Onyankopɔn Mfirihyia Apem Ahenni Abɛn

“Sɛnkyerɛnne” A Ɛfa Ne Ba No Ho

 1. Dɛn nti ɛsɛ sɛ yɛn ani gye kɛse sɛ yebehu bɛn a Mfirihyia Apem no abɛn?

SƐ YESUSUW ho sɛnea Bible ka no a, Mfirihyia Apem no yɛ ade a ɛsɛ sɛ adesamma nyinaa, ateasefo ne awufo, hwɛ kwan. Ɛno nti na amanneɛ a wɔbɔ sɛ abɛn no yɛ asɛm a wɔn a wɔte ase nyinaa ani gye ho. Ɛsɛ sɛ yɛn ani gye kɛse sɛ yebehu nneɛma ahorow a ɛma yetumi gye tom sɛ abɛn no. Dɛn ne saa nneɛma no? So yebetumi agye bere asusuw ebinom ho?

 2. (a) Anoboaboa bɛn na yehu sɛ ɛrekɔ so a ɛno ankasa yɛ adanse a emu da hɔ sɛ Mfirihyia Apem no abɛn? (b) Hena na odi “ɔko” no anim wɔ Onyankopɔn afa, na ɔkwan bɛn so na ɔredi dwuma dedaw?

² Wɔ baabi a yɛasusuw Mfirihyia Apem no ho abedu yi, yɛahu nokwasɛm a ɛyɛ sɛ ɛsɛ sɛ ɔko a ɛbɛsɛe ade asen biara wɔ adesamma abakɔsɛm nyinaa mu, “Onyankopɔn, Ade Nyinaa so Tumfoɔ, da kɛse no mu ko” wɔ Harmagedon no di eyi anim pɛɛ no. Afei yetumi hu amammui sodifo anaa “wiase nyinaa ahene” a wɔreboaboa wɔn ano, wɔ tumi horow a ɛsen ɔdesani de ase, ama saa akodi ahorow nyinaa mu Ko yi. Ɛsɛ sɛ saa nokwasɛm yi ankasa di adanse pefee sɛ mfirihyia apem a ani da so a edi ɔko no akyi no nso abɛn. (Adi. 16:13-16) Obi a ɔde ne ho hyɛ ɔko no mu denneennen wɔ Ade Nyinaa so Tumfoɔ Nyankopɔn no afã ne Onyankopɔn soro dɔm no Kannifo, onii a wɔfrɛ no Gyidi ne Nokwafo, Onyankopɔn Asɛm no. Ansa na Harmagedon ko yi refi ase mpo no, ɔsoro Kannifo yi yɛ Ɔhene. “Ahemmotiri pii bobɔ ne ti,” na “ɔwɔ din bi a wɔakyerɛw n’atade ne n’asen so sɛ, ahene mu Hene ne awuranom mu Awurade.” (Adi. 19:11-16) Enti ɔredi Hene dedaw ansa na wahyɛn mfirihyia apem bere a ɔne ne mfɛfo adedifo Kristofo 144,000 no bedi hene no mu.​—Adi. 12:5; 14:1-4; 20:4-6.

 3. Ɛdefa Kristo Mfirihyia apem ahenni no mfiase ho no, dɛn na Yohane hui bere a wɔtew nhoma mmobɔwee abien no ano no (Adi. 6:1-4)?

³ Wɔka ahene mu Hene, Yesu Kristo, ahenni a edi mfirihyia apem no anim yi mfiase ho asɛm wɔ yɛn afeha a ɛto so aduonu yi mu wiase nsɛm ho mfonini bi a wodii kan yɛe mu. Wɔda eyi adi wɔ Adiyisɛm ti asia, faako a ɔsomafo Yohane ka nea ohui bere a Onyankopɔn Guammaa, Yesu Kristo, fi ase tetew nsɔano ason a ɛsɔ “nhoma” mmobɔwee a onya fii Onyankopɔn a ɔte ɔsoro ahengua no so no nsam no ano no. Yohane se: “Na mihui sɛ oguammaa no tew nsɔano no mu biako ano, na metee ateasefo anan no mu biako sɛ ɔde nne a ɛte sɛ ɔpranaa se: Bra bɛhwɛ. Na mihui na hwɛ ɔpɔnkɔ fitaa, na nea ɔte no so no kura ta; na wɔmaa no abotiri, na ofii adi redi nkonim na wakodi nkonim. Na ɔtew nsɔano a ɛto so abien no ano no, metee ɔteasefo a ɔto so abien no sɛ ose: Bra bɛhwɛ! Na ɔpɔnkɔ foforo kɔkɔɔ fii adi, na wɔmaa nea ɔte no so no ahoɔden sɛ ommeyi asomdwoe mfi asase so na wɔakunkum wɔn ho, na wɔmaa no nkrante kɛse bi.”​—Adi. 6:14.

 4, 5. (a) Dɛn na yehu sɛ onii a ɔte ɔpɔnkɔ kɔkɔɔ no so no yɛ ne ho mfonini? (b) Hena na ofii adi kodii nkonim koraa saa bere no, na ɔkwan bɛn so na eyi maa Dwom 2:1-6 mmamu fii ase?

⁴ Ɛha na yehu nsɛnkyerɛnne a ɛyɛ wiase ko a efii ase wɔ afe 1914 Y.B. mu, a na edi wiase ko a ɛto so abien a eyii asomdwoe fii asase so bɛyɛ mfe nsia bio no anim ara kwa no ho mfonini. Saa wiase ko a edi kan no hyɛɛ bere a ɔkofo trenee, Yesu Kristo, nsa kaa ɔsoro abotiri no na ɔde kɔɔ n’atamfo a wɔwɔ asase so no so, sɛ obedi wɔn so nkonim koraa no agyirae. Eyi kyerɛe sɛ akyiri yi no ɔbɛko ama Onyankopɔn wɔ “Onyankopɔn, Ade Nyinaa so Tumfoɔ no, da kɛse no mu ko” wɔ Harmagedon no mu. Abotiri a wɔbɔɔ no sɛ Ɔhene wɔ ɔsoro bere a wɔkoo wiase nyinaa ko a edi kan no maa Dwom a Ɛto so Abien mu nsɛm fii ase nyaa mmamu:

⁵ “Ɛdɛn nti na wiase aman yɛ gyegyeegye, na amanaman susuw adehunu? Asase so ahene sɔre gyina na atumfo bom tu agyina hyɛ Yehowa ne nea wasra no [ne Kristo, Greek Septuagint Version] no. ‘Momma yemmubu wɔn mpokyerɛ; na yɛntow wɔn nhama mfi yɛn ho ngu!’ Nea ɔte soro no serew, Awurade di wɔn ho fɛw. Ɛno na ɔbɛkasa akyerɛ wɔn n’abufuw mu, na ɔde n’abufuhyew beyi wɔn hu. Na me na m’asi me hene, me bepɔw kronkron Sion so.”​—Dw. 2:1-6; fa toto Asomafo no Nnwuma 4:24-30 ho.

 6. So wiase nyinaa akodi ne Amanaman Nkabom no atumi atu Yehowa Hene no afi Bepɔw Sion so anaa, na dɛn na nea ebefi Armagedon ko no mu aba no si so dua ma yɛn?

⁶ Basabasayɛ a ahaw amanaman no fi wiase nyinaa ko a edi kan wɔ 1914-1918 Y.B. mu no so nyinaa akyi no, Yehowa ama ne Hene, ne Ba Yesu Kristo, atra ɔsoro ahengua no so, ɔsoro Sion. (Adi. 14:1; Heb. 12:22) Wiase Ko I, Wiase Ko II anaasɛ Amanaman Nkabom no mpo antumi antu Mesia Hene yi amfi ahengua no so. “Onyankopɔn, Ade Nyinaa so Tumfoɔ no, da kɛse no mu ko” wɔ Harmagedon no bɛhyɛ no den wɔ ne soro ahengua no so, na ɛhɔ na ɔne ne, mfɛfo adedifo 144,000 no befi ne mfirihyia apem ahenni no ase. (Adi. 19:19-21) Esiane ntease titiriw yi nti, Mfirihyia Apem a wɔahyɛ ho bɔ a ɛde nhyira horow a ɛma nkwa bɛbrɛ adesamma no yɛ nea yebetumi anya mu ahotoso. Abɛn!

 7. Dɛn nti na yɛnte se tete “abɔnefo ne awaresɛefo” awo ntoatoaso no, nanso ɛhe na yehu “sɛnkyerɛnne” a Yesu de mae ma yɛasusuw ho no?

⁷ Adanse a wɔde ama wɔ atifi ha yi nyinaa akyi no, akyinnyegyefo pii bɛhwehwɛ “sɛnkyerɛnne” bi ansa na wɔagye atom sɛ Mfirihyia Apem no abɛn ampa, yiw, sɛ ebefi ase wɔ yɛn awo ntoatoaso yi mu. Yɛnte sɛ nyamesom mu akyerɛwfo ne Farisifo “abɔnefo ne awaresɛefo” awo ntoatoaso a na ɛwɔ hɔ mfeha dunkron a atwam ni no mufo a wɔhwehwɛɛ sɛnkyerɛnne fii Yesu hɔ na wɔagye adi sɛ ɔno ne Mesia no. (Mat. 12:38, 39) Nanso yɛwɔ “sɛnkyerɛnne” bi a Yesu ankasa de mae ho nsɛm, na esiane sɛ ɔno ankasa de maa yɛn nti, yebedi yɛn ankasa ho aboro kɛse, sɛ yɛpow sɛ yɛrensusuw ho a. Wɔada nsɛm yi adi ama yɛn wɔ Mateo ti aduonu anan ne aduonu anum, Marko ti dumiɛnsa ne buka ti aduonu baako. Ɔkaa sɛnkyerɛnne no ho asɛm kyerɛɛ n’asomafo no bere a wobisaa no, a na ɛnyɛ sɛ ɔde rekyerɛ sɛ ɔne Mesia anaa Kristo no, na mmom sɛ nneɛma bi a na wɔahyɛ ho bɔ sɛ ɛbɛba daakye no abɛn, sɛ ɛrenkyɛ na anya mmamu. Ɔde mae wɔ fefɛw bere mu bosome Nisan da a ɛto so dubiako wɔ afe 33 Y.B. mu; nnansa ansa na ɔrewu yayaaya no.

“SƐNKYERƐNNE” NO HO NKƆMHYƐ

 8. Ɔkwan bɛn so na Yesu kyeree sɛ Ɔbɛkɔ, na sɛ ɔsan ba a asɛm bɛn na wɔbɛka?

⁸ Na Yesu ahyɛ biribi ho nkɔm a anyɛ Yudafo no dɛ koraa, a ɛyɛ, wɔn asɔrefi a ɛwɔ Yerusalem no a wɔbɛsɛe no. Na waka akyerɛ ne nyamesom mu asɔretiafo no wɔ hɔ sɛ: “Hwɛ, wobegyaw mo fi afituw ama mo. Na mise mo sɛ efi sesɛɛ morenhu me de bɛkɔ akosi sɛ mobese sɛ: Nhyira ne nea ɔnam Awurade din mu reba no!” (Mat. 23:38, 39) Eyi kyerɛe sɛ na ɔrefi wɔn nkyɛn akɔ. Sɛ ɔsan ba a, nnipa bi wɔ hɔ a wɔbɛfa nkɔmhyɛ asɛm a ɛwɔ Dwom 118:26 no aka sɛ: “Nhyira ne nea ɔnam Yehowa din so reba no.”

 9. Ɔkwan bɛn so na Yesu kyerɛe sɛ ɛnyɛ asɔrefo a wɔwɔ Yerusalem asɔrefi hɔ no na sɛ ɔsan ba a wɔbɛka saa asɛm a wɔde ma no akwaaba no?

⁹ Ɛda adi sɛ na ɛnyɛ asase so asɔrefi a ɛwɔ Yerusalem no mu na Yehowa asɔrefo de saa nkɔmhyɛ asɛm no behyia nea ɔba Yehowa din mu no. Eyi na Yesu maa emu daa hɔ pefee, sɛnea amaneɛbɔ a edi ne nsɛm a ɛyɛ ahodwiriw yi akyi kyerɛ no: “Na Yesu fii adi fii asɔrefi hɔ kɔe. Na n’asuafo no baa ne nkyɛn sɛ wɔbɛkyerɛ no asɔrefi aban no. Na Yesu see wɔn sɛ: Munhu eyinom nyinaa? Nokware mise mo sɛ: wɔrennyaw ɔbo ɔbo so ɛha a wɔremmu nhwe fam.”​—Mat. 24:1, 2.

10. Wɔ Ngo Bepɔw a wowɔ so a wuhu asɔrefi no so no, asɛm bɛn na asomafo baanan bisaa Yesu na ɔkwan bɛn so na nkyerɛase ahorow kyerɛ wɔn asemmisa no ase?

¹⁰ Asomafo dumien no ammisa nkɔmhyɛ a ɛyɛ hu yi ho asɛm kosii sɛ woduu Ngo Bepɔw a wowɔ so a wuhu Yerusalem ne asɔrefi a na ɔhene Herode ɔkɛseɛ no asan asiesie no foforo yiye no so. Ɛkame ayɛ sɛ nea wofi bepɔw no so hui no maa asemmisa yi sɔree asomafo no baanan ntam, na afoforo no nso ani gyee ho, efisɛ yɛkenkan sɛ: “Na ɔte Ngo Bepɔw so no, asuafo no baa ne nkyɛn wɔ fã se: Kyerɛ yɛn da ko a eyinom bɛyɛ, na ɛdɛn na ɛbɛyɛ wo ba [pa.rou.si’a, Hela] ne wiase awiei ho sɛnkyerɛnne?” (Mat. 24:8) Young’s Literal Translation of the Holy Bible kyerɛ wɔn asɛm no ase fi Hela mu ma ɛkenkan sɛ: “Kyerɛ yɛn, bere bɛn na eyinom bɛyɛ? na dɛn ne wo ba a woaba ne bere no awiei koraa no ho sɛnkyerɛnne?” The Emphasized Bible a Rotherham yɛe no kenkan saa ara: “Kyerɛ yɛn bere ko a eyinom bɛyɛ​—ne nea wo ba a wɔaba ne bere no awiei ho sɛnkyerɛnne no bɛyɛ.” Ɔsɔfo Panyin Newcome Nkyerɛase Foforo (a Wɔasan Asiesie) no kenkan sɛ: “Dɛn na ɛbɛyɛ wo ahoyi ne bere no awiei ho sɛnkyerɛnne?”​—1808 de no.

11. (a) Bere bɛn na Yerusalem asɔrefi no sɛe bae, nanso dɛn na amma saa bere no? (b) Enti, dɛn na ɛbɛyɛ nea ɛfata sɛ yɛyɛ wɔ abakɔsɛm ho?

¹¹ Ɛnnɛ yenim bere a wɔsɛee ɔhonam fam asɔrefi a na ɛwɔ Yerusalem no. Mfeha dunkron ni, wɔ afe 70 Y.B. ahohurubere mu, bere a Roma asraafo a Ɔsahene Tito di wɔn anim sɛee kurow no nyinaa no. (Luka 21:20-24) Na nneɛma afoforo a ɛyɛ Kristo Parousia (ne ba a waba) ne wiase anaasɛ nneɛma nhyehyɛe (anaa tebeaa) no awiei ho “sɛnkyerɛnne,” a na ɛka asuafo no asemmisa no ho no nso ɛ? Ampa, Yudafo man anaasɛ nneɛma nhyehyɛe no awiei bae wɔ afe 70 Y.B. mu, nanso nneɛma nhyehyɛe kɛse a na saa Yudafo nhyehyɛe no yɛ nkɔmhyɛ nsusuwso anaasɛ mfonini ara kwa no amma awiei. Afei nso, Awurade Yesu Kristo Parousia, anaasɛ ne ba a waba, no anyɛ hɔ saa afe no mu. Esiane sɛ yɛte afeha a ɛto so aduonu yi mu nti, ade a ɛsɛ sɛ yɛyɛ ara ne sɛ yɛhwɛ yɛn afeha a ɛto so aduonu yi abakɔsɛm mu hwɛ sɛ ebia “sɛnkyerɛnne” a wɔkaa ho asɛm siei no ada adi wɔ yɛn awo ntoatoaso yi mu anaa.

12 Esiane nea stefano kae wɔ Kristo ba a edi kan no ho nti, dɛn nti na ɛsɛ sɛ yebisa sɛ ebia na asomafo no rebisa Yesu “ba” ho asɛm?

¹² Ɛsɛ sɛ yɛhyɛ no nsow sɛ asuafo no bisaa Awurade Yesu Kristo Parousia no ho asɛm. Saa yɛ mu no, so na wɔrebisa ne “ba” ho asɛm anaa? Anaasɛ ne “Advent” sɛnea ebinom frɛ no Brɔfo mu no? Ɛfata sɛ wobisa saa asɛm yi, efisɛ Kristoni Stefano a owui mogya dansefo wu no, bere a ɔreka Awurade Yesu “ba” a edi kan no ho asɛm no, ɔka kyerɛɛ Yudafo Sanhedrin a ɛwɔ Yerusalem no sɛ: “Adiyifo no mu hena na mo agyanom antaa no? Na wokum wɔn a wɔkaa ɔtreneeni no ba [Hela, e’leu.sis] ho asɛm kan no, ɔno na afei moayɛ ne so kwankyerɛfo ne awudifo.” (Aso. 7:52) Yehu sɛ, bere a ɔreka Kristo ba a edi kan no ho asɛm no. Stefano amfa asɛmfua parousia anni dwuma, na mmom Hela asɛmfua e’leu.sis. Ɛnyɛ sɛ ɛsono sɛnea wɔkyerɛw saa Hela nsɛmfua abien yi mu biara ara kwa, na mmom ɛsono wɔn mu biara asekyerɛ nso.

13. Ɛdefa asɛmfua a efi mu no ho no, dɛn na asɛm parousia kyerɛ ankasa, nanso wɔn a wonim Hela nsɛmfua no kyerɛ ase dɛn?

¹³ Asɛmfua pa.rou.si’a no asekyerɛ paara ne sɛ obi “ka ho wɔ hɔ,” na woyi fii Hela asɛmfua para’ (“ka ho”) ne ousia (“wɔ hɔ”) mu. Liddel ne Scott Greek English Lexicon Po II, kratafa 1343, ɔfa 2, de asɛntiaa “wɔ a ɔwɔ hɔ” ma sɛ parousia asekyerɛ a edi kan. Ɛde ba a waba ma sɛ asekyerɛ a ɛto so abien, afei ɛde ka ho sɛ: “Titiriw ɔhene anaasɛ ɔbirɛmpɔn bi nsrahwɛ.” Nea ɛne eyi hyia no, The Theological Dictionary of the New Testament (a Gerhard Friedrich yɛe) no, Po 5, de asɛmfua “wɔ a ɔwɔ hɔ” no ma sɛ n’asekyerɛ titiriw. (Kratafa 859) Afei, ɛdefa “nnwuma afoforo a wɔde asɛmfua no di” wɔ Hela mu no ho no, ɛde ma sɛ “1. Sodifo bi Nsrahwɛ.” Wɔ kratafa 865 no ɛka wɔ “nnwuma foforo a wɔde pareimi [adeyɛ asɛmfua] ne parousia di wɔ Apam Foforo no mu” no sɛ: “Apam Foforo no mu no wɔmfa asɛmfua no nni dwuma wɔ ba a Kristo bae wɔ honam mu no ho, na na parousia nni nkyerɛase biara a ɛfa sanba ho. Akyiri yi Asɔre no mu nko na nea ɛboro parousia biako ho adwene bɛdaa adi.”

14. (a) Sɛnea dwuma foforo a wɔde Hela asɛmfua yi di kyerɛ no, asɛm bɛn na anka wɔde bedi dwuma mmom asen “ba a waba”? (b) Nkyerɛase ahorow bɛn mu na wɔkyerɛ parousia ase bere nyinaa sɛ “ba a waba,” na abirabɔ bɛn na ɛda adi wɔ Filipifo 2:12?

¹⁴ Enti, na ɛnyɛ sɛ Yesu asuafo no rebisa ne “ba” ho asɛm, na mmom na wɔrebisa ne ba no akyi ho asɛm. Na wɔrebisa “ba a waba” no ho asɛm. Na sɛ, sɛ́ anka yɛde asɛmfua “ba a waba” no bedi dwuma no, yɛdan kɔ “nnwuma afoforo a wɔde asɛmfua no di” wɔ Hela mu no so a, yɛbɛte ase sɛ asuafo no bisaa Yesu sɛ: “Dɛn na ɛbɛyɛ wo [nsrahwɛ sɛ ɔhene] ne nneɛma nhyehyɛe no awiei ho sɛnkyerɛnne?” “Nsrahwɛ” kɔ akyiri sen “ba” a obi ba ara kwa. Ba a ɔba ma “ɔwɔ hɔ” nso ka ho. Wɔ nea wɔfrɛ no Apam Foforo no mu no, Hela asɛmfua parousia no pue mpɛn aduonu anan, na ne nyinaa mu no, ɛnyɛ New World Translation of the Holy Scriptures nkutoo na ɛkyerɛ asɛmfua no ase bere biara sɛ “ba a waba,” na mmom nkyerɛase afoforo nso yɛ saa, te sɛ Young’s Literal Translation of the Holy Bible, a wɔyɛɛ no 1862 Y.B. mu no; The Emphatic Diaglott a Wilson yɛe, wɔ 1857-1868 Y.B. mu; ne The Emphasized Bible a Rotherham yɛe wɔ 1897 Y.B. mu no. Yehu abirabɔ a ɛfata a ɛda “ɔwɔ hɔ” ne “onni hɔ” ntam no, wɔ Filipifo 2:12, baabi a ɔsomafo Paulo ka sɛ: “Mutie daa, ɛnyɛ sɛ bere a mewɔ mo nkyɛn nko mu, na mmom bere a minni mo nkyɛn yi titiriw.”

MMABAA DU NO HO BƐ NO

15. “Sɛnkyerɛnne” a Yesu de mae no afã horow ma ɛda adi sɛ ɛsɛ sɛ wɔkyerɛ Parousia ase dɛn, sɛ ebia wɔ ɛbɛ bɛn mu?

¹⁵ Parousia a wɔkyerɛ ase “ba a waba” no yɛ nea ɛda adi wɔ Yesu nkɔmhyɛ a ɛfa Parousia ne nneɛma nhyehyɛe no awiei ho “sɛnkyerɛnne” no afa horow mu. Sɛ nhwɛso no, ma yensusuw saa nkɔmhyɛ no fã a wɔtaa ka ho asɛm sɛ mmabaa mmadwemma ne nkwasea du no ho bɛ no ho. Na Yesu ahyɛ nkɔm a ɛfa “akoa nokwafo ne ɔbadwemma” no ne “akoa bɔne” no ho a ɛnkyɛe, na afei ɔhyɛ ade foforo ho nkɔm a ɛfa ne Parousia no ho. Ose: “Ɛno na wɔde ɔsoro ahenni bɛto mmabaa du a wɔtasee wɔn akanea fii adi sɛ wokohyia ayeforokunu ho. Na wɔn mu baanum yɛ mmadwemma, na baanum yɛ nkwasea. Na wɔn a wɔyɛ nkwasea no faa wɔn akanea no, wɔamfa ngo ankura. Na mmadwemma no faa ngo wɔn ntoa mu kaa wɔn akanea ho.”​—Mat. 25:1-4; 24:45-51.

16. Ɔkwan bɛn so na mmea no yɛ “mmabun,” sɛnea ɛbɛ no nnianim asɛm no kyerɛ no?

¹⁶ Nea edi kan koraa no, ɛsɛ sɛ yehu sɛ nnipa kuw bi ho asɛm na ɛwɔ ɛbɛ no mu, na enti ɛnsɛ sɛ wɔde di dwuma sɛ ɛfa nnipa nkorɛnkorɛ asetra ne wɔn wu ho. Wɔn a wɔwɔ mu no yɛ “mmabun” wɔ ɔkwan titiriw bi so, esiane sɛ wogyina hɔ ma “ɔsoro ahenni” no nti, efisɛ sɛnea Yesu kae no, “ɛno na wɔde ɔsoro ahenni bɛto [dɛn?] mmabun du ho.” Eyi ne “ahenni” a Yesu dii kan kaa ho asɛm wɔ ne nkɔmhyɛ no mu no, sɛ: “Na wɔbɛka ahenni ho asɛmpa yi, wiase nyinaa de adi amanaman nyinaa adanse, na ɛno na awiei no bɛba.”​—Mat. 24:14.

17. (a) Henanom na “mmabun” a wɔn dodow yɛ du no yɛ wɔn ho mfonini? (b) Bere bɛn na ɛbɛ no fii ase nyaa mmamu, na dɛn nti na saa bere no na efii ase?

¹⁷ Esiane sɛ akontaahyɛde “‘du” yɛ Kyerɛwsɛm mu akontaahyɛde a ɛkyerɛ pɛyɛ wɔ asase so nneɛma ho nti, du a “mmabun” no yɛ no bɛkyerɛ Kristofo a wɔyɛ anaasɛ wɔkyerɛ sɛ wɔka Yesu Kristo ho sɛ yɔnko adedifo wɔ ɔsoro ahenni no mu no nyinaa. Enti, bere bɛn na nkɔmhyɛ kwan so bɛ no fii ase nyaa mmamu? Kwasida, Sivan 6, afe 33 Y.B. mu, Pentekoste Afahyɛ Da no. Ɔkwan bɛn so? Efisɛ saa bere no na mmabun kuw no bae. Eyi te saa sɛ, saa da no, wɔde honhom kronkron bɔɔ Yesu Kristo nokware asuafo a na wɔahyiam wɔ abansoro dan mu wɔ Yerusalem no asu. Onyankopɔn nam saa kwan yi so woo wɔn sɛ ne honhom mu mma a na wobetumi abɛyɛ ‘Onyankopɔn adedifo’ ne “Kristo yɔnko adedifo.” (Rom. 8:17) Nanso, Bible mu no, mmarima na wɔtaa yɛ adedifo; na ɛnde dɛn nti na wɔyɛ Kristo asuafo a wɔawo wɔn honhom mu no asafo no mufo nyinaa ho mfonini sɛ mmabun, a ayeforohyia anadwofa no, wofi adi kohyia ayeforokunu no wɔ ɛbɛ no mu no? Na hena ne “ayeforokunu” yi?

18. Ɛdefa awaresɛm ho no, Yohane Osuboni no de n’ankasa ho ne Yesu totoo dɛn ho, na hena nkyɛn na Yohane kyerɛɛ n’ankasa n’asuafo no kwan kɔe?

¹⁸ Nea edi kan koraa no, ayeforokunu yi ne Awurade Yesu Kristo a wɔanyan no ahyɛ no anuonyam no. Yohane Osuboni no kaa ne ho asɛm saa kwan no so, na nea ɛne no hyia no, ɔkaa n’ankasa ho asɛm sɛ “ayeforokunu adamfo.” Saa bere no, sɛnea nnipa pii nim no, ná “ayeforokunu adamfo” no na ɔyɛ ayeforokunu ne ayeforo no ntam aware ho nhyehyɛe. Na anadwo a wɔka nnipa baanu a wɔreware no bom no, wɔde adwene kɔ ayeforokunu no so titiriw kyɛn ayeforokunu adamfo no. Enti Osuboni Yohane ka kyerɛɛ n’asuafo a na ɔresiesie wɔn ama Yesu Kristo sɛ wɔn sɛnkyerɛnne kwan so “ayeforokunu” no sɛ: “Ɛnyɛ me ne Kristo no, na wɔsomaa me dii n’anim. Nea ɔwɔ ayeforo no ne ayeforokunu. Na ayeforokunu adamfo a ogyina hɔ na otie no ogye na n’ani gye, ayeforokunu no nne nti. Afei na me saa anigye yi awie pɛyɛ. Ɔno de, etwa sɛ ɔdɔ, na me de, me so huan.” (Yoh. 3:28-30) Enti nea ɛfata no, Yohane kyerɛɛ n’asuafo no kwan kɔɔ Yesu so.

19, 20. (a) Wɔ ɛbɛ ne Adiyisɛm mu no, ɔkwan bɛn so na Yesu de n’ankasa ho toto ayeforokunu ho? (b) Nea ɛne no hyia no, wɔfrɛ Yerusalem Foforo no dɛn?

¹⁹ N’ankasa ne fam no, Yesu de ne ho too ayeforokunu ho wɔ ɛbɛ foforo a obui mu. Eyi ne ɛbɛ a ɛfa ɔhene bi a ‘ohyiaa ayeforo’ maa ne babarima ho no, na ɔbabarima yi gyinaa hɔ maa Daa Hene, Yehowa Nyankopɔn, Ba no. (Mat. 22:1-14) Na Adiyisɛm a Yesu Kristo nya fii Onyankopɔn nkyɛn na ɔde maa ne somafo Yohane no mu no, wɔde Yesu, sɛ Onyankopɔn Guammaa no, toto ayeforokunu a ɔware n’asuafo asafo no ho, sɛ: “Momma yɛn ani nnye, na yenni ahurusi, na yɛnhyɛ no anuonyam, efisɛ oguammaa no ayeforohyia adu, na ne yere asiesie ne ho. Na wɔmaa no sɛ omfura nwera pa a ɛhoa fitaa a ɛho tew. Na nwera pa no ne ahotefo trenee. . . . Kyerɛw: Nhyira ne wɔn a wɔahyia wɔn oguammaa no ayeforo ase.” Afei nso, ɔsomafo Yohane ka ɔbɔfo bi a ɔbaa ne nkyɛn ho asɛm, na ose:

²⁰ “[Ɔne] me bɛkasae sɛ: Bra, na menkyerɛ wɔ ayeforo, oguammaa no yere no! Na ɔde me honhom mu kɔɔ bepɔw kɛse tenten bi so na ɔkyerɛɛ me kurow kronkron no, Yerusalem, sɛ efi soro Onyankopɔn nkyɛn resian, na ekura Onyankopɔn anuonyam.”​—Adi. 19:7-9; 21:9-11.

21 Wɔ Efesofo 5:23-27 no, Paulo de abusuabɔ a ɛda Yesu Kristo ne n’asafo no ntam no toto dɛn ho?

²¹ Ɔsomafo Paulo de abusuabɔ a ɛda Yesu Kristo ne n’asafo, 144,000 yɔnko adedifo, no ntam no toto okunu ne ɔyere ho. Ɔkyerɛw sɛ: “Okunu yɛ ɔyere ti, sɛ Kristo nso yɛ asafo no ti no, na ɔne nipadua no Agyenkwa. Na sɛ asafo no brɛ ne ho ase ma Kristo no, saa ara nso na ɔyerenom nyɛ mma wɔn kununom, ade nyinaa mu. Okununom, monnɔ mo yerenom, sɛnea Kristo nso dɔ asafo no de ne ho mae maa no, sɛ ɔde nsu aguare no bɛtew ne ho wɔ asɛm mu ayɛ no kronkron, na ɔde asafo no asi hɔ afa anuonyam mu a enni nkekae anaa mpomponee anaa eyinom biara, na mmom ayɛ kronkron a enni dɛm.”​—Efe. 5:23-27.

22. Ɛhe na ayeforohyia no kɔ so, na dɛn nti na Yesu bɛ no nka ayeforokunu no ayeforo no ho asɛm?

²² Ayeforokunu Yesu Kristo ne ‘n’ayeforo’ a ɛne n’asafo no ayeforohyia no ba wɔ ɔsoro, faako a wɔbɛka abom denam Yehowa Nyankopɔn, ɔsoro Agya no nhyira so no. Nanso, ɛsɛ sɛ yɛhyɛ no nsow sɛ wɔ mmabun du no bɛ no mu no, wɔnka ayeforo no ho asɛm. Wɔyɛ eyi na amfa adwene mu basaayɛ biara amma. Nea enti a ɛte saa ne sɛ wɔpaw “ayeforo” no fi “mmabun du” no ankasa mu. “Mmabun” a wɔpaw wɔn no ne wɔn a ‘wɔwɔ anigye’ a “wɔahyia wɔn Oguammaa no ayeforo ase” no. (Adi. 19:9) Nea ɛne eyi hyia no, Yesu bɛ no da “mmabun” a wɔfata no adi sɛ wɔhyɛn pon no mu kɔ ayeforohyia no ase. Na ɛbɛ no kɔ so kyerɛ ɔkwan a wɔnam so fata.

23. Nokwasɛm a ɛyɛ sɛ wɔde Kristo asafo no mufo toto “mmabun” ho no ma ɛbɛyɛ wɔn asɛyɛde sɛ wɔyɛ dɛn?

²³ Ɛnyɛ asiwa a wɔasi Kristo ayeforo a ɛyɛ n’asafo no mufo ama ayeforokunu a ɔno nso yɛ ɔbabun no nko nti na wɔde wɔn toto “mmabun” ho. Wɔyɛ “mmabun” ɔkwan foforo so honhom mu. Sɛnea ɔbabun yɛ kronn, ne ho tew, na obiara mfaa nsa nkaa no no, saa ara na ɛsɛ sɛ Kristofo asafo no mufo anokwafo yi yɛ kronn na wɔn ho tew denam wɔn ho a wɔtwe fi wiase no ho, a wɔne wiase yi nyamesom ne amammui nhyehyɛe horow nni hwee yɛ, no so. Wɔmmfa wɔn ho nhyɛ Asɔre ne Ɔman nkabom biara mu. Wokura wɔn honhom mu mmabunyɛ mu denam wɔn ho a wɔmfa nhyehyɛ wiase nsɛm mu no so. (2 Tim. 2:3, 4) Saa na na ɛkyerɛ bere a wɔkae wɔ 144,000 a wohu wɔn sɛ wɔne Onyankopɔn Guammaa no gyina honhom mu Bepɔw Sion so no ho sɛ: “Eyinom ne wɔn a wɔamfa mmaa angu wɔn ho fĩ [te sɛ nyamesom mu aguaman, Babilon Kɛse no ne ne mmabea no]; na wɔyɛ mmabun. Wɔn na wodi oguammaa no akyi baabiara a ɔkɔ.”​—Adi. 14:4; 17:3-5.

24. Dɛn na Yakobo 1:26, 27 ka wɔ ahotew a wɔhwehwɛ wɔ wɔn a wɔde wɔn toto mmabun ho no ho?

²⁴ Ɛdefa ahotew a wɔhwehwɛ no ho no, osuani Yakobo se: “Sɛ obi susuw sɛ ɔyɛ onyamesomfo, na wanto ne tɛkrɛma nnareka, na nnnom ɔdaadaa ne koma a, saa onipa yi nyamesom yɛ ɔkwa. Onyamesom a ɛho tew na ɛho nni fĩ Agya Onyankopɔn anim ne sɛ: wokɔhwɛ nyisaa ne akunafo wɔn ahohia mu, na wuyi wo ho fi wiase nkekae mu.”​—Yak. 1:26, 27.

FI A WOFI ADI KOHYIA “AYEFOROKUNU NO”

25. Ɔkwan bɛn so na Kristo asafo no fii ɔsom a ɛyɛ kronn na ɛho nni fi Onyankopɔn anim ase wɔ Pentekoste afe 33 Y. B. mu, na adanse bɛn na wonyae wɔ eyi ho?

²⁵ Pentekoste Afahyɛ Da no, wɔ afe 33 Y.B. mu, bere a honhom kronkron sian baa Yesu Kristo asuafo anokwafo no so sɛnea wɔde rebɔ wɔn asu bere a na wɔretwɛn wɔ Yerusalem no, Kristo asafo no fii “nyamesom a ɛho tew na ɛho nni fi Agya Onyankopɔn anim” ase. Honhom mu no na wɔyɛ mmabun, a wɔatwe wɔn ho afi nyamesom ahyehyɛde a na apow Yesu Kristo na ɛmaa Roma amrado Pontio Pilato bɔɔ no asɛndua mu no. (Aso. 2:1-42) Wɔde Mesia Yesu ne n’asomafo dumien no nkyerɛkyerɛ fii ase, na wɔtwee wɔn ho fii saa “abusua kɔntɔnkye” a na ɛde ne ho ahyɛ nyamesom mu atetesɛm a ennyina kyerɛwsɛm so a wonya fii wɔn agyanom a na wɔafom kwan no nkyɛn no ho. (Aso. 2:40; Gal.1:13-17; Mat.15:1-9) Honhom kronkron asubɔ, a na kasa horow akyɛde ka ho no, dii adanse sɛ na wɔwɔ nokware som, ná wonim saa. Afei de na ɛsɛ sɛ wɔkɔ so tra ase sɛ “mmabun.”

26, 27. (a) Honhom fam no, wogyee Kristofo asafo no aware ma hena Pentekoste 33 Y.B.? (b) Te sɛ “ayeforokunu adamfo” no, ɔkwan bɛn so na Paulo kasa kyerɛɛ Kristofo wɔ 2 Korintofo 11:2-5?

²⁶ Saa da no (Sivan 6, 33 Y.B.) na Kristofo asafo no bɛyɛɛ siyere, nea wɔagye no aware, ama ɔsoro ayeforokunu, Yesu Kristo. Wɔn a akyiri yi wɔbɛkaa asafo dedaw a ɛyɛ asuafo 120 a na wɔwɔ Yerusalem no ho no nyinaa bɛyɛɛ siyere kuw no fã na ɛbɛyɛɛ wɔn asɛyɛde sɛ wɔtra ase sɛ “mmabun.” Ɔsomafo Paulo twe adwene kɔ saa asɛm yi so, bere a ɔbɔ Kristofo a wɔwɔ Korinto no kɔkɔ wɔ bu a wɔremmu aware nhyehyɛe a wɔne Kristo Yesu ayɛ no so na wɔnkɔware atoro Kristo bi no ho. Te sɛ “ayeforokunu adamfo” no, Paulo se:

²⁷ “Na ninkunu a metwe mo ho no, metwe no Onyankopɔn ninkunu. Na magye mo aware mama ɔbarima biako, sɛ mede ababaa a efi nkaa no ɛ mekɔma Kristo. Nanso misuro sɛ ebia, sɛnea ɔwɔ no de n’anitew bɛdaadaa Hawa no, saa ara nso na wɔbɛsɛe mo adwene afi Kristo fam kronnyɛ no ho. Na sɛ obi ba bɛka Kristo foforo bi ho asɛm a yɛnkae, anaasɛ munya honhom foforo a munnyae, anaasɛ asɛmpa foforo a munnyae a, ɛnde na mutie no yiye! Na mibu sɛ [wɔn a wɔkyerɛ sɛ wɔyɛ] asomafo atitiriw no nkyɛn me biribiara mu.”​—2 Kor. 11:2-5.

28. Ɔkwan bɛn so na Yesu ne abɔfo ka kyerɛɛ asuafo no sɛ ɔbɛsan aba te sɛ Yudani ayeforokunu abɛfa wɔn ɔkɔ fie?

²⁸ Na wɔne ɔbabun ayeforokunu no aware wɔ ɔsoro no bɛba daakye a wonnim, afe 33 Y.B. Pentekoste da no akyi bere tenten bi. Nnafua aduonum abien ansa na ɛno reba, anadwo a ɔsomafo Yuda Iskariot a wanni nokware yii no mae no, na Yesu aka akyerɛ n’asomafo anokwafo no sɛ: “Trabere pii wɔ m’Agya ofie. Sɛ ɛnte saa a, anka mise mo sɛ: mekɔ makosiesie baabi mama mo? Na sɛ mekɔ na mekɔ siesie baabi mema mo a, mɛba bio na mabɛfa mo akɔ m’ankasa me nkyɛn, na nea mewɔ hɔ no, mo nso moaba hɔ. Na nea merekɔ no, munim, na ɔkwan no nso, munim.” (Yoh. 14:2-4) Ɛno akyi nnafua aduanan abien, bere a ofi Ngo Bepɔw no so reforo akɔ soro wɔ n’asuafo no binom anim no, abɔfo baanu yii wɔn ho adi kyerɛɛ wɔn na wɔkae sɛ: “Galilea mmarima, ɛdɛn na mugyina rehwɛ ɔsoro yi? Yesu yi ara a wɔafa no mo nkyɛn kɔ soro yi ɔbɛba saa ara, sɛnea muhuu no sɛ ɔrekɔ soro yi.” (Aso. 1:9-11) Enti, na asuafo no nim sɛ, te sɛ Yudani ayeforokunu, ayeforohyia anadwo no, Yesu a na wafi wɔn nkyɛn no bɛba abɛfa wɔn akɔ ne soro Agya no fi, sɛnea na Yesu adi kan asi so dua akyerɛ wɔn mpo no.​—Yoh. 14:1-3.

29. (a) Bere bɛn na “mmabun” kuw no fii ase sɛ wɔrekohyia ayeforokunu no? (b) Asemmisa bɛn na ɛsɔree afei, na dɛn na nokware a ɛyɛ sɛ mmabun kuw abien no nyinaa dodow yɛ pɛ no kyerɛ?

²⁹ Ayeforohyia no akwanhwɛ mu no, ɔbabun a wɔagye no aware no fi adi sɛ okohyia ayeforokunu no, ama no akwaaba na ɔne no ani agye. Na ɛsɛ sɛ wɔkɔ so wɛn, efisɛ na wonnim “da anaa dɔn ko” no. (Mat. 25:13) Na wɔn a wofii adi Pentekoste da no afe 33 Y.B. ne mpempem a wɔbɛkaa wɔn ho akyiri yi no baahe na wɔbɛkyerɛ sɛ wɔte sɛ mmabaa “mmadwemma” a wɔwɔ ɛbɛ no mu no, na baahe na wɔbɛyɛ te sɛ “nkwasea” anaa mmabaa a wɔnyɛ mmadwemma no? Ɛbɛ no yɛ mmadwemma ne nkwasea no mfonini sɛ wɔn dodow yɛ pɛ, ma ɛkyerɛ sɛ na wɔn a wofii ase ankasa no nyinaa wɔ hokwan koro, na ankyerɛ nso sɛ kuw biako mufo dɔɔso sen biako; wogyaw no saa. Nanso ɛbɛ no dii kan kyerɛe sɛ ɛnyɛ wɔn a wobefi ase sɛ “mmabun” no nyinaa na wɔbɛkyerɛ sɛ wɔfata sɛ wɔma wɔn kwan ma wɔkɔ konya “Oguammaa no ayeforohyia” aponto no mu anigye.​—Luka 12:35-38.

30. (a) Dɛn na ɛmaa mmabun a wɔyɛ mmadwemma no daa nsow wɔ nkwasea no ho? (b) So wɔn nyinaa de akanea a ɛredɛw na efii adi, na enti dɛn ne asemmisa a ɛho hia wɔ eyi fam?

³⁰ Na dɛn na ɛmaa mmabun a wɔyɛ mmadwemma anaa anyansafo no daa nsow wɔ mmabun a wɔyɛ nkwasea a wonnim nyansa no ho? Eyi: “Na wɔn a wɔyɛ nkwasea no faa wɔn akanea no, wɔamfa ngo ankura, na mmadwemma no faa ngo wɔn ntoa mu kaa wɔn akanea ho.” (Mat. 25:3, 4) Nanso na wɔn nyinaa nim sɛ wɔn akanea a ɛbɛkɔ so asɔ akosi akwaabama nhyehyɛe no awiei no na ebedi adanse sɛ wɔfata sɛ wɔkɔ ayeforohyia aponto no ase. Esiane eyi nti na wohia ngo a ɛdɔɔso a ebedu bere a ayeforohyia akwantu no bedu ayeforokunu no fi. Ɛbɛ no mmamu mu no, dɛn na wɔde ngo no yɛɛ ho mfonini? Wofii adi sɛ wɔkohyia ayeforokunu no ansa na wɔrebɔ ne ba ho dawuru, na bere a wofii adi sɛ wɔrekohyia no no na wɔn akanea no redɛw. Enti anyɛ yiye koraa no na ngo wɔ wɔn akanea no mu saa bere no. Nanso, so na ɛdɔɔso sɛnea ɛsɛ a ɛbɛma wɔn akanea no akɔ so adɛw kosi sɛ wɔbɛkɔ akodu ayeforokunu no fie anaa?

[Ase hɔ asɛm]