Mmofra Bisa Sɛ. . .

Dɛn Nti Na Ɛsɛ Sɛ Meboa Afoforo?

“HENA na ɛsɛ sɛ wudi kan sɔ n’ani wɔ w’asetra mu?” Nyan! kyerɛwfo de asɛm yi bisaa mmofra kuw bi wɔ abɔnten a ná nnipa pii wɔ hɔ so. Mike kae sɛ, “M’ankasa. Midi kan hwehwɛ nea edi kan, nea etwa to, ne bere nyinaa.” Susie a wadi mfe dunson no kae sɛ: “Sɛ mehwɛ m’abusua yiyedi ne m’ankasa de a, mede na ebedi kan.”

Nea ɛyɛ awerɛhow ne sɛ nkate a ɛte saa yi abu so. Nhoma bi a wɔfrɛ no The Postponed Generation ka nhwehwɛmu bi a wɔyɛe wɔ sukuufo 1,125 mu a asetra mu nsɛm ho abenfo de bɔɔ mmɔden sɛ wobehu sɛ mmofra hwehwɛ wɔn ankasa yiyedi anaasɛ ɔman no de no ho asɛm. Dɛn na efii mu bae? Bɛyɛ sɛ ɔha mu nkyem 80 daa wɔn ho adi sɛ “wɔhwehwɛ nea eye ma wɔn ankasa a ɔman no ho adwene anaasɛ asɛyɛde biara mfa wɔn ho.”

Ɛnde ɛnyɛ nwonwa sɛ wɔn mu kakraa bi pɛ na wɔwɔ ɔpɛ sɛ wɔboa afoforo, wɔbɛhaw wɔn ho ama afoforo anaasɛ wɔde wɔn ho bɛbɔ afɔre ama afoforo yiyedi. Nhoma ahorow te sɛ The Art of Selfishness ne Looking Out for Number One bɛyɛɛ nea wɔtɔɔ no pii, na ɛyɛɛ pɛsɛmenkominya su nnyinaso. Sɛnea Bibie ka siei no, nnipa ayɛ “ahopɛfo” nnɛ.​—2 Timoteo 3:1, 2.

Nanso, dɛn na wo woyɛ wɔ afoforo ahiade ahorow ho? Sɛ nhwɛso no, sɛ woyɛ krado sɛ wobɛhwɛ television so dwumadi a w’ani gye ho na Mama anaa Papa soma wo a, so wobo fuw? So wotwentwɛn wo nan ase wɔ fie adwumayɛ, atade a wobɛma wo nua ahyɛ bi anaa sɛ wone no bɛbom atra faako, anaasɛ sɛ wobɛyɛ ade ama obi bere a ‘ɛbɛma wo ho akyere wo kakra’ no ho? Ɛnde bere aso sɛ woyɛ nsakrae. Nanso dɛn ntia? Na nea ɛho hia kɛse no, ɔkwan bɛn so?

Pɛsɛmenkominya Fibea

Onyankopɔn mmara ma ne nkoa ne sɛ: “Dɔ wo yɔnko sɛ wo ho!” (Mateo 22:39) Eyi kyerɛ sɛ ɛsɛ sɛ yedwen afoforo ho, yɛyɛ ayamyefo, wɔn a wodwen afoforo ahiade ahorow ho. Nanso ɛnyɛ bere nyinaa na yetumi du ahwehwɛde yi ho, na Bible no boa yɛn ma yɛte nea enti a ɛte saa no ase. Wɔ Genesis 8:21 no ɛka sɛ: “Onipa komam adwene yɛ bɔne fi ne mmofraase.”

Yɛn agya Adam ansusuw sɛnea n’atuatew adeyɛ no bɛka afoforo no ho ankɔ akyiri. Ɛnde ɛnsɛ sɛ ɛyɛ yɛn nwonwa sɛ wɔde pɛsɛmenkominya su awo n’asefo. (Fa toto Dwom 51:5 ho.) Eyi da adi ntɛm wɔ asetra mu ma ɛyɛ nwonwa. Parents nsɛmma nhoma no ka sɛ: “Nkokoaa nyinaa yɛ pɛsɛmenkominya. . . .Wɔn ani gye wo ho de nanso ɛyɛ bere a woreyɛ biribi ama wɔn.” Sɛ wɔanni pɛsɛmenkominya ho dwuma a ebetumi ayɛ obi suban.

Su foforo a ɛmma obi ntumi mmoa afoforo ne anihaw. (Mmebusɛm 21:25) Nokwarem no, sɛ obi yɛ onihawfo a, obetumi ahwehwɛ atoro anoyi a ɛbɛma wakwati adwumayɛ. Mmebusɛm 22:13 ka sɛ: “Ɔkwaadwofo se: Gyata wɔ adiwo, wobekum me, mmorɔn so!”

Nea Afoforo a Wɔbɛboa Wɔn no Kyerɛ

Samariani ɔyamyefo ho bɛ a ɛwɔ Luka 10:29-37 no da no adi sɛ afoforo a wɔbɛboa wɔn no betumi akyerɛ ho a wɔde bɔ afɔre ankasa. Wɔ asemmisa, “Hena ne me yɔnko?” no ho mmuae a Yesu mae no mu no ɔkaa Yudani bi a adwotwafo boroo no ma ɔtɔɔ beraw no ho asɛm. Wɔ abusua mu ntawntawdi a ɛda Yudafo ne Samariafo ntam nyinaa akyi no, Samariani no yam hyehyee no na ɔboaa nea ne ho aka mu no. Ɔde n’ankasa nsa ne ngo na ɛyɛɛ ɔbarima no akuru no so. Afei ɔmaa ne so bɔkɔɔ too n’aboa so de no kɔɔ ahɔhodan mu. Otuaa ahɔhodan no so hwɛfo no bɛyɛ nnanu akatua na ɔhyɛɛ bɔ sɛ obetua ka foforo biara a ɛbɛba akyiri no.

Nea mfatoho a ɛka koma yi da no adi ne nea afoforo a wɔbɛboa wɔn no kyerɛ: di kan da wo ho adi sɛ ɔyɔnko ma afoforo. Ɛkyerɛ sɛ ɛsɛ sɛ obi fi ne pɛ mu sɛe bere, ahoɔden ne sika. Ma yensusuw akwan a wɔfa so yɛ eyi no bi ho.

W’abusuafo a Wobɛboa Wɔn

W’ayɔnkofo a wɔbɛn wo sen biara ne w’abusuafo​—awofo, nuabarimanom, nuabeanom. Nanso ebia wubesusuw sɛ ɛsɛ sɛ wɔn a wɔbɛn wo pii no te ase sɛ wunni adagyew na ɛnsɛ sɛ wɔhaw wo. Nanso Bible no tu fo sɛ: “Monyeyɛ mo ho hɔho a huhuhuhu nni mu.” (1 Petro 4:9) Bɔ mmɔden na hu sɛ nea ebefi ade a ɛte sɛ ɔhaw no mu aba ne sɛ, ɛnyɛ abufuw, na mmom sɛ hokwan a wode bɛhyɛ ɔdɔ a ɛwɔ abusua no mu no mu den.

Eddie kae sɛ: “Mama adwuma ma ɔtaa brɛ. Nanso me werɛ remfi sɛnea sɛ obue ɔpon no na ohu sɛ wɔahohoro nkuku mu, atwitwiw fam na wɔatow ɔpon ama anwummeduan a ɔyɛ n’anim no da. Migye tom sɛ anka mɛpɛ sɛ mɛkɔ akɔbɔ bɔɔl saa mmere no de, nanso me ho a mede mae no boae ma yɛn abusua no mu biakoyɛ no mu yɛɛ den kɛse.” So wo wɔ akwan bi a wobɛfa so aboa w’abusuafo?

Mfɛfo Kristofo a Wobɛyɛ Wɔn Yɔnko

Paulo kae sɛ: “Enti yɛwɔ bere a ɛfata yi, momma yɛnyɛ nnipa nyinaa yiye, ne titiriw no wɔn a wɔyɛ gyidi fifo.” (Galatifo 6:10) Sɛ woboa mfɛfo Kristofo a wunya anigye pii.​—Asomafo no Nnwuma 20:35.

Sɛ nhwɛso no, Chris, a wadi mfe 16 no yɛ Yehowa Adansefo mu biako. N’ani gye sɛ obi a ne mfe akɔ anim wɔ asafo a ɔwɔ mu no mu somasoma no. Da koro bi ɔfrɛɛ no wɔ telefon so sɛ ɔmɛboa no. Na afiri a ɛma no so kɔ ne dan mu no asɛe, na na esiane sɛ ontumi mforo atrapoe a ɛtoa so anum no nti na ne ho akyere no. Bere a Chris duu hɔ no, ɔkae sɛ: “Sɛ wo pɛ a hyɛ m’akyi na minturu wo nkɔ.” Wɔkɔɔ atrapoe a ɛtoa so anum no so! Ɛyɛ ɔbrɛ? Akyinnye biara nni ho. Nanso Chris ani gyei ɛnyɛ sɛ n’adamfo a ne mfe akɔ anim no anisɔ a ɔkyerɛe no nti na mmom adwene a ɛne sɛ Onyankopɔn ani gye ne nneyɛe no ho no!

Nanso ɛho nhia sɛ wotwɛn ma edu tebea ahorow yi so ansa woada wo ho adi sɛ afoforo ho hia wo. Sɛ nhwɛso no, ansa na wobefi nhyiam ase ne bere a wɔapɔn no, mmofra bi boa wɔn ho ano, wɔmma ɔpanyin biara mma mu. Eyi ne Bible mu afotu a ɛka sɛ, wonni mpanyimfo “anim ni” no bɔ abira. (Leviticus 19:32) Ɛtɔ mmere bi a adamfofa kwan so nkyia anaasɛ nkɔmmɔbɔ kakraa bi na ehia na ama obi a ne mfe akɔ anim ani agye. Ebia wobɛka sɛ ‘nanso mintumi ne mpanyimfo nkasa. Yenni hwee yɛ.’

Dough a mprempren ɔyɛ ɔpanyin wɔ Kristofo asafo no mu no ka sɛ: “Bere a na mewɔ mfe 19 no na me nnamfo paa yɛ mpanyimfo a wobetumi ayɛ m’awofo ne me nenanom. Na hwɛ sɛnea wɔboae yiye ma minyinii wɔ honhom mu!” Dɛn nti na wonsɔ nhwɛ wɔ Kristofo nhyiam a edi hɔ a worebɛkɔ no ase sɛ wobɛfa obi a ne mfe akɔ anim adamfo? Wubehu sɛ mowɔ nneɛma pii yɛ sen sɛnea wususuw! Na te sɛ Dough no, wubehu sɛ wubetumi asua biribi afi wɔn asetra mu osuahu ahorow no mu.

“Wɔn a Wɔwɔ Akyiri na” a Wobɛboa Wɔn

Wɔ Kolosefo 4:5 no, ɔsomafo Paulo kae sɛ: “Monnantew nyansam wɔn a wɔwɔ akyiri no fam, na monhwɛ mo adagyew so yiye.” Yehowa Adansefo da afoforo ho a wodwen no adi denam Bible mu asɛm a wɔka no so. (Mateo 24:14) Mmofra a wobu wɔn asɛyɛde wɔ Onyankopɔn anim aniberesɛm no de wɔn ho hyɛ adwuma yi mu pii sɛnea wobetumi.

Tamitha ka sɛ: “Meyere me ho wɔ asɛnka adwuma no mu efisɛ medɔ Yehowa.” Ɛwom sɛ wadi mfe 11 pɛ de nanso ɔde nnɔnhwerew pii yɛ asɛnka adwuma no ɔsram biara. “Asɛnka no ma minya hokwan da ɔdɔ adi kyerɛ m’afipamfo nso.” Sɛ anka wɔbɛhwehwɛ nnwuma a sika pii wom mmom no, Kristofo mmofra ɔpepem pii de afoforo a wɔbɛsom wɔn sɛ bere nyinaa mu asɛnkafo no ayɛ wɔn adwuma, na wɔtaa yɛ nnwuma a wɔde bere fã yɛ de hwɛ wɔn ho. Ebinom de wɔn ho ama sɛ asɛmpatrɛwfo anaasɛ Ɔwɛn Aban Asafo no bãa dwumadibea ahorow no mu adwumayɛfo.

Sɛ Woma a Wunya Mfaso

American Health nsɛmma nhoma no ka sɛ: “Nnipa hia nnipa esiane wɔn akwahosan nti.” Nhwehwɛmufo ka mpo sɛ nnipa a wɔboa afoforo no nya akwahosan mu mfaso horow fi mu. Nanso Yesu kyerɛɛ mfaso foforo bere a ɔkae sɛ: “Momma, na wɔama mo” no. (Luka 6:38) Ɔyamyefo nya ɔdɔ fi afoforo hɔ; wɔtaa da ayamye adi kyerɛ no!​—Fa toto Mmebusɛm 11:25 ho.

Enti kyɛ ade, na boa afoforo. Sɛ wo pɛsɛmenkominya su no reda ne ho adi a, kae sɛ Onyankopɔn Asɛm se: “Obiara nnhwehwɛ nea ɛyɛ n’ankasa de, na mmom ɔnhwehwɛ nea ɛyɛ ne yɔnko de.” (1 Korintofo 10:24) Sɛ woyɛ saa a ɛnyɛ sɛ afoforo bɛyɛ wo nnamfo nko na mmom wubenya Ɔsorosoroni Nyankopɔn no anim dom.

[Kratafa 18 mfoni]

Afoforo a wobɛboa wɔn no de anigye ba