Yesu Asetra Ne Ne Som Adwuma

Awaregyae ne Mmofra ho Dɔ ho Asuade Ahorow

YESU ne n’asuafo nam kwan so Yɛrekɔ Yerusalem akodi Twam no wɔ 33 Y.B. mu. Wotwa Yordan Asubɔnten no na wɔfa ɔkwan a ɛda Perea mantam mu no so. Ná Yesu aba Perea adapɛn kakraa bi ni, nanso wɔbɛfaa no kɔɔ Yudea efisɛ na n’adamfo Lasaro yare. Bere a Yesu wɔ Perea no, ɔkaa awaregyae ho asɛm kyerɛɛ Farisifo no, na afei wɔkɔfa ɛho asɛm ba bio.

Awaregyae ho adwene a ɛsonsonoe pii wɔ Farisifo no mu. Mose kae sɛ sɛ ‘wohu ɔbea ho aniwude bi a,’ wobetumi agyaa no. Ebinom gye di sɛ eyi fa afideyɛ nkutoo ho. Nanso afoforo susuw sɛ bɔne nketenkete ka “aniwude” no ho. Enti, bere a Farisifo no asi wɔn bo sɛ wɔbɛsɔ Yesu ahwɛ no, wobisa sɛ: “Obi wɔ ho kwan sɛ asɛm biara nti ogyaa ne yere anaa?” Wɔwɔ ahotoso sɛ nea Yesu bɛka biara bɛma Farisifo a wɔwɔ adwene a ɛsono no ne no anya.

Yesu di asemmisa no ho dwuma nnam so a ɔnkanyan onipa nsusuwii biara na mmom ɔdan adwene kɔ mfiase aware nhyehyɛe no so. Obisa sɛ: “Monkanee sɛ efi mfiase no, nea ɔbɔɔ nnipa no, ɔbarima ne ɔbea na ɔyɛɛ wɔn, na ɔkae sɛ: Eyi nti na onipa begyaw agya ne ɛna, na ɔde ne ho akɔbata ne yere ho, na wɔn baanu no akɔyɛ ɔhonam koro? Enti nea Onyankopɔn de abom no, mma onipa nntetew mu!”

Yesu kyerɛ sɛ Onyankopɔn mfiase atirimpɔw ne sɛ awarefo bɛka abom, sɛ wonnnyae aware. Farisifo no bua sɛ sɛ saa na ɛte a, “adɛn nti na Mose hyɛe sɛ wɔmma awaregyae nhoma, na wonnyaa no no?”

Yesu bua sɛ: “Mo komaden nti na Mose maa mo kwan sɛ munnyaa mo yerenom; na efi mfiase de, ɛnte sa.” Yiw, bere a Onyankopɔn de aware nokware gyinapɛn sii hɔ wɔ Eden turo no mu no, wanyɛ awaregyae ho nhyehyɛe biara.

Yesu kɔ so ka kyerɛ Farisifo no sɛ: “Mise mo sɛ, sɛ ɛnyɛ aguamammɔ [Hela, por·neiʹa] nti na obi gyaa ne yere na ɔware ɔfoforo a, na wasɛe aware.” Ɔkyerɛ wɔ ha sɛ por·neiʹa a ɛyɛ nna mu ɔbrasɛe kɛse no nkutoo ne nea Onyankopɔn pene so a wogyina so gyae aware.

Bere a asuafo no hui sɛ ɛsɛ sɛ aware yɛ nkabom a ɛtra hɔ daa a eyi nkutoo na wotumi gyina so gyae aware no, ɛkaa wɔn ma wɔkae sɛ: “Sɛ onipa ne ne yere ntam asɛm te saa de a, na enye sɛ wɔware.” Akyinnye biara nni ho sɛ ɛsɛ sɛ obi a ɔpɛ sɛ ɔware no susuw tra a aware nkabom no tra hɔ daa no ho anibere so!

Yesu kɔ so ka sigyadi ho asɛm. Ɔkyerɛkyerɛ mu sɛ wɔwoo mmarimaa binom ayitotofo a wɔrentumi nware esiane wɔn awode a annyin yiye nti. Afoforo nso nnipa na ayɛ wɔn ayitotofo, efisɛ wɔasɛe wɔn awode. Awiei koraa no, ebinom wɔ hɔ a wɔka aware ne ɔbarima ne ɔbea nna mu anigye a wobenya ho akɔnnɔ hyɛ sɛnea ɛbɛyɛ a wobetumi atu wɔn ho ama ɔsoro Ahenni no nneɛma koraa. Yesu wie sɛ: “Nea obetumi agye [sigyadi] no, ma onnye!”

Afei nkurɔfo fi ase de wɔn mma nkumaa brɛ Yesu. Nanso, asuafo no ka mmofra no anim na wɔbɔ mmɔden sɛ wɔbɛpam wɔn, a akyinnye biara nni ho sɛ wɔpɛ sɛ wɔbɔ Yesu ho ban fi nhyɛso a ɛho nhia ho. Nanso Yesu se: “Momma mmofra no kwan na wɔmmra me nkyɛn, na munnsiw wɔn kwan; na eyinom sɛɛ na Onyankopɔn ahenni yɛ wɔn dea. Nokware mise mo sɛ: Obiara a ɔrennye Onyankopɔn ahenni sɛ abofraa no, ɔrenkɔ mu koraa.”

Asuade fɛfɛ bɛn ara na Yesu de ma wɔ ha sɛɛ yi! Sɛ yebenya Onyankopɔn Ahenni no a, ɛsɛ sɛ yesuasua mmofra nkumaa ahobrɛase ne sɛnea wotumi kyerɛkyerɛ wɔn no. Nanso Yesu nhwɛso no kyerɛ sɛnea ɛho hia sɛ yenya bere ma mmofra, titiriw awofo. Afei Yesu kyerɛ ɔdɔ a ɔwɔ ma mmofra no denam atuu a ɔyɛ wɔn na ohyira wɔn no so. Mateo 19:1-15; Deuteronomium 24:1; Luka 16:18; Marko 10:1-16; Luka 18:15-17.

◆ Adwene a ɛsonsonoe bɛn na Farisifo no wɔ wɔ awaregyae ho, na enti ɔkwan bɛn so na wɔbɔ mmɔden sɛ wɔbɛsɔ Yesu ahwɛ?

◆ Yesu di Farisifo no mmɔden a wɔbɔ sɛ wɔbɛsɔ no ahwɛ no ho dwuma dɛn, na dɛn na ɔkyerɛ sɛ ɛno nkutoo na wobetumi agyina so agyae aware?

◆ Dɛn nti na Yesu asuafo no ka sɛ ennye sɛ wɔware, na dɛn na Yesu kamfo kyerɛ?

◆ Dɛn na Yesu nam sɛnea ɔne mmofra nkumaa dii no so kyerɛ yɛn?