16, 17. (a) Ade a etwa to bɛn na Yesu kae wɔ ne mfatoho no mu? (b) Yɛyɛ dɛn hu sɛ ɛyɛ daakye asɛm?

¹⁶ Nea ɛto so anum, wɔhyerɛn. Asɛm yi na Yesu de wiee ne nkɔmhyɛ no: “Saa bere no treneefo bɛhyerɛn paa sɛ owia wɔ wɔn Agya ahenni mu.” (Mat. 13:43) Bere bɛn na wɔbɛhyerɛn na ɛhe na wɔbɛyɛ saa? Saa asɛm yi bɛbam daakye. Nea Yesu kae no nyɛ biribi a ɛrekɔ so nnɛ wɔ asase so, na mmom ɛyɛ biribi a ɛbɛkɔ so daakye wɔ soro.f Yɛnhwɛ nneɛma abien nti a ɛte saa.

¹⁷ Nea edi kan, bere bɛn na wɔbɛhyerɛn? Yesu kae sɛ: “Saa bere no treneefo bɛhyerɛn.” “Saa bere no” a Yesu kaa ho asɛm no kyerɛ ɛbere a ‘wɔbɛtow nwura bɔne no agu ogya fononoo no mu.’ Ɔbɛyɛ saa wɔ ahohiahia kɛse no fã a etwa to mu. Enti yebetumi aka sɛ saa bere no ara nso na wɔn a wɔasra wɔn no “bɛhyerɛn.” Eyinom nyinaa yɛ daakye asɛm. Nea ɛto so abien, ɛhefa na wɔbɛhyerɛn? Yesu kae sɛ treneefo ‘bɛhyerɛn wɔ ahenni no mu.’ Eyi kyerɛ sɛn? Ɛkyerɛ sɛ ahohiahia kɛse no fã a edi kan betwam no, na wɔasɔ anokwafo a wɔasra wɔn a wɔda so ara wɔ asase so no nyinaa ano korakora. Afei sɛnea Yesu kae wɔ ne nkɔmhyɛ a ɛfa ahohiahia kɛse no ho mu no, wɔbɛboaboa wɔn ano akɔ soro. (Mat. 24:31) Ɛhɔ na wɔbɛhyerɛn “wɔ wɔn Agya ahenni mu.” Harmagedon ko no ba awiei a, wobegye wɔn aware ama Yesu; eyi ne “Oguammaa no ayeforohyia” no.—Adi. 19:6-9.