.
10. Dɛn nti na adwene a wɔde besi abusua so wɔ ɔkwan a ɛmfata so no betumi ayɛ ahuhude?
10 Salomo fi nhumu mu kaa abusua asetra ho nokwasɛm ahorow bi. Sɛ nhwɛso, ebia ɔbarima bi de n’adwene besi nsiesiei a ɔbɛyɛ ama ne mma ne ne mmanana so. Nanso wɔbɛyɛ anyansafo anaa? Anaasɛ wɔde nea ɔboaboaa ano maa wɔn no bɛyɛ nkwaseade? Sɛ wɔde yɛ nkwaseade a, hwɛ “ahuhude ne adebɔne kɛse” a ɛbɛyɛ!—Ɔsɛnkafo 2:18-21; 1 Ahene 12:8; 2 Beresosɛm 12:1-4, 9.
11, 12. (a) Asetra mu nneɛma bɛn na ebinom de wɔn adwene asi so? (b) Dɛn nti na yebetumi aka sɛ edin a obi bɛpɛ no yɛ “ɔdadwen hunu”?
11 Wɔ ɔkwan a ɛkɔ akyiri so no, nnipa pii de wɔn da biara abusua asetra ato nkyɛn na wɔrebɔ mmɔden sɛ wobenya din anaa afoforo so tumi. Eyi betumi ayɛ mfomso a mmarima taa di. So woahu eyi wɔ wo sukuufo, adwumamfo, anaa w’afipamfo mu? Ebinom pere denneennen sɛnea ɛbɛyɛ a afoforo behu wɔn, wɔbɛyɛ nnipa atitiriw, anaasɛ wobenya afoforo so tumi. Nanso mfaso bɛn ankasa na ɛwɔ eyi so?
12 Susuw sɛnea ebinom di apere sɛ wobegye din, sɛ́ ɛyɛ ketewaa anaa kɛse no ho. Yehu wɔ sukuu mu, wɔ yɛn mpɔtam, ne wiase akuw horow mu. Ɛno nso ne tumi a epiapia wɔn a wɔpɛ sɛ wogye din wɔ adwinni, anigyede, na amammuisɛm mu no. Nanso, ɛnyɛ ahuhude ankasa anaa? Ɛfata sɛ Salomo frɛɛ no “ɔdadwen hunu.” (Ɔsɛnkafo 4:4) Sɛ mpo abofra bi gye din wɔ kuw bi, agumadi, anaasɛ nnwonto kuw bi mu—anaa ɔbarima anaa ɔbea bi gye din wɔ adwumakuw anaa ɔman bi mu—a, nnipa ahe na wonim ankasa? So nnipa dodow no ara a wɔwɔ wiase no fã foforo (anaasɛ wɔwɔ ɔman koro no ara mu) no nim sɛ onipa no wɔ hɔ? Anaasɛ wɔkɔ so tra ase a wonnim edin kakra a onii no agye no ho hwee? Na saa ara na yebetumi aka wɔ tumi biara a obi nya wɔ adwumam, kurow bi mu, anaa kuw bi mu ho.
13. (a) Ɔkwan bɛn so na Ɔsɛnkafo 9:4, 5 boa yɛn ma yenya adwene a ɛfata wɔ edin anaa tumi a obi bɛpɛ ho? (b) Sɛ asetra yi ara na ɛwɔ hɔ a, ɛnde na nokwasɛm ahorow bɛn na ɛsɛ sɛ yesusuw ho? (Hwɛ ase hɔ asɛm no.)
13 Dɛn na edin anaa tumi a ɛte saa no de ba awiei koraa? Bere a awo ntoatoaso biako kɔ na foforo ba no, nnipa a wɔagye din anaa wɔwɔ tumi no wuwu, na werɛ fi wɔn. Ɛte saa wɔ adansifo, nnwontofo ne adwumfo foforo, ɔmansesɛwfo, ne nea ɛkeka ho no fam, sɛnea ɛte wɔ amammuifo ne asraafo akannifo dodow no ara fam no. Wɔ dwumadi a ɛtete saa mu no, nnipa dodow pɔtẽẽ bɛn na wɔtraa ase wɔ 1700 ne 1800 mu a wunim wɔn? Salomo susuw nneɛma ho wɔ ɔkwan a ɛfata so, na ɔkae sɛ: “Ɔkraman a ɔte ase ye sen gyata a wawu. Na ateasefo nim sɛ wobewuwu, na awufo de, wonnim biribiara, . . . na werɛ afi wɔn nkae.” (Ɔsɛnkafo 9:4, 5) Na sɛ saa asetra yi ara na ɛwɔ hɔ a, ɛnde na mmɔden a obi bɔ sɛ obegye din anaa obenya tumi no yɛ ahuhude ampa.a
Nneɛma a Yɛde Yɛn Adwene Si So ne Yɛn Asɛde
14. Dɛn nti na ɛsɛ sɛ Ɔsɛnkafo nhoma no boa yɛn ankasa?
14 Salomo anka nnwuma, botae, ne anigyede pii a nnipa de wɔn adwene si so wɔ asetram no ho asɛm. Nanso, nea ɔkyerɛwee no dɔɔso. Ɛnsɛ sɛ nhoma no a yɛasusuw ho no ma yɛn abasam tu anaa yɛyɛ basaa, efisɛ ɛyɛ Bible mu nhoma bi a Yehowa Nyankopɔn hyɛɛ da de ne honhom ma wɔkyerɛwee ma aboa yɛn na yɛasusuw ho nokwarem no. Ebetumi aboa yɛn mu biara ma yɛasiesie asetra ho adwene a yɛwɔ ne nea yɛde yɛn adwene si so no. (Ɔsɛnkafo 7:2; 2 Timoteo 3:16, 17) Ɛno te saa titiriw esiane nsɛm a Yehowa boaa Salomo ma ɔkae no nti.
15, 16. (a) Ná Salomo adwene ne dɛn wɔ asetra mu anigye a obi benya ho? (b) Ahwehwɛde a ɛfata bɛn na Salomo de sii hɔ wɔ asetra mu anigye a obi benya ho?
15 Ade biako a Salomo kɔɔ so kaa ho asɛm ne sɛ, ɛsɛ sɛ nokware Nyankopɔn no asomfo ani gye wɔn nnwuma mu wɔ N’anim. “Mahu sɛ adepa nni hɔ mma nnipa, gye sɛ wɔma wɔn ani gye na wɔyɛ yiye wɔn nkwa mu; nanso sɛ onipa biara didi nom hu adepa ne brɛ nyinaa mu a, Onyankopɔn akyɛde ne no.” (Ɔsɛnkafo 2:24; 3:12, 13; 5:18; 8:15) Hyɛ no nsow sɛ na Salomo renhyɛ potwaa ho nkuran; saa ara na na ɔmpene su a ɛne ‘Momma yennidi na yɛnnom, na yɛn ani nnye, efisɛ ɔkyena na yɛawu’ no so. (1 Korintofo 15:14, 32-34) Ná ɔkyerɛ sɛ ɛsɛ sɛ yɛde nneɛma a asɛm biara nni ho, te sɛ adidi, ne ɔnom gye yɛn ani, na ‘yɛyɛ papa bere a yɛte ase no.’ Akyinnye biara nni ho sɛ ɛno twe yɛn asetra si Ɔbɔadeɛ no a ɔkyerɛ nea ɛyɛ papa ankasa no apɛdeyɛ so.—Dwom 25:8; Ɔsɛnkafo 9:1; Marko 10:17, 18; Romafo 12:2.
16 Salomo kyerɛwee sɛ: “Kɔ na fa anigye kodi w’aduan, na fa koma pa nom wo nsã, na Onyankopɔn ani asɔ wo nneyɛe dedaw.” (Ɔsɛnkafo 9:7-9) Yiw, ɔbarima anaa ɔbea a ɔwɔ asetra pa a abotɔyam wom no yɛ nnam wɔ nnwuma a Yehowa ani gye ho mu. Ɛno hwehwɛ sɛ yebesusuw ne ho daa. Hwɛ sɛnea saa adwene yi yɛ soronko wɔ nnipa dodow no ara a wɔn asetra gyina nnipa nsusuwii so no de ho!
17, 18. (a) Ɔkwan bɛn so na nnipa pii yɛ wɔn ade wɔ asetram nokwasɛm ahorow ho? (b) Nea ebefi mu aba bɛn na ɛsɛ sɛ yɛma ɛtra yɛn adwenem bere nyinaa?
17 Ɛwom sɛ ɔsom ahorow bi kyerɛkyerɛ owu akyi asetra ho ade de, nanso nnipa pii gye di sɛ saa asetra yi nkutoo na wobetumi agye adi sɛ ɛwɔ hɔ. Ebia woahu wɔn sɛ wɔyɛ wɔn ade te sɛ nea Salomo kaa ho asɛm no: “Sɛ nneyɛe bɔne ho afobu mma ntɛm nti na nnipa mma bɔne ho atirimpɔw ayɛ wɔn koma ma.” (Ɔsɛnkafo 8:11) Wɔn a wɔmfa wɔn ho nhyɛ nneyɛe bɔne mu mpo no dwen nea ɛkɔ so seesei no ho titiriw. Ɛno ne ade biako a enti sika, ahonyade, edin, afoforo so tumidi, abusuasɛm, anaa nneɛma foforo a ɛtete saa gye wɔn adwene titiriw no. Nanso, Salomo amma asɛm no anso hɔ ara. Ɔde kaa ho sɛ: “Sɛ ɔdebɔneyɛfo di asɛmmɔne mpɛn ha na ɔtra hɔ kyɛ a, ɛnyɛ dɛn ara a, minim sɛ ebesi wɔn a wosuro Onyankopɔn na wɔfrɛ no no yiye; na ɛrenwie ɔbɔnefo yiye, na ɔremma ne nna nkyɛ, ɔte sɛ sunsuma, sɛ ɔmfɛre Onyankopɔn ntia.” (Ɔsɛnkafo 8:12, 13) Ɛda adi sɛ, na Salomo gye di sɛ sɛ ‘yesuro nokware Nyankopɔn no’ a, ebesi yɛn yiye. Ɔkwan bɛn so na ebesi yɛn yiye? Yebetumi anya mmuae no denam mfatoho a ɔyɛe no so. Yehowa betumi ama ‘yɛn nna aware.’
18 Wɔn a wonnyinyinii pii no titiriw na ɛsɛ sɛ wosusuw nokwasɛm turodoo a wotumi de ho to so a ɛne sɛ ebesi wɔn yiye bere a wosuro Onyankopɔn no ho. Sɛnea ebia w’ankasa woahu no, mmirikatufo a ne ho yɛ hare paa no betumi ahwe ase na wadi nkogu wɔ mmirikatu no mu. Asraafo a wɔyɛ den betumi adi nkogu. Oguadifo a onim nyansa betumi adi hia. Na nneɛma foforo pii a ɛba mpofirim no ma asetra yɛ nea wonhu ano. Nanso wubetumi ahu eyi ano koraa: Asetra kwan a nyansa wom na eye sen biara ne sɛ wobɛyɛ papa wɔ Onyankopɔn abrabɔ ho mmara mu na woayɛ no sɛnea n’apɛde te. (Ɔsɛnkafo 9:11) Nea ɛka eyi ho ne Onyankopɔn apɛde a obi besua afi Bible mu, wahyira ne nkwa so ama no, na wabɛyɛ Kristoni a wɔabɔ no asu.—Mateo 28:19, 20.
19. Ɔkwan bɛn so na mmofra betumi de wɔn nkwa adi dwuma, nanso ɔkwan bɛn na nyansa wom sɛ wɔfa so?
19 Ɔbɔadeɛ no renhyɛ mmofra anaa afoforo mma wonni n’akwankyerɛ so. Wobetumi de wɔn ho ahyɛ nhomasua mu, na ebia wɔabɛyɛ wɔn a wɔde bere tenten asua nhoma a enni ano a nnipa nyansa ayɛ no ma no. Awiei koraa no, ɛbɛma ɔhonam no abrɛ. Anaasɛ wobetumi ama nnipa koma a ɛnyɛ pɛ no akyerɛ wɔn kwan anaa wɔadi nea ɛyɛ aniwa fɛ akyi. Akyinnye biara nni ho sɛ, ɛno de ɔhaw na ɛbɛba, na bere bi no, nkwa a wɔde di dwuma saa kwan no so no bɛyɛ ahuhude kɛkɛ. (Ɔsɛnkafo 11:9–12:12; 1 Yohane 2:15-17) Enti Salomo de asɛm bi to mmofra anim—asɛm a ɛsɛ sɛ yesusuw ho anibere so, ɛmfa ho mfe biara a yɛadi no: “Kae wo bɔfo wo mmerantebere mu ansa na nna bɔne no aba, na mfe a wobɛka sɛ: minni ho anigye, no adu.”—Ɔsɛnkafo 12:1.
20. Dɛn ne Ɔsɛnkafo nhoma no mu nsɛm ho adwene a ɛkari pɛ?
20 Afei, dɛn na yɛnka? Wiɛ, asɛm a Salomo kae no nso ɛ? Ohui, anaa ɔyɛɛ nhwehwɛmu huu “nnwuma a wɔyɛ owia ase nyinaa, na hwɛ, ne nyinaa yɛ ahuhude ne ɔdadwen hunu.” (Ɔsɛnkafo 1:14) Ɛnyɛ nsɛm a ɔbarima kyinnyegyefo bi a wahaw kae na yehu wɔ Ɔsɛnkafo nhoma no mu. Ɛyɛ Onyankopɔn Asɛm a efi honhom mu no fã, na ɛfata sɛ yesusuw ho.
21, 22. (a) Asetra ho nneɛma bɛn na Salomo susuw ho? (b) Nyansasɛm bɛn na ohu kae? (d) Ɔkwan bɛn so na Ɔsɛnkafo nhoma no mu nsɛm no aka wo?
21 Salomo yɛɛ onipa brɛ, n’aperedi, ne ne botae ahorow mu nhwehwɛmu. Osusuw sɛnea nneɛma sakra wɔ da biara da dwumadi mu, abasamtu ne nkogu a nnipa pii di, no ho. Osusuw sɛnea onipa sintɔ te ankasa ne owu a ɛde aba no ho. Na osusuw nimdeɛ a Onyankopɔn de ma wɔ awufo tebea ne daakye asetra biara ho anidaso ho no ho. Ɔbarima bi a Onyankopɔn maa no nyansa pii, yiw, anyansafo a wɔsen biara a wɔatra ase pɛn no mu biako na ɔyɛɛ saa nhwehwɛmu yi nyinaa. Afei wɔkyerɛw nea ohui no wɔ Kyerɛw Kronkron no mu na aboa wɔn a wɔpɛ asetra a mfaso wɔ so ankasa no. So ɛnsɛ sɛ yegye tom?
22 “Asɛm no awiei, ne nea yɛate nyinaa ne sɛ: “Suro Onyankopɔn, na di ne mmara nsɛm so. Na eyi ne onipa asɛde nyinaa. Na nneyɛe nyinaa na nokware Nyankopɔn de bɛba atemmu mu, na nea ahintaw nyinaa nso, papa oo, bɔne oo, wabu so atɛn.”—Ɔsɛnkafo 12:13, 14, NW.
[Ase hɔ asɛm]
a Bere bi, Engiresi Ɔwɛn-Aban no kaa asɛm a efi nhumu mu yi: “Ɛnsɛ sɛ yɛsɛe saa asetra yi wɔ ahuhude ho . . . Sɛ asetra yi ara na ɛwɔ hɔ a, ɛnde biribiara ho nhia. Saa asetra yi te sɛ bɔɔl a wɔtow kɔ wim a ɛsan ba fam ntɛm ara. Ɛyɛ sunsuma bi a ɛretwam, nhwiren a ɛrekisa, sare bi a wɔrebetwa na ɛnkyɛ ebekisa. . . . Wɔ daa nkwa nsɛnia no so no, yɛn nkwa nna nsɛ hwee. Bere kɔ so no, yɛn nkwa nna bɛyɛ ade ketewaa bi. Nokwarem no, sɛ [Salomo] susuw nnipa dadwen ne ne dwumadi ahorow wɔ asetram ho na ɔka sɛ ɛyɛ ahuhude a, na ɛfata. Ɛnkyɛ koraa na yɛawu, na ebia wɔanwo yɛn koraa a, anka eye, nnipa ɔpepepem pii bɛba na wɔakɔ, ebia kakraa bi pɛ na wobehu sɛ yɛtraa ase. Saa adwene yi nyɛ nnaadaa anaa abasamtusɛm. Ɛyɛ nokware, nokwasɛm a ɛsɛ sɛ yɛda no adi, adwene a mfaso wɔ so, sɛ asetra yi ara na ɛwɔ hɔ a.”—August 1, 1957, kratafa 472.
So Wokae?
◻ Gyinabea a ahonyade wɔ wɔ w’asetram no ho nhwehwɛmu a nyansa wom bɛn na ɛsɛ sɛ woyɛ?
◻ Dɛn nti na ɛnsɛ sɛ yɛde adwene si abusua, edin, anaa afoforo so tumi a yebedi so wɔ ɔkwan a ɛmfata so?
◻ Anigye ho nneyɛe a Onyankopɔn hwehwɛ bɛn na Salomo hyɛɛ ho nkuran?
◻ Ɔkwan bɛn so na Ɔsɛnkafo nhoma no a yɛasusuw ho no aboa wo?
[Kratafa 15 mfonini ahorow]
Sika ne ahonyade nkyerɛ sɛ obi wɔ anigye
[Kratafa 17 mfonini]
Mmofra betumi anya awerɛhyem sɛ ebesi wɔn yiye bere a wosuro Onyankopɔn no