‘Ahene Biako A Ne Bo Yɛ Den A Wohui’

“Ɔsoro ahenni no ne botae a nnipa repere adu ho, na wɔn a wɔrepere adu ho no so mu denneennen.”—MATEO 11:12, NW.

 1, 2. (a) Su a wɔntaa nna no adi bɛn na Yesu kaa ho asɛm wɔ mmɛ a obu faa Ahenni no ho no biako mu? (b) Dɛn na Yesu kae wɔ ahene a ne bo yɛ den ho bɛ no mu?

SO BIRIBI wɔ hɔ a wubu no kɛse araa ma wode nea wowɔ nyinaa bɛma anaa wode bɛbɔ afɔre sɛnea ɛbɛyɛ a wo nsa bɛka saa ade no? Ɛwom sɛ nkurɔfo ka sɛ wɔde wɔn ho nyinaa ama de rehwehwɛ biribi a wɔde asi wɔn ani so te sɛ sika, edin, tumi, anaa dibea de, nanso ɛntaa mma sɛ obi behu biribi a n’ani gye ho araa ma enti obenya ɔpɛ sɛ ɔde nea ɔwɔ nyinaa bɛma de agye dekode no. Yesu Kristo kaa saa su yi a wɔntaa nna no adi no ho asɛm wɔ Onyankopɔn Ahenni ho mmɛ pii a ɛkanyan adwene a obui no biako mu.

² Ɛyɛ bɛ anaa mfatoho bi a Yesu kaa ho asɛm kyerɛɛ n’asuafo no wɔ kokoam, nea wɔtaa frɛ no ahene a ne bo yɛ den ho bɛ no. Nea Yesu kae ni: “Ɔsoro ahenni te sɛ oguadini bi a [otu kwan hwehwɛ, NW] nhene pa; na ohuu ahene biako a ne bo yɛ den no, ɔkɔtɔn nea ɔwɔ nyinaa de kɔtɔe.” (Mateo 13:36, 45, 46) Dɛn na na Yesu pɛ sɛ n’atiefo no sua fi saa mfatoho yi mu? Na yɛbɛyɛ dɛn atumi anya Yesu asɛm yi so mfaso?

Sɛnea Nhene Pa Som Bo Fa

 3. Tete no, dɛn nti na na nhene pa bo yɛ den paa?

³ Efi tete na wɔabu nhene sɛ nneɛma a yɛde hyehyɛ yɛn ho. Nhoma bi ka sɛ sɛnea Romani nhomanimfo Pliny Ɔpanyin kyerɛ no, na nhene “bo yɛ den sen nneɛma a ɛsom bo nyinaa.” Nhene nte sɛ sika kɔkɔɔ, dwetɛ, anaa aboɔden abo pii, efisɛ abɔde a nkwa wom na wɔyɛ. Sɛ nhwɛso no, wonim no yiye sɛ adɔde ahorow bi tumi de abosea nketenkete yɛ nhene. Wɔde wɔn ano nsu na ɛkeka abosea nketenkete no fomfam so de nwene. Tete no, na Ɛpo Kɔkɔɔ, Persia Po, ne India Po a na ɛmmɛn Israel koraa no mu titiriw na na wonya nhene pa a ɛsen biara no fi. Akyinnye biara nni ho sɛ eyi nti na Yesu kae sɛ ‘oguadini no tuu kwan kɔhwehwɛ nhene pa no.’ Ná egye mmɔdenbɔ pii na ama obi anya nhene a ɛsom bo paa.

 4. Dɛn ne asɛntitiriw a ɛwɔ Yesu bɛ a ɛfa oguadini kwantufo ho no mu?

⁴ Ɛwom sɛ mmere tenten ni na wɔabu nhene pa sɛ ade a ne bo yɛ den de, nanso ɛda adi sɛ ɛnyɛ sika fam mfaso dodow a wonya fi so na na ɛyɛ asɛntitiriw a Yesu reka ho asɛm wɔ ɛbɛ a obui no mu. Wɔ saa bɛ yi mu no, Yesu amfa Onyankopɔn Ahenni no antoto ahene a ne bo yɛ den ho kɛkɛ; ɔtwee adwene sii ‘oguadini a otu kwan kɔhwehwɛ nhene pa’ ne sɛnea ɔyɛɛ n’ade bere a onyaa bi no so. Esiane sɛ ná oguadini a otu kwan kɔhwehwɛ nhene no nte sɛ sotɔɔwura bi kɛkɛ nti, na ɔyɛ obi a onim saa guadi no mu yiye, na na otumi hu nea ɛkyerɛ sɛ ahene bi yɛ ahene pa na ɛyɛ nea edi mũ ankasa. Sɛ ohu ahene no a, otumi hu sɛ ɛyɛ papa anaasɛ ɛnyɛ papa, na ɛnyɛ ade a wobetumi de agude a ɛnyɛ papa anaa daadaakra abu no.

 5, 6. (a) Dɛn titiriw na ɛfata sɛ yɛhyɛ no nsow wɔ oguadini a ɔwɔ Yesu bɛ no mu no ho? (b) Dɛn na ademude a ahintaw ho bɛ no da no adi wɔ oguadini kwantufo no ho?

⁵ Biribi foforo wɔ hɔ a ɛsɛ sɛ yɛhyɛ no nsow wɔ saa guadini yi ho. Oguadini biara bɛbɔ mmɔden sɛ obehu bo a obetumi atɔn ahene no na ama wahu sɛnea ɔbɛtɔ no na sɛ ɔtɔn a wanya so mfaso. Ebia obesusuw ho nso sɛ ɛyɛ ade a wɔtɔ ahene a ɛte saa ntɛmntɛm paa wɔ gua so sɛnea ɛbɛyɛ a obetumi atɔn no ntɛm. Ɔkwan foforo so no, sɛnea obetumi atɔn no ntɛm anya ho mfaso no na ebehia no, na ɛnyɛ sɛ ɔbɛtɔ ahene no afa no. Nanso, na ɛnte saa wɔ oguadini a wɔka ne ho asɛm wɔ Yesu bɛ no mu no fam. Ɛnyɛ mfaso anaa ahode na na ɛho hia no. Nokwarem no, na ɔwɔ ɔpɛ sɛ ɔde “nea ɔwɔ nyinaa,” a ebetumi ayɛ n’agyapade nyinaa, bɛbɔ afɔre na ama watumi atɔ ade a na ɔrehwehwɛ no.

⁶ Wɔ aguadifo dodow no ara ani so no, ebetumi aba sɛ wobebu ade a onipa a ɔwɔ Yesu bɛ no mu yɛe no sɛ adeyɛ a nyansa nnim. Oguadini a ɔwɔ nhumu remfa ne ho nhyɛ adwuma a ebetumi ama wabɔ ka saa mu. Nanso, na mfaso foforo koraa na ɛho asɛm wɔ oguadini a ɔwɔ Yesu bɛ no mu no adwenem. Na ɛnyɛ sika fam mfaso na ɔrepɛ, na mmom na ɛyɛ anigye ne abotɔyam a obenya sɛ wanya biribi a ɛsom bo koraa saa. Yesu ma saa asɛm yi mu da hɔ wɔ bɛ bi a ɛte sɛ eyi a obui no mu. Ɔkae sɛ: “Ɔsoro ahenni no te sɛ ademude bi a wɔde asie afuw mu; ɛno na onipa bi kohui, na ɔkataa so, na ɛho anigye nti ɔkɔ kɔtɔn nea ɔwɔ nyinaa de kɔtɔɔ afuw no.” (Mateo 13:44) Yiw, ɔbarima no nyaa ademude a ohui a na ɛbɛba abɛyɛ ne de no ho anigye a emu yɛ den araa ma ɔde biribiara a na ɔwɔ bɔɔ afɔre. So nnipa bi te saa nnɛ? So ademude bi wɔ hɔ a ɛfata sɛ wɔbɔ ho afɔre a ɛte saa?

Wɔn a Wɔkyerɛɛ Sɛnea Ahenni no Som Bo Ho Anisɔ

 7. Ɔkwan bɛn so na Yesu kyerɛe sɛ n’ani sɔ sɛnea Ahenni no som bo paa?

⁷ Na ɛyɛ “ɔsoro ahenni” ho asɛm na na Yesu reka wɔ ɛbɛ a obui no mu. Akyinnye biara nni ho sɛ ɔno ankasa kyerɛɛ sɛnea Ahenni no som bo ho anisɔ ankasa. Nsɛmpa kyerɛwtohɔ no di nokwasɛm yi ho adanse pefee. Bere a wɔbɔɔ Yesu asu wɔ afe 29 Y.B. mu no, ‘ofii ase kaa asɛm sɛ: Monsakra mo adwene; na ɔsoro ahenni no abɛn.’ Ɔde mfirihyia abiɛsa kaa Ahenni no ho asɛm kyerɛɛ nkurɔfo akuwakuw pii. Okyinkyin asase no so baabiara, na “ɔkɔfaa nkurow ne nkuraa nyinaa mu kaa Onyankopɔn ahenni ho asɛmpa no kyerɛe.”—Mateo 4:17; Luka 8:1.

 8. Dɛn na Yesu yɛe de kyerɛɛ nea Ahenni no bɛyɛ?

⁸ Yesu nam anwonwade ahorow pii a ɔyɛe wɔ asase so nyinaa a ebi ne ayarefo a ɔsaa wɔn yare, wɔn a ɔkɔm de wɔn a ɔmaa wɔn aduan, abɔde mu nneɛma te sɛ ɛpo ne mframa a ɔma ɛyɛɛ komm, ne awufo a onyan wɔn no so nso daa nea Onyankopɔn Ahenni bɛyɛ adi. (Mateo 14:14-21; Marko 4:37-39; Luka 7:11-17) Awiei koraa no, ɔde ne nkwa mae wuu mogya dansefo wu wɔ asɛndua so de daa nokware a odi ma Onyankopɔn ne Ahenni no adi. Sɛnea oguadini kwantufo no tɔn biribiara a na ɔwɔ de tɔɔ ‘ahene a ne bo yɛ den’ no, saa ara na Yesu bɔɔ ne bra na owu maa Ahenni no.—Yohane 18:37.

 9. Suban soronko bɛn na Yesu asuafo a wodi kan no daa no adi?

⁹ Ɛnyɛ Ahenni no ho adwuma nko na Yesu yɛe wɔ n’asetram na mmom ɔboaboaa akyidifo kakra ano nso. Saafo yi nso kyerɛe sɛ wɔyɛ nkurɔfo a Ahenni no som bo ma wɔn paa. Wɔn mu bi ne Andrea a na anka ɔyɛ Yohane Osuboni suani no. Bere a Andrea tee adanse a Yohane dii sɛ Yesu ne “Onyankopɔn guammaa” no, ɔne Yohane suani foforo a ɛda adi paa sɛ ɔbɛyɛ Sebedeo mmabarima no mu biako a ɔno nso de Yohane no kodii Yesu akyi ntɛm ara, na wɔbɛyɛɛ gyidifo. Nanso, asɛm no anso hɔ ara. Ntɛm ara na Andrea kɔɔ ne nua Simon nkyɛn kɔka kyerɛɛ no sɛ: “Yɛahu Mesia” no. Amonom hɔ ara na Simon (a wɔbɛfrɛɛ no Kefa, anaa Petro no) ne Filipo ne n’adamfo Natanael nso begyee Yesu toom sɛ Mesia no. Nokwarem no, biribi kaa Natanael ma ɔka kyerɛɛ Yesu sɛ: “Wone Nyankopɔn ba, wone Israel hene.”—Yohane 1:35-49.

Wɔkanyan Wɔn Koma Maa Wɔyɛɛ Ade

10. Bere a Yesu frɛɛ asuafo no nea ɛto so abien no, wɔyɛɛ wɔn ade dɛn?

¹⁰ Yebetumi de anigye a Andrea, Petro, Yohane, ne afoforo nyae bere a wohuu Mesia no atoto anigye a oguadini kwantufo no nyae bere a ohuu ahene a ne bo yɛ den no ho. Afei na dɛn na wɔbɛyɛ? Nsɛmpa no nka nea wɔyɛe wɔ bere a edi kan a wohuu Yesu no akyi pɛɛ no ho nsɛm pii nkyerɛ yɛn. Ɛda adi sɛ, wɔn mu dodow no ara san kɔyɛɛ wɔn nnwuma a na wɔyɛ no daa no. Nanso, efi bɛyɛ asram asia kosi afe biako akyi no, Yesu san hyiaa Andrea, Petro, ne Yohane nua Yakobo bio wɔ baabi a na woyi mpataa wɔ Galilea Po no ho.a Bere a Yesu huu wɔn no, ɔkae sɛ: “Mummedi m’akyi, na mɛma moayɛ nnipa yifo.” Wɔyɛɛ wɔn ade dɛn? Mateo kyerɛwtohɔ no ka Petro ne Andrea ho asɛm sɛ: “Ntɛm ara wogyaw wɔn asawu no bedii n’akyi.” Yɛkenkan Yakobo ne Yohane ho asɛm sɛ: “Ntɛm ara wogyaw ɔkorow no ne wɔn agya bedii n’akyi.” Luka kyerɛwtohɔ no de ka ho sɛ “wogyaw biribiara hɔ dii n’akyi.”—Mateo 4:18-22; Luka 5:1-11, NW.

11. Ɛbɛyɛ sɛ dɛn na ɛmaa asuafo no gyee Yesu frɛ no so ntɛm no?

¹¹ So asuafo no de ahopere na egyee ɔfrɛ no so a wɔannwen ho ankɔ akyiri? Dabida! Ɛwom sɛ wɔsan kɔyɛɛ wɔn abusua adwuma a ɛyɛ mpataayi no wɔ bere a wohyiaa Yesu nea edi kan no akyi de, nanso akyinnye biara nni ho sɛ nea na wɔahu na wɔate wɔ bere a edi kan a wohyiaa Yesu no nyaa wɔn koma ne wɔn adwene so nkɛntɛnso kɛse. Bɛyɛ afe biako a etwaam no maa wonyaa bere pii de susuw nneɛma a ɛte saa no ho. Afei de na bere adu sɛ wosi gyinae. So na wɔbɛyɛ wɔn ade sɛ oguadini kwantufo no a ahene a ne bo yɛ den kanyan ne koma kɛse ma ɔyɛɛ n’ade sɛnea Yesu kaa ho asɛm sɛ, ‘ntɛm ara ɔkɔe’ kɔyɛɛ nea ɛsɛ sɛ ɔyɛ de kɔtɔɔ saa ahene no? Yiw. Nea na wɔahu na wɔate no kanyan wɔn koma. Wohui sɛ na bere adu sɛ wɔyɛ biribi. Enti, sɛnea kyerɛwtohɔ no ka no, wogyaw biribiara hɔ ntɛm ara bɛyɛɛ Yesu akyidifo.

12, 13. (a) Nnipa pii a wɔtee Yesu asɛm no yɛɛ wɔn ade dɛn? (b) Asɛm bɛn na Yesu ka faa n’asuafo anokwafo no ho, na n’asɛm no kyerɛ dɛn?

¹² Hwɛ sɛnea ɛsono saa anokwafo yi ne afoforo a wɔkaa wɔn ho asɛm akyiri yi wɔ Nsɛmpa no mu no! Nnipa yi mu pii na Yesu saa wɔn yare anaasɛ ɔmaa wɔn aduan nanso wɔsan kɔyɛɛ wɔn nnwuma. (Luka 17:17, 18; Yohane 6:26) Bere a Yesu frɛɛ ebinom sɛ wɔmmɛyɛ n’akyidifo no, wɔde nneɛma yiyii wɔn ho ano. (Luka 9:59-62) Nea ɛnte saa koraa no, Yesu ka faa anokwafo no ho akyiri yi sɛ: “Efi Yohane Suboni bere so besi sesɛɛ, ɔsoro ahenni no ne botae a nnipa repere adu ho, na wɔn a wɔrepere adu ho no so mu denneennen.”—Mateo 11:12, NW.

¹³ Dɛn na saa nsɛm yi, ‘pere’ ne “repere adu ho” no kyerɛ? Ɛdefa Hela adeyɛ asɛm a wonyaa saa nsɛm yi fii mu ho no, Vine’s Expository Dictionary of Old and New Testament Words ka sɛ: “Adeyɛ asɛm no kyerɛ adwuma a wɔyɛ no ahoɔden so.” Bible ho ɔbenfo Heinrich Meyer ka saa nkyekyɛm yi ho asɛm sɛ: “Saa kwan yi so no, wɔde anigye, mmɔdenbɔ, ne ahopere kɛse na ɛhwehwɛ Mesia ahenni a ɛreba no . . . (wɔntra faako komm nhwɛ kwan bio) na mmom wɔde ahopere ne ahoɔden na ɛhwehwɛ ahenni no.” Te sɛ oguadini kwantufo no, saa nnipa kakra yi huu ade a ɛsom bo ankasa no ntɛm, na wofii wɔn pɛ mu de nea na wɔwɔ nyinaa bɔɔ afɔre hwehwɛɛ Ahenni no.—Mateo 19:27, 28; Filipifo 3:8.

Afoforo Bɛkaa Ahenni a Wɔrehwehwɛ no Ho

14. Ɔkwan bɛn so na Yesu siesiee asomafo no maa Ahenni asɛnka adwuma no, na dɛn na efii mu bae?

¹⁴ Bere a Yesu reyɛ ne som adwuma no, ɔtetee afoforo boaa wɔn ma wɔhwehwɛɛ Ahenni no. Nea edi kan no, ɔpaw n’asuafo no mu 12 yɛɛ wɔn asomafo, anaa nnipa a ɔsomasomaa wɔn. Yesu de akwankyerɛ a ɛkɔ akyiri a na ɛfa sɛnea wɔbɛyɛ wɔn som adwuma no ho maa wɔn, na ɔbɔɔ wɔn kɔkɔ wɔ nsɛnnennen ne ahokyere a na wobehyia ho. (Mateo 10:1-42; Luka 6:12-16) Mfirihyia abien anaa nea ɛte saa a edi hɔ mu no, wɔne Yesu tutuu akwan kɔkaa asɛm no wɔ asase no so nyinaa, na wɔne no nyaa abusuabɔ a emu yɛ den. Wotiee ne kasa, huu n’anwonwade, ne ne nhwɛso a ɔyɛe. (Mateo 13:16, 17) Akyinnye biara nni ho sɛ eyinom nyinaa kaa wɔn koma kɛse araa ma te sɛ oguadini kwantufo no, wɔde nsiyɛ ne wɔn koma nyinaa hwehwɛɛ Ahenni no.

15. Dɛn na Yesu kae sɛ ɛno ne ade ankasa a na ɛsɛ sɛ ɛma n’akyidifo no ani gye?

¹⁵ Asomafo 12 no akyi no, Yesu “paw nnipa aduɔson bio, na ɔsomasomaa wɔn baanu baanu dii n’anim kɔɔ kurow biara ne baabiara a ɔno ankasa rebɛkɔ hɔ.” Ɔkaa sɔhwɛ ne ahokyere a na wobehyia ho asɛm kyerɛɛ wɔn, na ɔka kyerɛɛ wɔn sɛ wɔnka nkyerɛ nkurɔfo no sɛ: “Onyankopɔn ahenni abɛn mo.” (Luka 10:1-12) Bere a asuafo 70 no san bae no, na wɔn ani agye mmoroso, na wɔde amanneɛ yi bɛbɔɔ Yesu sɛ: “Awurade, wo din nti ahonhommɔne po abrɛ wɔn ho ase ama yɛn.” Nanso, ɛbɛyɛ sɛ wɔn ho dwiriw wɔn sɛ Yesu ka kyerɛɛ wɔn sɛ esiane nsi a wɔde ayɛ Ahenni no ho adwuma nti wobenya anigye foforo a ɛkyɛn saa koraa no. Ɔka kyerɛɛ wɔn sɛ: “Mommma mo ani nnnye sɛ ahonhom abrɛ wɔn ho ase ama mo; na mmom mo ani nnye sɛ wɔakyerɛw mo din ɔsoro.”—Luka 10:17, 20.

16, 17. (a) Dɛn na Yesu ka kyerɛɛ n’asomafo anokwafo no anadwo a etwa to a ɔne wɔn hyiae no? (b) Anigye ne awerɛhyem bɛn na Yesu nsɛm no maa asomafo no nyae?

¹⁶ Awiei koraa no, wɔ anadwo a etwa to a Yesu ne n’asomafo no hyiaam wɔ Nisan 14, 33 Y.B. mu no, ɔde afahyɛ bi a wɔbɛfrɛɛ no Awurade Anwummeduan sii hɔ, na ɔhyɛe sɛ wɔnyɛ mfa nyɛ no nkae. Saa anwummere no, Yesu ka kyerɛɛ asomafo 11 a na wɔda so ne no wɔ hɔ no sɛ: “Mone wɔn a wɔda so ka me ho me sɔhwɛ mu. Na me nso sɛnea m’agya ayi ahenni ama me no, saa ara na meyi mama mo, na moadidi na moanom me pon so wɔ m’ahenni mu, na moatra nhengua so abu Israel mmusuakuw dumien no atɛn.”—Luka 22:19, 20, 28-30.

¹⁷ Bere a asomafo no tee Yesu nsɛm no, hwɛ anigye ne abotɔyam a ɛbɛyɛ sɛ wonyae! Afei de na wɔde nidi ne hokwan a ɛsen biara a nnipa betumi anya rema wɔn. (Mateo 7:13, 14; 1 Petro 2:9) Te sɛ oguadini kwantufo no, na wɔde nneɛma pii abɔ afɔre abedi Yesu akyi rehwehwɛ Ahenni no. Afei de na wɔama wɔn awerɛhyem sɛ afɔre ahorow a wɔabɔ no nyinaa nyɛɛ ɔkwa.

18. Wɔ asomafo 11 no akyi no, henanom nso na na wobenya Ahenni no so mfaso?

¹⁸ Ná ɛnyɛ asomafo a na wɔne Yesu wɔ hɔ saa anadwo no nkutoo na na wobenya Ahenni no so mfaso. Ná ɛyɛ Yehowa pɛ sɛ wɔde nnipa 144,000 bɛba Ahenni apam no mu ma wɔabɛyɛ Yesu Kristo mfɛfo adedifo wɔ ɔsoro Ahenni a anuonyam wom no mu. Afei nso, ɔsomafo Yohane huu ‘nnipakuw kɛse a obi ntumi nkan wɔn sɛ wogyinagyina ahengua no ne oguammaa no anim, na wɔteɛɛm sɛ: Nkwagye no yɛ yɛn Nyankopɔn a ɔte ahengua no so ne oguammaa no dea’ wɔ anisoadehu mu. Eyinom yɛ Ahenni no nkoa a wɔwɔ asase so.b—Adiyisɛm 7:9, 10; 14:1, 4.

19, 20. (a) Hokwan bɛn na abue ama nnipa a wofi amanaman nyinaa mu? (b) Asɛmmisa bɛn na yebesusuw ho wɔ asɛm a edi hɔ no mu?

¹⁹ Aka bere tiaa bi ma Yesu aforo akɔ soro no, ɔka kyerɛɛ n’akyidifo anokwafo no sɛ: “Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne Honhom Kronkron din mu, na monkyerɛkyerɛ wɔn sɛ wonni nea mahyɛ mo nyinaa so. Na hwɛ, me ne mo wɔ hɔ nna nyinaa de bɛkɔ akosi wiase awiei.” (Mateo 28:19, 20) Enti, na nnipa a wofi amanaman nyinaa mu bɛba abɛyɛ Yesu Kristo asuafo. Sɛ́ wobenya wɔn akatua wɔ soro anaa asase so no, na wɔn nso de wɔn koma bedi Ahenni no akyi sɛnea oguadini kwantufo no yɛe wɔ ahene pa no ho no.

²⁰ Yesu nsɛm no kyerɛ sɛ wɔbɛyɛ asuafoyɛ adwuma no akosi “wiase awiei.” Enti, so nnipa bi wɔ yɛn bere yi so a wɔte sɛ oguadini kwantufo no a wɔwɔ ɔpɛ sɛ wɔde nea wɔwɔ nyinaa bɛbɔ afɔre de ahwehwɛ Onyankopɔn Ahenni no? Yebesusuw asɛmmisa yi ho wɔ asɛm a edi hɔ no mu.

[Ase hɔ nsɛm]

“Ahene A Ne Bo Yɛ Den” No A Yɛbɛhwehwɛ Nnɛ

“Wɔbɛka ahenni ho asɛmpa yi wiase nyinaa de adi amanaman nyinaa adanse.”—MATEO 24:14.

 1, 2. (a) Adwene bɛn na na Yesu bere so Yudafo no kura wɔ Onyankopɔn Ahenni ho? (b) Dɛn na Yesu yɛe maa wonyaa Ahenni no ho ntease a ɛfata, na dɛn na efii mu bae?

BERE a Yesu baa asase so no, na Onyankopɔn Ahenni no ne ade a Yudafo no ka ho asɛm titiriw. (Mateo 3:1, 2; 4:23-25; Yohane 1:49) Nanso, mfiase no, na wɔn mu dodow no ara nnim baabi a Ahenni no mu bɛtrɛw akodu ne sɛnea ebedi tumi; na saa ara nso na na wonnim sɛ ɛbɛyɛ ɔsoro nniso. (Yohane 3:1-5) Na ebinom a wɔbɛyɛɛ Yesu akyidifo no mpo ante nea Onyankopɔn Ahenni no kyerɛ ase yiye, na saa ara na na wonnim nea ɛsɛ sɛ wɔyɛ na ama wɔanya hokwan abɛyɛ Kristo yɔnko adedifo.—Mateo 20:20-22; Luka 19:11; Asomafo no Nnwuma 1:6.

² Bere kɔɔ so no, Yesu fii boasetɔ mu kyerɛkyerɛɛ n’asuafo no nneɛma pii, a ebi ne ahene a ne bo yɛ den ho bɛ a yesuaa ho ade wɔ asɛm a edi eyi anim mu no, na ɔma wohuu hia a ehia sɛ wɔyere wɔn ho hwehwɛ ɔsoro Ahenni no. (Mateo 6:33; 13:45, 46; Luka 13:23, 24) Ɛbɛyɛ sɛ eyi kaa wɔn koma yiye efisɛ ankyɛ na wɔbɛyɛɛ Ahenni no ho asɛmpakafo a wɔyɛ nsi na wɔwɔ akokoduru a wɔde asɛmpa no kɔɔ asase ano nohoa, nokwasɛm a Asomafo no Nnwuma di ho adanse pii.—Asomafo no Nnwuma 1:8; Kolosefo 1:23.

 3. Ahenni no ho asɛm bɛn na Yesu ka faa yɛn bere yi ho?

³ Na ɛnnɛ nso ɛ? Wɔaka nhyira a ɛbɛba asase so paradise mu wɔ Ahenni no ase ho asɛm akyerɛ nnipa ɔpepem pii. Wɔ “wiase awiei” ho nkɔm titiriw a Yesu hyɛe mu no, ɔkaa no pefee sɛ: “Wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.” (Mateo 24:3, 14; Marko 13:10) Ɔkyerɛkyerɛɛ mu nso sɛ ɛmfa ho sɛ wobehyia akwanside, nsɛnnennen a ɛyɛ hu, ne ɔtaa mpo no, wɔbɛyɛ adwuma kɛse yi. Nanso, ɔhyɛɛ saa bɔ yi sɛ: “Nea obegyina akodu awiei no, ɔno na wobegye no.” (Mateo 24:9-13) Eyi nyinaa hwehwɛ sɛ wɔda ahofama a oguadini kwantufo a wɔkaa ne ho asɛm wɔ Yesu bɛ no mu daa no adi no bi adi. So nnipa bi wɔ hɔ nnɛ a wɔda gyidi ne nsi a ɛte saa adi wɔ Ahenni no a wɔhwehwɛ no ho?

Nokware no a Wohui Ho Anigye

 4. Ahenni ho nokwasɛm no ka nkurɔfo dɛn nnɛ?

⁴ Bere a oguadini a ɔwɔ Yesu bɛ no mu huu nea osusuwii sɛ ɛyɛ “ahene a ne bo yɛ den” no, n’ani gyei mmoroso. Saa anigye no kaa no ma ɔyɛɛ biribiara a obetumi kɔtɔɔ ahene no. (Hebrifo 12:1) Saa ara na ɛnnɛ nkurɔfo ani gye Onyankopɔn ne N’ahenni ho nokwasɛm no ho na ɛkanyan wɔn. Eyi ma yɛkae asɛm bi a Onua A. H. Macmillan, a ɔkyerɛw Onyankopɔn ne N’atirimpɔw akyi kwan a n’ankasa hwehwɛe ho asɛm wɔ Faith on the March (Ɔsom a Ɛrenya Nkɔanim) nhoma no mu kae no. Ɔkae sɛ: “Nnipa mpempem pii da so hu nea mahu no afe biara. Na wɔyɛ nnipa a wɔte sɛ me ne wo, efisɛ wofi aman ne mmusua nyinaa mu, na ɛsonsono dibea a wokura wɔ asetram ne mfe a wɔadi. Nokware no nyiyi nnipa mu. Nnipa ahorow nyinaa tumi ba mu.”

 5. Nneɛma a ɛhyɛ nkuran bɛn na ɛwɔ 2004 ɔsom afe ho kyerɛwtohɔ no mu?

⁵ Yehu sɛ saa asɛm yi yɛ nokware, efisɛ afe biara Onyankopɔn Ahenni ho asɛmpa no ka nnipa anokwafo ɔpehaha pii ma wohyira wɔn nkwa so ma Yehowa na wɔyɛ n’apɛde. Saa ara na ɛbae wɔ 2004 ɔsom afe a efii ase September 2003 besii August 2004 no mu. Wɔ saa asram 12 no mu no, nnipa 262,416 na wohyira wɔn nkwa so maa Yehowa na wɔde nsu mu asubɔ yɛɛ ho sɛnkyerɛnne. Eyi kɔɔ so wɔ nsase 235 a Yehowa Adansefo reyɛ ofie Bible adesua 6,085,387 dapɛn biara de aboa nnipa a ɛsonsono wɔn dibea wɔ asetram na wofi aman, mmusuakuw, ne ɔkasa pii mu no so. Wɔreboa wɔn ma wɔanya Onyankopɔn Asɛm mu nokware a ɛma nkwa no.—Adiyisɛm 7:9.

 6. Dɛn na ɛde nkɔso aba bere nyinaa wɔ mfirihyia pii a atwam no mu?

⁶ Ɛyɛɛ dɛn na eyi nyinaa tumi bae? Akyinnye biara nni ho sɛ Yehowa na ɔtwe nnipa komapafo yi ba ne nkyɛn. (Yohane 6:65; Asomafo Nnwuma 13:48) Nanso, ade a ɛnsɛ sɛ yebu yɛn ani gu so ne ahofama ne nsi a wɔn a wɔatu wɔn ho ama reyɛ Ahenni adwuma no daa no adi no. Bere a Onua Macmillan dii mfirihyia 79 no, ɔkyerɛwee sɛ: “Efi bere a midii kan huu bɔhyɛ ahorow a ɛwɔ hɔ ma adesamma a wɔyare na wowuwu no, anidaso a mewɔ wɔ saa asɛm a Bible ada no adi mu no so ntewee. Saa bere no ara na misii me bo sɛ mɛhwehwɛ nea Bible kyerɛkyerɛ ho nsɛm pii sɛnea ɛbɛyɛ a metumi aboa afoforo a wɔte sɛ me a wɔrehwehwɛ Yehowa, Ade Nyinaa So Tumfoɔ Nyankopɔn no, ne n’atirimpɔw ahorow a ɛfata a ɔwɔ ma adesamma no ho nimdeɛ.”

 7. Nhwɛso bɛn na ɛkyerɛ anigye ne ahokeka a wɔn wohu Bible mu nokware no da no adi?

⁷ Yehu anigye a ɛte saa ara wɔ Yehowa asomfo a wɔwɔ hɔ nnɛ nso mu. Yɛmfa Daniela a ofi Vienna, Austria, no sɛ nhwɛso. Ɔkae sɛ: “Onyankopɔn ayɛ m’adamfo pa paa fi me mmofraase. Mahwehwɛ sɛ mehu ne din bere nyinaa efisɛ na ɛte sɛ nea ‘Onyankopɔn’ wɔ akyirikyiri dodo. Nanso, manhu kosii sɛ midii mfirihyia 17, bere a Yehowa Adansefo baa me nkyɛn no ansa. Wɔkyerɛkyerɛɛ me biribiara a na mepɛ sɛ mihu fa Onyankopɔn ho. Afei de, mibehuu nokware no, na m’ani gyei yiye! M’ani gyei araa ma mifii ase kaa asɛm no kyerɛɛ obiara.” Ankyɛ na anigye a ɔde ka asɛm no maa ne mfɛfo sukuufo dii ne ho fɛw. Daniela toaa so sɛ: “Nanso, me fam de, mefaa no sɛ ɛyɛ Bible nkɔmhyɛ na ɛrenya mmamu, efisɛ na masua sɛ Yesu kae sɛ ne din nti wɔbɛtan n’akyidifo na wɔataa wɔn. M’ani gyei kɛse na ɛyɛɛ me nwonwa.” Ankyɛ na Daniela hyiraa ne nkwa so maa Yehowa na ɔbɔɔ asu, na ofii ase de asɛmpatrɛw som adwuma yɛɛ ne botae. Bere a Daniela waree no, ɔne ne kunu Helmut, yɛɛ asɛnka adwuma wɔ Afrikafo, Chinafo, Philippinesfo, ne Indiafo a wɔwɔ Vienna no mu. Mprempren, Daniela ne Helmut resom sɛ asɛmpatrɛwfo wɔ Afrika anafo fam atɔe.

Wɔmpa Abaw

 8. Dɛn ne ɔkwan biako a mfaso wɔ so a nnipa pii afa so ada ɔdɔ a wɔwɔ ma Onyankopɔn ne nokware a wodi ma N’ahenni no adi?

⁸ Nokwarem no, asɛmpatrɛw adwuma yɛ akwan a Yehowa nkurɔfo fa so da ɔdɔ a wɔwɔ ma Onyankopɔn ne nokware a wodi ma N’ahenni nnɛ no mu biako. Te sɛ oguadini a ɔwɔ Yesu bɛ no mu no, wɔn a wɔde wɔn ho hyɛ saa ɔsom adwuma yi mu no wɔ ɔpɛ sɛ Ahenni no nti wobetu kwan akɔ akyirikyiri nsase so. Nanso, saa asɛmpatrɛwfo yi ntu kwan nkɔhwehwɛ Ahenni asɛmpa no; wɔde kɔma nnipa a wɔtete asase afanan nyinaa, na wɔkyerɛkyerɛ wɔn boa wɔn ma wɔbɛyɛ Yesu Kristo asuafo. (Mateo 28:19, 20) Wogyina ahokyere a emu yɛ den ano wɔ nsase pii so. Nanso, wohyira wɔn pii wɔ wɔn boasetɔ mu.

 9, 10. Osuahu ahorow a ɛyɛ anigye bɛn na asɛmpatrɛwfo a wɔwɔ akyirikyiri nsase so te sɛ Central African Republic renya?

⁹ Yɛmfa Central African Republic, ɔman a afe a etwaam no nnipa a wɔkɔɔ Kristo wu Nkaedi ase no dodow yɛ 16,184 no sɛ nhwɛso. Ná saa nnipa dodow yi bɛyɛ Ahenni adawurubɔfo a wɔwɔ saa man no mu mmɔho ason. Esiane sɛ anyinam nkanea nni ɔman no afã pii nti, nkurɔfo taa yɛ wɔn fie nnwuma wɔ abɔnten wɔ gyedua bi ase. Ne saa nti asɛmpatrɛwfo no nso yɛ wɔn asɛnka adwuma wɔ saa kwan no so—wɔyɛ Bible adesua ahorow wɔ abɔnten wɔ gyedua bi ase. Ɛnyɛ hann a wonya ne dwo a ɛhɔ dwo no nko ne mfaso a wonya fi abɔnten a wɔtra no so, na mmom wonya mfaso foforo nso. Nkurɔfo no ani gye Bible ho paa, na wɔtaa bɔ nyamesom ho nkɔmmɔ te sɛ nea wɔtaa bɔ bɔɔl ho nkɔmmɔ wɔ aman foforo so no. Mpɛn pii no, wɔn a wɔretwam no hu Bible adesua a wɔreyɛ no na wɔbɛtra mu bi.

¹⁰ Enti, bere a ɔsɛmpatrɛwfo bi reyɛ Bible adesua wɔ abɔnten no, aberante bi a ɔte bɛn hɔ bae bɛkae sɛ esiane sɛ obiara mmaa ne nkyɛn da nti, ɔsɛmpatrɛwfo no mmra na ɔne ɔno nso mmɛyɛ Bible adesua. Nokwarem no, ɔsɛmpatrɛwfo no de anigye kɔɔ ne nkyɛn, na aberante no renya nkɔso ntɛmntɛm. Wɔ saa man no mu no, polisifo taa gyina Adansefo no wɔ kwan so a ɛnyɛ sɛ wɔresamana wɔn anaasɛ wɔrebɔ wɔn ka, na mmom wobisa wɔn Ɔwɛn-Aban ne Nyan! nsɛmma nhoma no foforo a aba ho asɛm anaasɛ wɔda wɔn ase wɔ nsɛmma nhoma no mu asɛm pɔtee bi a wɔn ani gyee ho yiye ho.

11. Ɛmfa ho sɔhwɛ ahorow a asɛmpatrɛwfo hyia no, wɔn a wɔde mfirihyia pii asom sɛ asɛmpatrɛwfo no te nka dɛn wɔ wɔn so adwuma no ho?

¹¹ Nnipa pii a wɔde wɔn ho hyɛɛ asɛmpatrɛw adwuma no mu mfirihyia 40 anaa 50 a atwam no da so ara de nokwaredi reyɛ wɔn som adwuma no. Gyidi ne animia ho nhwɛso bɛn ara na wɔyɛ ma yɛn sɛɛ yi! Awarefo bi de bɛboro mfirihyia 42 asom sɛ asɛmpatrɛwfo wɔ aman abiɛsa mu. Okunu no ka sɛ: “Yɛahyia nsɛnnennen. Sɛ nhwɛso no, atiridiinini hawee yɛn mfirihyia 35. Nanso, yɛannu yɛn ho da sɛ yesii gyinae sɛ yɛbɛyɛ asɛmpatrɛwfo.” Ne yere de ka ho sɛ: “Nneɛma pii wɔ hɔ a ɛsɛ sɛ yɛda ho ase bere nyinaa. Asɛnka adwuma no yɛ anigye yiye, na ɛnyɛ den sɛ wubenya obi ne no asua Bible. Sɛ wuhu sɛ nnipa a wo ne wɔn sua Bible ba asafo nhyiam ahorow na muhu mo ho mo ho a, mobɛyɛ sɛ abusua biako a wohyiam bere biara.”

‘Wobu Nneɛma Nyinaa Adehwere’

12. Dɛn na obi yɛ de kyerɛ sɛ Ahenni no som bo ma no paa?

¹² Bere a oguadini kwantufo no huu ahene a ne bo yɛ den no, “ɔkɔtɔn nea ɔwɔ nyinaa de kɔtɔe.” (Mateo 13:46) Wɔn a Ahenni no som bo ma wɔn paa no taa fi wɔn pɛ mu de nneɛma a wobu no sɛ ɛsom bo no bɔ afɔre. Ɔsomafo Paulo a na ɔne Kristo bedi ade wɔ Ahenni no mu no kae sɛ: “Meda so mibu nneɛma nyinaa adehwere, m’Awurade Kristo Yesu hu a ɛkyɛn so no nti. Ɔno nti na mehweree nneɛma no nyinaa na mibu no sɛ sumina so ade, na Kristo ayɛ me mfaso.”—Filipifo 3:8.

13. Ɔkwan bɛn so na obi a ɔwɔ Czech Republic daa Ahenni no ho anigye a ɔwɔ adi?

¹³ Saa ara na ɛnnɛ nnipa pii pɛ sɛ wɔyɛ nsakrae akɛse wɔ wɔn asetram sɛnea ɛbɛyɛ a wobenya Ahenni no mu nhyira no bi. Sɛ nhwɛso no, wɔ October 2003 mu no, sukuu kyerɛkyerɛfo panyin bi a ɔwɔ Czech Republic a wadi mfirihyia 60 nsa kaa nhoma a wɔde sua Bible a ɛne Nimdeɛ a Ɛde Kɔ Daa Nkwa Mu no bi. Bere a ɔkenkan wiei no, ntɛm ara na okohuu Yehowa Adansefo a wɔwɔ ne mpɔtam hɔ ma wɔne no bɛyɛɛ Bible adesua. Onyaa Onyankopɔn ho nimdeɛ pii, na ankyɛ na ofii ase kɔɔ asafo nhyiam ahorow nyinaa. Na dɛn na ɔyɛe wɔ nhyehyɛe a na wayɛ sɛ ɔbɛpere kurow sohwɛfo dibea na wagyina ma wɔatow aba ama no ma wakɔyɛ mmarahyɛ baguani no ho? Ɔpaw biribi foforo a ɛbɛma wanya nkwa—sɛ́ ɔbɛyɛ Ahenni dawurubɔfo. Ɔkae sɛ, “Mitumi maa me sukuufo no nhoma a wɔde sua Bible pii.” Ɔde nsu mu asubɔ yɛɛ ne ho so a wahyira ama Yehowa no ho sɛnkyerɛnne wɔ July 2004 mu.

14. (a) Dɛn na Ahenni ho asɛmpa no akanyan nnipa ɔpepem pii ma wɔayɛ? (b) Nsɛmmisa a ɛma yɛhwehwɛ yɛn ho mu bɛn na ɛsɛ sɛ yɛn mu biara bisa ne ho?

¹⁴ Nnipa ɔpepem pii a wɔwɔ wiase baabiara ayɛ wɔn ade saa ara wɔ Ahenni ho asɛmpa no ho. Wɔafi wiase bɔne no mu, ayi wɔn nipasu dedaw no agu hɔ, atwe wɔn ho afi wɔn kan nnamfo ho, na wɔagyae wiase nneɛma akyi di. (Yohane 15:19; Efesofo 4:22-24; Yakobo 4:4; 1 Yohane 2:15-17) Dɛn nti na wɔyɛ eyinom nyinaa? Efisɛ wobu Onyankopɔn Ahenni no mu nhyira sɛ ɛsom bo sen biribiara a wobetumi anya wɔ wiase a ɛwɔ hɔ yi mu. So saa ara na wote nka wɔ Ahenni ho asɛmpa no ho? So Ahenni ho asɛmpa no kanyan wo ma woyɛ nsakrae wɔ w’abrabɔ ne nneɛma a wode sisi w’ani so mu ma ɛne nea Yehowa hwehwɛ hyia? Saa a wobɛyɛ no bɛma woanya nhyira pii nnɛ ne daakye.

Otwa Adwuma no Reba N’awiei

15. Dɛn na wɔhyɛɛ nkɔm sɛ Onyankopɔn nkurɔfo bɛyɛ wɔ nna a edi akyiri no mu?

¹⁵ Odwontofo no kyerɛwee sɛ: “Wo man beyi wɔn yam koraa aba, wo koda no.” Wɔn a wɔde wɔn ho ama no bi ne ‘mmerante asafo a wɔte sɛ obosu’ ne ‘mmea a wɔka nkonim asɛmpa no asafo a ɛsõ’ no. (Dwom 68:11; 110:3) Dɛn na afi nsi ne ahofama a Yehowa nkurɔfo, mmarima ne mmea, mpanyin ne mmofra, de ayɛ adwuma wɔ nna a edi akyiri yi mu no mu aba?

16. Ma nhwɛso bi fa kyerɛ sɛnea Onyankopɔn asomfo rebɔ mmɔden aboa afoforo ma wɔasua Ahenni no ho ade.

¹⁶ Ɔkwampaefo, anaa bere nyinaa Ahenni dawurubɔfo bi a ɔwɔ India susuw ɔkwan a wobetumi afa so aboa asotifo bɛboro ɔpepem abien a wɔwɔ saa man no mu ma wɔasua Ahenni no ho ade no ho. (Yesaia 35:5) Osii gyinae sɛ ɔbɛkɔ sukuu bi a ɛwɔ Bangalore akosua mum kasa. Ɛhɔ no otumi kaa Ahenni no ho anidaso ho asɛm kyerɛɛ wɔn a wɔyɛ asotifo no pii, na wɔhyehyɛɛ Bible adesua kuw ahorow. Wɔ adapɛn kakraa bi akyi no, nnipa bɛboro dumien fii ase baa asafo nhyiam ahorow wɔ Ahenni Asa so. Akyiri yi, wɔ ayeforohyia apontow bi ase no, ɔkwampaefo no hyiaa aberante bi a ɔyɛ ositifo a ofi Calcutta a na ɔwɔ nsɛmmisa pii, na na n’ani gye ho paa sɛ obehu nneɛma pii afa Yehowa ho. Nanso, na ɔhaw bi wɔ hɔ. Na aberante no rebɛsan akɔ Calcutta a ɛwɔ akyirikyiri kilomita 1,600 no akofi ase akɔ kɔlege, na na Adansefo biara nni hɔ a wonim mum kasa. Aberante no bɔɔ mmɔden pii ne ne papa kasae sɛ ɔmma ɔnkɔ sukuu no wɔ Bangalore mmom, sɛnea ɛbɛyɛ a obetumi akɔ so ayɛ ne Bible adesua no. Onyaa Onyankopɔn ho nimdeɛ pii, na afe biako akyi no, ohyiraa ne nkwa so maa Yehowa. Ɔno nso ne asotifo pii suaa Bible no, a na ne mmofraase adamfo bi ka ho. Mprempren, baa dwumadibea a ɛwɔ India no reyɛ nhyehyɛe ama akwampaefo asua mum kasa ma wɔde aboa asotifo a wɔwɔ ɔman no mu.

17. Ka biribi pɔtee a ɛhyɛ nkuran a wuhu wɔ 2004 ɔsom afe ho kyerɛwtohɔ a ɛwɔ kratafa 19 kosi 22 mu no mu.

¹⁷ Wubehu Yehowa Adansefo wiase nyinaa asɛnka adwuma ho kyerɛwtohɔ ma 2004 ɔsom afe no wɔ nsɛmma nhoma yi kratafa 19 kosi 22. Gye bere kakra fa hwehwɛ mu, na w’ankasa hu adanse a ɛkyerɛ sɛ Yehowa nkurɔfo a wɔwɔ wiase nyinaa de wɔn adwene asi “ahene a ne bo yɛ den” a wɔrehwehwɛ no so denneennen nnɛ.

Kɔ so ‘Hwehwɛ Ahenni no Kan’

18. Asɛm bɛn na Yesu anna no adi wɔ oguadini kwantufo ho bɛ no mu, na dɛn ntia?

¹⁸ Sɛ yɛsan susuw Yesu bɛ a ɛfa oguadini kwantufo no ho bio a, yehu sɛ Yesu anka biribiara amfa ɔkwan a na oguadini no bɛfa so ahwɛ ne ho bere a na watɔn biribiara a ɔwɔ no. Ebia ebinom de adwempa bebisa sɛ: ‘Afei a na oguadini no nni biribiara a ɔde bɛhwɛ ne ho no, ɛhe na na obenya aduan, ntade, ne dabere? Mfaso bɛn na na obenya afi saa ahene a ne bo yɛ den no so?’ Saa nsɛmmisa yi bɛyɛ nea ɛfata wɔ nnipa ani so. Nanso, so Yesu anka ankyerɛ n’asuafo no sɛ: “Monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho”? (Mateo 6:31-33) Asɛntitiriw a ɛwɔ ɛbɛ no mu ne koma nyinaa mu a yebefi de yɛn ho ama Onyankopɔn na yɛayɛ nsi wɔ Ahenni adwuma no mu. So yebenya asuade bi wɔ eyi mu?

19. Asuade titiriw bɛn na yebetumi anya afi ahene a ne bo yɛ den ho bɛ a Yesu bui no mu?

¹⁹ Sɛ́ ebia nnansa yi ara na yesuaa asɛmpa a ɛyɛ anigye no ho ade, anaasɛ mfirihyia pii na yɛde ayɛ Ahenni no ho adwuma na yɛreka emu nhyira ho asɛm akyerɛ afoforo no, ɛsɛ sɛ yɛkɔ so de Ahenni no yɛ yɛn asetram ade titiriw. Yɛte mmere a emu yɛ den mu, nanso yɛwɔ ntease a edi mũ a yebegyina so agye adi sɛ ade a yɛrehwehwɛ no wɔ hɔ ankasa, na biribiara ne no nsɛ—ɛte sɛ ahene a oguadini no kohui no. Nsɛm a ɛresisi wɔ wiase ne Bible nkɔmhyɛ a ɛrenya mmamu no yɛ adanse a edi mũ a ɛkyerɛ sɛ yɛte “wiase awiei” bere mu. (Mateo 24:3) Te sɛ oguadini kwantufo no, momma yemfi yɛn koma nyinaa mu mfa nsi nyɛ Onyankopɔn Ahenni no ho adwuma na yenni ahurusi wɔ asɛmpa no a yɛanya hokwan reka bi no mu.—Dwom 9:1, 2.