Munkura Biakoyɛ Mu Wɔ Nna A Edi Akyiri Yi Mu

‘Momma mo abrabɔ mfata Kristo asɛmpa no, munnyina pintinn honhom koro mu, na momfa ɔkra koro mmom nni apere mma asɛmpa no gyidi’​—FILIPIFO 1:27.

 1. Nsonsonoe bɛn na ɛda adi wɔ Yehowa Adansefo ne wiase no ntam?

“NNA a edi akyiri” no ni. Akyinnye biara nni ho sɛ, yɛwɔ “mmere a emu yɛ den” mu. (2 Timoteo 3:1-5) Wɔ “awiei bere” yi mu a basabasayɛ wɔ nnipa mu no, Yehowa Adansefo da nsow koraa esiane wɔn asomdwoe ne biakoyɛ nti. (Daniel 12:4) Nanso, wɔhwehwɛ sɛ ankorankoro biara a ɔwɔ Yehowa asomfo wiase nyinaa abusua no mu no bɔ mmɔden kura saa biakoyɛ yi mu.

 2. Asɛm bɛn na Paulo ka faa biakoyɛ a yebekura mu no ho, na asɛmmisa bɛn na yebesusuw ho?

² Ɔsomafo Paulo tuu mfɛfo Kristofo fo sɛ wonkura biakoyɛ mu. Ɔkyerɛwee sɛ: “Momma mo abrabɔ mfata Kristo asɛmpa no nko, na sɛ meba na mibehu mo oo, sɛ minni hɔ oo, mate mo ho asɛm sɛ mugyina pintinn honhom koro mu, na mode ɔkra koro bom di apere ma asɛmpa no gyidi, na mommma atamfo nnyi mo hu biribiara mu. Ɛno na ɛyɛ ɔyera a wɔbɛyera ho sɛnkyerɛnne ma wɔn, nanso ɛyɛ nkwagye ho sɛnkyerɛnne ma mo, na ne saa fi Nyankopɔn.” (Filipifo 1:27, 28) Paulo nsɛm no da no adi pefee sɛ, ɛsɛ sɛ yɛbom yɛ adwuma sɛ Kristofo. Enti, afei, dɛn na ɛbɛboa yɛn ma yɛakura yɛn Kristofo biakoyɛ mu wɔ sɔhwɛ mmere yi mu?

Gye Onyankopɔn Apɛde Tom

 3. Bere bɛn ne ɔkwan bɛn so na Amanaman mufo momonotofo a wodi kan no bɛyɛɛ Kristo akyidifo?

³ Ɔkwan biako a yɛnam so betumi akura yɛn biakoyɛ mu ne sɛ yebegye Onyankopɔn apɛde atom bere nyinaa. Ebia eyi bɛma ɛho abehia sɛ yɛyɛ nsakrae wɔ yɛn nsusuwii mu. Susuw Yesu Kristo tete asuafo a na wɔyɛ Yudafo no ho. Bere a ɔsomafo Petro dii kan kaa asɛm kyerɛɛ Amanaman mufo momonotofo wɔ afe 36 Y.B. mu no, Onyankopɔn hwiee honhom kronkron guu saa nkurɔfo a wofi amanaman mu yi so, na wɔbɔɔ wɔn asu. (Asomafo no Nnwuma ti 10) Ɛde besi saa bere no, na Yudafo, wɔn a wɔasakra aba Yudasom, ne Samariafo nkutoo na wɔabɛyɛ Yesu Kristo akyidifo.​—Asomafo no Nnwuma 8:4-8, 26-38.

 4. Bere a Petro kyerɛkyerɛɛ Kornelio ho asɛm a na asi no mu wiei no, dɛn na ɔkae, na sɔhwɛ bɛn na eyi bɛyɛ maa Yesu asuafo a na wɔyɛ Yudafo no?

⁴ Bere a asomafo no ne anuanom foforo a wɔwɔ Yerusalem no tee sɛ Kornelio ne Amanaman mufo foforo anya adwensakra no, wɔn ani gyee Petro amanneɛbɔ a wɔtee no ho. Bere a ɔsomafo no kyerɛkyerɛɛ Kornelio ne Amanaman mufo gyidifo foforo no asɛm no mu wiei no, ɔkaa nsɛm yi de wiee n’asɛm no sɛ: “Enti sɛ Onyankopɔn maa wɔn [Amanaman mufo a wɔagye adi no honhom kronkron] akyɛde koro no ara sɛ yɛn [Yudafo] nso a yegyee Awurade Yesu Kristo dii no a, mene hena a metumi masiw Onyankopɔn kwan?” (Asomafo no Nnwuma 11:1-17) Eyi yɛɛ sɔhwɛ maa Yesu Kristo akyidifo a wɔyɛ Yudafo no. So na wobegye Onyankopɔn apɛde atom, na wɔagye Amanaman mufo a wɔagye adi no atom sɛ wɔn mfɛfo asomfo? Anaasɛ na Yehowa asase so asomfo biakoyɛ ho bɛba asɛm?

 5. Ɔkwan bɛn so na asomafo no ne anuanom foforo no yɛɛ wɔn ade wɔ nokwasɛm a ɛne sɛ na Onyankopɔn ama Amanaman mufo adwensakra no ho, na dɛn na yebetumi asua afi saa su yi mu?

⁵ Kyerɛwtohɔ no ka sɛ: “Na [asomafo no ne anuanom foforo no tee] nsɛm yi no, womuaa wɔn ano, na woyii Nyankopɔn ayɛ sɛ: Ɛnde na Onyankopɔn ama amanaman no nso adwensakra a ɛde kɔ nkwa mu.” (Asomafo no nnwuma 11:18) Saa su no bɔɔ Yesu akyidifo no biakoyɛ ho ban, na ɛma enyaa nkɔso. Bere tiaa bi mu no, asɛnka adwuma no nyaa nkɔanim wɔ Amanaman mufo, anaa nnipa a wofi aman horow mu no mu, na na Yehowa nhyira wɔ dwumadi a ɛtete saa no so. Sɛ wɔrehyehyɛ asafo foforo anaasɛ wɔreyɛ teokrase nsakrae bi wɔ Onyankopɔn honhom kronkron akwankyerɛ ase na wɔhwehwɛ sɛ yɛboa a, ɛsɛ sɛ yɛn ankasa pene so. Koma nyinaa mu a yebefi aboa no bɛsɔ Yehowa ani, na ɛbɛboa yɛn ma yɛakura yɛn biakoyɛ mu wɔ nna a edi akyiri yi mu.

Mommata Nokware no Ho

 6. Nkɛntɛnso bɛn na nokware no nya wɔ Yehowa asomfo biakoyɛ no so?

⁶ Sɛ́ Yehowa asomfo abusua no mufo no, yekura biakoyɛ mu efisɛ “Onyankopɔn akyerɛkyerɛ” yɛn nyinaa, na yeso ne nokware a wayi no adi no mu pintinn. (Yohane 6:45; Dwom 43:3) Esiane sɛ yɛn nkyerɛkyerɛ gyina Onyankopɔn Asɛm so nti, yɛn nyinaa ka asɛm biako. Yɛde anigye gye honhom fam aduan a Yehowa nam “akoa nokwafo ne ɔbadwemma” no so de ma no. (Mateo 24:45-47) Nkyerɛkyerɛ biako a ɛte saa no boa yɛn ma yekura yɛn biakoyɛ mu wɔ wiase nyinaa.

 7. Sɛ yɛn ankasa nte asɛm bi ase a, dɛn na ɛsɛ sɛ yɛyɛ, na dɛn na ɛnsɛ sɛ yɛyɛ?

⁷ Na sɛ ɛyɛ yɛn mu bi den sɛ ɔbɛte asɛm bi ase anaasɛ obegye atom nso ɛ? Ɛsɛ sɛ yɛbɔ mpae hwehwɛ nyansa, na yɛhwehwɛ Kyerɛwnsɛm ne Kristofo nhoma ahorow mu. (Mmebusɛm 2:4, 5; Yakobo 1:5-8) Nkɔmmɔ a yɛne ɔpanyin bi bɛbɔ no betumi aboa. Sɛ yɛnte asɛm no ase ara a, ebia ɛbɛyɛ papa sɛ yɛde to hɔ. Ebia wobetintim ho nsɛm pii, na afei yɛanya emu ntease pii. Nanso, ɛbɛyɛ mfomso sɛ yɛbɛbɔ mmɔden sɛ yɛbɛdan asafo no mufo foforo adwene ma wɔagye yɛn nsusuwii a ɛne asafo no de nhyia no atom. Eyi bɛyɛ nea ɛde ntõtõ ba, ɛnyɛ nea ɛma biakoyɛ tra hɔ. Hwɛ sɛnea eye sɛ ‘wobɛkɔ so anantew nokware no mu,’ na woahyɛ afoforo nkuran ma wɔayɛ saa!​—3 Yohane 4.

 8. Su bɛn na ɛfata sɛ yenya wɔ nokware no ho?

⁸ Wɔ afeha a edi kan no mu no, Paulo kae sɛ: “Sesɛɛ de, yɛnam ahwehwɛ so hwɛ ade wɔ bɛ mu, na ɛno mu de, anim ne anim; sesɛɛ de, mihu ade fa-ne-fa, na ɛno mu de, mehu ade mu sɛnea wɔahu me nso mu.” (1 Korintofo 13:12) Ɛwom sɛ ɛnyɛ biribiara na tete Kristofo no tee ase de, nanso wɔkɔɔ so yɛɛ biako. Seesei yɛwɔ Yehowa atirimpɔw ne N’asɛm a ɛyɛ nokware no mu ntease a emu da hɔ sen wɔn de no koraa. Enti momma yɛnkyerɛ anisɔ wɔ nokware no a yɛnam “akoa nokwafo” no so anya no ho. Na momma yɛmfa aseda mma sɛ Yehowa nam n’ahyehyɛde no so akyerɛ yɛn kwan. Ɛwom sɛ yɛn nimdeɛ nyɛɛ pɛ bere nyinaa de, nanso honhom fam kɔm ne sukɔm nne yɛn. Mmom no, yɛn Guanhwɛfo, Yehowa, ama yɛayɛ biako, na wahwɛ yɛn yiye.​—Dwom 23:1-3.

Fa Tɛkrɛma no Di Dwuma Yiye!

 9. Ɔkwan bɛn so na yebetumi de tɛkrɛma no adi dwuma ma ɛde biakoyɛ aba?

⁹ Tɛkrɛma no a yɛde bɛhyɛ afoforo nkuran no yɛ ɔkwan titiriw a yɛnam so ma biakoyɛ ne onuayɛ su kɔ so. Ná krataa a wɔde dii twetiatwa ho asɛm bi ho dwuma a afeha a edi kan no mu sodikuw de somae no hyɛ nkuran. Bere a Amanaman mufo asuafo a wɔwɔ Antiokia no kenkan wiei no, “awerɛkyekye no nti wɔn ani gyei.” Yuda ne Silas a wɔde krataa no somaa wɔn fii Yerusalem no “de nsɛm pii tuu anuanom no fo, na wɔhyɛɛ wɔn den.” Akyinnye biara nni ho sɛ wɔ a na Paulo ne Barnaba wɔ wɔn ntam no nso hyɛɛ mfɛfo gyidifo a na wɔwɔ Antiokia no nkuran ma wɔyɛɛ den. (Asomafo no Nnwuma 15:1-3, 23-32) Yɛnam Kristofo nhyiam horow ase a yɛbɛkɔ na yɛama mmuae a ɛhyɛ nkuran so betumi ayɛ saa ara ‘ahyehyɛ yɛn ho yɛn ho nkuran.’​—Hebrifo 10:24, 25.

10. Sɛnea ɛbɛyɛ na yɛakura biakoyɛ mu no, sɛ ɛba sɛ wɔsopa obi didi no atɛm a, dɛn na ɛho behia sɛ wɔyɛ?

¹⁰ Nanso, yɛn tɛkrɛma a yɛde bedi dwuma ɔkwammɔne so no betumi asɛe yɛn biakoyɛ. Osuani Yakobo kyerɛwee sɛ: “Tɛkrɛma nso yɛ ɔhonam akwaa mu ketewa, nanso ɛhoahoa ne ho ade kɛse ho. Ogya ketewa nso, monhwɛ kwae kɛse a ebetumi asɔ!” (Yakobo 3:5) Yehowa kyi wɔn a wɔde ntõtõ ba. (Mmebusɛm 6:16-19) Nsɛnkeka a ɛtete saa betumi de mpaapaemu aba. Ɛnde afei, sɛ wɔresopa obi, kyerɛ sɛ, wɔkɔ so yeyaw no anaa wodidi no atɛm nso ɛ? Mpanyimfo no bɛbɔ mmɔden aboa ɔdebɔneyɛfo no. Nanso, ɛsɛ sɛ wotu tɔkwapɛfo a onnu ne ho no sɛnea ɛbɛyɛ a asafo no asomdwoe, nhyehyɛe pa, ne biakoyɛ betumi akɔ so atra hɔ. Anyɛ yiye koraa no, Paulo kyerɛwee sɛ: “Sɛ obi a wɔfrɛ no onua yɛ . . . ɔmaanefo [tɔkwapɛfoɔ, Asante Twi Bible] . . . a, mo ne no mmmɔ; saa onipa no, mo ne no nnnidi mpo.”​—1 Korintofo 5:11.

11. Sɛ yɛaka biribi a ama yɛne yɛn yɔnko gyidini bi ntam ayɛ basaa a, dɛn nti na ahobrɛase ho behia?

¹¹ Tɛkrɛma no a yɛbɛto no nnareka no boa ma yɛkɔ so kura biakoyɛ mu. (Yakobo 3:10-18) Nanso fa no sɛ biribi a yɛaka ama yɛne yɛn yɔnko Kristoni bi ntam ayɛ basaa. So ɛrenyɛ papa sɛ yebedi kan ne yɛn nua no akosiesie yɛn ntam, na sɛ ɛho hia a, yɛapa no kyɛw? (Mateo 5:23, 24) Ampa sɛ eyi gye ahobrɛase, anaa ahobrɛase adwene, nanso Petro kyerɛwee sɛ: “Mumfura ahobrɛase, na monsonsom mo ho mo ho, efisɛ Onyankopɔn siw ahantanfo kwan, na ɔdom ahobrɛasefo.” (1 Petro 5:5) Ahobrɛase bɛka yɛn ma ‘yɛahwehwɛ asomdwoe’ wɔ yɛne yɛn nuanom ntam, agye yɛn mfomso ahorow atom, na yɛde kyɛwpa a ɛfata ama. Eyi boa ma asomdwoe kɔ so tra Yehowa abusua no mu.​—1 Petro 3:10, 11.

12. Ɔkwan bɛn so na yebetumi de tɛkrɛma no adi dwuma ma biakoyɛ akɔ so wɔ Yehowa nkurɔfo mu na atra hɔ?

¹² Sɛ yɛde yɛn tɛkrɛma di dwuma yiye a, yebetumi ama abusuabɔ a ɛwɔ Yehowa ahyehyɛde mu no mu ayɛ den. Esiane sɛ Paulo yɛɛ saa nti, otumi kaee Tesalonikafo no sɛ: “Munim sɛnea yetutuu mo nyinaa fo mmiako mmiako, sɛnea agya bi yɛ ne mma, na yɛhyɛɛ mo baninha, na yedii mo adanse sɛ monnantew sɛnea ɛsɛ Onyankopɔn.” (1 Tesalonikafo 2:11, 12) Esiane sɛ Paulo yɛɛ eyi ho nhwɛso pa nti, ná obetumi aka akyerɛ mfɛfo Kristofo sɛ ‘wɔnkyekye wɔn a wɔn koma atu werɛ.’ (1 Tesalonikafo 5:14) Sɛ yɛde tɛkrɛma no kyekye afoforo werɛ, hyɛ wɔn nkuran, na yɛhyɛ wɔn den a, hwɛ ade pa ara a yebetumi ayɛ. Yiw, “asɛm a wɔka ne bere mu, eye dɛn ara!” (Mmebusɛm 15:23) Afei nso, asɛm a ɛte saa no boa ma biakoyɛ a ɛwɔ Yehowa nkurɔfo mu no nya nkɔso, na ɛtra hɔ.

Fa Bɔne Firi!

13. Dɛn nti na ɛsɛ sɛ yɛde bɔne firi?

¹³ Sɛ yɛbɛkɔ so akura Kristofo biakoyɛ mu a, ɛho hia sɛ yɛde ɔdebɔneyɛfo a wapa kyɛw bɔne firi no. Na mpɛn ahe na ɛsɛ sɛ yɛde firi? Yesu ka kyerɛɛ Petro sɛ: “Minse wo sɛ enkosi mpɛn ason, na mmom aduosɔn ahorow ason!” (Mateo 18:22) Sɛ yɛamfa bɔne amfiri a, na yɛreyɛ yɛn ho bɔne. Ɔkwan bɛn so? Nitan ne menasepɔw a yebenya no bɛsɛe yɛn asomdwoe. Na sɛ nkurɔfo behu yɛn sɛ yɛyɛ nnipa a yɛn tirim yɛ den a yɛmfa bɔne mfiri a, ebia yɛn ankasa bɛma afoforo atwe wɔn ho afi yɛn ho. (Mmebusɛm 11:17) Obi ho menasepɔw a wonya nsɔ Onyankopɔn ani, na ebetumi akowie bɔne a anibere wom mu. (Leviticus 19:18) Kae sɛ wotwaa Yohane Osuboni ti esiane ɛpɔw a otirimɔdenfo Herodia a onyaa no ‘menasepɔw’ no bɔe nti.​—Marko 6:19-28.

14. (a) Dɛn na Mateo 6:14, 15 kyerɛkyerɛ yɛn wɔ bɔne fafiri ho? (b) So ɛsɛ sɛ yɛtwɛn bere nyinaa ma wɔpa yɛn kyɛw ansa na yɛde obi bɔne afiri no?

¹⁴ Yesu mpaebɔ nhwɛso no mu nsɛm no bi ne sɛ: “Fa yɛn bɔne firi yɛn, efisɛ yɛn nso de firi obiara a ɔde yɛn aka.” (Luka 11:4) Sɛ yɛamfa bɔne amfiri a, anhwɛ a Yehowa Nyankopɔn nso remfa yɛn bɔne mfiri yɛn da bi, efisɛ Yesu kae sɛ: “Sɛ mode nnipa mfomso firi wɔn a, mo soro agya de mo de befiri mo nso. Na sɛ moamfa nnipa mfomso amfiri wɔn a, mo agya no nso remfa mo mfomso mfiri mo.” (Mateo 6:14, 15) Enti sɛ yɛpɛ sɛ yɛyɛ yɛn fãm de ankasa ma biakoyɛ kɔ so tra Yehowa asomfo abusua mu a, yɛde bɔne befiri, na ebia yɛbɛma yɛn werɛ afi bɔne bi a wɔyɛ tiaa yɛn a ɛte sɛ nea onii no ansusuw asɛm no ho yiye na ɔyɛe anaasɛ ɛyɛ nea adwemmɔne biara nni akyi no. Paulo kae sɛ: “Sɛ obi ne obi nya asɛm bi a, munhuhu mma mo ho na momfa nkyekyɛ mo ho; sɛnea Awurade de akyɛ mo no, sɛnea mo nso monyɛ ne no.” (Kolosefo 3:13) Sɛ yɛde bɔne firi a, yɛboa ma Yehowa ahyehyɛde no biakoyɛ a emu yɛ den no tra hɔ.

Biakoyɛ ne Ankorankoro Gyinaesi Ahorow

15. Dɛn na ɛboa Yehowa nkurɔfo ma wokura biakoyɛ mu bere a wɔresisi wɔn ankasa gyinae ahorow no?

¹⁵ Onyankopɔn yɛɛ yɛn ma yetumi paw nea yɛn ankasa pɛ, a yɛwɔ hokwan ne asɛyɛde sɛ yesisi yɛn ankasa gyinae ahorow. (Deuteronomium 30:19, 20; Galatifo 6:5) Nanso, yetumi kura yɛn biakoyɛ mu efisɛ yedi Bible mmara ne nnyinasosɛm ahorow so. Sɛ yɛresi yɛn ankasa gyinae ahorow a, yesusuw ho. (Asomafo no Nnwuma 5:29; 1 Yohane 5:3) Fa no sɛ ɔfã biara a yenni ho asɛm asɔre. Yɛn ankasa betumi asi gyinae sɛ nnipa a wɔwɔ nimdeɛ denam kae a yɛbɛkae sɛ ‘yɛnyɛ wiase no fã,’ na yɛde ‘yɛn nkrante abobɔ nsɔw’ no so. (Yohane 17:16, NW; Yesaia 2:2-4) Saa ara na sɛ ɛsɛ sɛ yɛn ankasa si yɛne Ɔman no ntam abusuabɔ ho gyinae a, yesusuw nea Bible ka fa ‘Nyankopɔn de a yɛde bɛma Onyankopɔn’ ho no ho bere a yɛbrɛ yɛn ho ase ma “atumfoɔ a wɔkorɔn” no wɔ wiase nsɛm mu no. (Luka 20:25; Romafo 13:1-7, NW; Tito 3:1, 2) Yiw, Bible mmara ne nnyinasosɛm ahorow ho a yebesusuw bere a yɛresi yɛn ankasa gyinae ahorow no boa ma yɛn Kristofo biakoyɛ no tra hɔ.

16. Ɔkwan bɛn so na yebetumi aboa ma biakoyɛ atra hɔ bere a yɛresisi gyinae ahorow a Kyerɛwnsɛm no nka sɛ ɛteɛ anaasɛ ɛnteɛ no? Yɛ mfatoho.

¹⁶ Yebetumi aboa ma yɛn Kristofo biakoyɛ no atra hɔ bere a yɛresi gyinae bi a ɛyɛ yɛn nkutoo asɛm, na Kyerɛwnsɛm no nka sɛ ɛteɛ anaa ɛnteɛ no mpo. Ɔkwan bɛn so? Denam ɔdɔ mu a yebefi adwen afoforo a ebia yɛn gyinaesi no bɛka wɔn no so. Sɛ yɛbɛyɛ mfatoho a: Wɔ tete Korinto asafo mu no, ɛnam a wokum ma abosom ho asɛm bi sɔree. Nokwarem no, na Kristoni ntumi mfa ne ho nhyehyɛ abosonsomfo guasodeyɛ mu. Nanso, na ɛnyɛ bɔne sɛ obi bedi nam a ɛte saa a wɔahwie ne mogya agu yiye a aka ma wɔtɔn wɔ gua so no. (Asomafo no Nnwuma 15:28, 29; 1 Korintofo 10:25) Nanso, na Kristofo binom ahonim haw wɔn wɔ saa nam yi a obi bedi no ho. Enti Paulo ka kyerɛɛ Kristofo a aka no sɛ wɔnnto wɔn hintidua. Nokwarem no, ɔkyerɛwee sɛ: “Enti sɛ aduan to me nua hintidua a, merenni nam ara da, na manto me nua hintidua.” (1 Korintofo 8:13) Enti sɛ Bible mmara anaa nnyinasosɛm biara nni adeyɛ bi mu mpo a, hwɛ sɛnea ɛkyerɛ ɔdɔ sɛ yebesusuw afoforo ho bere a yɛresi yɛn ankasa gyinae a ebetumi aka Onyankopɔn abusua no biakoyɛ no!

17. Dɛn na nyansa wom sɛ yɛyɛ bere a ɛsɛ sɛ yɛn ankasa sisi yɛn gyinae ahorow no?

¹⁷ Sɛ yenhu ɔkwan pɔtee a yɛmfa so a, nyansa wom sɛ yebesi gyinae a ɛbɛma yɛanya ahonim pa, na ɛsɛ sɛ afoforo kyerɛ obu ma yɛn gyinaesi no. (Romafo 14:10-12) Nokwarem no, sɛ ɛho behia sɛ yesi yɛn ankasa gyinae a, ɛsɛ sɛ yɛhwehwɛ Yehowa akwankyerɛ wɔ mpaebɔ mu. Te sɛ odwontofo no, yebetumi de ahotoso abɔ mpae sɛ: “Yɛ aso ma me, . . . Na wone me botantim ne me trabea srɔnsrɔn, na wo din nti wobɛkyerɛ me kwan na woakogya me.”​—Dwom 31:2, 3.

Munkura Kristofo Biakoyɛ Mu Daa

18. Ɔkwan bɛn so na Paulo yɛɛ Kristofo asafo no biakoyɛ ho mfatoho?

¹⁸ Wɔ 1 Korintofo ti 12 no, Paulo de nipadua no yɛɛ Kristofo asafo no biakoyɛ ho mfatoho. Osii dan a obiara dan ne yɔnko ne hia a emuni biara ho hia so dua. Paulo bisae sɛ: “Sɛ ne nyinaa yɛ kwaa biako a, anka nipadua wɔ he? Na afei akwaa no dɔɔso de, nanso nipadua yɛ biako. Aniwa ntumi nka nkyerɛ nsa sɛ: Wo ho nhia me; bio nso eti ntumi nka nkyerɛ anan sɛ: Mo ho nhia me.” (1 Korintofo 12:19-21) Saa ara na yɛn a yɛwɔ Yehowa asomfo abusua mu nyinaa no nyɛ adwuma biako. Nanso, yɛyɛ biako, na obiara hia ne yɔnko.

19. Ɔkwan bɛn so na yebetumi anya Onyankopɔn honhom fam nsiesiei ahorow mu mfaso, na dɛn na onua panyin bi kae wɔ eyi ho?

¹⁹ Sɛnea nipadua hia aduan, ɔhwɛ, ne akwankyerɛ no, saa na yehia honhom fam nsiesiei a Onyankopɔn nam N’asɛm, ne honhom, ne n’ahyehyɛde so de ma yɛn no. Sɛnea ɛbɛyɛ na yɛanya saa nsiesiei yi mu mfaso no, ɛsɛ sɛ yɛyɛ Yehowa asase so abusua no mufo. Bere a onua bi de mfe pii ayɛ Onyankopɔn som adwuma no, ɔkyerɛwee sɛ: “Ɛyɛ me anigye pii sɛ matra ase fi bere a Yehowa atirimpɔw ho nimdeɛ a na ɛwɔ hɔ kan nna a edii 1914 anim pɛɛ no mu, bere a na nneɛma mu nna hɔ yiye no . . . de abesi nnɛ, bere a nokware no ahyerɛn te sɛ owigyinae awia no. Sɛ biribi wɔ hɔ a ɛho ahia me asen biara a, na ɛyɛ Yehowa ahyehyɛde a aniwa hu no a mɛkɔ so abata ho no. Osuahu a minyae wɔ me mmofraase no ma mihuu sɛnea mfaso nni so sɛ obi de ne ho bɛto nnipa ntease so. Bere a metee saa asɛm no ase no, misii me bo sɛ mɛbata nokware ahyehyɛde no ho. Ɔkwan bɛn bio na obi betumi afa so anya Yehowa anim dom ne ne nhyira?”

20. Dɛn na ɛsɛ sɛ yesi yɛn bo sɛ yɛbɛyɛ wɔ yɛn biakoyɛ ho sɛ́ Yehowa nkurɔfo?

²⁰ Yehowa afrɛ ne nkurɔfo afi wiase sum ne mpaapaemu mu. (1 Petro 2:9) Ɔde yɛn aba ɔno ne yɛn mfɛfo gyidifo biakoyɛ a anigye wom mu. Saa biakoyɛ yi bɛkɔ so wɔ nneɛma nhyehyɛe foforo a seesei abɛn yiye no mu. Enti, wɔ nna a edi akyiri yi mu no, momma yɛnkɔ so ‘nhyɛ ɔdɔ,’ na yɛnyɛ nea yebetumi biara mma yɛn biakoyɛ a emu yɛ den no nnya nkɔso, na ɛntra hɔ.​—Kolosefo 3:14.

Wubebua Dɛn?

◻ Dɛn nti na Onyankopɔn apɛdeyɛ ne nokware no ho a yɛbɛbata betumi aboa yɛn ma yɛakura biakoyɛ mu?

◻ Ɔkwan bɛn so na tɛkrɛma no a yɛde bedi dwuma ɔkwampa so no ne biakoyɛ wɔ abusuabɔ?

◻ Dɛn na bɔne a yɛde befiri no hwehwɛ?

◻ Ɔkwan bɛn so na yebetumi akura biakoyɛ mu bere a yɛresisi yɛn ankasa gyinae ahorow no?

◻ Dɛn nti na ɛsɛ sɛ yekura Kristofo biakoyɛ mu?

[Mfonini wɔ kratafa 16]

Sɛnea oguanhwɛfo yi boa ne nguan ano no, saa na Yehowa ma ne nkurɔfo yɛ biako

[Mfonini wɔ kratafa 18]

Sɛ yɛfom a, yɛnam ahobrɛase mu a yebefi apa kyɛw so ma biakoyɛ tra hɔ