Yesu Te Sɛn?

Bere a Yesu baa asaase so no, nsɛm a ɔkae ne nneɛma a ɔyɛe no, sɛ yesua ho ade a, ɛbɛma yɛahu sɛ ɔwɔ suban pa pii. Afei, ɛbɛma yɛn ani abegye ho sɛ yɛbɛfa ɔne n’Agya Yehowa adamfo. Ne suban ahorow a ɛyɛ fɛ no, ebi ne dɛn? Afei nso, yɛbɛyɛ dɛn asuasua sɛnea Yesu bɔɔ ne bra no?

1. Sɛ yɛka sɛ Yesu te sɛ n’Agya a, ɛkyerɛ sɛn?

Yesu ne n’Agya atena soro mfe mpempem pii, enti na n’ani tua biribiara a n’Agya yɛ, na osuaa nneɛma pii fii ne hɔ. Wei nti, odwen te sɛ n’Agya, na sɛnea n’Agya yɛ n’ade no, saa ara na ɔno nso yɛ n’ade. Afei nso, sɛnea n’Agya te nka wɔ nneɛma ho no, saa ara na ɔno nso te nka. (Kenkan Yohane 5:19.) Yesu yɛ n’ade te sɛ n’Agya pɛpɛɛpɛ. Wei nti, ɔkaa sɛ: “Obiara a wahu me no ahu Agya no nso.” (Yohane 14:9) Enti sɛ wuhu sɛnea Yesu te ankasa a, ɛbɛboa wo ama woahu Yehowa yiye. Sɛ yɛbɛyɛ nhwɛso a, sɛnea na Yesu dwen nkurɔfo ho no kyerɛ sɛ Yehowa nso dwen wo ho.

2. Dɛn na Yesu yɛe a ɛkyerɛ sɛ ɔdɔ Yehowa?

Yesu kaa sɛ: “Nea ɛbɛyɛ na wiase no ahu sɛ medɔ Agya no, nea Agya no ahyɛ me sɛ menyɛ no, ɛno ara na mereyɛ.” (Yohane 14:31) Bere a Yesu baa asaase so no, ɔyɛɛ aso tiee n’Agya de kyerɛe sɛ ɔdɔ no paa; sɛ ɛyɛ den sɛ dɛn mpo a, na otie no. Ná Yesu ani gye ho sɛ ɔbɛka n’Agya ho asɛm akyerɛ afoforo na waboa wɔn ma wɔne no afa adamfo.—Yohane 14:23.

3. Dɛn na Yesu ayɛ de akyerɛ sɛ ɔdɔ nnipa?

Bible ka sɛ na ‘nnipa mma da Yesu koma so.’ (Mmebusɛm 8:31) Dɛn na ɔyɛ de kyerɛe sɛ ɔdɔ nnipa? Oyii ne yam boaa nkurɔfo na ɔkaa nkuranhyɛsɛm kyerɛɛ wɔn. Anwonwade ahorow a ɔyɛe no ma yehu sɛ ɔwɔ tumi. Nanso ɛno da nkyɛn a, ɛsan ma yehu sɛ na ɔwɔ mmɔborɔhunu. (Marko 1:40-42) Ɔne obiara dii no yiye, na na onyiyi nnipa mu. Nnipa a wɔwɔ koma pa a wotiee ne nkyerɛkyerɛ no, ɛma wonyaa awerɛkyekye ne anidaso. Ɔdɔ a ɔwɔ ma nnipa nyinaa nti, ohuu amane, na owu maa yɛn. Nanso, wɔn a wɔde ne nkyerɛkyerɛ yɛ adwuma no de, ɔdɔ wɔn paa.—Kenkan Yohane 15:13, 14.

SUA PII KA HO

4. Yesu dɔ n’Agya

Sɛ yɛhwɛ sɛnea Yesu yɛɛ n’ade a, ɛbɛma yɛahu nea yɛyɛ a ɛbɛkyerɛ sɛ yɛdɔ Onyankopɔn. Monkenkan Luka 6:12 ne Yohane 15:10; 17:26. Mokenkan kyerɛwsɛm biara wie a, munsusuw asɛmmisa yi ho:

• Dɛn na Yesu yɛ de kyerɛe sɛ ɔdɔ Yehowa? Yɛbɛyɛ dɛn asuasua no?

6. Yesu yam ye

Ná Yesu nni ahode pii, nanso na ne yam ye. Otuu yɛn fo sɛ yɛnyɛ nkurɔfo adɔe. Kenkan Asomafo Nnwuma 20:35. Muwie a munsusuw asɛmmisa yi ho:

• Yesu se sɛ yɛn ani begye a, dɛn na ɛsɛ sɛ yɛyɛ?

Hwɛ VIDEO yi. Muwie a munsusuw asɛmmisa yi ho.

VIDEO: “Ɔma Mu Wɔ Anigye Pii” —Ne Fã Bi (4:00)

• Sɛ yɛn nsam nni bi mpo a, nneɛma bɛn na yebetumi ayɛ de ayɛ nkurɔfo papa?

Wunim biribi?

Bible no ma yehu sɛ, sɛ yɛrebɔ Yehowa mpae a, ɛsɛ sɛ yɛbɔ wɔ Yesu din mu. (Kenkan Yohane 16:23, 24.) Sɛ yɛbɔ mpae wɔ saa kwan no so a, ɛkyerɛ sɛ nea Yesu ayɛ ama yɛn sɛnea ɛbɛyɛ a yebetumi ne Onyankopɔn afa adamfo no, yɛn ani sɔ.

NEA YƐASUA

Yesu dɔ Yehowa, na ɔsan dɔ nnipa. Suban a Yehowa wɔ no, ɛno ara bi na Yesu wɔ. Enti sɛ yehu Yesu yiye a, ɛbɛma yɛahu Yehowa nso yiye.

Ntimu

• Dɛn na yɛyɛ a ɛbɛkyerɛ sɛ yɛdɔ Yehowa sɛnea Yesu dɔ no no?

• Dɛn na yɛyɛ a ɛbɛkyerɛ sɛ yɛdɔ nnipa sɛnea Yesu dɔ nnipa no?

• Yesu suban bɛn na w’ani gye ho paa?

YƐ NHWEHWƐMU

Kenkan saa asɛm yi, na wubehu Yesu suban ahorow a yebetumi asuasua no bi.

“Suasua Yesu Na . . .” (Yesu Ne Ɛkwan no, Nokorɛ no ne Nkwa, kratafa 317)

Hwɛ nea enti a ehia sɛ yɛbɔ mpae wɔ Yesu din mu.

“Dɛn Nti Na Ɛsɛ Sɛ Yɛbɔ Mpae Wɔ Yesu Din Mu?” (Ɔwɛn-Aban, February 1, 2008)

Bible no kyerɛ sɛnea na Yesu nipadua te anaa?

“Ná Yesu Te Sɛn?” (Ɛwɔ jw.org)

Sɛnea Yesu dii mmea ni no, dɛn na yebetumi asua afi mu?

“Onyankopɔn Dwen Wɔn Ho, Ɔwɔ Obu ne Nidi Ma Wɔn” (Ɔwɛn-Aban, September 1, 2012)