Yehowa​—‘Ɔdɔmmarima’

NA WƆATƆRE Misrifo asraafo dɔm a wonim akodi yiye no ase. Na asɔrekye ma nteaseɛnam kafo ne asraafo a wɔtra apɔnkɔ so afunu kɔ soro ba fam wɔ Po Kɔkɔɔ no ani, na na asraafo nneɛma abɔ apete mpoano hɔ. Israelfo a Mose di wɔn anim no de ahurusi too nkonimdi dwom sɛ: “Mɛto [Yehowa] dwom, na ɔma na wama ne ho so, ɔpɔnkɔ ne ne sotefo no, na watow wɔn agu po mu. [Yehowa] yɛ dɔmmarima, [Yehowa] ne ne din.”​—Exodus 15:1, 3.

Yehowa nkonimdi wɔ Po Kɔkɔɔ no mu no yɛ sɛnea onim akodi sen biara a ɔdaa no adi ankasa. Na Israelfo de mpasuatwa afi Misraim, nanso na wonnim akodi kɛse. Na Yehowa nam omununkum dum a ɛdan ogya dum anadwo so adi wɔn anim afi Rameses akɔ Etam “wɔ sare no ano.” (Exodus 12:37; 13:18, 20-22) Afei Yehowa ka kyerɛɛ Mose sɛ: “Ka kyerɛ Israelfo ma wɔnnan nkɔbɔ nsra wɔ Pi-Hahirot anim wɔ Migdol ne po ntam, wɔ Baal-Sefon anim. . . . Na Farao bɛka Israelfo ho sɛ: Wɔrewɔ asase no so ntwɛtwɛdɛ, sare aka wɔn atom. . . . [Na obetiw] wɔn.” (Exodus 14:1-4) Israelfo no de osetie dan wɔn ho kɔɔ Pi-Hahirot. Farao akwansrafo no kɔkaa nea ɛte sɛ na wɔrewo ntwɛtwɛdɛ ho asɛm kyerɛe, na sɛnea wɔka siei no, Farao boaboaa n’asraafo ano tiw wɔn.​—Exodus 14:5-9.

Afiri​—Ma Israel Anaasɛ ma Farao?

Bere a na mmepɔw a ɛwɔ nifa ne benkum so aka wɔn ahyɛ ntam, na ɛpo no wɔ wɔn anim na Misrifo no wɔ wɔn akyi no, na ɛte sɛ nea Israelfo a ehu aka wɔn no atɔ afiri mu, enti wosu frɛɛ Onyankopɔn sɛ ɔmmoa wɔn. Mose boaboaa nnipa no ano, na ɔkae sɛ: “Munnsuro, munnyina pintinn, na monhwɛ [Yehowa] nkwagye a ɔde rebɛkyerɛ mo nnɛ, na Misrifo a muhu wɔn yi, morenhu wɔn da biara da bio. [Yehowa] bɛko ama mo, na mo de monyɛ komm!” (Exodus 14:10-14) Sɛnea saa bɔhyɛ no daa no adi no, “omununkum dum no fii wɔn anim begyinaa wɔn akyi, na ebefii Misraim dɔm ne Israel dɔm no ntam. . . . Na amma eyinom antumi ammɛn eyinom anadwo no nyinaa.”​—Exodus 14:15-20.

Sɛnea Yehowa kyerɛe no, Mose de ne poma no kyerɛɛ po no so, na “mu baee” na ama Israelfo no atumi aguan. Na afei anwonwade bi sii! (Exodus 14:16, 21) Apuei fam mframa dennen bi fii ase baee Po Kɔkɔɔ no mu nsu no mu, na ɛyɛɛ ɔkwan a ɛso yiye a ɛbɛma ɔman mũ no nyinaa​—bɛyɛ ɔpepem abiɛsa​—de mpasuatwa afa mu. Na nsu “ekuw” no gyinae te sɛ afasu akɛse abien wɔ Israelfo no benkum ne nifa so.​—Exodus 15:8.

Israelfo a na ogya dum no hann boa wɔn no guan faa ɛpo a mframa ama emu ayow no mu. Bere a ade kyee no, na Israelfo a wotwa to no apue wɔ nsu no agya. “Na Misrifo no tiw wɔn, na wodii wɔn akyi kɔɔ ɛpo no mfinimfini.” Na ataafo no atu mmirika akɔtɔ afiri mu.​—Exodus 14:23.

“[Yehowa] maa Misraim dɔm no ho yeraw wɔn, na ohunhuan wɔn nteaseɛnam anan maa ne nantew mu yɛɛ duru.” Afei Mose teɛɛ ne nsa ɛpo no so, na “ɛpo no san n’akyi bɛsenee sɛnea ɛte.” Nsu no afasu no dwiriw na efii ase kataa Misrifo no so. Wɔbɔɔ mmɔden sɛ wobeguan, “na [Yehowa] kaa wɔn guu po no mfinimfini.” Wɔn mu biako mpo anka! Israelfo no de ahurusidi too wɔn nkonimdi dwom maa Yehowa.​—Exodus 14:24-15:3; Dwom 106:11.

Yehowa Ko ma Yosua

Yehowa daa ne ho adi sɛ ɔyɛ ‘ɔdɔmmarima’ wɔ ɔsa afoforo mu. Na biako ne Ai ɔsa no. Kurow no so ntua a edi kan no dii nkogu esiane Akan bɔne a anibere wom no nti. Bere a wodii eyi ho dwuma no, Yehowa de ɔko ho ahyɛde maa Yosua.​—Yosua 7:1, 4, 5, 11-26; 8:1, 2.

Esiane sɛ Yosua dii Yehowa akwankyerɛ so nti, ɔma wɔkɔtɛw kurow no akyi anadwo, wɔ n’atɔe fam. Ɔde n’asraafo dɔm no ankasa kɔɔ apuei fam wɔ obon bi mu wɔ Ai akyi pɛɛ, na wosiesiee wɔn ho maa ntua a ebefi wɔn anim tee aba no. Afiri no yii Ai mmarima no. Esiane sɛ na wɔda so ara di ɔko a edi kan no mu nkonim a wodii no ho ahurusi kɛse nti, wopue fii kurow no mu sɛ wɔrebehyia Israelfo no ne wɔn ako. Israelfo no yɛɛ wɔn ho sɛ wɔresan wɔn akyi, na wɔkɔfaa “sare so kwan so” san twee atamfo no fii Ai ho bio.​—Yosua 8:3-17.

Wɔ bere a ɛsɛ mu ara pɛ no, Yehowa ka kyerɛɛ Yosua sɛ: “Teɛ peaw a ɛwɔ wo nsam no kyerɛ Ai, na mede mɛhyɛ wo nsa.” Bere a ɔyɛɛ sɛnkyerɛnne yi no, mmarima a wɔakɔtɛw no tow hyɛɛ kurow no so, wɔde nkrante kunkum mufo na wɔde ogya toom. Bere a atamfo dɔm a wɔwɔ kurow no akyi huu wusiw no, wɔn aba mu bui koraa. Bere a Yosua dan n’ani bɛtow hyɛɛ wɔn so no, ɔkaa ɔtamfo no hyɛɛ n’asraafo dɔm abien no ntam. Nkonim a onipa ma wodii? Dabi. Israelfo no dii nkonim efisɛ, sɛnea Yosua ka kyerɛɛ wɔn akyiri yi no: “[Yehowa] mo Nyankopɔn no, ɔno na ɔko maa mo.”​—Yosua 8:18-27; 23:3.

Kison Ɔsa No

Sɛnea Yehowa nim akodi sen biara no daa adi bio wɔ Kison Bon mu, wɔ Megido ho. Na Kanaan hene Yabin ahyɛ Israel so mfe 20. Na ɔwɔ dade nteaseɛnam 900 ka n’asraafo a wɔn safohempanyin ne Sisera no ho​—saa nna no mu asraafo dɔm a ɛte sɛ nea wontumi nni wɔn so nkonim.​—Atemmufo 4:1-3.

Nanso, Yehowa nam odiyifobea Debora so ka kyerɛɛ Ɔtemmufo Barak sɛ ɔmmoaboa akofofo ɔpedu ano wɔ Tabor Bepɔw so na wɔne Yabin asraafo dɔm no nkɔko. Sisera yɛɛ asraafo a ɔboaboaa wɔn ano yi ho ade ntɛm, ɔyɛɛ ntɛm fii Haroset kɔɔ Kison nsunoa wɔ Tabor Bepɔw ne Megido ntam. Akyinnye biara nni ho sɛ osusuwii sɛ Israel asraafo a wɔnam fam a wonni akode pii no rentumi ne nteaseɛnam no nko wɔ asase tamaa so wɔ hɔ. Nanso, wanhu sɛ ɔreko atia ɔsoro Tamfo bi.​—Atemmufo 4:4-7, 12, 13.

Yehowa hyɛɛ Barak ma osian fii Tabor atifi a ahobammɔ wɔ no kɔɔ obon no mu asase tamaa no so, na ɛmaa Sisera asraafo no ne no bɛkoe. Afei Yehowa de ne ho gyee mu! Mpofirim nsuyiri bi maa akono hɔ dan atɛkyɛ, na ɛmaa Sisera asraafo no kaa faako. Wɔ ehu a ɛkaa wɔn mu no, Israel asraafo a wɔnam fam no sɛee wɔn atamfo no pasaa a wɔammrɛ ho. “Na Sisera dɔm nyinaa totɔe nkrante ano, anka obiako pɛ.” Na Kison mu nsu a ayiri no ama Kanaanfo nteaseɛnam no atim atɛkyɛ mu, na ebia ɛsesaw funu no bi kɔe.​—Atemmufo 4:14-16; 5:20, 21.

Gog ne Ne Dɔm so Nkonimdi

Nsɛm a esisii tete yi yɛ Yehowa nkonimdi a ɛsen biara a ennya mmae no ho mfonini. Nea ɛbɛba nnansa yi ara ne ɔko bi a ebesi wɔ “mfe a edi akyiri no mu.” Sɛnea Hesekiel nkɔmhyɛ no kyerɛ no, Gog, “wi yi ase sodifo” a ɔne Satan Ɔbonsam no bɛboaboa amanaman mu ntua dɔm bi ano. Ɔbɛma n’asraafo atow ahyɛ sɛnkyerɛnne kwan so “Israel mmepɔw,” Kristofo “Onyankopɔn Israel” honhom mu trabea a wɔapagyaw no so.​—Hesekiel 38:1-9; Yohane 12:31; Galatifo 6:16.

Dɛn na ɛsɔ Gog hwɛ ma enti ɔde ntua kɛse yi ba Onyankopɔn nkurɔfo so? Nkɔmhyɛ no twe adwene si wɔn asomdwoe, honhom mu tebea a yiyedi wom no so. Gog se: “Mɛforo makɔ asase a ano da hɔ no so makotua wɔn a wɔwɔ hɔ komm a wɔte hɔ dwoodwoo no, wɔn nyinaa tete hɔ a wonni ɔfasu, na wonni aponkɛse ne akyiri adaban, sɛ worekɔfa asade na woafow afow ade . . . [afi] ɔman a . . . wɔanya [ahode] ne nneɛma.”​—Hesekiel 38:10-12.

Yehowa nkurɔfo nyɛ adefo wɔ honam fam. Nanso, wɔn wiase nyinaa asɛnka adwuma no ama wɔanya honhom mu ahode bebree. Wɔaboaboa “nnipakuw kɛse a . . . wofi aman . . . nyinaa mu” ano, na mprempren wɔn dodow boro ɔpepem anan. (Adiyisɛm 7:9, 10) Ahode bɛn ara ni! Esiane sɛ Satan​—afa honhom mu yiyedi yi ho abufuw nti​—ɔbɔ mmɔden sɛ ɔbɛtɔre Onyankopɔn nkurɔfo ase.

Nanso bere a Gog retow ahyɛ Israel sɛnkyerɛnne kwan so asase so no, na ɔretow ahyɛ Yehowa ankasa so. Yehowa a ɔbɛtɔ ne so werɛ ama ne nkurɔfo no se: “M’abufuw mu yamgya bɛdɛw.” Basabasayɛ bɛma Gog asraafo dɔm no ase atɔre. “Wɔn nyinaa nkrante, obi de bɛka ne nua.” Afei Yehowa da ne ɔsɛe tumi no adi​—“nsu a ehwie na ɛsram so ne amparuwbo, ogya ne sufre.” Sɛnea Yehowa yɛe wɔ Po Kɔkɔɔ no mu, Ai, ne Kison no, Yehowa bɛsan ako ama ne nkurɔfo bio na wahyɛ ne din anuonyam. “Na mɛyɛ me ho kɛse na mayɛ me ho kronkron, na mama wɔahu me, amanaman bebree anim, na wɔahu sɛ mene [Yehowa].”​—Hesekiel 38:18-23.

Yehowa akodi wɔ tete mmere mu ho abakɔsɛm kyerɛwtohɔ no ma yehu nea enti a ɛsɛ sɛ yenya saa daakye nkonimdi wɔ “ahohiahia kɛse” no mu yi mu ahotoso koraa no. (Mateo 24:21, 22) Esiane sɛ Yehowa wɔ nneɛma so tumi bere nyinaa nti, obetumi adwen asen n’atamfo na wadannan tebea horow de agye ne nkurɔfo nkwa. Yesaia hyɛɛ nkɔm sɛ: “[Yehowa] befi adi sɛ dɔmmarima, ɔbɛhwanyan n’abufuw mu sɛ ɔkofoni; obehuro, ɔbɛbɔ ose; obedi n’atamfo so abaninsɛm.” (Yesia 42:13) Ɔbɛkɔ so ayɛ YEHOWA, ‘ƆDƆMMARIMA’ mmere nyinaa wɔ n’Adansefo ani so!​—Exodus 15:3.

[Asase mfonini wɔ kratafa 25]

(Wopɛ nsɛm a wɔahyehyɛ no nyinaa a, hwɛ nhoma no mu)

Ɔkwan a wɔde fii Misraim

GOSHEN

Memphis

Rameses

Succoth

Migdol

Pihahiroth

Etham

[Mfonini wɔ kratafa 26]

Wɔ Ai mpɔtam ha na Yehowa dii Yosua ne Ne nkurɔfo anim ma wodii nkonim kɛse

Kison mu nsu yirii ntɛmntɛm, na ɛboa ma wodii Yehowa atamfo so nkonim

[Mfonini Fibea]

Photos: Pictorial Archive (Near Eastern History) Est.