11. (a) Dɛn nti na Yehowa de “aweredi da” ba? (b) Henanom ne ‘wɔn a na wɔagye wɔn’ wɔ tete mmere mu no, na wɔne henanom nnɛ?

¹¹ Yehowa kɔɔ so kyerɛkyerɛɛ nea enti a ɔno ankasa yɛ saa adwuma yi mu sɛ: “Aweredi da bi wɔ me koma mu, na me gye afe no aba.” (Yesaia 63:4)b Yehowa nkutoo na ɔwɔ hokwan sɛ odi wɔn a wɔyɛ ne nkurɔfo bɔne no werɛ. (Deuteronomium 32:35) Wɔ tete mmere mu no, na ‘wɔn a wɔagye wɔn no’ ne Yudafo a wohuu amane wɔ Babilonfo nsam no. (Yesaia 35:10; 43:1; 48:20) Ɛnnɛ mmere mu no, wɔne nkaefo a wɔasra wɔn no. (Adiyisɛm 12:17) Te sɛ wɔn mfɛfo a wɔtraa ase wɔ tete mmere no mu no, wɔagye wɔn afi nyamesom mu nnommumfa mu. Na te sɛ saa Yudafo no, nkaefo no ne wɔn ahokafo “nguan foforo” no ahyia ɔtaa ne ɔsɔretia. (Yohane 10:16) Enti, Yesaia nkɔmhyɛ no ma Kristofo a wɔwɔ hɔ nnɛ no nya awerɛhyem sɛ wɔ Onyankopɔn bere a wahyɛ mu no, Obedi wɔn asɛm ama wɔn.