‘Momma Yɛnto Adesoa Biara Ngu’

Mary bɔɔ abubuw sɛ: “Me werɛ ahow yiye na m’aba mu abu.” Kristoni ɔbea yi reka Kristofo asɛyɛde ahorow ho asɛm no, ɔka kaa ho sɛ: “Mihu me nnamfo sɛ wɔagurow. Me nso mete ɔbrɛ ne ahokyere no nka. Mesrɛ sɛ mommoa me ma mente nea enti a ɛte saa no ase.”

SO WO nso wote nka sɛ wo ho akyere wo, woabrɛ dodo sɛ wubedi wo teokrase asɛyɛde ahorow ho dwuma sɛnea ɛsɛ? So ɛtɔ mmere bi a, ɛyɛ te sɛ nea Kristofo som adwuma no yɛ adesoa bi a emu yɛ duru, ɔhaw a wuntumi nsoa? Kristofo anokwafo pii aba mu bu wɔ mmere horow mu, efisɛ tumi bɔne a ebetumi abrɛ yɛn anigye ase atwa yɛn ho ahyia. Nokware Kristoni a obi bɛyɛ nnɛ no yɛ asɛnnennen ankasa. Enti, ɛtɔ da bi a, ebia ebinom bɛte nka sɛ Kristofo som adwuma no yɛ adesoa a emu yɛ duru.

Nea Ɛde Ba a Wobɛhwehwɛ

Kyerɛwnsɛm no da no adi pefee sɛ Yehowa nka sɛ yɛnyɛ nneɛma a ntease nnim. Ɔsomafo Yohane kae sɛ Onyankopɔn ‘ahyɛde nyɛ den.’ (1 Yohane 5:3) Yesu ka kyerɛɛ n’akyidifo saa ara sɛ: “Momfa me kɔndua nto mo ho so, na munsua me, sɛ midwo na mebrɛ me ho ase koma mu; na mubenya ɔhome ama mo kra. Na me kɔndua yɛ mmerɛw, na m’adesoa yɛ hare.” (Mateo 11:29, 30) Ɛda adi pefee sɛ ɛnyɛ nea Yehowa pɛ ne sɛ yɛbɛte nka sɛ yɛabrɛ dodo wɔ ɔsom a yɛde ma no no mu.

Ɛnde, ɔkwan bɛn so na Kristoni nokwafo betumi abu ne Kristofo asɛyɛde ahorow sɛ adesoa a emu yɛ duru? Ɛda adi sɛ nneɛma pii wom. Hyɛ ɔsomafo Paulo nsɛm yi nsow: “Momma yɛntow adesoa biara . . . ngu, na yɛmfa boasetɔ ntu apereperedi a ɛda yɛn anim no mu mmirika.” (Hebrifo 12:1) Paulo nsɛm no kyerɛ sɛ ɛtɔ da bi a, ebia Kristofo bɛfa nneɛma a ɛho nhia asoa. Eyi nyɛ bɔne a anibere wom ankasa. Nanso ebia Kristoni bi di mfomso wɔ atemmu mu ma n’asetra yɛ hwanyann yiye, na ɛma ɛyɛ den yiye sɛ obetu mmirika a ɛda yɛn anim no.

Honam Fam Nneɛma ho Adwene a Ɛkari Pɛ

Fa honam fam adwuma ho asɛm sɛ nhwɛso. Nsase pii so no, ebia sikasɛm tebea bɛma Kristoni de nnɔnhwerew pii ayɛ adwuma. Nanso, mpɛn pii no nkurɔfo yɛ adwuma na ama wɔadi yiye anaasɛ wɔaboaboa ahonyade ano kɛkɛ. Kristofo binom nam nneɛma a wohia ankasa no mu a wɔsan hwehwɛe no so ahu sɛ nyansam wom sɛ wɔbɛsakra adwuma a wɔyɛ no mu. Debbie ne ne kunu a wɔn baanu nyinaa yɛ Yehowa Adansefo no yɛɛ saa. Debbie se: “Yɛn sikasɛm asesa, na ɛho nhia bio ankasa sɛ mɛkɔ so ayɛ adwuma a wɔde bere nyinaa yɛ. Nanso na ɛyɛ den sɛ megyae.” Ankyɛ ofii ase tee nka sɛ adwuma a ɔwɔ yɛ no ama ne ho akyere no. Ɔkyerɛkyerɛ mu sɛ: “Na Memeneda nkutoo na minya de yɛ me fie nnwuma. Na mentaa nte nka sɛ mɛkɔ asɛnka. Eyi haw me, na m’ahonim haw me, nanso na m’ani gye m’adwuma no ho. Awiei koraa no, na ɛsɛ sɛ migye nokwasɛm no tom. Ano aduru yɛ biako pɛ. Migyaee adwuma no.” Nokwarem no, ebia ebinom rentumi nyɛ nsakrae kɛse a ɛte sɛɛ. Nanso, ebia w’adwuma bere nhyehyɛe a wobɛhwehwɛ mu yiye no bɛma woahu sɛ nsakrae ahorow bi ho hia.

Ebia akwan afoforo wɔ hɔ a yɛbɛfa so asoɛ nnesoa a ɛho nhia no asi hɔ. Na akwan a yetu de gye yɛn ani, agumadi, ne anigyede afoforo​—a bere a yɛde hwɛ television ka ho nso ɛ? Na bere a yɛatumi akari pɛ wɔ eyi mu mpo no, ɛho behia sɛ yɛyɛ nsakrae bere nyinaa na yɛakɔ so akari pɛ.

Ntease Ho Hia

Ntease wɔ nsɛm a ɛte sɛɛ mu no bɛboa yɛn ma yɛayɛ nsakrae ma ɛne nsɛm tebea afoforo ahyia. Yɛnam saayɛ so betumi akura adwempa mu wɔ yɛn som adwuma no mu.​—Efesofo 5:15-17; Filipifo 4:5.

So wuhu sɛ wo ho akyere wo sɛ wobɛyɛ pii te sɛ nea afoforo yɛ wɔ Onyankopɔn som mu no? Eyi nso betumi de dadwen ne abasamtu aba w’asetra mu. Ɛwom sɛ akyinnye biara nni ho sɛ afoforo nhwɛso betumi ahyɛ wo nkuran ma woayɛ pii de, nanso anidahɔ bɛboa wo ma wode botae horow a ntease wom asisi hɔ ma ɛne wo nsɛm tebea ne nea wutumi yɛ ahyia. Kyerɛwnsɛm no ka kyerɛ yɛn sɛ: “Na ma obiara nsɔ n’ankasa n’adwuma nhwɛ, ɛno na obenya n’ankasa ho biribi ahoahoa ne ho, na ɛnyɛ obi ho. Na obiara bɛsoa n’ankasa n’adesoa.”​—Galatifo 6:4, 5.

Mo hɔnom amammerɛ ne atetesɛm nso betumi ama wo haw ahorow no ayɛ kɛse. Yesu nna no mu no, na mmɔden a nnipa no bɔ sɛ wobedi ahyɛde ne atetesɛm pii a nnipa ahyehyɛ so no ama wɔabrɛ. Ɛnnɛ Yehowa nkurɔfo ade wɔn ho afi atoro som mu atetesɛm ho. (Fa toto Yohane 8:32 ho.) Nanso, Kristoni betumi ahaw ne ho wɔ ne mpɔtam hɔ amammerɛ ahorow ho ma atra so. Sɛ nhwɛso no, nneɛma te sɛ ayeforohyia yɛ nea amammerɛ pii ka ho. Ebia na mfomso biara nni saa amammerɛ no ho, na ebetumi ayɛ fɛ ne anigye mpo. Nanso, ebia Kristofo nni bere ne sika a wɔde bɛyɛ saa nneɛma yi nyinaa, na mmɔden a wɔbɛbɔ sɛ wɔbɛyɛ no betumi de ɔhaw afoforo a ɛho nhia abrɛ wɔn.

Susuw nea esii bere a Yesu kɔsraa ɔbea bi a wɔfrɛ no Marta no ho. Sɛ anka obenya mfaso afi Yesu ɔsoro nyansa mu akosi ase mmom no, “Marta de, ɔfenaa ne ho ɔsom pii ho.” Na ɔde nneɛma pii haw ne ho. (Luka 10:40) Nanso Yesu fi ayamye mu de nyansahyɛ mae sɛ obetumi ama n’aduannoa nhyehyɛe no ayɛ mmerɛw sɛnea ɛbɛyɛ na wanya ne nkyerɛkyerɛ mu mfaso. (Luka 10:41, 42) Eyi kyerɛkyerɛ mu yiye sɛ atɛmpa ne ntease bɛboa wo ma woakari pɛ wɔ wo Kristofo som adwuma no mu wɔ ɔkwan a ɛfata so.​—Yakobo 3:17.

Atɛmpa nso ho hia bere a worepaw wo nnamfo no. Mmebusɛm 27:3 bɔ kɔkɔ sɛ: “Ɔbo yɛ duru na nhwea yɛ pemee, na ogyimfo abohuru yɛ duru sen n’abien nyinaa.” Mpɛn pii no wo nnamfo a wɔbɛn wo paa no benya wo nsusuwii so nkɛntɛnso kɛse. Wɔn a wɔhwehwɛ afoforo ho mfomso ntɛmntɛm na wɔkasa tia asafo no mufo afoforo a wo ne wɔn bɛbɔ no betumi ama w’aba mu abu, na wanya adwene a ɛnteɛ. (1 Korintofo 15:33) Sɛ wuhu sɛ eyi yɛ ɔhaw a, nsakrae a nyansa wom a wobɛyɛ wɔ w’ayɔnkofa mu no betumi ama wo haw no so atew.

Wo ne Onyankopɔn Nnantew Ahobrɛase Mu

Wɔ Mika 6:8 no, yehu asemmisa a ɛkanyan adwene yi: “Dɛn na Yehowa rehwehwɛ afi wo hɔ sen sɛ . . . wode ahobrɛase ne wo Nyankopɔn bɛnantew?” (New World Translation) Wɔkyerɛ ahobrɛase ase sɛ nim a obi nim ne sintɔ ahorow. Wɔn a wonnye wɔn sintɔ ahorow ntom no betumi asoa nnwuma pii agu wɔn ho so. Eyi ato Kristofo a wɔn ho akokwaw, ahwɛfo mpo, na ama wɔn aba mu abu na wɔahwere wɔn anigye. Kristoni panyin bi a wɔfrɛ no Kenneth gye toom sɛ: “Mihui sɛ merenya adwenemhaw, na mekae sɛ, ‘Meremma eyi nto me.’ Metew me nnwuma so na mede m’adwene sii nea metumi ayɛ so.”

Ɛyɛɛ den maa odiyifo Mose ɔhobrɛasefo no mpo sɛ obegye n’ankasa sintɔ ahorow atom. Enti Yetro a ɔyɛ Mose asebarima no boaa no ma osusuw nnwuma pii a ɔrebɔ mmɔden sɛ ne nkutoo bɛyɛ no ho yiye. Yetro bisae sɛ: “Dɛn ne nea woreyɛ ɔman no yi? . . . Nea woyɛ yi nye. Ɔbrɛ na wo . . . bɛbrɛ, efisɛ ade yi yɛ duru dodo ma wo, na wo nko worentumi nyɛ . . . Na wo nso yiyi ɔman no nyinaa mu mmarima a wɔyɛ den, . . . na asɛnkɛse biara de, wɔmfa mmrɛ wo, na nsɛm nketewa nyinaa de, wɔn ara wonni na ama ayɛ wo so hare, na wɔne wo aso mu.” Mose fii ase ntɛm ara sɛ ɔde ne nnwuma no bi bɛma afoforo, ma enti onyaa ahotɔ wɔ nea na ɛreyɛ adesoa a ontumi nsoa no mu.​—Exodus 18:13-26.

Bere foforo nso Mose ka kyerɛɛ Yehowa sɛ: “Me nko mintumi minkura ɔman yi nyinaa, efisɛ ɛyɛ duru sen me.” Bio nso, na mmuae no ne sɛ ɔmfa nnwuma no bi mma afoforo. Ebia eyi nso bɛyɛ wo haw no ano aduru, sɛ wote nka sɛ wo nnwuma dɔɔso pii ma wo dodo a.​—Numeri 11:14-17.

Yehowa Boa Yɛn Ma Yɛsoa Adesoa No

Yesu kae sɛ ne kɔndua yɛ mmerɛw na n’adesoa yɛ hare, nanso ɛnkyerɛ sɛ ɛnyɛ duru koraa. Kɔndua a Yesu too nsa frɛɛ yɛn sɛ yɛmmɛfa nto yɛn ho so no nyɛ anihaw kɔndua. Ɛyɛ ho a wohyira so ma Onyankopɔn koraa sɛ Yesu Kristo suani kɔndua. Enti adesoa anaasɛ ahokyere bi ka nokware Kristoni a obi bɛyɛ no ho. (Mateo 16:24-26; 19:16-29; Luka 13:24) Bere a wiase no tebea resɛe no, ahokyere ahorow no bɛyɛ kɛse. Nanso, yɛwɔ nea yebegyina so anya adwempa, efisɛ Yesu ɔfrɛ no kyerɛ sɛ afoforo betumi ne ɔno afa ne kɔndua na ɔbɛboa wɔn.a Enti bere dodow a yedi Kristo akwankyerɛ akyi no, yebetumi asoa yɛn nnesoa no efisɛ ɔbɛboa yɛn.

Onyankopɔn hwɛ n’adɔfo, na ɔbɔ wɔn a wɔnam mpaebɔ so de wɔn adesoa to no so no nyinaa koma ne wɔn adwene tumi ho ban. (Dwom 55:22; Filipifo 4:6, 7; 1 Petro 5:6, 7) Odwontofo no kae sɛ: “Nhyira ne [Yehowa] a ɔsoa yɛn adesoa ma yɛn daa daa, ɔno Nyankopɔn no ne yɛn nkwagye.” (Dwom 68:19) Yiw, nya awerɛhyem sɛ Onyankopɔn bɛsoa w’adesoa ama wo daa, sɛ wotow adesoa biara gu na wode boasetɔ tu mmirika a ɛda w’anim no a.

[Ase hɔ asɛm]

[Mfonini wɔ kratafa 24]

Mpanyimfo a wɔwɔ nyansa wɔ ɔpɛ sɛ wɔde nnwuma bi bɛma afoforo na wɔne wɔn asoa adesoa no