Mesia No​—Nhyira Ma Amanaman Nyinaa

HEBRI diyifo Yesaia kaa daakye bere bi a “habɔdɔm ne oguanten ba bɛtra, na ɔsebɔ ne apapowa ada, . . . na gyata awe wura sɛ nantwi,” bere a nnipa “renyɛ bɔne na wɔrensɛe ade bio” ho asɛm.​—Yesaia 11:6-9.a

Nanso, ɛbɛyɛ dɛn na tebea a asomdwoe wom yi aba? Nea ɛyɛ anigye ne sɛ, Yesaia de tebea a ɛte saa too daakye sodifo bi a ɔfrɛɛ no ‘duforo bi a ebefifi afi Yisai [tete Israel Hene David agya] dunsin no mu’ ho. Saa Ɔhene David aseni yi na ɔbɛyɛ sodifo pa, ɔbarima a ɛnyɛ sɛnea ohu ade anaasɛ ɔte asɛm so na ɔbɛfa abu atɛn, na mmom nea obebu atɛn wɔ trenee mu na ɔde atɛntrenee ne asomdwoe atim hɔ. Bio nso, saa daakye sodifo yi renyɛ Yudafo no sodifo nkutoo, na mmom, obi a amanaman nyinaa de wɔn ani bɛto no so ama akwankyerɛ. Wɔ nokwarem no, sɛnea Yesaia ka siei no, “N’akyi kwan na amanaman bɛhwehwɛ.”​—Yesaia 11:1-10; fa to Yesaia 9:6, 7 ho.

Bere a mfe a edii Yesaia nkɔmhyɛ yi akyi no mu no Yuda man no kaa sodifo a wɔretwɛn no no ho asɛm sɛ Mesia anaasɛ nea wɔasra no no, onii a Mesia yi yɛ ankasa no adan ɔsɛmpɔw bi fi teteete. Abakɔsɛm aka nnipa ahorow pii a wɔaka sɛ wɔne Mesia no ho asɛm wɔ mfehaha a atwam no mu, wɔn mu biara sɔre gye din na watwam kɔ. Yudani a osua nnipa ho ade, Raphael Patai kaa “sie a nnipa no asiesie wɔn ho sɛ wɔbɛpene ɔdaadaafo biara anaasɛ ɔdaesofo bi a ɔdaadaa n’ankasa ho a ɔka sɛ ɔne Mesia no so” no asɛm. Na sɛnea wɔbɛhwɛ kwan no, wɔn a wɔde wɔn ani to obi a ɔka sɛ ɔyɛ Mesia so wɔ atoro mu no bedi huammɔ. Eyi kyerɛ sɛnea ɛho hia sɛ yɛhwɛ yiye wɔ Mesia no hu mu.

Nanso Yesaia kyerɛe sɛ ɛho behia sɛ ‘yɛbɛhwehwɛ’ Mesia no, sɛ yɛpɛ sɛ yenya ne nhyira a ɔde bɛba no mu kyɛfa de a. Nea yebetumi ada ho ase ne sɛ yɛwɔ pii a yebetumi asua afi wɔn a wɔafrɛ wɔn ho sɛ wɔyɛ Mesia ahorow no ho abakɔsɛm a atwam no mu, ne afei afi Hebri Kyerɛwnsɛm no ankasa mu. Enti yɛto nsa frɛ wo sɛ susuw nsɛm a edi hɔ a wɔakyerɛw yi ho.

[Ase hɔ nsɛm]