‘Nyansa Ademude Nyinaa’

1-3. Afe 31 Y.B. no, Yesu maa ɔkasa bi wɔ osutɔbere mu. Ɛhe na ɔmaa kasa no, na dɛn na na ɛrekɔ so bere a ɔrema ɔkasa no? Adɛn nti na n’atiefo no ho dwiriw wɔn?

NÁ ƐYƐ osutɔbere wɔ afe 31 Y.B. Ná Yesu Kristo abɛn Kapernaum. Ɛyɛ kurow a na adagyew nni hɔ koraa a ɛda Galilea Po no atifi fam baabi. Ná Yesu nko ara akɔhyɛ bepɔw bi a ɛbɛn Kapernaum so abɔ mpae anadwo mũ no nyinaa. Bere a ade kyee no, ɔfrɛɛ n’asuafo no baa ne nkyɛn, na ɔpaw wɔn mu 12 frɛɛ wɔn asomafo. Saa bere no ara nso, na nnipadɔm a wɔn mu bi fi akyirikyiri adi Yesu akyi aba bepɔw no so, na wɔtenatenaa baabi a ɛhɔ trɛw. Ná wɔn ho pere wɔn sɛ wɔbetie nea Yesu wɔ ka, na wasa wɔn yare. Yesu nso amma wɔn nsa ansi fam; ɔyɛɛ wɔn apɛde maa wɔn.—Luka 6:12-19.

² Yesu baa nnipadɔm no nkyɛn, na ɔsaa wɔn a wɔyare nyinaa yare. Afei, bere a Yesu hui sɛ wɔn mu baako mpo nni hɔ a yare reteetee no no, ɔtenaa ase, na ofii ase kyerɛkyerɛɛ wɔn.a Nsɛm a ɔkaa saa da no, ɛbɛyɛ sɛ ɛmaa n’atiefo no ho dwiriw wɔn. Nokwasɛm ne sɛ, na wɔntee sɛ obi akyerɛkyerɛ sɛnea Yesu yɛe no da. Yudafo atetesɛm anaa wɔn akyerɛkyerɛfo no nsɛm a nnipa no nim no yiye no, wamfa anhyehyɛ ne nsɛm mu sɛnea ɛbɛyɛ a nkurɔfo ani begye ho. Mmom no, ɔfaa Hebri Kyerɛwnsɛm no mu nsɛm pii de kaa n’asɛm. Wamfa ne nsɛm no anwadawada, na na ɛnyɛ den sɛ wɔbɛte ase. Afei nso, na ne nsɛm no mu da hɔ. Bere a owiei no, nnipadɔm no ho dwiriw wɔn. Sɛ wɔn ho dwiriw wɔn a, na edi sa, efisɛ onipa a ɔkyerɛkyerɛɛ wɔn no, na ɔno ne onipa a onim nyansa sen biara a watena ase pɛn!—Mateo 7:28, 29.

³ Wɔakyerɛw ɔkasa a Yesu mae no, nsɛm afoforo a ɔkae, ne nneɛma a ɔyɛe no wɔ Onyankopɔn Asɛm mu. Nea Bible ka fa Yesu ho no, sɛ yɛbɔ mmɔden sua ho ade pii a, yebenya so mfaso pii, efisɛ ne mu na ‘nyansa ademude nyinaa’ wɔ. (Kolosefo 2:3) Saa nimdeɛ ne ntease a Yesu de dii dwuma wɔ ɔkwan a ɛfata so, anaa ne nyansa no, ɛhe na onya fii? Ɔkwan bɛn so na ɔdaa nyansa adi, na yɛbɛyɛ dɛn adi ne nhwɛso no akyi?

 4. Yesu atiefo a na wɔwɔ Nasaret no, asɛm bɛn na wɔbisae, na adɛn ntia?

⁴ Bere bi a na Yesu nam reka asɛm no, ɔkɔɔ Nasaret kurow a onyinii wom no mu, na ofii ase kyerɛkyerɛe wɔ hyiadan a ɛwɔ hɔ no mu. N’atiefo no pii ho dwiriw wɔn, na wɔbisae sɛ: “Ɛhe na onipa yi nyaa nyansa . . . yi” fii? Ná wɔnim abusua a ofi mu, kyerɛ sɛ, na wɔnim n’awofo ne ne nuanom. Afei nso, na wɔnim sɛ ofi ahiafo abusua mu, na na n’abusua no nnyee din biara. (Mateo 13:54-56; Marko 6:1-3) Akyinnye biara nni ho sɛ, na wɔnim nso sɛ, kapentani a n’ano atew yi ankɔ rabifo sukuu a agye din no bi. (Yohane 7:15) Enti sɛ wɔbisaa saa a, na wɔdi bisa.

 5. Yesu kaa sɛ ne nyansa no fi he?

⁵ Ɛnyɛ sɛ na bɔne nni Yesu ho nti na na onim nyansa saa. Akyiri yi, bere a na Yesu rekyerɛkyerɛ nkurɔfo wɔ asɔrefie hɔ no, ɔkaa sɛ ne nyansa no fi obi a ɔkorɔn paa hɔ. Ɔkaa sɛ: “Nea mekyerɛkyerɛ no nyɛ me dea, na mmom ɛyɛ nea ɔsomaa me no dea.” (Yohane 7:16) Nokwarem no, Agya a ɔsomaa Ɔba no ankasa na ɔmaa Yesu saa nyansa no. (Yohane 12:49) Ɛnde, ɔkwan bɛn na Yehowa faa so maa Yesu nyansa?

6, 7. Akwan bɛn so na Yesu nyaa nyansa fii n’Agya hɔ?

⁶ Ná Yehowa honhom kronkron no reyɛ adwuma wɔ Yesu koma ne n’adwene mu. Yesu a ɔne Mesia a wɔahyɛ ne ho bɔ no, bere a Yesaia rehyɛ ne ho nkɔm no ɔkaa sɛ: “Yehowa honhom bɛtena no so, nyansa ne ntease honhom, afotu ne tumi honhom, nimdeɛ ne Yehowa suro honhom.” (Yesaia 11:2) Yehowa honhom a na ɛwɔ Yesu so no, ɛno na ɛboaa no ma odwinnwen nneɛma ho na osisii gyinae pa. Ɛno nti, nyansa a Yesu de kasae na ɔde yɛɛ n’ade no, na wutumi hu sɛ ɛnyɛ ɔno ara dea, na mmom efi Yehowa.

⁷ Yehowa san faa ɔkwan soronko bi so maa Yesu nyansa. Sɛnea yehui wɔ Ti 2 no, bere tenten a Yesu de tenaa soro ansa na ɔreba asaase so sɛ onipa no, ɛma onyaa hokwan suasuaa sɛnea n’Agya yɛ n’ade no yiye paa. Ɔba no na ɔboaa Agya no ma wɔbɔɔ nneɛma a nkwa wom ne nea nkwa nnim nyinaa, enti bere a na ɔwɔ Agya no nkyɛn sɛ Onyankopɔn ‘dwumayɛni a onim adwuma paa’ no, ɛbɛyɛ sɛ nyansa a onyae de, ɛnyɛ asɛm ketewa. Ansa na Ɔba no refi soro aba asaase so sɛ onipa no, Kyerɛwnsɛm no frɛɛ no nyansa, na na saa din yi fata no. (Mmebusɛm 8:22-31; Kolosefo 1:15, 16) Yesu som adwuma nyinaa mu no, ɔde nyansa a onya fii n’Agya hɔ wɔ soro no yɛɛ adwuma.b (Yohane 8:26, 28, 38) Enti, nimdeɛ ne ntease a emu dɔ a Yesu daa no adi, ne nyansa a ɛso bi nni a ɔde dii dwuma wɔ biribiara a ɔyɛe mu no, ɛnsɛ sɛ ɛyɛ yɛn nwanwa.

 8. Yɛn a yɛyɛ Yesu akyidifo no, yɛbɛyɛ dɛn anya nyansa?

⁸ Esiane sɛ yɛyɛ Yesu akyidifo nti, ɛsɛ sɛ yɛn nso yɛhwehwɛ nyansa fi Yehowa hɔ. (Mmebusɛm 2:6) Ɛwom, Yehowa mfa anwanwakwan so mma yɛn nyansa. Nanso, mpae a yefi koma mu bɔ de hwehwɛ nyansa a yɛde begyina ɔhaw a yehyia wɔ asetena mu ano no, otie. (Yakobo 1:5) Sɛ yebetumi anya nyansa a ɛte saa a, ɛsɛ sɛ yɛbɔ yɛn ho mmɔden. Ɛsɛ sɛ yɛkɔ so hwehwɛ nyansa “sɛ biribi a ɛsom bo a wɔde asie.” (Mmebusɛm 2:1-6) Nea ɛte ne sɛ, Onyankopɔn Asɛm mu na yebehu ne nyansa, enti ɛsɛ sɛ yɛkɔ so dɔ n’Asɛm no mu asukɔ de hwehwɛ nyansa, na yɛde nea yesua no nso bɔ yɛn bra. Nhwɛso a Yehowa Ba no yɛe no betumi aboa yɛn paa ama yɛanya nyansa. Akwan a Yesu faa so daa nyansa adi no, momma yensusuw ho, na yɛnhwɛ sɛnea yebetumi asuasua no.

 9. Adɛn nti na na nyansa wɔ Yesu nkyerɛkyerɛ mu saa?

⁹ Nnipadɔm tu dii Yesu akyi sɛnea ɛbɛyɛ a wɔbetie ne nsɛm. (Marko 6:31-34; Luka 5:1-3) Ɛnyɛ nwanwa, efisɛ bere biara a Yesu buee n’ano no, nsɛm a nyansa wom paa na epue fii n’anom! Ne nkyerɛkyerɛ ma ɛdaa adi sɛ ɔwɔ Onyankopɔn Asɛm mu nimdeɛ a emu dɔ, na na otumi hu nsɛm mu yiye nso sen obiara. Ná obiara ani gye ne nkyerɛkyerɛ ho, na na ne nsɛm so wɔ mfaso bere nyinaa. Nsɛm a nyansa wom a Yesu, “Ɔfotufo Nwonwafo” a wɔhyɛɛ ne ho nkɔm no kae no, susuw bi ho hwɛ.—Yesaia 9:6.

10. Suban pa bɛn saa na Yesu hyɛ yɛn nkuran sɛ yennya, na adɛn ntia?

¹⁰ Ti yi mfiase no, yɛkaa Bepɔw So Asɛnka no ho asɛm. Ɛno nko ara ne Yesu nkyerɛkyerɛ ho kyerɛwtohɔ a ɛware paa na obiara nso anka biribi antwa mu; nea ɔkyerɛw saa asɛm no too hɔ no mpo ankyerɛw hwee anhyehyɛ mu. Bere a Yesu rema saa kasa no, wanka kɛkɛ sɛ yɛnka kasa pa na yɛmmɔ bra pa. Mmom, na n’afotu no kɔ akyiri sen saa. Ná Yesu nim sɛ, nneɛma a onipa dwinnwen ho ne sɛnea ɔte nka no betumi anya nsɛm a ɔka ne sɛnea ɔyɛ n’ade so nkɛntɛnso, enti ɔhyɛɛ yɛn nkuran sɛ, yemfi yɛn adwene ne yɛn koma mu nna suban pa te sɛ odwo adi. Ɔkaa nso sɛ ɛsɛ sɛ yɛhwehwɛ trenee, yɛda mmɔborɔhunu adi, yɛyɛ nnipa a wɔpɛ asomdwoe, na yɛda ɔdɔ adi kyerɛ afoforo. (Mateo 5:5-9, 43-48) Sɛ yɛbɔ mmɔden sɛ yebenya suban pa a ɛtete saa wɔ yɛn koma mu a, ɛbɛma nsɛm a yɛka ne ɔbra a yɛbɔ no ho aba nyam. Ɛba saa a yɛbɛsɔ Yehowa ani, na ɛbɛma yɛne yɛn nuanom nso ntam ayɛ papa.—Mateo 5:16.

11. Bere a Yesu de afotu rema wɔ nneyɛe bɔne ho no, dɛn na ɔkaa sɛ etumi kɔfa nneyɛe bɔne ba?

¹¹ Bere a Yesu de nneyɛe bɔne ho afotu rema no, ɔkyerɛɛ nea ɛkɔfa nneyɛe bɔne ba. Wanka kɛkɛ sɛ yɛntwe yɛn ho mfi basabasayɛ ho, na mmom ɔbɔɔ yɛn kɔkɔ sɛ ɛnsɛ sɛ yɛma yɛn bo fuw yɛn nua denneennen wɔ yɛn koma mu. (Mateo 5:21, 22; 1 Yohane 3:15) Wankasa antia awaresɛe kɛkɛ. Mmom ɔbɔɔ kɔkɔ sɛ, akɔnnɔ bɔne a obi benya wɔ ne koma mu no betumi ama wasɛe aware. Ɔkaa sɛ, ɛnsɛ sɛ yɛhwɛ nneɛma a ebetumi ama yɛanya akɔnnɔ bɔne. (Mateo 5:27-30) Ná Yesu nim sɛ hwirema na ɛtwetwe dwom, enti wantwe adwene ankɔ bɔne no so kɛkɛ. Mmom, ɔtwee adwene sii suban ne nneɛma a ɛtwetwe obi ma ɔyɛ bɔne no so titiriw.—Dwom 7:14.

12. Yesu akyidifo bu n’afotu sɛn, na adɛn ntia?

¹² Ná nyansa wɔ Yesu nsɛm no mu paa! Ɛno nti na “ɔkwan a ɔfaa so kyerɛkyerɛe no maa nnipadɔm no ho dwiriw wɔn” no. (Mateo 7:28) Yɛn a yɛyɛ Yesu akyidifo no, yehu Yesu afotu sɛ ɛyɛ afotu pa a ɛsɛ sɛ yɛde bɔ yɛn bra. Ɛsɛ sɛ yɛbɔ mmɔden sɛ yebenya suban pa te sɛ ayamhyehye, na yɛyɛ nnipa a wɔpɛ asomdwoe na wɔwɔ ɔdɔ sɛnea Yesu kaa sɛ yɛnyɛ no. Yenim sɛ, sɛ yɛyɛ saa a, ɛbɛma yɛayɛ nneɛma a Yehowa pɛ. Yetie Yesu, na yɛbɔ mmɔden yi adwene a ɛmfata biara fi yɛn tirim, na yeyi abufuw ne akɔnnɔ bɔne biara fi yɛn komam. Yenim sɛ, yetumi tu ase a, ɛremma yɛnyɛ nneɛma bɔne.—Yakobo 1:14, 15.

13, 14. Dɛn na ɛkyerɛ sɛ nyansa na Yesu de sisii gyinae wɔ n’abrabɔ mu?

¹³ Ɛnyɛ Yesu nsɛm nko ara na ɛma yehu sɛ na ɔwɔ nyansa paa, na mmom sɛnea ɔbɔɔ ne bra no nso ma yehu ne nyansa. Yesu daa nyansa soronko adi wɔ gyinae a osisii, sɛnea na ohu ne ho, sɛnea ɔyɛɛ afoforo, ne biribi foforo biara a ɔyɛe ho. Wo de, ma yɛnhwɛ adanse ahorow bi a ɛkyerɛ sɛ “nyansa ne adwempa” na Yesu de bɔɔ ne bra.—Mmebusɛm 3:21.

¹⁴ Sɛ obi nim nyansa a, ɔde adwene a emu da hɔ sisi gyinae pa. Gyinae ahorow a Yesu sisi faa n’abrabɔ ho no, ɔde adwene a emu da hɔ na esisii. Wo de dwen ho hwɛ. Ɛdɛn paa na Yesu pɛ a anka ɔrentumi nnya? Ɔdan kamakama? Adwuma a ɛkɔ yiye? Anaa dibea kɛse wɔ aban mu? Nanso na Yesu nim sɛ, sɛ obi di saa nneɛma no akyi wɔ abrabɔ mu a, ɛbɛma n’asetena ‘ayɛ ahuhude, na ayɛ ɔbrɛgu.’ (Ɔsɛnkafo 4:4; 5:10) Sɛ obi de si n’ani so sɛ kyinkyin ara a ɛsɛ sɛ onya saa nneɛma no bi wɔ abrabɔ mu a, ɛbɛkyerɛ sɛ onnim nyansa. Yesu anyɛ akɛsesɛm wɔ n’asetena mu. Wammɔ mmɔden sɛ obenya sika anaa ɔbɛboaboa ahonyade ano. (Mateo 8:20) Sɛnea ɔkyerɛɛ nkurɔfo sɛ wɔnyɛ no, ɔde n’adwene nyinaa sii ade baako so; ɛno ne sɛ na ɔbɛyɛ Onyankopɔn apɛde. (Mateo 6:22) Yesu de ne bere ne n’ahoɔden dii dwuma nyansam na ama Ahenni nneɛma anya nkɔso, efisɛ na onim sɛ mfaso wɔ ɛno so sen honam fam nneɛma. (Mateo 6:19-21) Nea Yesu yɛe no yɛ nhwɛso a ɛsɛ sɛ yesuasua.

15. Yesu akyidifo bɛyɛ dɛn akyerɛ sɛ wɔde Onyankopɔn Ahenni di kan wɔ wɔn asetena mu? Adɛn nti na nyansa wom sɛ wɔbɛyɛ saa?

¹⁵ Nnipa a wɔdi Yesu akyi nnɛ no ahu sɛ nyansa wom sɛ wɔde Onyankopɔn Ahenni no bedi kan wɔ wɔn asetena mu. Enti wɔbɔ mmɔden sɛ wɔrensoa ɛka ngu wɔn ho so, na wɔrenni nneɛma hunu akyi mfa nsɛe wɔn adaagye ne wɔn ahoɔden. (1 Timoteo 6:9, 10) Nnipa pii abɔ mmɔden sɛ wɔremma wɔn asetena nyɛ kyenkyenenn sɛnea ɛbɛyɛ a wɔbenya bere pii de ayɛ asɛnka adwuma no, na ebinom mpo de wɔn bere nyinaa ka Ahenni ho asɛmpa no. Ade foforo biara nni hɔ a sɛ obi yɛ a nyansa wom sen saa, efisɛ Ahenni no a obi de bedi kan wɔ n’asetena mu no bɛma wanya anigye ne akomatɔyam pii.—Mateo 6:33.

16, 17. (a) Akwan bɛn so na Yesu kyerɛe sɛ ɔbrɛ ne ho ase, na onim nea obetumi ayɛ ne nea ontumi nyɛ? (b) Yɛbɛyɛ dɛn akyerɛ sɛ yɛbrɛ yɛn ho ase na yenim nea yɛn ahoɔden betumi ama yɛayɛ?

¹⁶ Bible de ahobrɛase bata nyansa ho. Sɛ yɛwɔ ahobrɛase nso a, yɛrenyɛ nea ɛboro yɛn ahoɔden so. (Mmebusɛm 11:2) Ná Yesu brɛ ne ho ase, enti na onim nea obetumi ayɛ ne nea ontumi nyɛ. Ná onim sɛ ɛnyɛ wɔn a wɔbɛte n’asɛm no nyinaa na obetumi ama wɔabɛyɛ n’akyidifo. (Mateo 10:32-39) Afei nso, ohui sɛ ɛnyɛ nnipa nyinaa na na ɔno ankasa betumi aka asɛm no akyerɛ wɔn. Enti ɔdaa nyansa adi, na ɔde asuafoyɛ adwuma no hyɛɛ n’akyidifo nsa. (Mateo 28:18-20) Ɔdaa ahobrɛase nso adi, enti ogye toom sɛ ‘wɔbɛyɛ nnwuma akɛse asen’ nea ɔyɛe no, efisɛ na wɔbetumi ne nnipa pii akasa wɔ mmeae pii asen no, na na wɔbɛyɛ adwuma no nso akyɛ asen no. (Yohane 14:12) Afei nso, Yesu hui sɛ na ɔno nso hia mmoa. Bere a na ɔwɔ sare so a abɔfo ba bɛsom no no, wampo. Saa ara nso na bere a ɔwɔ Getsemane a ɔbɔfo bi bɛhyɛɛ no den no, wampo. Bere a Onyankopɔn Ba no kɔɔ ahokyere a emu yɛ den paa mu no, ɔteɛɛm hwehwɛɛ mmoa.—Mateo 4:11; Luka 22:43; Hebrifo 5:7.

¹⁷ Ɛsɛ sɛ yɛn nso yefi ahobrɛase mu hu nea yɛn ahoɔden bɛma yɛatumi ayɛ. Akyinnye biara nni ho sɛ, yɛpɛ sɛ yefi yɛn kra nyinaa mu de nsi ne ahokeka yɛ asɛnka ne asuafoyɛ adwuma no. (Luka 13:24; Kolosefo 3:23) Nanso, ɛsɛ sɛ yɛkae sɛ Yehowa mfa yɛn ntoto afoforo ho, enti yɛn nso, ɛnsɛ sɛ yɛde yɛn ho toto afoforo ho. (Galatifo 6:4) Nyansa bɛboa yɛn, na sɛ yɛde botae resi yɛn ani so a, ayɛ botae a yɛn ahoɔden bɛma yɛatumi adu ho. Bio nso, nyansa bɛboa wɔn a asɛde hyehyɛ wɔn nsa wɔ asafo no mu ama wɔahu sɛ ɛnyɛ biribiara na wɔbetumi ayɛ, na ɛwom ara a, wɔbehia afoforo mmoa. Ahobrɛase bɛboa wɔn ama wɔakyerɛ mmoa a ɛte saa no ho anisɔ, na wɔahu sɛ Yehowa betumi afa wɔn nuanom gyidifo no mu bi so ‘akyekye wɔn werɛ paa.’—Kolosefo 4:11.

18, 19. (a) Dɛn na ɛma yehu sɛ na Yesu dwen n’asuafo no ho, na na ɔte wɔn ase? (b) Adɛn nti na ɛsɛ sɛ yenya afoforo ho adwempa na yɛte wɔn ase, na yɛbɛyɛ dɛn ayɛ saa?

¹⁸ Yakobo 3:17 ka sɛ, “nyansa a efi soro no de, . . . ɛte asɛm ase.” Ná Yesu dwen n’asuafo no ho, na na ɔte wɔn ase. Ná onim wɔn mmerɛwyɛ, nanso ɔde n’adwene sii nneɛma pa a na wɔtumi yɛ no so. (Yohane 1:47) Anadwo a wɔrebɛkyere no no, na onim sɛ wɔbeguan agyaw no, nanso ɔkɔɔ so nyaa wɔn mu ahotoso. (Mateo 26:31-35; Luka 22:28-30) Petro poo Yesu mprɛnsa sɛ onnim no koraa. Nanso, Yesu bɔɔ mpae maa Petro na ɔma ohui sɛ ɔda so ara wɔ ne mu ahotoso sɛ obedi nokware. (Luka 22:31-34) Bere a Yesu rebɔ n’Agya mpae anadwo a na wɔrebekum no no, wamfa n’adwene ansi n’asuafo no mfomso so. Mmom no, ɔkaa nneɛma a na wɔayɛ abesi saa bere no ho asɛmpa. Ɔkaa sɛ: “Wɔatie w’asɛm.” (Yohane 17:6) Ɛmfa ho sɛ na bɔne wɔ wɔn ho no, ɔde Ahenni ho asɛmpaka ne asuafoyɛ adwuma no hyɛɛ wɔn nsa. (Mateo 28:19, 20) Akyinnye biara nni ho sɛ, ahotoso ne gyidi a ɔdaa no adi wɔ wɔn mu no hyɛɛ wɔn den ma wɔtumi yɛɛ adwuma a ɔkaa sɛ wɔnyɛ no.

¹⁹ Nea Yesu yɛe no, ɛsɛ sɛ n’akyidifo suasua no. Sɛ Onyankopɔn Ba a bɔne nni ne ho no mpo nyaa abotare maa n’asuafo a bɔne wɔ wɔn ho no a, ɛnde ɛsɛ sɛ yɛn a bɔne wɔ yɛn ho no nya afoforo ho abotare koraa sen nea Yesu yɛe no! (Filipifo 4:5) Sɛ́ anka yɛde yɛn adwene besi yɛn nuanom Kristofo mfomso so no, ɛsɛ sɛ yɛhwɛ nneɛma pa a wɔtumi yɛ no mmom. Ɛsɛ sɛ yɛma ɛtena yɛn adwene mu sɛ Yehowa na atwe wɔn aba ne nkyɛn. (Yohane 6:44) Sɛ saa a, ɛnde akyinnye biara nni ho sɛ, Yehowa hu adepa bi wɔ wɔn ho, na saa ara na ɛsɛ sɛ yɛn nso yehu. Sɛ yenya afoforo ho adwempa a, ɛbɛboa yɛn ama ‘yɛabu yɛn ani agu wɔn mfomso so,’ na yɛahwehwɛ nneɛma a yebetumi akamfo wɔn wɔ ho. (Mmebusɛm 19:11) Sɛ yenya yɛn nuanom Kristofo mu ahotoso a, ɛbɛboa wɔn ama wɔafi wɔn koma nyinaa mu asom Yehowa, na wɔanya anigye wɔ ne som mu.—1 Tesalonikafo 5:11.

20. Nyansa ademude a ɛsom bo a ɛwɔ Nsɛmpa no mu no, dɛn na ɛsɛ sɛ yɛde yɛ, na adɛn ntia?

²⁰ Yesu asetena ne ne som adwuma ho kyerɛwtohɔ a ɛwɔ Nsɛmpa no mu no yɛ nyansa ademude a ɛsom bo paa! Dɛn na ɛsɛ sɛ yɛde akyɛde a ɛsom bo yi yɛ? Bere a na Yesu de ne Bepɔw So Asɛnka no reba awiei no, ɔhyɛɛ n’atiefo no nkuran sɛ, nsɛm a nyansa wom a wɔate no, wɔmfa nyɛ adwuma, anaa wɔnni so, mma wɔnntie no kɛkɛ. (Mateo 7:24-27) Sɛnea Yesu de nyansa yɛɛ n’ade, ne nsɛm a nyansa wom a ɔkae no, sɛ yɛma enya yɛn adwene so nkɛntɛnso, na yɛma ɛka sɛnea yɛte nka ne sɛnea yɛbɔ yɛn bra a, ɛbɛma yɛakɔ so anantew ɔkwan a ɛkɔ daa nkwa mu no so. (Mateo 7:13, 14) Dɛn paa na ɛso wɔ mfaso sen wei?