9, 10. Dɛn na akwankyerɛ a ɛne sɛ “ma wo ntamadan mu ntrɛw” no kyerɛ ma ɔbea a ɔtraa ntamadan mu tete mmere mu no, na dɛn nti na saa bere yi yɛ anigye bere ma ɔbea a ɔte saa no?

⁹ Yesaia kɔ so hyɛ nkɔanim soronko no ho nkɔm sɛ: “Ma wo ntamadan mu ntrɛw, na wɔntwe wo trabea mmɔhɔɔ no mu, nkyɛe biara so. Ma wo ntampehama nware, na ma wo mmofunnua ntintim. Na wobɛtrɛw akɔ nifa ne benkum, na w’asefo afa amanaman no, na woama wɔatratra nkurofõ so. Nsuro, na w’ani renwu, nsi wo ti ase, na w’anim renkisa, na wo werɛ befi wo mmabaabere mu aniwu, na wo kunayɛ ahohora no, worenkae bio.”—Yesaia 54:2-4.

¹⁰ Ɛha no wɔkasa kyerɛ Yerusalem sɛ nea ɔyɛ ɔyere ne ɛna a ɔte ntamadan mu te sɛ Sara. Bere a ne mma redɔɔso no, ɛbere du sɛ ɛna a ɔte saa no trɛw ne fie mu. Ehia sɛ onya mmɔhɔɔ ne ntampehama atenten na ɔde mmofunnua sisi mmeae foforo. Eyi yɛ adwuma a n’ani gye ho, na bere a onni adagyew saa no, ne werɛ betumi afi mfe a na ɔde hwɛ kwan sɛ ebia obenya mma ma wɔatoa abusua no anato so no.