Wiase a Akodi Nnim Bɛba Nnansa Yi Ara

SAN hwɛ Bible nkɔmhyɛ a ɛwɔ Yesaia a ɛka sɛ: “Na wɔde wɔn nkrante abobɔ nsɔw, ne wɔn mpeaw ayeyɛ nnare; ɔman bi remma afoa so nhyɛ ɔman bi, na wɔrensua akodi bio” no bio. Hyɛ wɔn a wɔde wɔn nkrante bɛbobɔ nsɔw no nsow fi nsɛm a atwa ho ahyia no mu sɛ wɔyɛ “aman bebree” a wɔnantew Onyankopɔn akwan so. (Yesaia 2:2-4) Eyi kyerɛ sɛ saa nkurɔfo yi som Yehowa Nyankopɔn, na wodi ne mmara horow so. Wɔne henanom?

Ɛsɛ sɛ wɔyɛ nnipa a wofi aman horow mu a ɛnyɛ sɛ wɔapow akode kɛkɛ nko na mmom, wɔayi nsusuwii ne nhyehyɛe a ɛde akodi ne nitan ba afi wɔn adwene ne wɔn koma mu koraa. (Romafo 12:2) Sɛ́ anka wobekum wɔn yɔnko no, wɔdɔ no. (Mateo 22:36-39) Woate nnipa a wɔte saa ho asɛm?

Ebia woate sɛ Yehowa Adansefo wɔ amanaman ntam onuayɛ kuw bi, na wɔapow sɛ wɔde akode bekunkum afoforo. Susuw ho hwɛ: Sɛ nnipa a wɔwɔ asase so nyinaa kura adwene a ɛte saa a, so anka wiase nnanee beae a asomdwoe ne dwoodwoo asetra wɔ dedaw?

Nokwarem no, ɛnyɛ obiara na okura saa adwene no. Ɛte sɛ nea Ɔhene Salomo kyerɛwee mfirihyia 3,000 a atwam ni no: “Na mesan mehwɛɛ nhyɛso a ɛwɔ owia ase no nyinaa, na hwɛ, wɔn a wɔhyɛ wɔn so no nusu, na wonni ɔwerɛkyekyefo bi, na nhyɛsofo nsam den no mu no, wonni ɔwerɛkyekyefo bi.”—Ɔsɛnkafo 4:1.

Wɔn a Wɔdɔ Asomdwoe a Wɔto Nsa Frɛ Wɔn

So wiase a akodi nnim bɛba da bi? Yiw. So ɛnam nnipa mmɔdenbɔ so na ɛbɛba? Dabi. So ɛnam nnipadɔm a wɔbɛdan wɔn aba nokware som mu so na ɛbɛba? Dabi. Bible mu nhoma Dwom bua sɛ: “Mommra mmɛhwɛ [Yehowa, NW] nnwuma . . . Ɔma akodi gyae kosi asase ano.”—Dwom 46:8, 9.

Ɔkwan bɛn so na Yehowa Nyankopɔn bɛfa ayɛ eyi? Mmebusɛm nhoma no bua sɛ: “Na teefo na ɛbɛtra asase no so, na wɔn a wɔyɛ pɛ no na ɛbɛtra mu; na wobegu abɔnefo [wɔn a wommu Onyankopɔn mmara horow] ase afi asase so, na wɔatu nkontompofo afi so.”—Mmebusɛm 2:21, 22.

Ade titiriw a enti Onyankopɔn atwɛn abesi sɛsɛɛ ni: Ɔrema nnipa hokwan ma wɔde asua n’akwan sɛnea ɛbɛyɛ a wobetumi anantew n’atempɔn so. Ɔsomafo Petro kyerɛwee sɛ: “Awurade nkyɛ ne bɔhyɛ ho, sɛnea ebinom bu sɛ ɛkyɛ, na mmom ɔma ne bo dwo kyɛ ma mo, ɔmpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.” (2 Petro 3:9) Enti Onyankopɔn nkurɔfo fi ayamye mu boa afoforo ma wosua Yehowa ho ade. Sɛnea Yesaia kae no: “Mommra mma yɛnkɔ Awurade bepɔw so, . . . na ɔnkyerɛ yɛn n’akwan.”—Yesaia 2:3.

“Nna a Edi Akyiri no Mu”

Kyerɛwsɛm a ɛwɔ Yesaia nso hyɛɛ nkɔm sɛ nnipa a wɔbɛkyerɛkyerɛ wɔn asomdwoe kwan bɛba “wɔ nna a edi akyiri no mu.” (Yesaia 2:2) Yɛte saa bere no mu seesei. Nea ɛyɛ nwonwa no, afeha yi mu akodi no kyerɛ sɛ yɛte saa bere no mu.

Bere a Yesu asuafo bisaa no nea ɛbɛhyɛ nhyehyɛe yi awiei agyirae no, ɔkaa ‘asasewosow akɛse, ne ɔkɔm ne ɔyaredɔm a ɛbɛba mmeaemmeae’ ho asɛm siei. (Luka 21:11; Mateo 24:3) Ɔkae nso sɛ: “Na sɛ mote ɔko ne mansotwe a, mommma ɛnnyɛ mo hu; na etwa sɛ eyinom ba kan; na awiei no de, ɛremma ntɛm. Ɛnna osee wɔn sɛ: Ɔman bɛsɔre ɔman so, ne ahenni ahenni so.”—Luka 21:9, 10.

Ɛwom sɛ wɔadi ako mfe mpempem pii ni de, nanso wɔako wiase ko abien wɔ saa afeha yi nkutoo mu, na sɛnea akontaabu bi kyerɛ no, nketewa ɔhaha pii ka ho. Nokwasɛm a ɛyɛ sɛ nnipa ɔpepem dudu pii na wɔakunkum wɔn wɔ afeha yi mu no yɛ ade a ɛyɛ hu. Sɛnea World Watch nsɛmma nhoma kyerɛ no, wɔ mfe 2,000 a edi afeha 20 yi anim mu no, sɛ wɔkyekyem pɛpɛɛpɛ a, bere a egyei ma nnipa ɔpepem biako wuwui wɔ akodi mu no yɛ mfe 50. Wɔ afeha yi mu no, sɛ wɔkyekyem pɛpɛɛpɛ a bere a egyei ma nnipa ɔpepem biako wuwui wɔ ɔko mu yɛ afe biako pɛ.

Wiase a Akodi Nnim

Akodi a ɛyɛ hu wɔ yɛn bere yi mu ne nneɛma foforo a wɔkaa ho asɛm siei wɔ Bible nkɔmhyɛ mu no kyerɛ sɛ yɛwɔ Onyankopɔn wiase foforo a ɔde reba no pon ano pɛɛ. Wobeyi wiase nhyehyɛe dedaw no afi hɔ na wɔde “asase foforo,” beae a asomdwoe ne trenee bɛtra, aba. (2 Petro 3:13) Onyankopɔn asɛm ka sɛ: “Na wobeyi nnebɔneyɛfo hɔ, na wɔn a wɔtwɛn Awurade no, wɔn na wobenya asase no adi. Na ahobrɛasefo benya asase no adi, na wɔagye wɔn ani asomdwoe bebree mu.”—Dwom 37:9, 11.

Ɛnnɛ, wɔ asase so mmaa nyinaa no, nnipa ɔpepem pii na wɔn kɔn dɔ wiase a akodi nnim. Bere a odiyifo bi rekyerɛ sɛ Onyankopɔn bɛma ne bɔhyɛ a ɛne sɛ ɔbɛma wiase a ɛte saa aba ɔkwan biara so no, ɔkyerɛw too hɔ bere tenten bi a atwam sɛ: “Na adehu no da so kyerɛ bere a wɔahyɛ, na ɛpere repɛ awiei, na ɛrenni atoro; sɛ ɛtwentwɛn ase nso a, twɛn no ara, na ɔba de, ɛbɛba, ɛrenka akyiri.”—Habakuk 2:3.

Ɛnde, fi nyansa mu fa wo ho to Onyankopɔn so, na woanya ne bɔhyɛ no mu nhyira: “Na Onyankopɔn ankasa ne wɔn [ne nkurɔfo] bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:3, 4.

[Adaka/Mfonini wɔ kratafa 16, 17]

Nea Bible Hyɛ Ho Bɔ ma Saa Wiase Foforo No:

Amumɔyɛ, Nsɛmmɔnedi Anaa Basabasayɛ Nni Hɔ Bio

‘[Onyankopɔn] ma akodi gyae kosi asase ano.’—Dwom 46:9.

“Na wobeyi nnebɔneyɛfo hɔ . . . Aka kakraa sɛ na ɔbɔnefo nni hɔ.”—Dwom 37:9, 10.

Adesamma Nyinaa Tra Ase Asomdwoe Mu

“Na wɔawo akokoaa ama yɛn, wɔama yɛn ɔbabanin; na n’ahenni bɛda ne mmati so, na wɔafrɛ ne din sɛ . . . Asomdwoe-hene; na n’ahenni mu bɛtrɛw, na asomdwoe a enni awiei aba.”—Yesaia 9:6, 7.

Asase Nyinaa Dan Paradise

Yesu kae sɛ: “Wobɛka me ho Paradise hɔ.”—Luka 23:43.

“Treneefo benya asase no adi, na wɔatra so daapem.”—Dwom 37:29.

Wiase Nyinaa Nuayɛkuw a Ɔdɔ Wom

“Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.”—Asomafo no Nnwuma 10:34, 35.

[Kratafa 18 adaka/mfonini]

Adɔfo a Wɔawuwu a Wobenyan Wɔn

“Dɔn no reba a wɔn a wɔwɔ ada mu nyinaa bɛte [Yesu] nne, na wɔafi adi.”—Yohane 5:28, 29.

Ɔyare, Mpanyinyɛ, Anaa Owu Nni Hɔ Bio

“Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:4.