ADESUA 36
Di Nokware Wɔ Biribiara Mu
Obiara pɛ adamfo a odi nokware. Yehowa nso saa ara. Ɔhwɛ kwan sɛ ne nnamfo bedi no nokware. Nanso ɛnnɛ, nokwaredi asã wɔ wiase, ɛno nti ɛnna fam sɛ yebedi nokware. Sɛ yedi nokware wɔ biribiara mu a, mfaso bɛn na ebetumi afi mu aba?
1. Dɛn nti paa na ɛsɛ sɛ yedi nokware?
Sɛ yedi afoforo nokware a, ɛkyerɛ sɛ yɛdɔ Yehowa, na yebu no. Wo de, dwen wei ho hwɛ: Nea ɛwɔ yɛn adwene mu ne biribiara a yɛyɛ no, Yehowa hu. (Hebrifo 4:13) Enti sɛ yɛyere yɛn ho sɛ yebedi nokware a, ohu, na ɛma n’ani gye. Onyankopɔn Asɛm ka sɛ: “Yehowa kyi okontomponi, na atreneefo na wɔyɛ ne nnamfo paa.”—Mmebusɛm 3:32.
2. Nneɛma bɛn na yebetumi ayɛ de akyerɛ sɛ yedi nokware wɔ yɛn asetena mu?
Yehowa pɛ sɛ yɛn mu biara ‘ka nokware kyerɛ ne yɔnko.’ (Sakaria 8:16, 17) Saa asɛm no kyerɛ sɛn? Ɛkyerɛ sɛ, sɛ yɛne yɛn abusuafo, yɛn adwumamfo, anaa yɛn nuanom Kristofo rebɔ nkɔmmɔ a, ɛnsɛ sɛ yedi atoro anaa yɛdaadaa wɔn. Saa ara na ɛnsɛ sɛ yɛdaadaa aban mpanyimfo nso. Obi a ɔyɛ ɔnokwafo nnwia ade, na ɔmmɔ apoo. (Kenkan Mmebusɛm 24:28 ne Efesofo 4:28.) Tow biara a ɛsɛ sɛ otua ma aban no, otua. (Romafo 13:5-7) Sɛ Kristoni yɛ nneɛma a ɛtete saa a, ɛkyerɛ sɛ ‘ɔde nokwaredi bɔ ne bra wɔ biribiara mu.’—Hebrifo 13:18.
3. Sɛ yedi nokware a, mfaso bɛn na ɛwɔ so?
Sɛ nkurɔfo hu sɛ yedi nokware a, wobegye yɛn adi. Afei nso, sɛ obiara a ɔwɔ asafo no mu di nokware a, ɛma asafo no mufo yɛ baako, na ɛma obiara koma tɔ ne yam. Sɛ yedi nokware a, ɛmma yɛn tiboa mmu yɛn fɔ. Mfaso baako nso ne sɛ, ɛma ‘anuonyam ba yɛn Agyenkwa Onyankopɔn nkyerɛkyerɛ ho,’ na ɛma wɔn a wonni asafo no mu kɔn dɔ sɛ wɔbɛsom Yehowa.—Tito 2:10.
SUA PII KA HO
Sɛ wudi nokware a, ɛbɛboa wo sɛn, na Yehowa nso bɛte nka sɛn? Ɔfã yi bɛboa wo ama woanya saa nsɛmmisa yi ho mmuae. Afei, yɛbɛhwɛ nea ebetumi aboa wo ama woadi nokware wɔ biribiara mu.
4. Sɛ wudi nokware a, ɛma Yehowa ani gye
Monkenkan Dwom 44:21 ne Malaki 3:16. Muwie a munsusuw nsɛmmisa yi ho:
Sɛ obi nim nokware a ɛwɔ asɛm bi mu, na wanka, na ɛyɛ no sɛ obiara nnim a, na ɔredaadaa ne ho. Adɛn ntia?
Sɛ ɛyɛ den sɛ wobɛka nokware a ɛwɔ asɛm bi mu, na sɛ wobɔ mmɔden ka a, wohwɛ a, Yehowa bɛte nka sɛn?
Sɛ mmofra ka nokware a, ɛma wɔn awofo ani gye. Yɛn nso, yɛka nokware a, ɛma Yehowa ani gye
5. Di nokware bere nyinaa
Nnipa pii adwene ne sɛ, ɛnyɛ bere nyinaa na ɛsɛ sɛ wudi nokware, anyɛ saa a, da koro wo ho bɛkyere wo. Nanso hwɛ nea enti a ɛsɛ sɛ yedi nokware bere nyinaa. Hwɛ VIDEO yi.
Monkenkan Hebrifo 13:18. Muwie a, munsusuw ho nhwɛ sɛnea yebetumi adi nokware wɔ . . .
yɛn abusua mu.
yɛn adwumam anaa sukuu mu.
baabiara a yɛwɔ.
6. Sɛ yedi nokware a, ɛboa yɛn
Ɛwom, yedi nokware a, ɛtɔ da a, ebetumi ama yɛn ho akyere yɛn. Nanso yɛyɛ saa a, yɛrennu yɛn ho da. Monkenkan Dwom 34:12-16. Muwie a munsusuw asɛmmisa yi ho:
Sɛ wudi nokware a, ɛbɛboa wo sɛn?
A. Awarefo a wodi nokware no, ɛma wɔn aware sɔ
B. Adwumayɛfo a wodi nokware no, wɔn adwumawuranom gye wɔn di
D. Sɛ obi te ɔman bi mu na sɛ odi nokware a, ɔne aban no rennya asɛm biara
EBINOM KA SƐ: “Wudi atoro ketewaa bi a, na ayɛ dɛn?”
Wohwɛ a Yehowa kyi atoro nyinaa, anaa ebi wɔ hɔ a, ohu no sɛ ɛnyɛ hwee? Adɛn nti na woreka saa?
NEA YƐASUA
Yehowa pɛ sɛ ne nnamfo di nokware wɔ biribiara mu.
Ntimu
Nneɛma bɛn na yɛyɛ a ɛkyerɛ sɛ yedi nokware?
Sɛ yenim nokware a ɛwɔ asɛm bi mu, na yɛanka, na ɛyɛ yɛn sɛ obiara nnim a, na yɛredaadaa yɛn ho. Adɛn ntia?
Adɛn nti na wopɛ sɛ wudi nokware wɔ biribiara mu?
YƐ NHWEHWƐMU
Hwɛ video yi, na wubehu sɛnea awofo betumi aboa wɔn mma ama wɔadi nokware.
Yɛhyɛ bɔ na yedi so a, mfaso bɛn na ebefi mu aba? Hwɛ video yi, na wubehu.
Sɛ aban no mfa tow a yetua no nyɛ adepa mpo a, adɛn nti na ɛsɛ sɛ yɛkɔ so tua? Kenkan saa asɛm yi, na wubehu nea enti a.
Ná owura bi bɔ nkurɔfo apoo san tow kyakya. Kenkan saa asɛm yi, na wubehu nea ɛyɛe a ɔsesaa n’abrabɔ.
“Mebɛhuu sɛ Yehowa Yɛ Mmɔborɔhunufo na Ɔde Bɔne Kyɛ” (Ɔwɛn-Aban, May 1, 2015)