Henanom Na Wobɛfa Wɔn Nnamfo?

1, 2. (a) Nsɛnnennen bɛn na Kristofo hyia wɔ nnipa a wɔne wɔn bɔ fekuw ho? (b) Dɛn nti na ɛsɛ sɛ yesusuw wɔn a Yeremia paw wɔn sɛ ne nnamfo no ho?

SƐ WO mfɛfo adwumayɛfo, wɔn a wɔte wo mpɔtam, anaa wo mfɛfo sukuufo binom to nsa frɛ wo sɛ bra Buronya apontow bi ase a, dɛn na wobɛyɛ? Na sɛ w’adwumawura ka kyerɛ wo sɛ di atoro anaa yɛ biribi a etia mmara nso ɛ? Anaasɛ, sɛ aban mpanyimfo ka kyerɛ wo sɛ yɛ biribi a ɛbɛma wode wo ho ahyɛ amanyɔsɛm anaa sraadi mu a, dɛn na wobɛyɛ? W’ahonim betumi aka akyerɛ wo sɛ nyɛ nneɛma yi mu biara, na sɛ woanyɛ na ɛbɛma wɔadi wo ho fɛw anaa wɔayɛ wo basabasa mpo a, worenyɛ.

² Sɛnea yebehu no, Yeremia hyiaa nsɛnnennen a ɛte saa mpɛn pii. Sɛ wususuw ankorankoro ne nnipakuw a Yeremia ne wɔn bɔe wɔ mfe pii a ɔde yɛɛ ne som adwuma no mu ho a, akyinnye biara nni ho sɛ, wubetumi anya so mfaso. Wɔn mu binom bɔɔ mmɔden sɛ wobebu n’abam ma wagyae adwuma a na ɔreyɛ no. Ná ɛsɛ sɛ Yeremia ne wɔn mu binom bɔ kɛse, nanso akyinnye biara nni ho sɛ, wampaw wɔn sɛ ne nnamfo. Nanso, sɛ wususuw nnipa a Yeremia faa wɔn nnamfo, wɔn a wɔboaa no na wɔhyɛɛ no nkuran ma ɔkɔɔ so dii nokware no ho a, wubenya so mfaso. Nokwarem no, yebetumi asua biribi afi nea Yeremia yɛe wɔ nnipa a ɔne wɔn bɔe ho no mu.

 3. Dɛn na na Sedekia pɛ sɛ Yeremia ka kyerɛ no, na dɛn na Yeremia yɛe?

³ Ɔhene Sedekia kohuu Yeremia mpɛn pii ansa na wɔresɛe Yerusalem. Dɛn ntia? Ná ɔhene no hwɛ kwan sɛ ɔbɛte asɛm pa bi afa nea ɛbɛba n’ahenni no so daakye ho. Ná ɔpɛ sɛ Yeremia ka sɛ Onyankopɔn de ne ho begye nsɛm mu na wagye Yudafo afi wɔn atamfo nsam. Sedekia somaa nkurɔfo kɔɔ Yeremia nkyɛn kɔsrɛɛ no sɛ: “Yɛsrɛ wo, bisa Yehowa ma yɛn, efisɛ Babilon hene Nebukadresar ne yɛn rebɛko. Ebia Yehowa bɛyɛ n’ahoɔden nnwuma no bi de aboa yɛn ma [Nebukadresar afi] yɛn so akɔ.” (Yer. 21:2) Ná ɔhene no mpɛ sɛ odi akwankyerɛ a na Onyankopɔn de ama sɛ wɔmfa wɔn ho nkɔma Babilon no so. Nhomanimfo bi de Sedekia totoo “ɔyarefo bi a ɔkɔ oduruyɛfo hɔ mpɛn pii sɛ ɔrekɔpɛ ayaresa, nanso ɔmpɛ sɛ ɔnom nnuru a wɔde ma no no” ho. Na Yeremia nso ɛ? Sɛ Yeremia kaa asɛm a ɛbɛyɛ Sedekia asom dɛ a, anka n’ani begye no ho. Sɛ ɛte saa a, dɛn nti na Yeremia ansesa n’asɛm no amma ne ho antɔ no? Nea enti a wanyɛ saa ne sɛ na Yehowa adi kan aka akyerɛ no sɛ ɔnka sɛ wɔbɛsɛe Yerusalem.—Monkenkan Yeremia 32:1-5.

 4. Gyinae bɛn na ɛsɛ sɛ yesisi wɔ nnamfo a yɛbɛfa ho wɔ mmeae bi te sɛ yɛn adwuma mu?

⁴ Wɔ akwan bi so no, tebea a wowom no te sɛ Yeremia de no. Akyinnye biara nni ho sɛ wo ne nnipa a wɔte wo mpɔtam, wo mfɛfo adwumayɛfo, anaa wo mfɛfo sukuufo bɔ fekuw wɔ ɔkwan bi so. Nanso, so wobɛkɔ so ne wɔn abɔ ma wɔabɛyɛ wo nnamfo ɛmfa ho sɛ wɔada no adi sɛ wɔn ani nnye ho sɛ wobetie Onyankopɔn asɛm anaa wobedi n’akwankyerɛ so no? Yeremia antumi antwe ne ho amfi Sedekia ho koraa; ná Sedekia da so ara yɛ ɔhene bere a na ontie Onyankopɔn afotu mpo no. Nanso, na ɛnyɛ nhyɛ sɛ Yeremia begye ɔhene no nsusuwii a ɛnteɛ no atom, anaasɛ ɔbɛbɔ mmɔden sɛ obenya n’anim dom. Nokwasɛm ne sɛ, sɛ Yeremia yɛɛ nea Sedekia pɛ maa no a, anka ɔbɛma no akyɛde ne nneɛma foforo pii. Nanso, Yeremia amma nhyɛso anaa biribi foforo biara antwetwe no amma wanhwehwɛ sɛ ɔbɛyɛ Sedekia adamfo. Dɛn ntia? Efisɛ na Yeremia rensesa nea na Yehowa aka akyerɛ no sɛ ɔnyɛ no da. Ɛsɛ sɛ nea Yeremia yɛe no ka yɛn ma yɛhwɛ sɛ wɔn a yɛfa wɔn nnamfo no yɛ nnipa a wɔbɛhyɛ yɛn nkuran ma yɛadi Onyankopɔn nokware anaa. Worentumi ntwe wo ho koraa mfi nnipa a wɔnsom Onyankopɔn ho—wɔn a wo ne wɔn yɛ adwuma, wɔn a wo ne wɔn kɔ sukuu, anaa wɔn a wɔte wo mpɔtam. (1 Kor. 5:9, 10) Nanso, wunim sɛ sɛ wofa nnipa a wɔte saa nnamfo a, ebetumi ama woasɛe wo ne Onyankopɔn adamfofa.

5, 6. Dɛn na ebinom yɛe sɛnea ɛbɛyɛ a wɔbɛma Yeremia aka n’ano atom?

⁵ Ɛnyɛ Sedekia nkutoo na ɔbɔɔ mmɔden sɛ ɔbɛsɛe Yeremia adwene. Ɔsɔfo bi a wɔfrɛ no Pasur “boroo” Yeremia, ebia ɔma wɔbɔɔ no mmaa 39. (Yer. 20:2; Deut. 25:3) Yuda mpanyimfo binom nso yɛɛ Yeremia saa ara, na afei wɔma wɔde no too “afiase.” Wɔde odiyifo no too afiase bi a na ɛhɔ nye koraa ma enti bere a odii nna pii wɔ hɔ no, na osusuw sɛ obewu. (Monkenkan Yeremia 37:3, 15, 16.) Afei, bere a woyii Yeremia fii afiase kakra no, mpanyimfo foforo hyɛɛ Sedekia sɛ onkum no. Ná wɔn adwene yɛ wɔn sɛ Yeremia rebu Yuda asraafo no abam. Eyi ma wɔtow odiyifo no too abura bi a na dontori wom mu sɛ onwu. (Yer. 38:1-4) Woakenkan ho asɛm dedaw sɛ wogyee Yeremia fii saa owu yawyaw no mu. Nanso, saa nsɛm yi ma yehu sɛ, wɔn a anka ɛsɛ sɛ wohu Onyankopɔn asɛm mu yiye no mmom annye asɛm a Onyankopɔn diyifo no kae no anni; wotwaa wɔn ho sɔre tiaa no.

⁶ Ɛnyɛ ɔman no mu mpanyimfo nkutoo na na wɔtan Yeremia. Bere bi, mmarima bi a wofi Yeremia ankasa kurow Anatot mu—wubetumi aka sɛ na wɔyɛ wɔn a wɔte ne mpɔtam—hunahunaa no sɛ sɛ wannyae nkɔm a ɔrehyɛ no a, wobekum no. (Yer. 11:21) Asɛm a na Yeremia reka no anyɛ wɔn dɛ, enti wohunahunaa no. Nanso, Yeremia paw Yehowa sɛ n’adamfo mmom sen sɛ ɔbɛfa wɔn a wɔte ne mpɔtam no nnamfo. Yeremia beresofo binom de, wɔanhunahuna no kɛkɛ. Bere a Yeremia de kɔndua yɛɛ nhwɛso maa Yudafo no sɛ wɔmfa wɔn ho nkɔma Babilon hene na ama wɔanya nkwa no, Hanania yii kɔndua no fii Yeremia kɔn ho bubuu mu. Odiyifo torofo no kyerɛe sɛ, ná Yehowa aka sɛ: “Mebubu Babilon hene kɔndua no mu.” Hanania wui wɔ saa afe no ara mu, na eyi ma wuhu odiyifo a na n’asɛm yɛ nokware. (Yer. 28:1-11, 17) Bere a wɔsɛee Yerusalem sɛnea na Yeremia abɔ ho kɔkɔ no, Yohanan ne asahene foforo antie ahyɛde a na Onyankopɔn de ama sɛ wɔnkɔ so ntena Yuda asase so no. Wɔka kyerɛɛ Yeremia sɛ: “Atosɛm na woreka yi. Yɛn Nyankopɔn nsomaa wo yɛn nkyɛn sɛ, ‘Munntu mo nan nnsi Egypt nnkɔtena hɔ.’” Wɔsan buu Yehowa ahyɛde so de Yeremia ne Baruk kaa wɔn ho kɔɔ Egypt.—Yer. 42:1–43:7.

 7. Asɛnnennen bɛn na worehyia wɔ nokware a wudi ma Yehowa no ho?

⁷ Yeremia ne nnipa a wonnye nni ne wɔn a na wɔsɔre tia no tenaa mfe pii. Dwinnwen nea ɔyɛe no ho hwɛ. Ná anka ɛrenyɛ den sɛ ɔne nnipa a wommu Onyankopɔn anaa N’Asɛm no bɛfa nnamfo. Ná ɔne wɔn ara na ɛte. Na wo nso ɛ? Ebia wo ne nnipa a wɔte sɛ wɔn a na wɔne Yeremia te no abɔ kakra. Sɛ́ wɔyɛ nnipa a wɔsɔre tia wo ne Onyankopɔn denneennen, anaasɛ wɔayɛ wɔn ho sɛ wɔyɛ nnipa pa no, so wobɛfa wɔn nnamfo? So wo ne nnipa a wɔmmfa Onyankopɔn nkɔmhyɛ aniberesɛm no bɛbɔ? Sɛ Yeremia wɔ hɔ nnɛ a, so anka ɔbɛfa nnipa a wɔmmfa Onyankopɔn Asɛm no mmɔ wɔn bra anaa wɔde wɔn ho to nnipa so no nnamfo? (2 Be. 19:2) Onyankopɔn maa Yeremia huu nea na ɛbɛto nnipa a wɔmmfa wɔn ho nnto Onyankopɔn so na wɔde wɔn ho to nnipa so no pefee. (Monkenkan Yeremia 17:5, 6.) Wote nka dɛn wɔ asɛm yi ho?

 8. Ka nsɛnnennen a Kristofo a wɔwɔ wo mpɔtam hɔ betumi ahyia ho asɛm.

⁸ Kristofo binom anya adwene sɛ sɛ wogye nnipa a wonnye nni a wɔne wɔn di gua no ani a, ɛbɛma wɔn adwuma akɔ so. Nanso, so saa a Kristofo binom bɛyɛ no bɛma wɔde wɔn ho ahyɛ fekubɔne ne asiane ahorow bi te sɛ kasafĩ ne asanom bebrebe mu? Wubetumi ahu nea enti a Kristofo pii a wohyia tebea a ɛte saa no twe wɔn ho fi fekubɔne ho, ɛmfa ho mpo sɛ saa a wɔbɛyɛ no betumi ama wɔahwere mfaso anaa nkɔso a wobenya wɔ wiase no mu no. Saa ara nso na ɛrenyɛ den sɛ adwumawura bi anaa yɛn mfɛfo adwumayɛfo besisi wɔn a wɔne wɔn di gua. Nanso, nokware Kristofo nsuasua nnipa a wɔatwa wɔn ho ahyia no nneyɛe. Ɛtɔ mmere bi a, ɛyɛ den sɛ yebesisi gyinae wɔ nsɛm a ɛte saa ho. Nanso, ɛyɛ anigye sɛ yɛwɔ obi te sɛ Yeremia a yebetumi asuasua no. Nea ɔyɛe no ma onyaa ahonim pa, na nea ɛsen saa no, ɔne Onyankopɔn nyaa abusuabɔ pa.

 9. Asiane bɛn na ɛwom sɛ obi bɛyɛ nea nkurɔfo yɛ no bi?

⁹ Yeremia mfɛfo Yudafo binom dii ne ho fɛw esiane ne gyidi ne adwuma a na ɔreyɛ no nti. (Yer. 18:18) Nanso, na Yeremia ani gye ho sɛ ɔbɛyɛ soronko wɔ ne beresofo mu, na ɔmpɛ sɛ ɔbɛyɛ “nea nkurɔfo yɛ no bi.” (Yer. 8:5, 6) Ɛtɔ mmere bi mpo a, na Yeremia pɛ sɛ ɔtew ne ho ‘na ɔno nkutoo tena ne baabi.’ Ná ɔpɛ sɛ ɔno nkutoo bɛtena mmom sen sɛ ɔne abɔnefo bɛbɔ na wasuasua wɔn subammɔne no. (Monkenkan Yeremia 9:4, 5; 15:17.) Na wo nso ɛ? Sɛnea na ɛte wɔ Yeremia bere so no, nnipa dodow no ara nni Onyankopɔn nokware nnɛ. Efi tete na Yehowa asomfo ahwɛ wɔn ho yiye wɔ nnipa a wɔfa wɔn nnamfo no ho. Eyi nkyerɛ sɛ na Yeremia nni nnamfo. Nnipa bi twitwa gyee no, na wɔboaa no. Henanom ne saa nkurɔfo yi? Sɛ wuhu wɔn a, ebetumi aboa wo paa.

10, 11. (a) Dɛn na Yeremia gyinaa so paw ne nnamfo? (b) Henanom na na wɔyɛ Yeremia nnamfo, na nsɛmmisa bɛn na ɛsɔre wɔ wɔn ho?

¹⁰ Henanom na na Yeremia bɛfa wɔn nnamfo? Yehowa maa Yeremia kasa tiaa wɔn a na wɔyɛ bɔne, nnaadaafo, asisifo, awudifo, wɔn a wonni tema, ne wɔn a wɔn bra asɛe. Ná saa nkurɔfo yi agyae nokware som akɔsom abosom ma enti na wɔabɔ aguaman wɔ honhom fam. Yeremia hyɛɛ ne mfɛfo Yudafo no nkuran sɛ: “Monnan mfi mo akwammɔne ho ɛ, na munsiesie mo akwan ne mo nneyɛe.” (Yer. 18:11) Bere a wɔsɛee Yerusalem mpo no, Yeremia kɔɔ so kaa Onyankopɔn “adɔe,” ne “mmɔborɔhunu,” ne ne “nokwaredi” ho asɛm. (Kwa. 3:22-24) Yehowa asomfo anokwafo nkutoo na Yeremia faa wɔn nnamfo.—Monkenkan Yeremia 17:7.

¹¹ Yenim nnipa binom a Yeremia faa wɔn nnamfo anaasɛ ɔne wɔn bɔe no ho nsɛm. Ɛda adi sɛ na mmarima bi te sɛ Ebed-Melek, Baruk, Seraia, ne Safan mmabarima no yɛ ne nnamfo paa. Yebetumi abisa sɛ: ‘Ná saa mmarima yi te dɛn? Fekubɔ bɛn na wɔne Yeremia nyae? Dɛn na na ɛma wɔyɛ nnamfo pa? Dɛn na wɔyɛ de boaa Yeremia ma ɔkɔɔ so kuraa ne mũdi mu?’ Momma yɛnhwɛ, bere a yɛn ankasa susuw yɛn tebea ho no.

12. (a) Sɛnea wɔayɛ ho mfonini wɔ kratafa 58 no, adwuma bɛn na na Yeremia ne Baruk nyinaa yɛ? (b) Ná hena ne Seraia, na dɛn na yenim fa ne ho?

¹² Ɛbɛyɛ sɛ Neria ba Baruk na na ɔyɛ odiyifo no adamfo paa. Yeremia nyaa Baruk mu ahotoso ma ɔkaa asɛm a Yehowa aka akyerɛ no no kyerɛɛ Baruk ma ɔkyerɛwee, na ɔmaa Baruk dii kan kenkan nsɛm a ɔkyerɛw wɔ nhoma mmobɔwee no mu no kyerɛɛ nkurɔfo no wɔ baguam, na ɛno akyi no, ɔkenkan kyerɛɛ Yudafo mpanyimfo no. (Yer. 36:4-8, 14, 15) Ná Baruk ne Yeremia nyinaa wɔ gyidi ne ahotoso sɛ nea Onyankopɔn aka no bɛbam. Ná wɔn baanu nyinaa afa basabasayɛ a ɛbaa Yuda so wɔ mfe 18 a etwa to mu no mu. Wɔn nyinaa de bere pii yɛɛ adwuma a na Onyankopɔn de ama wɔn no. Wɔn baanu nyinaa hyiaa nsɛnnennen, na na ɛho hia sɛ wɔde wɔn ho hintaw wɔn atamfo. Yehowa hyɛɛ wɔn mu biara nkuran. Ɛbɛyɛ sɛ na Baruk fi abusua bi a ɛwɔ Yuda a na emufo yɛ akyerɛwfo a wɔagye din mu. Kyerɛwnsɛm no frɛ no “ɔkyerɛwfo,” na na ne nua Seraia nso yɛ ɔbapɔmma wɔ ahemfie. Akyiri yi, Yeremia ne Seraia boom kaa Yehowa nkɔmhyɛ nsɛm no sɛnea ɔne Baruk yɛe no. (Yer. 36:32; 51:59-64) Ɛbɛyɛ sɛ sɛnea Neria mmabarima baanu yi fi wɔn pɛ mu ne Yeremia yɛɛ adwuma wɔ mmere a emu yɛ den mu no maa odiyifo no nyaa akokoduru ne nkuranhyɛ. Wo nso, wɔn a wɔde nokwaredi ne wo bom yɛ Yehowa som adwuma no betumi ama woanya akokoduru ne nkuranhyɛ.

13. Sɛnea wɔayɛ ho mfonini wɔ kratafa 63 no, dɛn na Ebed-Melek yɛe de kyerɛe sɛ ɔyɛ Yeremia adamfo pa ankasa?

¹³ Onipa foforo a na ɔyɛ Yeremia adamfo paa ne Ebed-Melek. Bere a mpanyimfo bi a na wɔn bo afuw tow Yeremia too abura bi a na nsu nnim mu sɛ onwu no, ɔbarima a onyaa akokoduru twitwa gyee no ne Ebed-Melek a na ɔyɛ ɔnanani a ofi Etiopia no. Ná ɔyɛ opiani, kyerɛ sɛ, na ɔyɛ adwuma wɔ ɔhene no fie. Ɔkɔɔ Sedekia a na ɔte Benyamin Pon ano no nkyɛn wɔ baguam. Ebed-Melek de akokoduru srɛɛ Sedekia sɛ ɔmma no kwan mma onkoyi Yeremia mfi abura a dontori wom no mu. Ebed-Melek faa mmarima 30 kaa ne ho kɔyɛɛ adwuma no, na eyi ma yehu sɛ na ɔhwɛ kwan sɛ Yeremia atamfo betumi abesiw wɔn kwan. (Yer. 38:7-13) Yɛrentumi nkyerɛ bere tenten a Ebed-Melek ne Yeremia bɔe. Nanso, esiane sɛ na wɔn nyinaa yɛ Yehowa nnamfo nti, yebetumi aka sɛ na wɔn baanu nyinaa yɛ nnamfo pa. Ná Ebed-Melek nim sɛ Yeremia yɛ Yehowa diyifo. Ebed-Melek kaa nea mpanyimfo no yɛe no ho asɛm sɛ ɛyɛ “bɔne,” na sɛ na nea ɛteɛ a ɔbɛyɛ no bɛma ne dibea afi ne nsa mpo a, na ɔpɛ no saa. Nokwarem no, na Ebed-Melek yɛ onipa pa. Yetumi hu sɛ na ɔyɛ onipa pa ampa efisɛ Yehowa ankasa hyɛɛ no bɔ sɛ: “Ɛda [a mmusu bɛba Yerusalem so] no, megye wo, . . . efisɛ wode wo ho too me so.” (Monkenkan Yeremia 39:15-18.) Hwɛ sɛnea wɔkamfoo no! So ɛnyɛ adamfo a ɔte saa na wopɛ?

14. Dɛn na yenim fa Safan abusua ne wɔne Yeremia fekubɔ ho?

¹⁴ Ná Safan mmabarima baasa ne ne banana barima nso yɛ Yeremia nnamfo. Ná wofi abusua a emu mmarima wɔ dibea paa mu, na na Safan asom sɛ Ɔhene Yosia kyerɛwfo pɛn. Bere a edi kan a na Yeremia atamfo pɛ sɛ wokum no no, ɛyɛ “Safan ba Ahikam nsa na edi boaa Yeremia, sɛnea ɛbɛyɛ na wɔremfa no nhyɛ ɔman no nsa.” (Yer. 26:24) Ná Ahikam wɔ nuabarima bi a wɔfrɛ no Gemaria. Bere a Baruk kenkan Onyankopɔn atemmusɛm wɔ baguam no, Gemaria ba Mikaia tee nea ɔkae no, na ɔkɔka kyerɛɛ ne papa ne mpanyimfo foforo. Esiane sɛ na wonim nea na Yehoiakim bɛyɛ nti, otuu Yeremia ne Baruk fo sɛ wonkohintaw. Na bere a ɔhene no antie Onyankopɔn asɛm no, na Gemaria ka nnipa a wɔsrɛɛ ɔhene no sɛ mma ɔnnhyew nhoma mmobɔwee no ho. (Yer. 36:9-25) Yeremia de krataa a nkɔmhyɛsɛm wom san maa Safan babarima foforo a wɔfrɛ no Elasa ma ɔde kɔmaa Yudafo a na wɔwɔ nkoasom mu wɔ Babilon no. (Yer. 29:1-3) Enti, yɛahu sɛ na Safan wɔ mmabarima baasa ne banana barima biako a wɔn nyinaa boaa Onyankopɔn diyifo no. Wo de, hwɛ sɛnea ɛbɛyɛ sɛ Yeremia ani sɔɔ mmarima a wɔte saa no! Ná wɔyɛ ne nnamfo, nanso na ɛnyɛ aduan, nsa, anaa anigyede bi na ɛma wɔbɛyɛɛ nnamfo. Ná wɔn nnamfofa no gyina nea ɛsen saa koraa so.

15. Nhwɛso pa bɛn na Yeremia ayɛ ama yɛn wɔ sɛnea yɛbɛpaw yɛn nnamfo mu?

¹⁵ Wubetumi asua biribi afi sɛnea Yeremia ne ne beresofo a na wɔyɛ abɔnefo ne apapafo no dii no mu. Ɔhene no, asahene, atoro adiyifo, ne mpanyimfo pii hyɛɛ Yeremia sɛ ɔnsesa asɛm a ɔka no. Nanso, Yeremia antie wɔn. Ɔsom kronn a Yeremia de maa Onyankopɔn no amma saa mmarima no ani annye no ho, nanso ɛnyɛ wɔn adamfofa na na ɔrehwehwɛ. Yehowa na na ɔyɛ n’adamfo pa bere nyinaa. Sɛ Onyankopɔn a na Yeremia bɛsom no nokware mu nti na na ɛbɛma nkurɔfo no atan n’ani a, ɛnde na ɔbɛpene so ma wɔayɛ no saa. (Monkenkan Kwadwom 3:52-59.) Nanso, sɛnea yɛahu no, na ɛnyɛ Yeremia nkutoo na wasi ne bo sɛ ɔbɛsom Yehowa.

16, 17. (a) Mmoa bɛn na Yehowa somfo betumi anya afi adamfo pa hɔ? (b) Ɛmfa ho ɔman a wote mu no, ɛhe na wubetumi anya nnamfo pa?

¹⁶ Yehowa mu gyidi ne ahotoso a na Ebed-Melek wɔ na ɛma ɔbɛyɛɛ adamfo pa. Saa ɔbarima yi de akokoduru yɛɛ ade ntɛm so de gyee Yeremia nkwa. Baruk fii ne pɛ mu ne Yeremia nantewee mfe pii, na ɔboaa no ma ɔkaa Yehowa asɛm no. Nnamfo pa a wɔwɔ Kristofo asafo no mu nnɛ nso som bo te sɛ saa mmarima no. Cameron a ɔyɛ daa kwampaefo a wadi mfe 20 no ani sɔ nhwɛso pa a Kara a ɔno nso yɛ daa kwampaefo no yɛe ma ɛboaa no no paa. Cameron ka sɛ, “Kara nam ne nhwɛso ne nsɛm a ɔka kyerɛɛ me so hyɛɛ me nkuran sɛ memfa Yehowa nni kan wɔ m’asetena mu.” Ɛwom sɛ na anuanom mmea baanu yi nte faako de, nanso na Kara kyerɛw Cameron anaa ɔne no kasa wɔ telefon so bere nyinaa hwɛ sɛ ne ho te dɛn, na na wɔhyehyɛ wɔn ho nkuran. Cameron kae sɛ: “Ná Kara nim nea na ɛrekɔ so wɔ m’abusua mu nyinaa. Ná onim nea ɛrekɔ so wɔ me nuabea panyin asetena mu ne sɛnea midii yaw bere a me nuabea no tew atua na ofii nokware no mu no. Eyinom nyinaa mu no, Kara annyaw me, na sɛ ɛnyɛ ne nhwɛso pa ne ne mmoa a, anka minnim nea mɛyɛ. Nokwasɛm ne sɛ, waboa me yiye.”

¹⁷ Wubetumi anya nnamfo pa a wɔyɛ w’atipɛnfo ne wɔn a wɔnyɛ w’atipɛnfo wɔ Kristofo asafo no mu. Wo nuanom mmarima ne mmea yi ne wo wɔ gyidi biako, wɔbɔ bra pa, wɔdɔ Yehowa, wɔwɔ anidaso a wowɔ no bi, na ebia wɔahyia sɔhwɛ ahorow a ɛte sɛ nea worehyia no bi. Wubetumi ne wɔn abom ayɛ Kristofo som adwuma no. Sɛ worehyia nsɛnnennen bi a, wobetumi ahyɛ wo den, na ebi to wɔn nso a, wo nso wubetumi ahyɛ wɔn den. Sɛ w’ani gye wɔ Yehowa som adwuma no mu a, wɔne wo bɛbom adi ahurusi. Bio nso, nnamfofa a ɛte saa betumi atena hɔ daa.—Mmeb. 17:17; 18:24; 27:9.

18. Dɛn na wusua fi sɛnea Yeremia paw ne nnamfo no mu?

¹⁸ Ɛda adi sɛ yebetumi asua biribi afi sɛnea Yeremia paw ne nnamfo no mu. Mma wo werɛ mmfi saa nokwasɛm yi: Worentumi ne nnipa a wɔn gyidi ne Bible nkyerɛkyerɛ nhyia mmɔ fekuw na worenkɔ so ara nkura wo gyidi mu. Saa nokwasɛm yi a yɛbɛma atena yɛn adwenem nnɛ no ho hia paa sɛnea na ɛho hia wɔ Yeremia bere so no. Ná Yeremia wɔ ɔpɛ sɛ ɔbɛyɛ soronko wɔ nnipa dodow no ara a na wɔwɔ ne bere so no mu, sɛnea ɛbɛyɛ a ɔde nokwaredi bɛyɛ n’adwuma na ama wanya Yehowa nhyira. So ɛnyɛ saa na wo nso wopɛ sɛ woyɛ? Nnipa a Yeremia faa wɔn nnamfo no yɛ wɔn a na wɔne no wɔ gyidi biako na wɔboaa no ma ɔyɛɛ n’adwuma no. Nokwarem no, Kristoni nokwafo biara a ɔwɔ hɔ nnɛ betumi asua biribi afi sɛnea Yeremia paw ne nnamfo nyansam no mu!—Mmeb. 13:20; 22:17.