“Eyi Nti Na Wɔsomaa Me”

1-4. (a) Ɔkwan bɛn so na Yesu de ahokokwaw kyerɛkyerɛɛ Samariani bea bi, na dɛn na efii mu bae? (b) N’asomafo no yɛɛ wɔn ade sɛn?

NÁ YESU ne n’asomafo no anantew abrɛ. Ná wɔfi Yudea rekɔ Galilea wɔ atifi fam. Wɔkɔfaa Samaria, baabi a na ɛyɛ tia a ɛbɛma wɔde nnansa atwa kwan no. Bere a ɛreyɛ adu bɛyɛ awia 12 no, wɔbɛn kurow ketewaa bi a wɔfrɛ hɔ Sikar, na wɔgyee wɔn ahome wɔ hɔ.

² Bere a Yesu asomafo no kɔe sɛ wɔrekɔtɔ aduan aba no, Yesu tenaa abura bi a ɛwɔ kurow no kurotia ho gyee n’ahome. Ɔbea bi bae sɛ ɔrebɛsaw nsu. Ná anka Yesu betumi ayɛ te sɛ nea onhuu no, efisɛ na “akwantu no ama Yesu abrɛ.” (Yohane 4:6) Sɛ Yesu buu n’ani guu Samariani bea yi so a, anka ntease wom. Sɛnea yehui wɔ nhoma yi Ti 4 no, na ɔbea no nim sɛ Yudani biara bebu no animtiaa. Nanso, Yesu fii ase ne no bɔɔ nkɔmmɔ.

³ Ɔde nea na ɔbea no reyɛ saa bere no yɛɛ mfatoho de fii nkɔmmɔbɔ no ase. Ná ɔbea no rebɛsaw nsu, enti Yesu kaa nkwa nsu ho asɛm kyerɛɛ no, na ɔka kyerɛɛ no sɛ, sɛ ɔnom bi a ɛremma honhom mu sukɔm nne no bio. Ɔbea no kaa nsɛm pii a na ebetumi akowie akyinnyegye mu.a Nanso Yesu daa anifere adi, na obuu n’ani guu nsɛm a ɛte saa no so sɛnea ɛbɛyɛ a n’adwene remfi nkɔmmɔ a na ɔpɛ sɛ ɔne ɔbea no bɔ no so. Yesu de n’adwene sii honhom fam nneɛma so. Ɔkaa nokwaresom ne Yehowa Nyankopɔn ho asɛm. Nsɛm a Yesu kae no kaa ɔbea no koma paa ma enti ɔkɔka kyerɛɛ kurow no mu mmarima ma wɔn nso betiee Yesu.—Yohane 4:3-42.

⁴ Bere a asomafo no bae no, dɛn na wɔyɛe wɔ adanse kamakama a na Yesu redi no ho? Wɔanyɛ biribiara a ɛkyerɛ sɛ na wɔn ani gye ho. Mmom, ɛyɛɛ wɔn nwanwa mpo sɛ na Yesu ne ɔbea yi rekasa, na ɛbɛyɛ sɛ wɔanka hwee ankyerɛ ɔbea no. Bere a ɔbea no kɔe no, asomafo no yɛe ara sɛ anka Yesu nni aduan a wɔde aba no. Nanso, Yesu ka kyerɛɛ wɔn sɛ: “Mewɔ aduan bi di a munnim.” Mfiase no, na wɔsusuw sɛ Yesu wɔ aduan ankasa bi wɔ baabi, enti ne ho yɛɛ wɔn nwanwa. Nanso ɔkyerɛɛ mu sɛ: “M’aduan ne sɛ mɛyɛ nea ɔsomaa me no apɛde, na mawie n’adwuma.” (Yohane 4:32, 34) Yesu nam asɛm yi so kyerɛɛ wɔn sɛ adwuma titiriw a enti na ɔwɔ asaase so no, na ɛho hia no sen aduan a obedi. Ná ɔpɛ sɛ wɔnya adwene a ɛte saa ara wɔ adwuma no ho. Ná ɛyɛ adwuma bɛn?

 5. Adwuma bɛn na Yesu de ne bere nyinaa yɛe, na dɛn na yebesusuw ho wɔ ti yi mu?

⁵ Bere bi Yesu kaa sɛ: ‘Ɛsɛ sɛ meka Onyankopɔn Ahenni ho asɛmpa no, efisɛ eyi nti na wɔsomaa me.’ (Luka 4:43) Nokwarem no, wɔsomaa Yesu sɛ ɔmmɛka Onyankopɔn Ahenni no ho asɛmpa, na ɔnkyerɛkyerɛ nso.b Yesu akyidifo a wɔwɔ hɔ nnɛ no nso yɛ adwuma koro no ara bi. Ne saa nti, nea enti a Yesu kaa asɛm no, nea ɔkaa ho asɛm, ne sɛnea na obu adwuma a na ɛhyɛ ne nsa no, ehia sɛ yesusuw ho.

6, 7. Adwene bɛn na na Yesu pɛ sɛ “ɔkyerɛkyerɛfo biara” nya wɔ asɛmpaka adwuma no ho? Fa mfatoho kyerɛkyerɛ mu.

⁶ Ma yensusuw sɛnea na Yesu te nka wɔ nokware a ɔkyerɛkyerɛe no ho. Ɛno akyi no, yɛbɛhwɛ sɛnea na ohu wɔn a ɔkyerɛkyerɛɛ wɔn no. Nokwasɛm a Yehowa de kyerɛkyerɛɛ Yesu a ɔno nso de kyerɛkyerɛɛ afoforo no, Yesu de mfatoho bi a emu da hɔ kyerɛɛ sɛnea na ɔte nka wɔ ho. Ɔkaa sɛ: “Ɔkyerɛkyerɛfo biara a wɔakyerɛ no ɔsoro Ahenni ho ade no, ɔte sɛ ofiwura bi a oyi nneɛma fi ɔdan a ɔde n’agyapade sie mu no mu. Oyi nneɛma foforo ne dedaw nyinaa pue.” (Mateo 13:52) Adɛn nti na ofiewura a wɔkaa ne ho asɛm wɔ mfatoho yi mu no yii nneɛma fii ɔdan a ɔde n’agyapade sie mu no mu?

⁷ Ɛnyɛ sɛ na ofiewura no pɛ sɛ obiara hu nea na ɔwɔ, sɛnea Ɔhene Hesekia a ɔtenaa ase tete no yɛe bere bi ma ɛkɔfaa ɔhaw pii brɛɛ no no. (2 Ahene 20:13-20) Ɛnde, adɛn nti na ofiewura no yɛɛ saa? Wo de, susuw mfatoho bi ho hwɛ: Fa no sɛ woakɔsra wo kyerɛkyerɛfo bi a wopɛ n’asɛm wɔ ne fie. Obuee adaka bi so na oyii nkrataa mmienu bi fii mu bae. Ná baako akyɛ paa, nanso nea ɛka ho no de, na ɛyɛ foforo kakra. Ɔkyerɛɛ mu sɛ, nkrataa mmienu no nyinaa, ne papa na ɔkyerɛw brɛɛ no. Ɔkyerɛw baako brɛɛ no bere a na ɔyɛ abarimaa, na nea ɛka ho no de, na ɔkyerɛw brɛɛ no nkyɛe pii. Afei ɔkyerɛkyerɛfo no de anigye kyerɛɛ mu sɛ, nkrataa mmienu no som bo ma no paa. Ɔkaa sɛnea emu afotu no asesa n’abrabɔ, ɛne sɛnea ebetumi aboa wo nso. Wutumi hu sɛ, nkrataa no som bo paa ma ɔkyerɛkyerɛfo no, na onni ho agorɔ koraa. (Luka 6:45) Ɛnyɛ sɛ na ɔpɛ sɛ ɔhoahoa ne ho anaa ɔpɛ biribi fi wo hɔ nti na ɔkaa ho asɛm kyerɛɛ wo, na mmom sɛnea ɛbɛyɛ a wubenya so mfaso na woahu sɛnea ɛsom bo.

 8. Adɛn nti na yebetumi aka sɛ nokwasɛm a yesua fi Onyankopɔn Asɛm mu no yɛ agyapade a ɛsom bo?

⁸ Adwene a ɔkyerɛkyerɛfo a yɛde no yɛɛ mfatoho no kura no, ɛno ara bi na na Yesu, Ɔkyerɛkyerɛfo Kɛse no nso kura bere a na ɔrekyerɛkyerɛ afoforo Onyankopɔn ho nokwasɛm no. Ná Yesu hu saa nokwasɛm no sɛ agyapade a ɛsom bo paa. Ná n’ani gye ho, na na ɔpɛ sɛ ɔka ho asɛm kyerɛ afoforo. Ná ɔpɛ sɛ “ɔkyerɛkyerɛfo biara,” kyerɛ sɛ, n’akyidifo nyinaa nso te nka saa ara. Saa na yɛte nka anaa? Yɛwɔ nnyinaso pa a enti ɛsɛ sɛ yɛn ani gye nokwasɛm a yesua fi Onyankopɔn Asɛm mu no ho. Nokwasɛm ahorow a yesua no, sɛ ɛyɛ nea yesuae akyɛ oo, sɛ ɛyɛ nea wɔayɛ mu nsakrae nnansa yi oo, ɛsom bo ma yɛn paa. Sɛ yɛkɔ so ma yɛn ani gye nneɛma a Yehowa akyerɛkyerɛ yɛn no ho, na yefi yɛn koma mu ka ho asɛm kyerɛ afoforo a, na yɛreboa wɔn ama wɔn ani abegye Yehowa nkyerɛkyerɛ ho, sɛnea Yesu yɛe no.

 9. (a) Ná Yesu te nka sɛn wɔ nnipa a ɔkyerɛkyerɛ wɔn no ho? (b) Adwene a na Yesu wɔ wɔ afoforo ho no, yɛbɛyɛ dɛn anya bi?

⁹ Ná Yesu dɔ wɔn a ɔkyerɛkyerɛ wɔn no nso. Yebesusuw wei ho akɔ akyiri wɔ Ɔfã 3. Ná wɔahyɛ Mesia no ho nkɔm sɛ “ɔbrɛfo ne ohiani asɛm bɛyɛ no mmɔbɔ.” (Dwom 72:13) Na saa ara na ɛbae. Ná Yesu dwen nnipa ho. Nneɛma a nkurɔfo dwen ho ne nea ɛma wɔyɛ nneɛma bi no, na ne nyinaa ho hia Yesu. Nneɛma a ɛhaw wɔn, ne nea ɛma ɛyɛ den sɛ wɔbɛte nokware no ase nso, na ɛho hia no. (Mateo 11:28; 16:13; 23:13, 15) Wo de, ma yensusuw Samariani bea no ho nhwɛ. Akyinnye biara nni ho sɛ, n’ani gyei sɛ Yesu nyaa adaagye maa no na ɔne no kasae. Sɛnea Yesu tumi huu Samariani bea no asetena mu nsɛm no kaa no ma ogyee no toom sɛ Yesu yɛ odiyifo, na ɔkaa ne ho asɛm kyerɛɛ afoforo. (Yohane 4:16-19, 39) Ɛwom, wɔn a wɔdi Yesu akyi nnɛ no ntumi nhu nnipa a wɔka asɛm no kyerɛ wɔn no koma mu. Nanso, yebetumi akyerɛ nkurɔfo ho anigye sɛnea Yesu yɛe no. Yebetumi ama wɔahu sɛ yedwen wɔn ho, na yebetumi adannan yɛn nsɛm mu ama afa nneɛma pɔtee a wɔn ani gye ho, ɔhaw ahorow a wɔhyia, ne wɔn ahiade ho.

10, 11. (a) Dɛn ho asɛm na Yesu kae? (b) Adɛn nti na ebehiae sɛ Onyankopɔn Ahenni no ba?

¹⁰ Dɛn ho asɛm na Yesu kae? Nsɔrensɔre pii a wɔka sɛ wɔyɛ Kristofo no, sɛ woregyina wɔn nkyerɛkyerɛ so ayi asɛm yi ano a, anka wobɛka sɛ ade a na esi Yesu ani so ne sɛ ɔbɛpere atu ntɛnkyea ase. Ebetumi ama obi anya adwene nso sɛ, na Yesu pɛ sɛ nkurɔfo sesa aban, anaa mpo nkwagye a ankorankoro benya na na ehia no kɛse. Nanso, sɛnea yɛadi kan ahu no, Yesu kaa no pen sɛ: ‘Ɛsɛ sɛ meka Onyankopɔn Ahenni ho asɛmpa no.’ Dɛn na na saa asɛm no kyerɛ?

¹¹ Kae sɛ, Satan kasa tiaa Yehowa din kronkron no, na ɔkaa sɛ ɔkwan a Yehowa Nyankopɔn fa so di tumi no mfata. Saa bere no nyinaa, na Yesu wɔ soro hɔ bi. Satan bɔɔ Onyankopɔn sobo sɛ ɔyɛ Sodifo tirimɔdenfo a ɔde nneɛma pa kame n’abɔde. Esiane sɛ na Yesu nim sɛ n’Agya akwan nyinaa tene nti, bere a ɔtee sobo no, ɛbɛyɛ sɛ ɛhyee no paa! Bio nso, Adam ne Hawa na daakye na nnipa nyinaa befi wɔn mu aba, enti bere a wɔgyee Satan atosɛm no dii no, ɛbɛyɛ sɛ ɛyɛɛ Onyankopɔn Ba no yaw yiye. Onyankopɔn Ba no hui sɛ, esiane saa atuatew no nti, bɔne ne owu trɛw kaa nnipa nyinaa. (Romafo 5:12) Enti bere a n’Agya ma ohui sɛ wayɛ nhyehyɛe a daakye ɔde besiesie nneɛma nyinaa no, ɛbɛyɛ sɛ n’ani gyei paa!

12, 13. Nneɛma a ɛnkɔ yiye a Onyankopɔn Ahenni bɛtenetene no no, ebi ne sɛn? Ɔkwan bɛn so na Yesu maa Ahenni no yɛɛ ade titiriw wɔ n’asɛnka adwuma no mu?

¹² Dɛn na na ɛnkɔ yiye koraa a ɛsɛ sɛ wɔtenetene no? Ná ehia sɛ wɔtew Yehowa din kronkron no ho, na atosɛm a Satan ne n’akyidifo asoa agu ne so nyinaa, na ɛsɛ sɛ wɔbɔ gu. Bio nso, esiane sɛ Yehowa yɛ sodifo nti, na ehia sɛ ɛda adi ma obiara hu sɛ sɛnea ɔdi tumi no fata anaa ɛmfata. Saa nsɛm a ɛho hia yi, na Yesu te ase kyɛn onipa biara. Bere a Yesu rekyerɛ n’akyidifo mpaebɔ no, ɔkaa sɛ wɔrebɔ mpae a, wɔnni kan nsrɛ sɛ n’Agya din ho ntew, afei wɔnsrɛ sɛ n’Agya Ahenni no mmra, na ɛno akyi no, wɔnsrɛ mma Onyankopɔn apɛde nyɛ hɔ wɔ asaase so. (Mateo 6:9, 10) Ɛrenkyɛ, Onyankopɔn Ahenni a Kristo Yesu yɛ so Hene no beyi Satan wiase a aporɔw no afi asaase so, na ɛbɛma ada adi korakora sɛ Yehowa tumidi tene.—Daniel 2:44.

¹³ Ná saa Ahenni no ne ade titiriw a Yesu ka ho asɛm wɔ n’asɛnka adwuma no mu. Nsɛm a ɔkae ne nea ɔyɛe nyinaa boa maa nkurɔfo huu nea Ahenni no kyerɛ, ne sɛnea ebedi Yehowa atirimpɔw ho dwuma. Yesu amma biribiara antwetwe n’adwene amfi Onyankopɔn Ahenni no ho asɛmpa a na ɔreka no so. Bere a ɔwɔ asaase so no, na nsɛmnsɛm pii wɔ hɔ a ɛhaw ɔmanfo, na na atɛnkyea abu so, nanso ɔde n’adwene sii asɛm a ɔde nam ne adwuma a ɔreyɛ no so. Wei kyerɛ sɛ na Yesu yɛ katee, onnwen afoforo ho, na asɛnkoro no ara na ɔka no daa anaa? Ɛnte saa koraa!

14, 15. (a) Ɔkwan bɛn so na Yesu kyerɛe sɛ ‘ɔsen Solomon’? (b) Yɛbɛyɛ dɛn asuasua Yesu wɔ asɛnka adwuma no mu?

¹⁴ Sɛnea yebehu wɔ ɔfã yi nyinaa mu no, Yesu maa ne nkyerɛkyerɛ yɛɛ anika, na na ɔdannan mu. Ɔkaa asɛm no ma ɛtɔɔ nkurɔfo koma so. Ebia wei ma yɛkae Ɔhene Solomon. Saa ɔhene nyansafo yi hwehwɛɛ nsɛm a ɛyɛ dɛ, ne nsɛm a ɛyɛ nokware, sɛnea ɛbɛyɛ a ɔbɛkyerɛw nsɛm a Yehowa de maa no no. (Ɔsɛnkafo 12:10) Ɛwom sɛ na Solomon yɛ onipa a bɔne wɔ ne ho a onwie pɛyɛ, nanso Yehowa maa no “koma a emu ntease dɔɔso” a obetumi de aka nneɛma pii te sɛ nnua, nnomaa, mpataa, ne mmoa foforo ho asɛm. Nnipa fi akyirikyiri betiee Solomon nsɛm. (1 Ahene 4:29-34) Nanso na Yesu ‘sen Solomon’ koraa. (Mateo 12:42) Ná onim nyansa sen Solomon bam, na na ɔwɔ “koma a emu ntease dɔɔso” sen Solomon de koraa. Sɛ Yesu rekyerɛkyerɛ afoforo a, na ɔde Onyankopɔn Asɛm mu nimdeɛ a edi mũ a ɔwɔ no di dwuma. Afei nso, nimdeɛ a ɛkyɛn so a na ɔwɔ wɔ nnomaa, mmoa, mpataa, kuadwuma, wim tebea, nsɛm a na ɛresisi, abakɔsɛm, ne nnipa asetena mu nsɛm ho no, ɔde kaa ne nkyerɛkyerɛ ho. Nanso Yesu amfa nimdeɛ a na ɔwɔ no antu ne ho. Ná ne nkyerɛkyerɛ nyɛ nwonworann, na na emu da hɔ. Enti, na nkurɔfo ani gye ne nkyerɛkyerɛ ho yiye!—Marko 12:37; Luka 19:48.

¹⁵ Ɛnnɛ, Kristofo bɔ mmɔden sɛ wɔbedi Yesu anammɔn akyi. Nimdeɛ ne nyansa a yɛwɔ no nnu Yesu de no, nanso yɛn nyinaa wɔ nimdeɛ ne osuahu a yebetumi de akyerɛkyerɛ afoforo nokwasɛm a ɛwɔ Onyankopɔn Asɛm mu no. Sɛ nhwɛso no, awofo betumi de osuahu a wɔanya wɔ mmofra ntetee mu no akyerɛ sɛnea Yehowa dɔ ne mma. Afoforo nso betumi de osuahu a wɔanya wɔ adwumam, sukuu mu, anaa osuahu a wɔanya wɔ sɛnea yɛne nnipa tena ho, ne nsɛm a ɛresisi adi dwuma. Bere koro no ara nso, bere a yɛreyɛ saa no, yɛhwɛ yiye sɛ yɛremma asɛm a yɛka no ntwetwe nkurɔfo adwene mfi Onyankopɔn Ahenni ho asɛmpa no so.—1 Timoteo 4:16.

16, 17. (a) Sɛn na na Yesu bu ne som adwuma no? (b) Dɛn na Yesu yɛe a ɛkyerɛ sɛ na asɛnka adwuma no ne ade a ehia no paa wɔ n’asetena mu?

¹⁶ Ná Yesu bu asɛnka adwuma no sɛ agyapade a ɛsom bo. Ná ɔmpɛ sɛ nnipa nkyerɛkyerɛ ne amammerɛ ahorow ma nkurɔfo nya ne soro Agya no ho adwene a ɛmfata. Ɛno nti, na n’ani gye ho sɛ ɔbɛboa wɔn ama wɔahu n’Agya yiye. Ná Yesu ani gye ho sɛ ɔbɛboa nkurɔfo ama wɔne Yehowa ntam ayɛ papa na wɔanya daa nkwa ho anidaso. Ná n’ani gye ho nso sɛ ɔbɛka asɛmpa no akyerɛ nkurɔfo na ama wɔanya anigye ne awerɛkyekye. Dɛn na ɔyɛe a ɛkyerɛ sɛ na n’ani gye ho sɛ ɔbɛyɛ saa nneɛma yi nyinaa? Momma yɛnhwɛ nneɛma mmiɛnsa bi.

¹⁷ Nea edi kan no, Yesu maa asɛnka adwuma no yɛɛ ade a ehia no paa wɔ n’asetena mu. Ahenni no ho asɛm a na ɔka no, ɛno ne adwuma titiriw a ɔyɛe wɔ n’asetena mu. Ɛno nti na wanyɛ akɛsesɛm, sɛnea yehui wɔ Ti 5 no. Afotu a ɔde maa nkurɔfo sɛ wɔmma wɔn aniwa nhwɛ tẽẽ no, ɔno ara nso de yɛɛ adwuma, na ɔde n’adwene sii nea ɛho hia paa so. Yesu ansoa nneɛma pii angu ne ho so. Anyɛ saa a, anka ɛho ka, ɛho adwuma, ne nea ɛkeka ho no begye ne bere pii. Enti wamma n’abrabɔ anyɛ kyenkyenenn, sɛnea ɛbɛyɛ a nneɛma a ɛho nhia renyi n’adwene mfi asɛnka adwuma no so.—Mateo 6:22; 8:20.

18. Dɛn na Yesu yɛe a ɛkyerɛ sɛ ɔyeree ne ho yɛɛ asɛnka adwuma no?

¹⁸ Nea ɛtɔ so mmienu no, Yesu yeree ne ho yɛɛ asɛnka adwuma no. Ɔnantew twaa kwantenten faa Palestina nyinaa, na ɔyeree ne ho hwehwɛɛ nnipa a ɔbɛka asɛmpa no akyerɛ wɔn. Ɔkasa kyerɛɛ nkurɔfo wɔ wɔn afie mu, mmɔnten ne gua so, ne petee mu nyinaa. Bere a ɔkɔm ne sukɔm de no, bere a wabrɛ, ɛne bere a na ɛsɛ sɛ ɔne ne nnamfonom a wɔbɛn no paa gye wɔn ahome nyinaa, ɔkɔɔ so kyerɛkyerɛe. Bere a na ɔrewu mpo no, ɔkaa Onyankopɔn Ahenni ho asɛmpa no kyerɛɛ afoforo!—Luka 23:39-43.

19, 20. Mfatoho bɛn na Yesu de kyerɛkyerɛɛ sɛnea asɛnka adwuma no gye ntɛmpɛ no mu?

¹⁹ Nea ɛtɔ so mmiɛnsa no, na Yesu nim sɛ asɛnka adwuma no gye ntɛmpɛ, enti ɔde nsi ne ahokeka yɛe. Yɛnsan nhwɛ nkɔmmɔ a ɔne Samariani bea no bɔe wɔ asubura a ɛwɔ Sikar kurotia no. Ɛbɛyɛ sɛ na Yesu asomafo no nhu sɛ egye ntɛmpɛ sɛ wɔka asɛmpa no kyerɛ afoforo. Enti Yesu ka kyerɛɛ wɔn sɛ: “Ɛyɛ a moka sɛ aka abosome anan ansa na twabere adu, ɛnte saa? Hwɛ! Mereka akyerɛ mo sɛ: Momma mo ani so nhwɛ mfuw no, na mubehu sɛ nnɔbae no awo sɛ wotwa.”—Yohane 4:35.

²⁰ Yesu hwɛɛ bere a na wɔwom no na ɔde maa mfatoho no. Ɛda adi sɛ na ɛyɛ bosome Kislew no (November/December) mu. Ná aka bɛyɛ abosome nnan ansa na wɔafi ase atwa baali. Saa bere no mu hɔ baabi nso na na wɔbedi Twam no wɔ Nisan 14. Enti, na akuafo ho mpere wɔn sɛ wɔbetwa wɔn nnɔbae wɔ bosome Kislew no mu. Ná wɔwɔ bere pii da wɔn anim. Nanso na Yesu de otwa adwuma no retoto sɛnea yɛboa nkurɔfo ma wɔbɛyɛ n’asuafo no ho. Enti asɛm no ne sɛ, na bere aso sɛ wɔyɛ saa adwuma no anaa? Yiw. Ná nnipa pii ayɛ krado sɛ wɔbetie asɛm no, wɔbesua nea wɔde bɛkyerɛkyerɛ wɔn no, na wɔabɛyɛ Kristo asuafo, na ama wɔanya anidaso a ɛyɛ anigye a Yehowa de ahyɛ wɔn bɔ no. Yesu hwɛ saa nnipa no a, na otumi hu sɛ wɔte sɛ baali afuw a nnɔbae no awo na mframa rebɔ no ma ɛredi ahim, kyerɛ sɛ, bere aso sɛ wɔtwa.c Ná bere aso, na na adwuma no gye ntɛmpɛ! Ne saa nti, bere a nnipa a wɔwɔ kurow bi mu pɛe sɛ Yesu tena wɔn nkyɛn kyɛ no, ɔka kyerɛɛ wɔn sɛ: “Ɛsɛ sɛ mekɔ nkurow foforo mu nso kɔka Onyankopɔn Ahenni ho asɛmpa no, efisɛ eyi nti na wɔsomaa me.”—Luka 4:43.

21. Yɛbɛyɛ dɛn asuasua Yesu?

²¹ Yebetumi asuasua Yesu wɔ akwan mmiɛnsa a yɛasusuw ho yi nyinaa mu. Yebetumi ama Kristofo asɛnka adwuma no ayɛ ade titiriw wɔ yɛn asetena mu. Ɛwom sɛ ebia yɛwɔ abusua mu asɛde a ɛsɛ sɛ yedi ho dwuma, anaa honam fam adwuma bi a ɛsɛ sɛ yɛyɛ de, nanso yebetumi de nsi ne ahokeka ayɛ asɛnka adwuma no sɛnea Yesu yɛe no. Yɛyɛ saa a, na ɛkyerɛ sɛ yɛde ɔsom adwuma no redi kan wɔ yɛn asetena mu. (Mateo 6:33; 1 Timoteo 5:8) Yebetumi ayere yɛn ho wɔ asɛnka adwuma no mu, na yɛafi yɛn pɛ mu de yɛn bere, yɛn ahoɔden, ne yɛn ahode aboa. (Luka 13:24) Afei nso, ɛsɛ sɛ yɛma ɛtena yɛn adwene mu sɛ, yɛn adwuma no gye ntɛmpɛ. (2 Timoteo 4:2) Enti hokwan biara a yebenya no, ɛsɛ sɛ yɛka asɛm no!

22. Dɛn na yebesusuw ho wɔ ti a edi hɔ no mu?

²² Bio nso, Yesu yɛɛ nhyehyɛe a ɛbɛma wɔatoa adwuma no so wɔ ne wu akyi. Ɛno kyerɛ sɛ na ɛho hia no paa. Ɔka kyerɛɛ n’akyidifo sɛ wɔnyɛ asɛnka ne ɔkyerɛkyerɛ adwuma no. Yebesusuw saa ahyɛde no ho wɔ ti a edi hɔ no mu.