Onyankopɔn Ahenni ‘Ba’​—Bere Bɛn?

 1. (a) Dɛn nti na ɛsɛ sɛ ‘yɛkɔ so twɛn’ awiei no? (b) Ɔkwan bɛn so na yebetumi ‘ahyɛ yɛn som anuonyam,’ na ahotoso bɛn na yɛde bɛyɛ saa?

BERE bɛn pɔtee na yebetumi ahwɛ kwan sɛ Ahenni bɔhyɛ ahorow no benya mmamu ankasa? Ebinom a wɔasom Yehowa nokwaredi mu bɛyɛ mfirihyia 20, 30, 40 anaa nea ɛboro saa fam no, ebia “awiei” no bɛyɛ te sɛ nea akyɛ. Nanso kae nea Onyankopɔn diyifo Habakuk ka kyerɛ yɛn no: “Sɛ ɛtwentwɛn ase nso a, twɛn no ara, na ɔba de ɛbɛba, ɛrenka akyiri.” (Habakuk 2:3) Ɛho nhia sɛ yedi kan hu “da no ne dɔn” a “ahohiahia kɛse” no bɛpae agu wiase yi so wɔ n’abufuhyew nyinaa mu no. Mprempren no nea ɛho hia ne sɛ ‘yɛbɛhyɛ yɛn som anuonyam’ denam ahenni a wɔde asi hɔ no ho asɛmpa a yɛde nsiyɛ bɛka akyerɛ no so. Efisɛ yebetumi anya ahotoso sɛ, bere a wɔaka Ahenni ho asɛm no akyerɛ akodu baabi a Yehowa hwehwɛ no, ɛno na “awiei no bɛba.”​—Mateo 24:14, 21, 36; Romafo 11:13.

 2. (a) Ɛdefa bere ho akontaa a Yehowa bu ho no, dɛn na ɛyɛ anigye? (b) Bere bɛn, ne dɛn na Yudafo nhyehyɛe no “nna a edi akyiri” no de fii ase?

² Ɛdefa bere ho akontaa a Yehowa bu ho no, saa nokwasɛm yi yɛ nea ɛyɛ anigye: Sɛ Yehowa dii kan daa bere a mmere atitiriw abien wɔ adesamma abakɔsɛm mu de besi nnɛ bere yi befi ase adi. Eyinom yɛ mmere bɛn? Abien no nyinaa yɛ atemmu mmere. Mmere yi mu nea edi kan ne Yudafo nneɛma nhyehyɛe no “nna a edi akyiri” no, na ɛde Yesu asubɔ ne sra a wɔsraa no sɛ Mesia no na efii ase. (Yoel 1:15; 2:28-32; Asomafo no Nnwuma 2:17) Daniel nkɔmhyɛ a wodii kan kyerɛw too hɔ bɛboro mfirihyia 500 no daa no adi sɛ afe 29 Y.B. na saa “nna a edi akyiri” no fii ase. Ɔkwan bɛn so?

Yudafo “Nna a Edi Akyiri” No Ho Akontaabu

 3, 4. (a) Dɛn ne “adapɛn aduɔson” no, bere bɛn na efii ase, na ɛbaa awiei bere bɛn? (b) Dɛn na ɛhyɛɛ ‘dapɛn a ɛyɛ mfepɛn a etwa to no agyirae sɛ nea ɛho hia?

³ Wɔ Daniel 9:24-27 no, yɛkenkan ‘adapɛn aduɔson a ɛyɛ mfe,’ anaasɛ mfirihyia a ne nyinaa yɛ 490, a efi ase ‘fi asɛm a ɛka sɛ wɔnsan nkyekye Yerusalem nsi n’ananmu’a no ho asɛm. Ɛne bere bɛn? Bible kyerɛwtohɔ a ɛwɔ Nehemia 2:1-7 no ka sɛ Persia ‘hene Artasasta afe a ɛto so aduonu’ no mu na ɔhene no ankasa ka kyerɛɛ ne nsahyɛfo a ɔyɛ Yudani, Nehemia, sɛ ɔnsan nkɔ n’agyanom kurom na ‘ɔnkɔkyekye bio.’ Sɛnea wiase abakɔsɛm kyerɛ no, saa “Artasasta afe a ɛto so aduonu” yi bɛyɛ 455 A.Y.B. Sɛ yɛkan mfirihyia 490 fi saa bere no a, ebesi afe 36 Y.B. Daniel nkɔmhyɛ no kyerɛ yɛn sɛ ‘dapɛn a ɛyɛ mfepɛn’ a etwa to, 29-36 Y.B., yɛ nea ɛho hia titiriw. Na dɛn ntia?

⁴ Efisɛ “efi asɛm a ɛka sɛ wɔnsan nkyekye Yerusalem nsi n’ananmu no fi so kosi Obirɛmpɔn a wɔasra no [Mesia] so yɛ adapɛn ason, [ne] adapɛn aduosia abien [nso].” Enti na Mesia no bɛba wɔ saa dapɛn a ɛto so aduɔson a ɛyɛ mfepɛn no mfiase. Ná eyi nso bɛhyɛ Yudafo nneɛma nhyehyɛe no “nna a edi akyiri” no mfiase agyirae, wɔ mfirihyia ason a edi kan atemmu bere a Mesia no bɛhyɛ Abraham apam wɔ saa Yudafo a wogyee no toom no so mu den no. Saa dapɛn a ɛyɛ mfepɛn no “fã mu,” a ɛne 33 Y.B. mu no, “wobetwa” Mesia no “akyene” wɔ owu mu, n’ankasa ne pɛ mu a ofi bɔ bɔne ho mpata afɔre kɛse a ‘ɛma afɔrebɔ ne ayɛyɛdema [sɛnea Israel mmara no te] gyae’ sɛ ade a ɛho nni mfaso bio.​—Hebrifo 10:12, 18.

 5. (a) Dɛn na ɛkyerɛ sɛ na Yudafo no nim “adapɛn aduɔson” no ho asɛm yiye? (b) Dɛn nti na Yudafo no anidaso yɛɛ ɔkwa? (d) Ɛdaa adi sɛ Daniel nkɔmhyɛ no yɛ nokware dɛn?

⁵ Akyinnye biara nni ho sɛ na Yudafo no nim “adapɛn aduɔson” bere no ho asɛm yiye, efisɛ Bible kyerɛwfo Luka, ka kyerɛ yɛn sɛ saa bere no mu no na ‘ɔman no rehwɛ’ Kristo ‘no kwan.’ (Luka 3:15) Nanso, na wɔn anidaso ahorow no gyina ɔhene-kofoni nuonyamfo bi a ɔbɛba, a obedi Yudafo no anim akodi Romafo a wɔhyɛ wɔn so no so nkonim so. Wɔn gyidi no anyɛ nea ɛbɛma wɔagye adi sɛ “wobetwa” Mesia no “akyene,” wobekum no, wɔ 33 Y.B. mu. Na saa ara na wɔantie nkɔmhyɛ mu kɔkɔbɔ sɛ “ɔsɛe pasaa” bɛba Yerusalem ne emufo so bio no. Nanso hwɛ nokware ara a Daniel nkɔmhyɛ no yɛe bere a Roma asraafo wɔ Ɔsahene Tito ase sɛee Yerusalem wɔ 70 Y.B. mu no!

Wiase Nyinaa “Nna a Edi Akyiri”​—Bere Bɛn?

 6. Bere foforo bɛn na Yehowa dii kan daa no adi, na sɛ́ dɛn mfiase?

⁶ Nanso, dɛn ne bere foforo no mfiase a Yehowa fi ayamye mu dii kan daa no adi no? Ɛyɛ Satan wiase no nneɛma nhyehyɛe no nyinaa “nna a edi akyiri” mfiase. (2 Timoteo 3:1-5) Eyi ne “mmere a emu yɛ den” a efii ase wɔ wiase nyinaa afe 1914 Y.B. mu no.

 7, 8. (a) Bible asuafo a wɔbɔ mmɔden abu saa bere no dɛn fi 1880, ne de besi 1980 mfe yi mu? (b) Nnipa a wɔyɛ animdefo wɔ wiase no mu nsɛm bɛn nso na atwe adwene asi 1914 so?

⁷ Mfirihyia 34 ansa na 1914 reba no, na Bible asuafo a wɔbɔ mmɔden rehwɛ saa bere no kwan. Ná Ɔwɛn-Aban no taa twe adwene si nea ɛkyerɛ no so efi afe 1880 reba no. Na mprempren, 1914 akyi mfirihyia 68 no, yɛhwɛ yɛn akyi na yɛkae saa afe no sɛ nea ɛkyerɛ biribi. Ɛnyɛ yɛn nkutoo na eyi te saa ma yɛn. Ɔkyerɛwfo nimdefo biako kaa 1914 ho asɛm sɛ afe a “sɛnea na wonim wiase no na wogye tom saa bere no baa awiei”b Ɔfoforo nso kaa 1914 ho asɛm sɛ ɛno na efii “nnɛ bere a obiara nim no yiye sɛ . . . ebetumi akowie ɔsɛe kɛse mu” no ase.c​—Hwɛ nhoma “Let Your Kingdom Come” no nso mu, nkratafa 127-140, 186-189.

⁸ Nea ɛboro mfirihyia 50 wɔ 1914 akyi no, Germanni ɔmanyɛfo Konrad Adenauer kae sɛ: “Nsusuwii ne mfonini ahorow ba m’adwene mu, . . . nsusuwii ahorow a efi bere bi ansa na afe 1914 reba, bere a ná asomdwoe, kommyɛ ne dwoodwoo asetra ankasa wɔ asase yi so no ​—bere a na yennim ehu no. . . .Dwoodwoo asetra ne kommyɛ ayera afi nnipa asetra mu fi 1914.” Na nnansa yi ara wɔ November 1980 mu no, Engiresini ɔmanyɛfo Harold Macmillan buu kɔmpɔ hwɛɛ n’akyi wɔ mfirihyia 86 a ɔde atra ase no mu na ɔde awerɛhow kaa ɔhemmaa Victoria bere so nkɔso kɛse no ho asɛm. Ɔkae sɛ: “Biribiara bɛkɔ so ayɛ yiye. Ɛno ne wiase a wɔwoo me wɔ mu. [Nanso] mpofirim ara a yɛnhwɛ kwan, anɔpa bi wɔ 1914 mu no ade mũ no nyinaa baa awiei.”

 9. (a) Ɛyɛɛ dɛn na Bible asuafo dii kan hui sɛ afe 1914 betumi ayɛ nea ɛkyerɛ biribi? (b) Daniel nkɔmhyɛ a ɛwɔ ti 4 no nkyerɛase bɛn na ɛde adwene yi bae?

⁹ Ɛyɛɛ dɛn na Bible asuafo mmɔdenbɔfo a mprempren wɔfrɛ wɔn Yehowa Adansefo dii kan hui wɔ mfirihyia 34 mu sɛ 1914 befi nsakrae a ɛte saa ase? Efisɛ na “akoa nokwafo ne ɔbadwemma” (Mateo 24:45-47) a emufo yɛ Kristofo a wɔasra wɔn a wɔresom wɔ wɔn Wura, Yesu Kristo ase no, de Petro Nhoma a Etia Abien 1:19 no mu nsɛm ‘rehwɛ adiyi asɛm no yiye sɛ ɔkanea a ɛharan baabi a ɛhɔ yɛ kusuu.’ Ɛdenam nkɔmhyɛ a ɛwɔ Daniel ti 4 no so no, wobehui sɛ Ɔhene Dawid ahengua a ɛwɔ Yerusalem a wotu gui wɔ 607 A.Y.B. mu no, renkyerɛ Yehowa nniso wɔ asase so no awiei koraa. Onyankopɔn ahenni tumi “dua” no bɛfefɛw bio. Bere a amanaman no nniso a ɛte sɛ aboa de wɔ asase so no akɔ so “mmere nson” anaasɛ mfirihyia 2,520 akyi no, wobehu bio sɛ: “Nea ɔwɔ ɔsoro [no] na odi nnipa ahenni so tumi, na ɔde ma obiara a ɔpɛ, na ɔde nnipa mu hobrɛasefo si so.”​—Daniel 4:14-17.

10. Ɔkwan bɛn so na ɛsono Mesia no ba wɔ 1914 mu no wɔ ne ba a edi kan no ho?

¹⁰ Yiw, ná saa afe 1914 a emu yɛ hu no mu na ‘Ɔhobrɛasefo’ a wɔ ne ba a edi kan sɛ Mesia no mu no, ‘wotwaa no kyenee’ yayaayaw ‘a anka no hwee’ no bɛsan aba. Nanso saa bere yi de ná Kristo bɛba honhom mu, wɔ ɔsoro anuonyam mu, a abɔfo kronkron no nyinaa ka ne ho, na “ɔbɛtra n’anuonyam ahengua so.”​—Daniel 9:26; Mateo 25:31.

1914 “Awo Ntoatoaso” No

11. (a) “Awo ntoatoaso” bɛn na ɛrentwam ansa na nneɛma a Yesu ka too hɔ no aba? (b) Dɛn na saa “awo ntoatoaso” yi mufo a wɔaka no bɛhwɛ kwan sɛ wobehu?

¹¹ Saa bere no a Kristo ba a waba, anaasɛ parousia fii ase no, wɔamfa ɔdesani aniwa anhu no. Nanso saa 1914 awo ntoatoaso no huu nea esii wɔ asase so ha no sɛ ne ba a waba no ho “sɛnkyerɛnne” ne sɛ “awerɛhow ahorow mfiase” ma adesamma no! (Mateo 24:8, Authorized Version) Na saa 1914 awo ntoatoaso no mufo a wɔaka no da so ara reka ho asɛm. Wɔn mu binom bɛka ho asɛm ara akosi bere a “ahohiahia kɛse” no bɛpopa Satan nneɛma nhyehyɛe bɔne no afi yɛn asase yi ani. Efisɛ Yesu Kristo ankasa ma yɛn awerɛhyem sɛ: “Nokware mise mo sɛ, awo ntoatoaso yi [awo ntoatoaso a ehuu ‘awoko yaw mfiase’ wɔ 1914 mu no] rentwam [koraa], gye sɛ eyinom nyinaa aba mu ansa. Ɔsoro ne asase betwam akɔ, na me nsɛm de, ɛrentwam da.”​—Mateo 24:3, 8, 34, 35.

12. (a) Nsɛm a asisi fi 1914 mu bɛn na ɛsɛ sɛ ɛma yegye nokware a nkɔmhyɛ yɛ no di? (b) Nanso, wɔato yɛn gyidi no sɛkyɛ wɔ dɛn mu? (d) Dɛn so na “asɛmpa” no twe adwene si?

¹² “Awerɛhow ahorow” a wɔka too hɔ sɛ ebefi ase 1914 mu no pae guu wiase no so mpofirim ara. Na ɛkɔ so ara kã adesamma! Ɛde “sɛnkyerɛnne” a emu da hɔ ma sɛ 1914 hyɛɛ “nneɛma nhyehyɛe no awiei” mfiase agyirae. Nanso, yɛn gyidi no nyɛ nea egyina bere ara kwa, te sɛ 1914 so. Wɔato yɛn gyidi no sɛkyɛ denneennen wɔ Onyankopɔn asɛm no nyinaa mu, wɔ “asɛmpa” a Yesu ne n’asuafo no dii kan kae no mu, wɔ Bible nkɔmhyɛ ahorow pii mmamu a ɛyɛ nwonwa, wɔ yɛn bere yi mu, ne ne titiriw no sɛnea eyinom fa “akoa nokwafo ne ɔbadwemma” no ne ne mfɛfo adwumayɛfo no ho na ɛda wɔn adi ho no. “Ahenni no ho asɛmpa yi,” Bible mu asɛm no nyinaa, na ɛyɛ yɛn gyidi nhyɛase. Eyi nyinaa de adwene si Yesu Kristo, Onyankopɔn Ba, a ɔsomaa no baa asase so sɛ ommegye adesamma, a mprempren ɔredi hene anuonyam mu wɔ ɔsoro ahenni a wɔde asi hɔ no mu no so. (Mateo 24:3, 14, 45-47; 25:31-33; Adiyisɛm 19:10) Esiane sɛ yɛwɔ gyidi nti, yebetumi ahu sɛnea Ahenni no ‘bɛba’ abegye wɔn a wɔdɔ na wɔyɛ ade trenee nyinaa. Ɛbɛyɛ dɛn na ɛno ayɛ hɔ?

[Ase hɔ nsɛm]

[Kratafa 17 adaka]

‘ADAPƐN ADUƆSON A ƐYƐ MFE’ (Daniel 9:24-27)

EFI bere a Persia hene kaa asɛm no kyerɛɛ Nehemia wɔ 455 A.Y.B.

455 - 1 A.Y.B. = mfe 454

1 A.Y.B. - 1 Y.B. = afe 1

1 Y.B. - 36 Y.B. = mfe 35

455 A.Y.B. - 36 Y.B. = mfe 490

‘Wotwa Mesia no kyene wɔ dapɛn no fã mu,’ April 33 Y.B.

KOSI ɔdom titiriw ma Yudafo no awiei wɔ 36 Y.B. mu bere a Kornelio ne ne fifo nyaa adwensakra no

[Kratafa 18 adaka]

“AMANAMAN NO MMERE A WƆAHYƐ” (Daniel 4:14-25; Luka 21:24-26)

Wogu Yehowa Ahenni mpokyerɛ bere a Amanaman Mmere no fi ase, 607 A.Y.B.

“MMERE NSON” = 7x360 = mfe 2,520

(Hwɛ Adiyisɛm 12:6,14; Hesekiel 4:6b)

607 - 1 A.Y.B. = mfe 606

1 A.Y.B. - 1 Y.B. = afe 1

1 Y.B. - 1914 Y.B. = mfe 1,913

607 A.Y.B. - 1914 Y.B. = mfe 2,520

Wɔsan de Yehowa Ahenni si hɔ wɔ Mesia Ahenni mu, 1914 Y.B.

[Kratafa 18 adaka]

“Adɛn nti na amanaman yɛ gyegyeegye, na aman susuw ade hunu? Asase so ahene sɔre gyina, na atumfo bom tu agyina hyɛ Yehowa ne nea wasra no no. Momma yemmubu wɔn mpokyerɛ; na yɛntow wɔn nhama mfi yɛn ho ngu. Nea ɔte soro no serew, Yehowa di wɔn ho fɛw. Ɛno na ɔbɛkasa akyerɛ wɔn n’abufuw mu, na ɔde n’abufuhyew beyi wɔn hu. Mumfew ɔba no ano, na ne bo amfuw, na moanyera ɔkwan mu; na aka kakra na n’abufuw adɛw. Nhyira ne wɔn a woguan toa no nyinaa.”​—Dwom 2:1-5, 12