Hann a Epue wɔ Asomafo no Mmere So

“Hann [apue] ama ɔtreneeni, ne anigye ama koma mu teefo.”—DWOM 97:11.

 1. Ɔkwan bɛn so na nnɛyi Yehowa Adansefo sɛ tete Kristofo no?

HWƐ sɛnea yɛn nokware Kristofo ani sɔ Dwom 97:11 mu nsɛm no kɛse! ‘Hann apue’ ama yɛn mpɛn pii. Nokwarem no, yɛn mu bi ahu Yehowa hann a apue no mfe du du pii ni. Eyi nyinaa ma yɛkae Mmebusɛm 4:18, a ɛkenkan sɛ: “Treneefo kwan te sɛ owia hann, ɛkɔ so hyerɛn kodu awia ketee.” Esiane anisɔ a yɛn Yehowa Adansefo wɔ ma Kyerɛwnsɛm no mmom sen atetesɛm nti, yɛsɛ tete Kristofo no. Yebetumi ahu wɔn nneyɛe afi Kristofo Hela Kyerɛwnsɛm mu abakɔsɛm nhoma ahorow ne emu nkrataa a wofi Onyankopɔn home mu kyerɛwee no mu pefee.

 2. Hann a edii kan puei a Yesu akyidifo nyae no bi ne dɛn?

² Hann a epuei a Yesu Kristo tete akyidifo nyae no bi ne nea na ɛfa Mesia no ho no. Andrea ka kyerɛɛ ne nua Simon Petro sɛ: “Yɛahu Mesia no.” (Yohane 1:41) Bere bi akyi no, Agya a ɔwɔ soro no maa ɔsomafo Petro tumi dii saa asɛm no ho adanse bere a ɔka kyerɛɛ Yesu Kristo sɛ: “Wone Kristo no, Onyankopɔn teasefo no ba!”—Mateo 16:16, 17; Yohane 6:68, 69.

Asɛnka Adwuma a Wɔde Ama Wɔn no Ho Hann

3, 4. Yesu wusɔre akyi no, nkyerɛkyerɛmu bɛn na ɔde maa n’akyidifo no wɔ wɔn daakye dwumadi ho?

³ Wɔ Yesu Kristo wusɔre akyi no, ɔmaa ahyɛde bi a ɛsɛ sɛ n’akyidifo nyinaa di ho dwuma ho hann puei. Ɛda adi kɛse sɛ ɛyɛ n’akyidifo 500 a na wɔahyiam wɔ Galilea no na ɔkaa eyi kyerɛɛ wɔn: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne honhom kronkron din mu, na monkyerɛkyerɛ wɔn sɛ wonni nea mahyɛ mo nyinaa so. Na hwɛ, me ne mo wɔ hɔ nna nyinaa de bɛkɔ akosi wiase awiei.” (Mateo 28:19, 20; 1 Korintofo 15:6) Ɛno akyi no, na ɛsɛ sɛ Kristo akyidifo nyinaa yɛ asɛnkafo, na na ɛnsɛ sɛ ahyɛde a wɔde ama wɔn sɛ wɔnka asɛm no sõ “Israel fi nguan a ayera” no nkutoo so. (Mateo 10:6) Na saa ara na na ɛnyɛ Yohane asubɔ na wɔbɛbɔ de ayɛ adwensakra ho sɛnkyerɛnne na ama wɔanya bɔne fafiri. Mmom no, na wɔbɛbɔ nkurɔfo asu wɔ “Agya ne Ɔba ne honhom kronkron din mu.”

⁴ Aka bere tiaa bi ma Yesu akɔ soro no, n’asomafo anokwafo 11 no bisae sɛ: “Awurade, bere yi mu na wobɛsan de ahenni no ama Israel anaa?” Sɛ́ anka Yesu bɛma saa asɛm no ho mmuae no, ɔde akwankyerɛ foforo mae wɔ ahyɛde a wɔde ama sɛ wɔnka asɛm no ho sɛ: “Sɛ honhom kronkron nya ba mo so a, mubenya ahoɔden, na moayɛ m’adansefo Yerusalem ne Yudea nyinaa ne Samaria de akɔpem asase ano nohɔ.” Ɛde besi saa bere no, na wɔyɛ Yehowa nkutoo adansefo, nanso afei de na wɔabɛyɛ Kristo nso adansefo.—Asomafo no Nnwuma 1:6-8.

5, 6. Hann a epue bɛn na Yesu akyidifo no nyae wɔ Pentekoste?

⁵ Hwɛ hann a ɛhyerɛn bi a epuei a Yesu akyidifo no nyae wɔ ɛno akyi dadu pɛ! Wɔ Pentekoste da afe 33 Y.B. no, wɔtee nea Yoel 2:28, 29 kyerɛ ankasa ase bere a edi kan: “[Me Yehowa] mehwie me honhom magu ɔhonam nyinaa so, na mo mmabanin ne mo mmabea ahyɛ nkɔm, na mo mpanyin asosõ adae, na mo mmerante ahuhu anisoade, na nkoa ne mfenaa nso so na nna no mu mehwie me honhom magu.” Yesu asuafo no huu honhom kronkron no te sɛ tɛkrɛma a ɛte sɛ ogya sɛ esisi wɔn nyinaa—bɛyɛ mmarima ne mmea 120—a na wɔahyiam wɔ Yerusalem no atifi.—Asomafo no Nnwuma 1:12-15; 2:1-4.

⁶ Afei nso Pentekoste da no ne nea edi kan a asuafo no tee ase sɛ Dwom 16:10 fa Yesu Kristo a wɔanyan no afi awufo mu no ho. Ná odwontofo no aka sɛ: “Na [wo Yehowa Nyankopɔn] worennyaw me kra asaman, woremma wo hotefo nhu ɔda mu porɔwee.” Asuafo no hui sɛ na saa nsɛm no ntumi mfa Ɔhene Dawid ho, efisɛ na ne damoa da so ara wɔ wɔn nkyɛn de besi saa da no. Ɛnyɛ nwonwa sɛ nnipa bɛyɛ 3,000 a wɔkyerɛkyerɛɛ hann foforo yi mu ma wɔtee no gye dii araa ma wɔbɔɔ wɔn asu saa da no!—Asomafo no Nnwuma 2:14-41.

 7. Hann a ɛhyerɛn bɛn na ɔsomafo Petro nyae bere a ɔkɔsraa Roma sraani panyin Kornelio no?

⁷ Mfehaha pii na na Israelfo no abu nea na Onyankopɔn aka afa wɔn ho no sɛ ɛsom bo: “Mo nko na mahu mo, asase so mmusua nyinaa mu, enti nso mo na metua mo mo amumɔyɛ nyinaa so ka.” (Amos 3:2) Enti nokwarem no, na ɛyɛ hann a ɛhyerɛn na ɔsomafo Petro ne wɔn a wɔne no kɔɔ Roma sraani panyin Kornelio fie no nyae bere a honhom kronkron sian beguu agyidifo a wɔyɛ Amanaman Mufo momonotofo so nea edi kan no. Ɛsɛ sɛ yɛhyɛ no nsow sɛ na eyi nko ne bere a wɔde honhom kronkron ama ansa na wɔrebɔ asu. Nanso na ɛsɛ sɛ ɛba saa. Sɛ amma saa a, anka Petro anhu sɛ saa Amanaman Mufo momonotofo no fata ma asubɔ. Bere a Petro tee nea na adeyɛ yi kyerɛ ase koraa no, obisae sɛ: “So obi betumi asiw nsu ho kwan sɛ wɔmmmɔ eyinom [Amanaman Mufo] a wɔanya honhom kronkron sɛ yɛn ara yi asu?” Ampa, na wɔn a wɔwɔ hɔ no mu biara ntumi nsɔre ntia ma ɛnyɛ yiye, enti wɔbɔɔ Amanaman Mufo yi asu.—Asomafo no Nnwuma 10:44-48; fa toto Asomafo no Nnwuma 8:14-17 ho.

Twetiatwa Nni Hɔ Bio

 8. Dɛn nti na ɛyɛɛ den maa tete Kristofo binom sɛ wobegyae twetiatwa akyi di?

⁸ Nokware hann foforo a ɛhyerɛn puei a na ɛfa twetiatwa ho. Twetiatwa fii ase wɔ afe 1919 A.Y.B. wɔ apam a Yehowa ne Abraham yɛe no mu. Onyankopɔn hyɛɛ Abraham saa bere no sɛ ɔne ne fifo a wɔyɛ mmarima nyinaa ntwa twetia. (Genesis 17:9-14, 23-27) Enti twetiatwa bɛyɛɛ agyiraehyɛde maa Abraham asefo. Na hwɛ sɛnea na wɔde saa adeyɛ yi hoahoa wɔn ho! Ne saa nti, asɛm “momonotoni” bɛyɛɛ asɛm a wɔka de bu animtiaa. (Yesaia 52:1; 1 Samuel 17:26, 27) Ɛnyɛ den sɛ wubehu nea enti a tete Yudafo Kristofo bi pɛe sɛ wɔkora saa agyiraehyɛde yi so no. Wɔn mu binom ne Paulo ne Barnaba susuw asɛm yi ho kɔɔ akyiri. Nea ɛbɛyɛ na wɔasiesie no, Paulo ne afoforo bi kɔɔ Yerusalem kohuu Kristofo sodikuw no.—Asomafo no Nnwuma 15:1, 2.

 9. Hann bɛn na woyii no adi kyerɛɛ tete sodikuw no, sɛnea wɔayɛ ho kyerɛwtohɔ wɔ Asomafo no Nnwuma ti 15 no?

⁹ Saa bere yi, ɛnyɛ anwonwakwan so na saa tete Kristofo no nam nyaa hann no sɛ twetiatwa nyɛ Yehowa asomfo ahwehwɛde bio. Mmom no, wɔnam Kyerɛwnsɛm no a wɔhwehwɛɛ mu, honhom kronkron no akwankyerɛ a wɔde wɔn ho too so, ne Petro ne Paulo osuahu ahorow a ɛfa Amanaman Mufo momonotofo a wɔasakra ho a wotiei so na enyaa hann a ɛhyerɛn kɛse no. (Asomafo no Nnwuma 15:6-21) Wɔkyerɛw gyinae a wosii no wɔ krataa bi mu a ne fã bi kenkan sɛ: “Ɛyɛɛ honhom kronkron ne yɛn sɛ eye sɛ wɔmfa adesoa bi nto mo so, gye nea ehia yi ara, ɛne sɛ munyi mo ho mfi nam a wɔakum ama abosom ne mogya ne mmoa a wɔanhwie wɔn mogya na wowui ne aguamammɔ mu.” (Asomafo no Nnwuma 15:28, 29) Enti tete Kristofo dee wɔn ho fii ahyɛde a ɛne sɛ wontwa twetia na wonni Mose Mmara no mu ahwehwɛde afoforo so ho. Enti, na Paulo betumi aka akyerɛ Galatifo Kristofo no sɛ: “Adehyedi mu na Kristo ama yɛade yɛn ho.”—Galatifo 5:1.

Nsɛmpa no mu Hann

10. Hann bɛn na wɔdaa no adi wɔ Mateo Asɛmpa no mu?

¹⁰ Akyinnye biara nni ho sɛ hann pii a epuei wɔ Mateo Asɛmpa a wɔkyerɛw no bɛyɛ afe 41 Y.B. no mu a ɛso ba n’akenkanfo mfaso. Sɛ yɛyɛ ntoto ho a, afeha a edi kan mu Kristofo no mu kakraa bi pɛ na wɔn ankasa tee sɛ Yesu reda ne nkyerɛkyerɛ no adi. Mateo Asɛmpa no titiriw na esii so dua sɛ Ahenni no ne Yesu asɛnka no asɛmti. Na hwɛ sɛnea Yesu sii hia a ɛho hia sɛ obi nya adwempa so dua denneennen! Hwɛ hann a epuei wɔ ne Bepɔw so Asɛnka no mu, wɔ ne mmebu (te sɛ nea wɔayɛ ho kyerɛwtohɔ wɔ ti 13) no mu, ne ne nkɔmhyɛ titiriw a ɛwɔ atiri 24 ne 25 no mu! Wɔnam Mateo Asɛmpa a wɔkyerɛw no bɛyɛ Pentekoste afe 33 Y.B. akyi mfe awotwe pɛ no so maa tete Kristofo no huu eyinom nyinaa.

11. Dɛn na yebetumi aka wɔ Luka ne Marko Nsɛmpa no mu nsɛm ho?

¹¹ Bɛyɛ mfe 15 akyi no, Luka kyerɛw n’Asɛmpa no. Bere a emu nsɛm dodow no ara te sɛ Mateo kyerɛwtohɔ no, emu ɔha biara mu nkyekyem 59 yɛ nsɛm foforo a wɔde aka ho. Luka yɛɛ Yesu anwonwade ahorow asia ho kyerɛwtohɔ ne Ne mmebu ahorow bɛboro mmɔho abien a Nsɛmpa akyerɛwfo afoforo no anka ho asɛm. Ɛda adi sɛ mfe kakraa bi akyi na Marko kyerɛw n’Asɛmpa no na osii so dua sɛ Yesu Kristo yɛ ɔbarima nsiyɛfo a ɔyɛ anwonwadwuma. Bere a Marko kaa nsɛm a na Mateo ne Luka adi kan aka no pii no, ɔyɛɛ bɛ biako bi a wɔanka ho asɛm ho kyerɛwtohɔ. Wɔ saa bɛ no mu no, Yesu de Onyankopɔn Ahenni no totoo aba bi a efifi, enyin yɛ tenten, na nkakrankakra no, ɛsow aba ho.a—Marko 4:26-29.

12. Yohane Asɛmpa no de nkyerɛkyerɛmu foforo ma koduu he?

¹² Ná Yohane Asɛmpa a wɔkyerɛw no bere a Marko yɛɛ ne kyerɛwtohɔ no akyi bɛboro mfe 30 no nso wɔ hɔ. Ɛdenam Yesu asetra a na ɔwom ansa na wɔrewo no sɛ ɔdesani no ho nsɛm pii a Yohane kae so titiriw no, hwɛ sɛnea ɔmaa hann puee Ne som adwuma no so kɛse! Yohane nkutoo na ɔyɛɛ Lasaro wusɔre no ho kyerɛwtohɔ, na ɔno nkutoo na ɔma yehu afotu pa pii a Yesu de maa n’asomafo anokwafo no, ne ne mpae a ɛka koma a ɔbɔe anadwo a woyii no mae no, sɛnea wɔayɛ ho kyerɛwtohɔ wɔ atiri 13 kosi 17 no. Nokwarem no, wɔka sɛ Yohane Asɛmpa no nkyekyem ɔha mu 92 yɛ soronko.

Hann a Epue Wɔ Paulo Nkrataa Mu

13. Dɛn nti na ebinom bu Paulo krataa a ɔkyerɛw kɔmaa Romafo no sɛ gyama ɛka Nsɛmpa no ho?

¹³ Wɔde ɔsomafo Paulo dii dwuma titiriw ma ɔde nokware hann brɛɛ Kristofo a wɔtraa ase wɔ asomafo no nna no mu. Sɛ nhwɛso no, Paulo krataa a ɔkyerɛw kɔmaa Romafo bɛyɛ afe 56 Y.B.—bɛyɛ bere a Luka kyerɛw n’Asɛmpa no ara wɔ hɔ. Paulo si nokwasɛm a ɛyɛ sɛ trenee fi Onyankopɔn dom, na ɛnam Yesu Kristo mu gyidi so so dua wɔ saa krataa yi mu. Si a Paulo si asɛmpa no fã yi so dua no ama ebinom abu ne krataa a ɔde kɔmaa Romafo no sɛ gyama ɛyɛ Asɛmpa a ɛto so anum.

14-16. (a) Wɔ Paulo krataa a edi kan a ɔkyerɛw kɔmaa Kristofo a wɔwɔ Korinto mu no, hann bɛn na ɔdaa no adi wɔ hia a na ɛho hia sɛ wɔyɛ biako no ho? (b) Abrabɔ ho hann foforo bɛn na ɛwɔ Korintofo Nhoma a Edi Kan mu?

¹⁴ Paulo kyerɛw nneɛma bi a na ɛrehaw Kristofo a wɔwɔ Korinto no ho asɛm. Afotu a efi honhom mu bebree wɔ ne krataa a ɔde kɔmaa Korintofo no mu a ɛso aba Kristofo mfaso de abesi yɛn nna yi mu. Mfiase no, na ɛsɛ sɛ ɔda mfomso a na Korintofo no redi akodi nnipa bi akyi no adi. Ɔsomafo no teɛɛ wɔn so akokoduru so ka kyerɛɛ wɔn sɛ: “Anuanom, menam yɛn Awurade Yesu Kristo din so mitu mo fo sɛ, mo nyinaa nyɛ nokoro, na mpaapaemu amma mo mu, na mmom moabom awie pɛyɛ adwenkoro ne nsusuwii koro mu.”—1 Korintofo 1:10-15.

¹⁵ Na wɔma ɔbrasɛe a anibere wom bi ho kwan wɔ Kristofo asafo no mu wɔ Korinto. Ná ɔbarima bi afa ne papa yere wɔ hɔ, ma enti wɔrebɔ ‘aguaman a enni amanaman mufo mpo mu.’ Paulo kyerɛwee pefee sɛ: “Munyi ɔbɔnefo no mfi mo mu!” (1 Korintofo 5:1, 11-13) Ná ɛno yɛ biribi foforo ma Kristofo asafo no—tu a wotu obi. Ade foforo a na ɛho hia sɛ wɔka ho asɛm kyerɛ Korintofo no fa nokwasɛm a ɛyɛ sɛ na emufo binom de wɔn honhom fam anuanom kɔ wiase asennibea ahorow kosiesie wɔn ntam asɛm. Paulo kaa wɔn anim denneennen wɔ eyi a wɔyɛe no ho.—1 Korintofo 6:5-8.

¹⁶ Ade foforo nso a na ɛhaw Korinto asafo no fa nna ho nsɛm ho. Paulo kyerɛe wɔ 1 Korintofo ti 7 sɛ, esiane sɛ na nna ho ɔbrasɛe abu so nti, na ɛbɛyɛ papa sɛ ɔbarima biara nya n’ankasa ne yere, na ɔbea biara nya n’ankasa ne kunu. Paulo kyerɛe nso sɛ bere a asigyafo tumi som Yehowa a nneɛma bebree ntwetwe wɔn adwene no, ɛnyɛ obiara na otumi di sigya. Na sɛ ɛkɔba sɛ ɔbea bi kunu wu a, na ɔde ne ho sɛ obetumi aware bio, nanso gye “Awurade mu nko.”—1 Korintofo 7:39.

17. Hann bɛn na Paulo daa no adi wɔ owusɔre nkyerɛkyerɛ no ho?

¹⁷ Hwɛ hann ara a Awurade de Paulo dii dwuma ma ɔdaa no adi wɔ owusɔre no ho! Nipadua bɛn mu na na wobenyan Kristofo a wɔasra wɔn no akɔ? Paulo kyerɛwee sɛ: “Wodua ɔkra nipadua, ebenyan ayɛ honhom nipadua.” Wɔremfa honam nipadua biara nkɔ soro, efisɛ “ɔhonam ne mogya ntumi nnya Onyankopɔn ahenni.” Paulo de kaa ho sɛ ɛnyɛ wɔn a wɔasra wɔn no nyinaa na wɔbɛdeda wɔ owu mu, na mmom wobenyan ebinom amonom hɔ ara wɔ wɔn wu akyi akɔ nkwa a owu nnim mu bere a Yesu aba no mu.—1 Korintofo 15:43-53.

18. Daakye ho hann bɛn na na ɛwɔ Paulo krataa a edi kan a ɔde kɔmaa Tesalonikafo no mu?

¹⁸ Wɔ Paulo krataa a ɔde kɔmaa Kristofo a wɔwɔ Tesalonika mu no, wɔde no dii dwuma ma ɔdaa daakye ho hann adi. Yehowa da no bɛba sɛnea owifo ba anadwo. Paulo kyerɛkyerɛɛ mu nso sɛ: “Bere a wɔbɛka sɛ: Yɛwɔ asomdwoe ne ahotɔ, no, ɛnde mpofirim na ɔsɛe bɛba wɔn so sɛ awoko ba ɔbea a ɔyem so, na wɔrennya ɔkwan nguan.”—1 Tesalonikafo 5:2, 3.

19, 20. Hann bɛn na Kristofo a na wɔwɔ Yerusalem ne Yudea nyae wɔ Paulo krataa a ɔde kɔmaa Hebrifo no mu?

¹⁹ Paulo nam ne krataa a ɔkyerɛw kɔmaa Hebrifo no so de hann kɔmaa tete Kristofo a wɔwɔ Yerusalem ne Yudea no. Hwɛ sɛnea ɔdaa no adi akokoduru so sɛ Kristosom nhyehyɛe no sen Mose som nhyehyɛe no! Sɛ́ anka wobedi Mmara a wɔnam abɔfo so de mae no akyi no, Kristofo nya gyidi wɔ nkwagye a Onyankopɔn Ba a ɔsen saa abɔfo a wɔsomaa wɔn no koraa no fii ase kaa ho asɛm no mu. (Hebrifo 2:2-4) Ná Mose yɛ Onyankopɔn fiehwɛfo ara kwa. Nanso, Yesu Kristo di ofie no nyinaa so. Kristo yɛ Melkisedek kwan so sɔfo panyin a ɔwɔ gyinabea a ɛsen Aaron kwan so asɔfodi no koraa. Paulo daa no adi nso sɛ, Israelfo no antumi anhyɛn Onyankopɔn home mu esiane gyidi a na wonni ne wɔn asoɔden nti, nanso Kristofo hyɛn mu esiane wɔn nokwaredi ne osetie nti.—Hebrifo 3:1–4:11.

²⁰ Saa ara nso na apam foforo no sen Mmara apam no koraa. Sɛnea na wɔadi kan ahyɛ ho nkɔm mfe 600 wɔ Yeremia 31:31-34 no, na wɔakyerɛw Onyankopɔn mmara wɔ wɔn a wɔwɔ apam foforo no mu no komam, na wonya bɔne fafiri ankasa. Sɛ́ anka wobenya ɔsɔfo panyin a na ɛsɛ sɛ ɔbɔ bɔne ho afɔre afe afe ma n’ankasa, ne ɔman no de ho no, Kristofo wɔ Yesu Kristo a onni bɔne na ɔbɔɔ bɔne ho afɔre prɛko pɛ no sɛ wɔn Sɔfo Panyin. Sɛ́ anka ɔbɛhyɛn kronkronbea a wɔde nsa ayɛ mu de n’afɔrebɔde no akɔma no, ɔhyɛnee ɔsoro ankasa sɛ ɔrekoyi ne ho adi akyerɛ Yehowa wɔ hɔ. Afei nso, mmoa a na wɔde bɔ afɔre wɔ Mose Mmara apam no ase no antumi anyi bɔne amfi hɔ koraa, sɛ ɛnte saa a anka wɔammɔ afɔre daa afirihyia. Nanso, Kristo afɔre a ɔbɔɔ no prɛko pɛ no yi bɔne fi hɔ. Eyi nyinaa ma hann pue honhom mu asɔrefie kɛse no a n’adiwo na nkaefo a wɔasra wɔn ne “nguan foforo” no som nnɛ no so.—Yohane 10:16; Hebrifo 9:24-28.

21. Dɛn na saa nkɔmmɔbɔ yi ada no adi wɔ Dwom 97:11 ne Mmebusɛm 4:18 mmamu ho wɔ asomafo no mmere so?

²¹ Yɛrennya baabi nkyerɛw nhwɛso ahorow pii te sɛ hann afoforo a epuei wɔ ɔsomafo Petro, ne asuafo Yakobo ne Yuda nkrataa mu no ho nsɛm. Nanso nea yɛaka ho asɛm no dɔɔso a ebetumi ama yɛahu sɛ Dwom 97:11 ne Mmebusɛm 4:18 nyaa ne mmamu a ɛyɛ nwonwa wɔ asomafo no mmere so. Nokware no fii ase nyaa nkɔanim fii ne sunsuma ne ne nsusuwso so kosii ne mmamu ankasa so.—Galatifo 3:23-25; 4:21-26.

22. Dɛn na ɛbae wɔ asomafo no wu akyi, na dɛn na asɛm a edi hɔ no bɛda no adi?

²² Bere a Yesu asomafo no wuwui na ɔwae a wɔhyɛɛ ho nkɔm no fii ase no, nokware no hann no ano brɛɛ ase. (2 Tesalonikafo 2:1-11) Nanso, sɛnea Yesu hyɛɛ bɔ no, mfehaha pii akyi no, Owura no san bae, na obehuu “akoa nokwafo ne ɔbadwemma” no sɛ ɔrema ‘asomfo’ no aduan bere a ɛsɛ mu. Ne saa nti, Yesu Kristo paw saa akoa no sɛ ‘onni nea ɔwɔ nyinaa so.’ (Mateo 24:45-47) Hann foforo bɛn na epuei wɔ ɛno akyi? Yebesusuw eyi ho wɔ asɛm a edi hɔ no mu.

[Ase hɔ asɛm]

Wokae?

◻ Bible mu nsɛm bɛn na ɛkyerɛ sɛ nokware no asete ba nkakrankakra?

◻ Hann a ɛdaa adi a wɔayɛ ho kyerɛwtohɔ wɔ Asomafo no Nnwuma no mu bi ne nea ɛwɔ he?

◻ Hann bɛn na wohu wɔ Nsɛmpa no mu?

◻ Hann bɛn na epue wɔ Paulo nkrataa no mu?